Ná kuniñúʼuyó ley Ndióxi̱ xíʼin tu̱ʼun ña̱ táxi yichi̱ nu̱úyó ña̱ vií ná koo ña̱ xínitúni̱yó

1. ¿Nda̱chun ndáyáʼvikayó nu̱ú tí kití?

JEHOVÁ ta̱xira ña̱ xínitúni̱yó ndaʼa̱yó xa̱ʼa ña̱yóʼo ndáyáʼvikayó nu̱ú tí kití. Ta̱ Adán xíʼin ñá Eva ni̱xi̱yo ña̱ xínitúni̱na. ¿Nda̱chun xíni̱yó ña̱yóʼo? Saáchi tá i̱xaso̱ʼona ley Ndióxi̱ chi̱se̱ʼéna miína. Ña̱yóʼo kúni̱ kachi ña̱ ku̱nda̱a̱va-inina ña̱ va̱ása va̱ʼa ña̱ ke̱ʼéna.

2. ¿Nda̱saa kítáʼan ña̱ xínitúni̱yó xíʼin iin volante? (Koto na̱ʼná ña̱ va̱xi chí xa̱ʼa).

² Ña̱ xínitúni̱yó níʼiña yichi̱ nu̱úyó chi káʼa̱nña xíʼinyó ndáaña va̱ʼa keʼéyó ta ndáaña va̱ása va̱ʼa keʼéyó. Ta kivi chitáʼanyóña xíʼin iin volante ña̱ xíniñúʼuna ña̱ kávana iin barco. Na̱ yiví na̱ kǒo íyo va̱ʼa ña̱ xíni̱túni̱ íyona táki̱ʼva íyo iin barco tú va̱ása va̱ʼa volante. Ta i̱yoní ña̱ ku̱ʼu̱nna xíʼin túyóʼo chi tá ná kixi ta̱chí á ná kanda̱ní ti̱kui̱í nu̱ú mar inka nu̱ú ku̱ʼu̱nva tú barco yóʼo. Soo tú barco tú kúúmií volante ña̱ va̱ʼa, va̱ʼava kavananú ña̱ ku̱ʼu̱nnú nu̱ú xíniñúʼu ku̱ʼu̱nnú. Saátu íyo ña̱ xínitúni̱yó tá vií ná sánáʼa̱yóña kivi kuniʼi viíña yichi̱ nu̱úyó, tá va̱ása va̱ʼa íyoña kivi chika̱a̱ña miíyó tu̱ndóʼo.

3. ¿Ndáaña kivi kéʼéyó tá va̱ása va̱ʼa íyo ña̱ xínitúni̱yó?

³ Tá va̱ása va̱ʼa íyo ña̱ xínitúni̱yó va̱ása ka̱ʼa̱nña xíʼinyó xa̱ʼa ña̱ʼa ña̱ va̱ása va̱ʼa ta ni kǒo ka̱ʼa̱nña xíʼinyó ña̱ kǒo keʼéyóña (1 Tim. 4:1, 2). Nda̱a̱ kivi sáxi̱nuña-iniyó ña̱ ndakanixi̱níyó ña̱ʼa ña̱ va̱ása va̱ʼa, ña̱ va̱ʼava kúúña (Is. 5:20). Ta̱ Jesús ni̱ka̱ʼa̱nra xíʼin na̱ discípulora: “Nda̱a̱ va̱xi tiempo ta na̱ kaʼní ndóʼó ndakanixi̱nína ña̱ kéʼéna ña̱ va̱ʼa nu̱ú Ndióxi̱” (Juan 16:2). Ña̱yóʼo kúú ña̱ xi̱ndakanixi̱ní na̱ xa̱ʼní ta̱ discípulo Esteban ta saátu ndákanixi̱ní na̱ kéʼé táki̱ʼva ke̱ʼé na̱yóʼo (Hech. 6:8, 12; 7:54-60). Na̱ kándíxaní ña̱ káʼa̱n na̱ veʼe-ñu̱ʼuna kéʼéna ku̱a̱ʼání ña̱ kini ta káʼa̱nna ña̱ ndásakáʼnuna Ndióxi̱ soo na̱ yáʼandosóva kúúna ña̱ káʼa̱nra (Éx. 20:13). Ña̱ xínitúni̱na sándáʼviña miína.

