ARTÍCULO ÑA̱ KAʼVIYÓ 1
“Va̱ása ndi̱ʼi̱ní-iniún, chi yi̱ʼi̱ kúú Ndióxi̱ miíún”
“Va̱ása yi̱ʼvíún, chi yi̱ʼi̱ íyoi̱ xíʼún. Va̱ása ndi̱ʼi̱ní-iniún, chi yi̱ʼi̱ kúú Ndióxi̱ miíún. Yi̱ʼi̱ taxi ndee̱ ndaʼún. Yi̱ʼi̱ chindeé yóʼó” (IS. 41:10).
YAA 7 Jehová kúú ta̱ táxi ndée ndaʼa̱yó
ÑA̱ KA̱ʼA̱NYÓ XA̱ʼA̱a
1, 2. a) ¿Nda̱saa chi̱ndeétáʼan ña̱ káʼa̱n Isaías 41:10 xíʼin ñá Yoshiko? b) ¿Ndáa inkaka na̱ kivi chindeétáʼan Jehová xíʼin texto yóʼo?
IIN ñá hermana ñá naní Yoshiko, ni̱ka̱ʼa̱n ñá doctora xíʼinñá ña̱ si̱lóʼo yo̱o̱ kutakuñá. ¿Ndáaña ke̱ʼéñá tá xi̱niso̱ʼoñá ña̱yóʼo? Kama nda̱kaʼánñá xa̱ʼa̱ iin texto ña̱ kútóoñá: Isaías 41:10 (kaʼviña).b Soo va̱ʼa̱ní ni̱ka̱ʼa̱nñá xíʼin ñá doctora ña̱ va̱ása yíʼviñá, saáchi Jehová nda̱a̱ tá íyo iin ta̱ tíin ndaʼa̱ñá saá íyora.c Versículo yóʼo sa̱ndíko-iniñá ta chi̱ndeétáʼanña xíʼinñá ña̱ kandíxakañá Jehová xíʼin ndiʼi níma̱ñá. Saá kivitu chindeéña miíyó tá yáʼayó nu̱ú tu̱ndóʼo. Ña̱ kunda̱a̱ va̱ʼa iniyó nda̱saa chíndeétáʼanña xíʼinyó, ná ka̱ʼa̱nyó xa̱ʼa̱ nda̱chun ni̱ka̱ʼa̱n Ndióxi̱ tu̱ʼun yóʼo xíʼin ta̱ Isaías.
2 Tá xa̱ʼa̱ Jehová ni̱ka̱ʼa̱nra ña̱yóʼo ña̱ va̱ʼa sandi̱kora-ini na̱ judío tá ná kixi na̱ ñuu Babilonia ndakiʼinnana ku̱ʼu̱n xíʼinna. Soo saátu tu̱ʼun yóʼo ni̱ka̱ʼyi̱ña ña̱ va̱ʼa chindeétáʼanña xíʼin ndiʼi na̱ káchíñu nu̱úra (Is. 40:8; Rom. 15:4). Tiempo ña̱ ndóoyó vitin yo̱ʼvi̱níña, ta xa̱ʼa̱ ña̱yóʼo kúú ña̱ xíniñúʼuníyó ndee̱ ña̱ táxi libro ta̱ Isaías (2 Tim. 3:1).
3. a) ¿Ndáa tu̱ʼun va̱ʼa kúú ña̱ va̱xi nu̱ú texto ña̱ ku̱i̱ya̱ 2019? b) ¿Nda̱chun xíniñúʼúníyo ña̱ káʼa̱n tu̱ʼun yóʼo vitin?
3 Nu̱ú artículo yóʼo ka̱ʼa̱nyó xa̱ʼa̱ u̱ni̱ ña̱ʼa ña̱ káʼa̱n Jehová xíʼinyó ña̱ kivi ndasandakúka ña̱ kándíxayóra ta ña̱yóʼo va̱xiña nu̱ú Isaías 41:10, texto ña̱ ku̱i̱ya̱ 2019. Ña̱ nu̱ú kúú ña̱ koo Jehová xíʼinyó. Ña̱ u̱vi̱ kúú, ña̱ kúúra Ndióxi̱yó. Ta ña̱ u̱ni̱ kúú, ña̱ chindeétáʼanra xíʼinyó. ¿Nda̱chun xíniñúʼuníyó ña̱ káʼa̱n tu̱ʼun yóʼo vitin?d Saáchi táki̱ʼva ndo̱ʼo ñá Yoshiko saátu ndóʼo miíyó. Chi tu̱ndóʼo ña̱ íyo ñuyǐví yóʼo nda̱a̱ miíyó sáxo̱ʼvi̱ña. Savayó ndóʼoyó xa̱ʼa̱ ña̱ va̱ása táxika na̱ chíñu ña̱ ka̱ʼa̱nyó xa̱ʼa̱ Ndióxi̱.
