¿Ndáaña keʼéyó ña̱ va̱ʼa kusi̱í-iniyó ña̱ kaʼviyó Biblia ta kunda̱a̱ka-iniyó xíʼinña?

Ta̱ Josué káʼvira rollo nu̱ú va̱xi ley; ndu̱va nama̱ ña̱ Jericó ta va̱ása nínduva veʼe ñá Rahab; ta̱ Josué ndániʼira ndaʼa̱ra chí ndiví tá káʼa̱nra xíʼin Jehová

TA̱ Josué yáʼara nu̱ú iin ña̱ yo̱ʼvi̱ní: kuniʼira yichi̱ nu̱ú na̱ ñuu Israel ta sáki̱ʼvirana nu̱ú ñuʼú ña̱ ni̱ka̱ʼa̱n Ndióxi̱ taxira ndaʼa̱na. Ña̱ va̱ʼa keʼéra ña̱yóʼo xíniñúʼu ya̱ʼara nu̱ú ku̱a̱ʼá tu̱ndóʼo. Soo Jehová ni̱ka̱ʼa̱n xíʼinra ña̱ va̱ʼa kana ña̱ keʼéra ta nda̱kú ná koo inira. Ta ni̱ka̱ʼa̱nra xíʼinra ña̱ ná kuniso̱ʼora ña̱ káʼa̱n ley ña̱ ta̱xira ndaʼa̱ra, ta ná kaʼviraña ndiʼi ki̱vi̱ saá va̱ʼa xa̱a̱ra keʼéra ndiʼi ña̱ káʼa̱nña. Ta ni̱ka̱ʼa̱nra xíʼinra tá ná keʼéra ndiʼi ña̱yóʼo va̱ʼaní kana ña̱ keʼéra ta ndíchiní xa̱a̱ra koora (Jos. 1:7, 8).

Tiempo ña̱ ndóoyó vitin “ku̱a̱ʼá tu̱ndóʼo” íyo, ta saátu miíyó yáʼayó nu̱ú ku̱a̱ʼá tu̱ndóʼo ña̱ yo̱ʼvi̱ní (2 Tim. 3:1). Tá ná keʼéyó nda̱a̱ táki̱ʼva ni̱ka̱ʼa̱n Jehová xíʼin ta̱ Josué saá va̱ʼa kana ña̱ keʼéyó. Tá ná kaʼviyó Biblia ndiʼi ki̱vi̱, kivi chindeétáʼanña xíʼinyó ña̱ kundiku̱nyó ña̱ káʼa̱nña tá ná kixi tu̱ndóʼo nu̱úyó.

Soo ná ndakuniyó chi savayó íxayo̱ʼvi̱vaña xíʼinyó ña̱ kaʼviyó ta inkatuyó va̱ása kútóoyó kaʼviyó. Soo xa̱ʼa ña̱ ndáyáʼviní ña̱ kaʼviyó Biblia, kivi kotoyó ña̱ káʼa̱n “Kivi keʼún ña̱yóʼo”. Kán ndani̱ʼún sava consejo ña̱ chindeétáʼan xíʼún ña̱ va̱ʼaka kunda̱a̱-iniún tá ná kaʼviún Biblia, ta kusi̱íníka iniún xíʼinña.

Iin ta̱ ka̱ʼyí Salmo ni̱ka̱ʼa̱nra ña̱yóʼo: “Kuniʼi yi̱ʼi̱ nu̱ú yichi̱ ña̱ káʼún, saáchi kúsi̱íní-inii̱ xíʼinña” (Sal. 119:35). Saátu kivi kusi̱íní-iniún tá ná kaʼviún Biblia. Ndani̱ʼún ku̱a̱ʼání ña̱ kivi chindeé yóʼo tá ná kaʼviún Biblia ndiʼi ki̱vi̱.

Ni va̱ása kúúmiíún chiñu ña̱ xi̱kuumií ta̱ Josué ña̱ xi̱niʼira yichi̱ nu̱ú na̱ ñuu Israel, soo íyova tu̱ndóʼo ña̱ yáʼún nu̱ú. Ña̱kán táki̱ʼva ke̱ʼé ta̱ Josué, xíniñúʼu kaʼviún Biblia ña̱ va̱ʼa chindeétáʼanña xíʼún ta saátu keʼún táki̱ʼva káʼa̱nña. Tá ná keʼún ña̱yóʼo va̱ʼaníka kana ña̱ kéʼún ta ndíchiníka koún.