4. ¿Ndáaña kivi kéʼéyó tasaá va̱ása sandáʼvi ña̱ xínitúni̱yó miíyó?

⁴ ¿Ndáaña keʼéyó ña̱ va̱ʼa ná kǒo sandáʼvi ña̱ xínitúni̱yó miíyó? Ley Ndióxi̱ xíʼin tu̱ʼun ña̱ táxi yichi̱ nu̱úyó ña̱ va̱xi nu̱ú Biblia kivi chindeéña miíyó chi “va̱ʼaní sánáʼa̱ña, ta chíka̱a̱ña miíyó yichi̱ nda̱kú tasaá násamaña miíyó xíʼin ña̱ kéʼéyó” (2 Tim. 3:16). Ña̱ va̱ʼa sánáʼa̱ viíyó ña̱ xínitúni̱yó ña̱ ná kooña táki̱ʼva ndákanixi̱ní Ndióxi̱ xíniñúʼu kaʼviníyó Biblia, ndákanixi̱níyó xa̱ʼa ña̱ káʼviyó ta keʼéyó ña̱ sákuaʼayó. Ná kotoyó ndáa ki̱ʼva chindeé ley Ndióxi̱ miíyó xíʼin tu̱ʼun ña̱ táxi yichi̱ nu̱úyó ña̱ va̱ʼa sánáʼa̱ viíyó ña̱ xínitúni̱yó.

NÁ KUNIÑÚʼUYÓ LEY NDIÓXI̱ ÑA̱ VA̱ʼA SAKUAʼAYÓ KUNIÑÚʼU VIÍYÓ ÑA̱ XÍNITÚNI̱YÓ

5, 6. ¿Ndáaña va̱ʼa ndákiʼinyó tá kéʼéyó ña̱ káʼa̱n ley Ndióxi̱?

⁵ Ña̱ va̱ʼa ndakiʼinyó ku̱a̱ʼá ña̱ va̱ʼa xa̱ʼa ña̱ kundiku̱nyó ña̱ káʼa̱n ley Ndióxi̱ su̱ví kuití kaʼviyó á kuxini̱yóña. Chi xíniñúʼu kuʼvi̱-iniyó kuniyóña ta ixato̱ʼóyóña. Tu̱ʼun Ndióxi̱ káchiña: “Sa̱a̱-inindó kunindó ña̱ va̱ása va̱ʼa ta kuʼvi̱-inindó kunindó ña̱ va̱ʼa” (Amós 5:15). Iin ña̱ chindeé táʼan xíʼinyó kúú ña̱ ndakanixi̱níyó táki̱ʼva ndákanixi̱ní Jehová. Ná ka̱ʼa̱nyó xa̱ʼa iin ejemplo, xa̱a̱ ku̱a̱ʼá tiempo kǒo kísi̱ va̱ʼayó, soo ta̱ doctor káʼa̱nra xíʼinyó ña̱ xíniñúʼu kuxu va̱ʼayó, keʼéyó ejercicio ta nasamayó sava ña̱ kéʼéyó. Tá xítoyó ña̱ va̱ʼaní kúniyó xa̱ʼa ña̱ kéʼéyó ndiʼi ña̱ káʼa̱nra xíʼinyó, kundayáʼviníva ta̱ doctor yóʼo nu̱úyó saátu consejo ña̱ táxira ndaʼa̱yó.

⁶ Saátu íyo ña̱yóʼo, yiváyó Jehová ta̱xira ley ndaʼa̱yó ña̱ va̱ʼa kundaaña miíyó ña̱ kǒo ndakavayó ndaʼa̱ ku̱a̱chi tasaá si̱íka kundooyó. Ná ndakanixi̱níyó xa̱ʼa ña̱ va̱ʼa ndákiʼinyó tá xíniso̱ʼoyó ña̱ káʼa̱n Biblia xa̱ʼa na̱ káʼa̱n tu̱ʼun vatá, na̱ sándáʼvi táʼan, na̱ íxakuíʼna, na̱ kéʼé ña̱ kini, na̱ kánitáʼan saátu na̱ kéʼé ña̱ tási (kaʼvi Proverbios 6:16-19;a Rev. 21:8). Tá xítoyó ndiʼi ña̱ va̱ʼa ndákiʼinyó xa̱ʼa ña̱ xíniso̱ʼoyó ña̱ káʼa̱n Jehová, saá kíxaʼá kúʼvi̱ka-iniyó xíniyóra xíʼin ña̱ káʼa̱nra.