“YI̱ʼI̱ ÍYOI̱ XÍʼÚN”
4. a) ¿Ndáaña nu̱ú ña̱ ni̱ka̱ʼa̱n Jehová ka̱ʼa̱nyó xa̱ʼa̱? (Koto nota). b) ¿Ndáaña káʼa̱n Jehová xíʼinyó? c) ¿Nda̱saa kúniún xíʼin ña̱ káʼa̱n Jehová xíʼún?
4 Ña̱ nu̱ú ña̱ kéʼé Jehová kúú ña̱ sándi̱kora-iniyó xíʼin tu̱ʼun yóʼo: “Va̱ása yi̱ʼvíún, chi yi̱ʼi̱ íyoi̱ xíʼún”.e Náʼa̱ra ña̱ íyora xíʼinyó, chi ndíʼi̱-inira xa̱ʼa̱yó ta kúʼvi̱-inira xínira miíyó. Ná kotoyó ndáaña káʼa̱nra xíʼinyó: “Saáchi ndáyáʼviníún nu̱úi̱ kúni̱níi̱ xínii̱ yóʼó, ta kúʼvi̱ní-inii̱ xínii̱ yóʼó” (Is. 43:4). Ni iin ña̱ʼa kǒo kivi kasi nu̱ú Jehová ña̱ ndakoora ña̱ kuʼvi̱-inira kunira na̱ káchíñu nu̱úra. Nda̱a̱ ni iin yichi̱ va̱ása sandákoora miíyó (Is. 54:10). Tá kúnda̱a̱-iniyó ña̱ kúúra migoyó ta kúʼvi̱-inira xínira miíyó ndakúka íyo iniyó. Kundaavara miíyó vitin nda̱a̱ táki̱ʼva xi̱ndaara ta̱ Abrán (Abrahán), Jehová ni̱ka̱ʼa̱n xíʼinra: “Va̱ása yi̱ʼvíún, Abrán. Yi̱ʼi̱ kúú ta̱ kundaa yóʼó” (Gén. 15:1).
Jehová chindeétáʼan xíʼinyó ña̱ ya̱ʼayó nu̱ú tu̱ndóʼo ña̱ íyo nda̱a̱ táki̱ʼva íyo yu̱ta á ñuʼu̱ ña̱ sáxo̱ʼvi̱ miíyó. (Koto párrafo 5 xíʼin 6).i
5, 6. a) ¿Nda̱chun va̱ʼa kúnda̱a̱-iniyó ña̱ kúni̱ Jehová chindeétáʼanra xíʼinyó ña̱ ya̱ʼayó nu̱ú tu̱ndóʼo? b) ¿Ndáaña sákuaʼayó xíʼin ña̱ ke̱ʼé ñá Yoshiko?
5 Xíni̱yó ña̱ mií Jehová kúni̱ra chindeétáʼanra xíʼinyó, saáchi káʼa̱nra ña̱yóʼo xíʼinyó: “Tá ná ya̱ʼún nu̱ú ti̱kui̱í, yi̱ʼi̱ koi̱ xíʼún; tá ná ya̱ʼún nu̱ú yu̱ta va̱ása sa̱ʼvíún ti̱xinrá. Tá ná ya̱ʼún nu̱ú ñuʼu̱ va̱ása kokoún” (Is. 43:2). ¿Ndáaña kúni̱ kachi tu̱ʼun yóʼo?