KIVI KEʼÚN ÑA̱YÓʼO

Siʼna ka̱ʼa̱n xíʼin Ndióxi̱ ta saáví kixaʼún kaʼviún. Nu̱ú Biblia va̱xi ña̱ ndákanixi̱ní Ndióxi̱, ña̱kán ni̱ka̱ʼyi̱ ña̱yóʼo ña̱ va̱ʼa chindeétáʼanña xíʼinyó. Ña̱kán tá kaʼviyó Biblia ná ka̱ʼa̱nyó xíʼin Ndióxi̱ ná chindeéra miíyó ña̱ va̱ʼa kunda̱a̱-iniyó xíʼin tu̱ʼunra, ña̱ va̱ʼa ndakaʼányóña ta saátu ná keʼéyó ña̱ káʼa̱nña (Esd. 7:10).
Nda̱ka̱tu̱ʼún xíʼin miíún. Tá káʼviún Biblia á inka tutu ña̱ tavá na̱ ñuu Ndióxi̱ nda̱ka̱tu̱ʼún xíʼin miíún ña̱yóʼo: “¿Ndáaña sákuaʼi̱ xa̱ʼa Jehová xíʼin ña̱ káʼvi yóʼo? ¿Nda̱saa kítáʼanña xíʼin ña̱ káʼa̱n Biblia xa̱ʼa Reino Ndióxi̱? ¿Nda̱saa kivi kuniñúʼi̱ versículo yóʼo ña̱ chindeétáʼi̱n xíʼin inka na̱ yiví?”.
Ndakanixi̱ní xa̱ʼa ña̱ káʼviún. Tá xa̱a̱ káʼviún, ndakanixi̱ní xa̱ʼa ña̱yóʼo: “¿Nda̱saa ndóʼi̱ xíʼin ña̱ káʼvi yóʼo? ¿Nda̱chun ndóʼi̱ saá xíʼinña? ¿Nda̱saa kivi chindeétáʼan ña̱yóʼo xíʼi̱n xa̱ʼa ña̱ ndo̱ʼi̱ tá ya̱chi̱, nda̱saa kivi chindeétáʼanña xíʼi̱n vitin ta nda̱saa kivi chindeétáʼanña xíʼi̱n chí nu̱únínu? ¿Nda̱saa kivi kuniñúʼi̱ ña̱ sa̱kuaʼi̱ yóʼo?” (Job 23:5; Sal. 49:3). Ndakanixi̱ní á kivi ka̱ʼún xa̱ʼa ña̱yóʼo, ¿nda̱chun va̱ása kúni̱ Jehová keʼéyó sava ña̱ʼa ta ndáa tu̱ndóʼo kixi nu̱úyó tá kǒo xíniso̱ʼoyó ña̱ káʼa̱nra? (Deut. 32:28, 29).
Ndakanixi̱ní ña̱ miíún ndóʼo ña̱ káʼviún nu̱ú Biblia. Ndakanixi̱ní ña̱ íyoún tá ni̱xi̱kó na̱ ñani ndáʼvi ta̱ José miíra nu̱ú na̱ ismaelita (Gén. 37:18-28). ¿Ndáaña xítoún? ¿Ndáaña xíniso̱ʼún? ¿Nda̱saa xáʼa̱n túviún? Ndakanixi̱ní nda̱a̱ táki̱ʼva miíún ndóʼo ña̱ ndo̱ʼo sava na̱ káʼa̱n Biblia xa̱ʼa. Nda̱ka̱tu̱ʼún xíʼin miíún: “¿Ndáaña ndákanixi̱nína? ¿Nda̱saa kúnina?” Tá ná ndakanixi̱níún xa̱ʼa ndiʼi ña̱yóʼo va̱ʼaníka kusi̱í-iniún ña̱ kaʼviún Biblia ta va̱ʼaníka kunda̱a̱-iniún xíʼinña.
Kuniñúʼu ndiʼi ña̱ kivi chindeétáʼan xíʼún tá kaʼviún ña̱ va̱ʼaka kunda̱a̱-iniún xíʼinña. Kuniñúʼu ña̱ xa̱a̱ íyo tu̱ʼun miíún ti̱xin Internet á nu̱ú tutu. Tá va̱ása xíniún kuniñúʼúnña, ka̱ʼa̱n xíʼin inkana ná sanáʼa̱na yóʼo. Nu̱ú Índice de las publicaciones Watch Tower xíʼin ña̱ Guía de estudio para los testigos de Jehová ndani̱ʼún ku̱a̱ʼání ña̱ʼa ta va̱ʼaní ndákaniña xa̱ʼa sava versículo ña̱ va̱xi nu̱ú Biblia. Saátu nu̱ú folleto Ña̱ táxi yichi̱ nu̱úyó ña̱ va̱ʼa sakuaʼakayó xa̱ʼa Biblia kivi ndani̱ʼún mapa, fecha, ki̱ʼva ña̱ xíniñúʼuna xíʼin xu̱ʼún, ta saátu medida xíʼin inkaka ña̱ʼa.
Ndakaʼán xa̱ʼa ña̱ sa̱kuaʼún. Ña̱yóʼo chindeé miíún ña̱ va̱ása nandósóún xa̱ʼa ña̱ ka̱ʼviún. Saátu kivi ka̱ʼún xíʼin inkana xa̱ʼa ña̱ sa̱kuaʼún. Ndakanixi̱ní xa̱ʼa ña̱yóʼo: “¿Á kivi kuniñúʼi̱ ña̱ sa̱kuaʼi̱ ña̱ va̱ʼa sánáʼi̱ inka na̱ yiví?”. Ndiʼi ña̱ sa̱kuaʼayó yóʼo chindeétáʼanña xíʼún ña̱ va̱ása nandósóún xa̱ʼaña ta kivitu kuniñúʼúnña ña̱ va̱ʼa chindeún inkana.