7. ¿Ndáaña kivi sakuaʼayó tá ná kaʼviyó xa̱ʼa ña̱ ke̱ʼé na̱ xi̱ndoo xi̱naʼá?

⁷ Va̱ása xíniñúʼu ya̱ʼayó nu̱ú iin tu̱ndóʼo ña̱ va̱ʼa sakuaʼayó xíʼinña. Kivi sakuaʼayó xíʼin ña̱yóʼo tá ná kaʼviyó nu̱ú Biblia xa̱ʼa na̱ ni̱ki̱ʼvi ku̱a̱chi ta ndáa tu̱ndóʼo ki̱xi nu̱úna ta ná ndakanixi̱níyó xa̱ʼana. Proverbios 1:5 káchiña: “Na̱ ndíchi kúú na̱ xíniso̱ʼo ta sákuaʼakana”. Ndióxi̱ táxi consejo yóʼo ndaʼa̱yó ta ndáyáʼviníña. Ná ndakanixi̱níyó xa̱ʼa nda̱saa ni̱xo̱ʼvi̱ ta̱ rey David tá ni̱ya̱ʼandosóra ña̱ ni̱ka̱ʼa̱n Ndióxi̱ xíʼinra ta ni̱ki̱ʼvira ku̱a̱chi xíʼin ñá Bat-seba (2 Sam. 12:7-14). Tá káʼviyó xa̱ʼa ta̱yóʼo, kivi ndakanixi̱níyó xa̱ʼa ña̱yóʼo: “¿Ndáaña xi̱niñúʼu keʼé ta̱ David ta saá kǒo kundoʼora ndiʼi tu̱ndóʼo ña̱ ni̱ya̱ʼara nu̱ú? Tá miíi̱ níya̱ʼa nu̱ú ña̱kán ¿ndáaña keʼíi̱? ¿Á kunui̱ táki̱ʼva ke̱ʼé ta̱ José á ndakavai̱ nu̱ú ku̱a̱chi táki̱ʼva ke̱ʼé ta̱ David?” (Gén. 39:11-15). Tá ná ndakanixi̱níyó xa̱ʼa ndiʼi tu̱ndóʼo ña̱ kixi nu̱úyó saá xa̱a̱yó kundasíyó ña̱ va̱ása va̱ʼa.

8, 9. a) ¿Nda̱saa chíndeé ña̱ xínitúni̱yó miíyó? b) ¿Nda̱saa chíndeé táʼan tu̱ʼun ña̱ táxi yichi̱ nu̱úyó xíʼin ña̱ xínitúni̱yó?

⁸ Ndiʼivayó chíka̱a̱ ndée ña̱ kǒo keʼéyó ña̱ʼa ña̱ va̱ása kútóo Ndióxi̱. Soo sava yichi̱ íyo ña̱ʼa ña̱ kǒo káʼa̱n káxi Biblia xa̱ʼa á va̱ʼa keʼéyóña á va̱ása va̱ʼa keʼéyóña. ¿Nda̱saa va̱ʼa kunda̱a̱-iniyó ndáaña kúni̱ Jehová keʼéyó? Tá xa̱a̱ sa̱náʼa̱ viíyó ña̱ xínitúni̱yó xíʼin ña̱ Biblia, ña̱yóʼo kivi chindeéña miíyó ña̱ ndaka̱xin viíyó ña̱ keʼéyó.