6 Jehová va̱ása káʼa̱nra xíʼinyó ña̱ sandiʼi-xa̱ʼa̱ra tu̱ndóʼo ña̱ ndóʼoyó. Tu̱ndóʼo yóʼo íyoña nda̱a̱ táki̱ʼva íyo iin yu̱ta nu̱ú sáʼví na̱ yiví á íyoña nda̱a̱ táki̱ʼva íyo iin ñuʼu̱ nu̱ú xíxi na̱ yiví, soo va̱ása taxi Jehová ña̱ saxo̱ʼvi̱ña iniyó ndiʼi tiempo. Ta taxitura ña̱ táxin koo iniyó ni tá kúni̱na kaʼnína miíyó (Is. 41:13). Saá chi̱ndeétáʼanra xíʼin ñá Yoshiko, ñá ni̱ka̱ʼa̱nyó xa̱ʼa̱ nu̱ú ki̱xáʼa artículo yóʼo. Káchi ñá se̱ʼeñá: “Nda̱kanda̱ní-ininḏi tá xi̱nindi̱ ña̱ va̱ása níndi̱ʼi̱ní-iniñá. Ku̱nda̱a̱-inindi̱ ña̱ mií Jehová ta̱xi ña̱ táxin koo iniñá. Nda̱a̱ ki̱vi̱ ni̱xi̱ʼi̱ñá na̱túʼunvañá xa̱ʼa̱ Jehová xíʼin ná enfermera ta saátu xíʼin inkaka na̱ ndeé ndóʼo”. ¿Ndáaña sákuaʼayó xíʼin ña̱ ke̱ʼé ñá Yoshiko? Tá ná kandíxaníyo ña̱ xi̱nu tu̱ʼun Jehová ña̱ chindeéra miíyó, saá kundeéní-iniyó ta ndakúka koo iniyó nu̱ú tu̱ndóʼo.
“YI̱ʼI̱ KÚÚ NDIÓXI̱ MIÍÚN”
7, 8. a) ¿Ndáaña kúú ña̱ u̱vi̱ ka̱ʼyí ta̱ Isaías ka̱ʼa̱nyó xa̱ʼa̱, ta ndáaña kúni̱ kachi tu̱ʼun ña̱ ndíʼi̱ní-iniyó? b) ¿Nda̱chun ni̱ka̱ʼa̱n Jehová xíʼin na̱ judío na̱ ndasi chí Babilonia ña̱ va̱ása kundi̱ʼi̱ní-inina? c) ¿Ndáaña ni̱ka̱ʼa̱n Jehová nu̱ú Isaías 46:3, 4 ña̱ va̱ʼa sandi̱kora-ini na̱ ñuura?
7 Ná ka̱ʼa̱nyó xa̱ʼa̱ ña̱ u̱vi̱ ña̱ ka̱ʼyí ta̱ Isaías: “Va̱ása ndi̱ʼi̱ní-iniún, chi yi̱ʼi̱ kúú Ndióxi̱ miíún”. Tá káʼa̱nña xa̱ʼa̱ ña̱ ndíʼi̱ní-iniyó nu̱ú tu̱ʼun ña̱ ka̱ʼyína xi̱naʼá kúni̱ kachiña xa̱ʼa̱ ña̱ kéʼé na̱ yiví tá yíʼvinína ta “xítona chí sa̱tána” á tá “xítona iníí xiyo”.
8 ¿Nda̱chun ni̱ka̱ʼa̱n Jehová xíʼin na̱ judío na̱ ndasi chí Babilonia ña̱ va̱ása kundi̱ʼi̱ní-inina? Saáchi xíni̱ra ña̱ yi̱ʼvína tá ná kixa̱a̱ na̱ soldado medopersa kanitáʼanna xíʼin na̱ ñuu Babilonia tá ná ya̱ʼa 70 ku̱i̱ya̱ ña̱ koona kán. Jehová kuniñúʼura na̱ medopersa ña̱ tavára na̱ ñuura ti̱xin ñuu Babilonia (Is. 41:2-4). Tá ku̱nda̱a̱-ini na̱ ñuu Babilonia xíʼin na̱ inka ñuu ña̱ xa̱a̱ ku̱yatin va̱xi na̱ kúni̱ kanitáʼan xíʼinna, ña̱ va̱ása yi̱ʼvína ki̱xáʼana káʼa̱nna xíʼin táʼanna: “Ndakú koo inindó”. Saátu i̱xava̱ʼana inkaka ndióxi̱ chi kúni̱na saka̱ku ña̱yóʼo miína (Is. 41:5-7). Soo Jehová sa̱ndíkora-ini na̱ ñuura xíʼin tu̱ʼun yóʼo: “Ndóʼó, na̱ ñuu Israel na̱ káchíñu nu̱úi̱ kúúndó”. Ta ña̱ va̱ása kundi̱ʼi̱ní-inina ni̱ka̱ʼa̱nkara xíʼinna: “Yi̱ʼi̱ kúú Ndióxi̱ miíún” (Is. 41:8-10). Tá ni̱ka̱ʼa̱nra xíʼinna “yi̱ʼi̱ kúú Ndióxi̱ miíún”, ña̱ ku̱ni kachira kúú ña̱ kǒo nándósó-inira ña̱ kúúna na̱ ñuura. Saátu ni̱ka̱ʼa̱nra xíʼinna ña̱ chindeétáʼanra xíʼinna ña̱ va̱ʼa ka̱kuna ta ndikóna ñuuna. Tu̱ʼun ña̱ ni̱ka̱ʼa̱n Jehová xíʼin na̱ judío chi̱ndeétáʼanníña xíʼinna (kaʼvi Isaías 46:3, 4).f
9, 10. ¿Nda̱chun va̱ása xíniñúʼu kundi̱ʼi̱ní-iniyó? Ka̱ʼa̱n xa̱ʼa̱ iin ejemplo.