⁹ Jehová kúni̱níra xínira miíyó, ña̱kán táxira tu̱ʼun ña̱ táxi yichi̱ nu̱úyó ña̱ va̱ʼa kuniʼi ña̱yóʼo yichi̱ nu̱ú ña̱ xínitúni̱yó. Miíra káʼa̱n ña̱yóʼo: “Yi̱ʼi̱, Jehová, kúú Ndióxi̱ miíún, yi̱ʼi̱ kúú ta̱ sánáʼa̱ yóʼó xa̱ʼa ña̱ va̱ʼa miíún, yi̱ʼi̱ kúú ta̱ káʼa̱n xíʼún ndáa yichi̱ xíniñúʼu ku̱ʼún” (Is. 48:17, 18). Tá ndákanixi̱níyó xa̱ʼa tu̱ʼun ña̱ táxi yichi̱ nu̱úyó ña̱ va̱xi nu̱ú Biblia ña̱yóʼo xáa̱ña níma̱yó, ta chíndeéña ña̱ xínitúni̱yó ña̱ sakuaʼaña keʼé viíña chiñu.

NÁ KUNIÑÚʼUYÓ TU̱ʼUN ÑA̱ TÁXI YICHI̱ NU̱ÚYÓ ÑA̱ SANÁʼA̱YÓ ÑA̱ XÍNITÚNI̱YÓ

10. a) ¿Nda̱saa chíndeé tu̱ʼun ña̱ táxi yichi̱ nu̱úyó miíyó? b) ¿Nda̱saa xi̱niñúʼu ta̱ Jesús tu̱ʼun ña̱ táxi yichi̱ nu̱úyó?

¹⁰ Tu̱ʼun ña̱ táxi yichi̱ nu̱úyó yóʼo chíndeéña miíyó ña̱ vií ndakanixi̱níyó ta vií koo chiñu keʼéyó. Tá ná kunda̱a̱ va̱ʼa iniyó xa̱ʼa tu̱ʼun ña̱ táxi yichi̱ nu̱úyó kunda̱a̱-iniyó ndáa ki̱ʼva ndákanixi̱ní Jehová ta nda̱chun ta̱xira sava ley ndaʼa̱yó. Ta̱ Jesús sa̱náʼa̱ra na̱ discípulo tu̱ʼun ña̱ ta̱xi yichi̱ nu̱úna ña̱ chindeé táʼan xíʼinna tasaá kunda̱a̱-inina ndáa tu̱ndóʼo kixi nu̱úna tá ná keʼéna ña̱ va̱ása va̱ʼa. Ni̱ka̱ʼa̱nra xíʼinna, na̱ kǒo nándosó xa̱ʼa ña̱ʼa ña̱ kéʼéna xíʼinna kivi xa̱a̱na kanitáʼanna saátu tá ná ndakanixi̱nína xa̱ʼa ña̱ kini nda̱a̱ kivi xa̱a̱na kéʼénaña (Mat. 5:21, 22, 27, 28). Tá ná kandíxayó tu̱ʼun ña̱ táxi yichi̱ nu̱úyó va̱ʼaníva koo ña̱ xínitúni̱yó tasaá ndasakáʼnuyó Ndióxi̱ xíʼin ña̱ kéʼéyó (1 Cor. 10:31).

11. ¿Á inkáchi ndákanixi̱ní ndiʼiyó?

¹¹ ¿Á inkáchi koo ndiʼi ña̱ ndaka̱xinyó keʼéyó? Su̱ví inkáchi kooña. Ná ka̱ʼa̱nyó xa̱ʼa u̱vi̱ na̱ káʼvi tu̱ʼun Ndióxi̱ sana xa̱a̱ síín síínña ndaka̱xin iin iinna keʼéna. Ná káʼa̱nyó xa̱ʼa ndixi. Nu̱ú Biblia va̱ása káʼa̱nña ña̱ kǒo kivi koʼoyó ndixi soo káchiña ña̱ va̱ása va̱ʼa koʼo viʼíníyórá (Prov. 20:1; 1 Tim. 3:8). Soo tá ná ndaka̱xinyó á koʼoyó ndixi á va̱ása koʼoyórá xíniñúʼu ndakanixi̱níyó ¿á iinlá kuití xa̱ʼa nda̱saa ki̱ʼva ndixi koʼi̱ kúú ña̱ xíniñúʼu ndakanixi̱níi̱ xa̱ʼa? Su̱ví xa̱ʼa iinlá ña̱yóʼo. Ña̱ va̱ʼa koo ña̱ xínitúni̱yó xíniñúʼu kiʼinyó kuenta xa̱ʼa ña̱ ndákanixi̱ní inka na̱ hermano.

12. ¿Nda̱chun xíniñúʼu ndakanixi̱níyó xa̱ʼa ña̱ káʼa̱n Romanos 14:21?

¹² Ta̱ Pablo ni̱ka̱ʼa̱nra xa̱ʼa na̱ káʼvi tu̱ʼun Ndióxi̱ ña̱ xíniñúʼu kiʼinna kuenta xíʼin ña̱ xínitúni̱ inkana. Ka̱chira: “Va̱ʼaníka tá ná kǒo kuxún ku̱ñu ni kǒo koʼún ndixi, ni va̱ása keʼún ni iin ña̱ʼa ña̱ kivi sandákava inkana” (Rom. 14:21). Tá iin na̱ hermano kǒo kúni̱na koʼona, ni kúni̱yó koʼoyó ¿á sandákooyó keʼéyó ña̱yóʼo ña̱ kǒo sandákavayó-inina? Sandákoovayóña. Íyo sava na̱ hermano tá kúma̱níka nduuna testigo Jehová xi̱xiʼinína soo vitin ni loʼo va̱ása kúni̱na koʼona. Ña̱kán miíyó kǒo kúni̱yó tuku ndakava na̱yóʼo ta kixaʼána koʼona ta xo̱ʼvi̱na xa̱ʼa ña̱yóʼo (1 Cor. 6:9, 10). Tá táxiyó ndixi ña̱ koʼo na̱yóʼo ta kǒo kúni̱na koʼona va̱ása ixandúxayó xíʼinna. Chi tá ná ixandúxayó xíʼinna na̱ʼa̱yó ña̱ kǒo kúʼvi̱-iniyó xíniyóna.

13. ¿Ndáaña ke̱ʼé ta̱ Timoteo ña̱ va̱ʼa sanáʼa̱ra na̱ yiví xa̱ʼa Ndióxi̱?

¹³ Ná sakuaʼayó xa̱ʼa ta̱ Timoteo tá ndíka̱a̱ra 20 ku̱i̱ya̱ ka̱ndíxara ña̱ xa̱ʼndana nu̱ú yi̱i̱ra ña̱ va̱ʼa ná kuniso̱ʼo na̱ judío miíra tá ná ku̱ʼu̱nra natúʼunra xa̱ʼa Ndióxi̱ xíʼinna. Tasaá xi̱ndiku̱nra yichi̱ ta̱ apóstol Pablo (Hech. 16:3; 1 Cor. 9:19-23). Ta miíyó ¿á sandákooyó keʼéyó ña̱ kútóoyó tasaá va̱ása ndakava inkana xíʼin ña̱ kéʼéyó?

“NÁ KUAʼNUKAYÓ XÍʼIN TU̱ʼUN NDIÓXI̱”

14, 15. a) ¿Ndáaña xíniñúʼuyó ña̱ va̱ʼa kuaʼnuyó xíʼin tu̱ʼun Ndióxi̱? b) ¿Nda̱saa kítáʼan ña̱ kuaʼnuyó xíʼin tu̱ʼun Ndióxi̱ xíʼin ña̱ kuʼvi̱-iniyó kuniyó inkana?

¹⁴ Ndiʼi miíyó na̱ káʼvi tu̱ʼun Ndióxi̱ xíniñúʼu kuaʼnukayó xíʼin tu̱ʼun Ndióxi̱ ta su̱ví loʼo kuití ña̱ʼa kuxini̱yó xa̱ʼa ta̱ Jesús (Heb. 6:1). Soo ña̱ va̱ʼa kuaʼnuyó xíʼinña xíniñúʼu chika̱a̱níyó ndée. Ña̱ va̱ʼa kuuyó iin na̱ yiví xu̱xa xíʼin tu̱ʼun Ndióxi̱ xíniñúʼu kuaʼnuka ña̱ xíni̱yó xa̱ʼa Ndióxi̱. Ña̱kán tuku ta tuku káʼa̱nna xíʼinyó ña̱ ná kaʼviyó Biblia ndiʼi ki̱vi̱ (Sal. 1:1-3). ¿Á ña̱yóʼo kúú ña̱ kúni̱yó keʼéyó? Tá ná kaʼviyó Biblia ndiʼi ki̱vi̱ saá kunda̱a̱ va̱ʼaka iniyó xa̱ʼa ley Ndióxi̱ xíʼin tu̱ʼun ña̱ táxi yichi̱ nu̱úyó.