9 Tiempo vitin ndeéníka ndíʼi̱-ini na̱ yiví xa̱ʼa̱ ña̱ kúú nu̱ú ñuyǐví yóʼo. Sava nda̱a̱ miíyó ndóʼo saá. Soo va̱ása xíniñúʼu ndi̱ʼi̱ní-iniyó, saáchi Jehová káʼa̱nra xíʼinyó: “Yi̱ʼi̱ kúú Ndióxi̱ miíún”. Tu̱ʼun yóʼo sándi̱koníña-iniyó. ¿Nda̱chun?
10 Ná ka̱ʼa̱nyó xa̱ʼa̱ iin ejemplo. Ndakanixi̱ní xa̱ʼa̱ u̱vi̱ na̱ va̱lí, ta̱ Juan xíʼin ta̱ José ña̱ ku̱a̱ʼa̱nna xíʼin tú autobús tá ñuú. Ta iin sana ki̱xáʼa kúni̱ ti̱vínú ta xi̱kundichinú. Tasaá ki̱xáʼa káʼa̱n ta̱ káva tú autobús xíʼin na̱ ku̱a̱ʼa̱n ininú: “Va̱ása kundi̱ʼi̱ní-inindó. Kǒo ña̱ kundoʼondó”. Ta̱ Juan yíʼviníra, soo xítora ña̱ kǒo ndíʼi̱-ini ta̱ José. Ta ni̱nda̱ka̱tu̱ʼunrara: “¿Nda̱chun va̱ʼaní kǒo yíʼviún?”. Ta̱ José xáku̱ra ta káchira xíʼinra: “Saáchi ta̱ káva tú autobús, yivái̱ kúúra ta xíni̱vai̱ ña̱ miíra kivi sandaʼánú. Taxi ná ka̱ʼi̱n xíʼún xa̱ʼa̱ ña̱ va̱ʼaní kávara tú autobús ta saá va̱ása yi̱ʼvíkaún”.
11. ¿Ndáaña sákuaʼayó xíʼin ejemplo na̱ ku̱a̱ʼa̱n xíʼin tú autobús?
11 ¿Ndáaña sákuaʼayó xíʼin ejemplo yóʼo? Táki̱ʼva ndo̱ʼo ta̱ José, saátu miíyó va̱ása ndíʼi̱ní-iniyó saáchi xíni̱ va̱ʼayó yiváyó Jehová. Kúnda̱a̱-iniyó ña̱ miíra chindeétáʼan xíʼinyó ña̱ va̱ʼa ya̱ʼayó nu̱ú tu̱ndóʼo tiempo nu̱ú ndíʼi (Is. 35:4). Ni ndiʼi na̱ yiví na̱ ñuyǐví yóʼo yíʼvinína, soo miíyó va̱ása ndíʼi̱ní-iniyó chi kándíxaníyó Jehová (Is. 30:15). Ta nda̱a̱ táki̱ʼva ke̱ʼé ta̱ José, káʼa̱nyó xíʼin na̱ yiví xa̱ʼa̱ ña̱ nda̱chun kándíxaníyó Ndióxi̱. Tasaá, miína kivi xa̱a̱na kandíxa va̱ʼana ña̱ kivi chindeétáʼan Jehová xíʼinna tá ná ya̱ʼana nu̱ú tu̱ndóʼo.