¹⁵ Ley ña̱ ndáyáʼvika kúú ña̱ kuʼvi̱-iniyó kuni táʼanyó. Ta̱ Jesús ni̱ka̱ʼa̱nra xíʼin na̱ discípulo ña̱yóʼo: “Xíʼin ña̱yóʼo ndakunina ndóʼó ña̱ kúúndó discípuloi̱, tá kúʼvi̱-inindó xíni táʼanndó” (Juan 13:35). Ta̱ Santiago ñani ndáʼvi ta̱ Jesús ni̱ka̱ʼa̱nra ña̱yóʼo kúú ley ña̱ ndixa ndáyáʼvika (Sant. 2:8). Ta̱ Pablo ni̱ka̱ʼa̱nra: “Tá kéʼún ña̱yóʼo, sáxi̱nún ña̱ káʼa̱n ley” (Rom. 13:10). Nu̱ú Biblia ku̱a̱ʼání yichi̱ káʼa̱nña xa̱ʼa ña̱yóʼo chi ‘Ndióxi̱ kúʼvi̱-inira xínira miíyóʼ (1 Juan 4:8). Nu̱ú Jehová su̱ví kuití xíniñúʼu ka̱ʼa̱nyó ña̱ kúʼvi̱-iniyó xíniyó inkana chi xíniñúʼu na̱ʼa̱yó ña̱yóʼo xíʼin ña̱ kéʼéyó. Ta̱ Juan ka̱ʼyíra ña̱yóʼo: “Xa̱ʼa ña̱yóʼo ni̱na̱ʼa̱ Ndióxi̱ ña̱ kúʼvi̱-inira xínira miíyó, saáchi chi̱ndaʼára se̱ʼera ta̱ mitúʼun ña̱ ki̱xira ñuyǐví yóʼo ña̱ va̱ʼa ni̱ʼíyó ña̱ kutakuyó” (1 Juan 4:9). Náʼa̱yó ña̱ xa̱ʼnuyó xíʼin tu̱ʼun Ndióxi̱ tá kúʼvi̱-iniyó xíniyó Jehová xíʼin se̱ʼera, saátu na̱ hermanoyó xíʼin inkaka na̱ yiví (Mat. 22:37-39).

16. Tá ku̱a̱ʼa̱n xáʼnuyó xíʼin tu̱ʼun Ndióxi̱ ¿nda̱chun chíndayáʼvikayó tu̱ʼun Ndióxi̱ ña̱ táxi yichi̱ nu̱úyó?

¹⁶ Ña̱ ley káʼa̱n káxiña ndáa ña̱ʼa kúú ña̱ va̱ʼa keʼéyó ta ndáaña va̱ása kívi keʼéyó ta sava yichi̱ chíndeéña miíyó. Soo tu̱ʼun ña̱ táxi yichi̱ nu̱úyó chíndeéña miíyó ndiʼi yichi̱. Ña̱kán tá xáʼnuyó ku̱a̱ʼa̱nyó xíʼin tu̱ʼun Ndióxi̱ tu̱ʼun ña̱ táxi yichi̱ nu̱úyó chíndayáʼviníkayó ña̱yóʼo. Kivi chitáʼanyóña xíʼin ña̱ ndóʼo na̱ va̱lí. Tá válína, kǒo kúnda̱a̱-inina nda̱chun va̱ása va̱ʼa koona migo na̱ kéʼé ña̱ va̱ása va̱ʼa, ta xíniñúʼu taxi yivána consejo ndaʼa̱na ña̱ va̱ʼa kundaanana (1 Cor. 15:33). Soo tá ku̱a̱ʼa̱n xáʼnuna xíʼin tu̱ʼun Ndióxi̱ kíxaʼána ndákani va̱ʼaka xi̱nína xíʼin ña̱ káʼa̱n Biblia ta sákuaʼana ndaka̱xin viína na̱ migona (kaʼvi 1 Corintios 13:11;b 14:20).c Saátu miíyó tá ndákani va̱ʼa xi̱níyó xa̱ʼa tu̱ʼun ña̱ táxi yichi̱ nu̱úyó ña̱ va̱xi nu̱ú Biblia saá kíxaʼá ndákanixi̱níyó táki̱ʼva ndákanixi̱ní Jehová ta va̱ʼa ndáka̱xinyó ña̱ keʼéyó.

17. ¿Ndáaña kivi chindeé táʼan xíʼinyó ña̱ va̱ʼa sakuaʼayó keʼéyó ña̱ va̱ʼa?

¹⁷ Íyo ku̱a̱ʼání ña̱ kivi chindeé miíyó ña̱ va̱ʼa keʼéyó ña̱ kútóo Jehová. ¿Nda̱chun káʼa̱nyó ña̱yóʼo? Saáchi ley Ndióxi̱ xíʼin tu̱ʼun ña̱ táxi yichi̱ nu̱úyó ña̱ va̱xi nu̱ú Biblia chíndeé táʼanña xíʼinyó ña̱ va̱ʼa xa̱a̱yó ‘nduuyó iin na̱ xíni̱ va̱ʼaʼ ta ‘koo tu̱ʼvayó ña̱ keʼéyó ndiʼi ña̱ʼaʼ (2 Tim. 3:16, 17). Soo tá kúni̱yó kunda̱a̱-iniyó “ndáaña kúú ña̱ kúni̱ Jehová”, xíniñúʼu chika̱a̱yó ndée ña̱ sakuaʼakayó xa̱ʼara (Efes. 5:17). Ná kuniñúʼuyó ña̱ kivi chindeé miíyó, savaña kúú ña̱ Guía de estudio para los testigos de Jehová, programa ña̱ Watchtower Library, ña̱ BIBLIOTECA NU̱Ú INTERNET Watchtower xíʼin ña̱ aplicación JW Library. Ndiʼi ña̱yóʼo chindeé táʼanña xíʼinyó ña̱ va̱ʼaka sakuaʼayó xíʼin na̱ veʼeyó á ña̱ sákuaʼa mitúʼun miíyó.

VA̱ʼANÍ KOOYÓ TÁ NÁ SANÁʼA̱ VIÍYÓ ÑA̱ XÍNITÚNI̱YÓ XÍʼIN BIBLIA

18. ¿Ndáaña va̱ʼa ni̱ʼíyó tá ná keʼéyó ña̱ káʼa̱n ley Ndióxi̱ xíʼin tu̱ʼun ña̱ táxi yichi̱ nu̱úyó?

¹⁸ Ku̱a̱ʼá ña̱ʼa va̱ʼa ndakiʼinyó tá ná kundiku̱nyó ley Ndióxi̱ xíʼin tu̱ʼunra ña̱ táxi yichi̱ nu̱úyó. Salmo 119:97-100 káchiña: “Kúʼvi̱ní-inii̱ xínii̱ ley ña̱ táxiún ndaʼíi̱. Ndiʼi tiempo káʼvii̱ña. Ña̱ káʼún xíʼi̱n táxiña ña̱ ndíchika íyoi̱ nu̱ú na̱ sáa̱-ini xíni yi̱ʼi̱ chi ndiʼi tiempo íyoña xíʼi̱n. Kúnda̱a̱ va̱ʼaka inii̱ nu̱úka na̱ sánáʼa̱ yi̱ʼi̱, saáchi ku̱a̱ʼání yichi̱ ndákanixi̱níi̱ xa̱ʼa tu̱ʼún. Va̱ʼaníka ña̱ kéʼíi̱ nu̱ú na̱ xa̱a̱ chée, saáchi kéʼíi̱ ndiʼi ña̱ káʼún xíʼi̱n”. Tá ná kuniñúʼuyó tiempoyó ña̱ ndakanixi̱níyó xa̱ʼa ley Ndióxi̱ xíʼin tu̱ʼun ña̱ táxi yichi̱ nu̱úyó va̱ʼaka kunda̱a̱-iniyó ta ndíchika xa̱a̱yó kooyó. Tá ná sanáʼa̱ viíyó ña̱ xínitúni̱yó xíʼin Biblia saá xa̱a̱yó “kuaʼnuyó xíʼin ña̱ kándíxayó táki̱ʼva ke̱ʼé ta̱ Jesús” (Efes. 4:13).