“YI̱ʼI̱ TAXII̱ NDEE̱ NDAʼÚN. YI̱ʼI̱ CHINDEÉ YÓʼÓ”
12. a) ¿Ndáaña u̱ni̱ ni̱ka̱ʼa̱n Jehová ka̱ʼa̱nyó xa̱ʼa̱? b) ¿Ndáaña ndákaʼányó tá káʼa̱n Biblia xa̱ʼa̱ “ndaʼa̱” Jehová?
12 Ná ka̱ʼa̱nyó xa̱ʼa̱ ña̱ u̱ni̱ ña̱ ni̱ka̱ʼa̱n Jehová: “Yi̱ʼi̱ taxi ndee̱ ndaʼún. Yi̱ʼi̱ chindeé yóʼó”. Tiempo saá, xa̱a̱ ni̱ka̱ʼa̱nva ta̱ Isaías nda̱saa chindeétáʼan Jehová xíʼin na̱ ñuura. Ka̱chira: “Mií tátayó Jehová kixi ta ndakúníra, ta ndaʼa̱ra kúú ña̱ kaʼndachíñu” (Is. 40:10). Tá xíniñúʼu Biblia ña̱ tu̱ʼun ndaʼa̱, káʼa̱nña xa̱ʼa̱ ndee̱ ña̱ kúúmií iin na̱ yiví. Tu̱ʼun ña̱ ni̱ka̱ʼa̱n ta̱ Isaías sándakaʼánña miíyó ña̱ kúú Jehová iin rey ta̱ íyoní ndee̱. Tiempo xi̱naʼá xi̱niñúʼura ndee̱ra ña̱ chi̱ndeétáʼanra xíʼin na̱ ñuura ta sa̱kákurana. Saátu vitinva, chíka̱a̱ra ndee̱ xíʼin na̱ káchíñu nu̱úra ta ndáara na̱ kándíxañaʼá (Deut. 1:30, 31; Is. 43:10).
Ni iin ña̱ʼa ña̱ xíniñúʼu na̱ ñuyǐví ña̱ kundi̱va̱ʼana xíʼinyó va̱ása kuchiñuña chi Jehová chindeétáʼan xíʼinyó. (Koto párrafo 12 nda̱a̱ 16).j
13. a) ¿Ama sáxi̱nu Jehová tu̱ʼunra ña̱ káʼa̱nra taxira ndee̱ ndaʼa̱yó? b) ¿Ndáa tu̱ʼun chíka̱a̱ní ndee̱ xíʼinyó ña̱ va̱ʼa kandíxakayó Ndióxi̱?
13 Jehová táxivara ndee̱ ndaʼa̱yó táki̱ʼva káʼa̱nra, táxiraña tá kéʼéna ña̱ va̱ása va̱ʼa xíʼinyó. Sava ñuu, kéʼéna ku̱a̱ʼá ña̱ʼa ña̱ va̱ása táxikana sanáʼayó xa̱ʼa̱ Ndióxi̱ á ña̱ va̱ása ndasakáʼnuyóra. Soo ña̱yóʼo kǒo sándíʼi̱níña-iniyó. Tu̱ʼun ña̱ káʼa̱n Jehová táxiníña ndee̱ ndaʼa̱yó tasaá va̱ʼa kándíxakayóra. Káchira xíʼinyó: “Nda̱a̱ ndáakaña ná kuni̱na keʼéna xíʼún kǒo kuchiñuna xíʼún” (Is. 54:17). Ña̱yóʼo sándakaʼánña miíyó u̱ni̱ ña̱ʼa ña̱ ndáyáʼviní.
14. ¿Nda̱chun va̱ása ndákanda̱-iniyó xa̱ʼa̱ ña̱ kúni̱ na̱ sáa̱-ini xíni Ndióxi̱ keʼéna xíʼinyó?
14 Ña̱ nu̱ú kúú ña̱ xíni̱yó ña̱ kundasíva na̱ ñuyǐví yóʼo kunina miíyó (Mat. 10:22). Ta̱ Jesús ni̱ka̱ʼa̱nra ña̱ ndeéní kixi ku̱a̱chi nu̱ú na̱ ndíku̱nñaʼá ki̱vi̱ nu̱ú ndíʼi (Mat. 24:9; Juan 15:20). Ña̱ u̱vi̱ ña̱ kúnda̱a̱-iniyó xíʼin kúú ña̱ ni̱ka̱ʼa̱n profecía ta̱ Isaías, ña̱ su̱ví nda̱saa kundasína kunina miíyó, chi nda̱a̱ xa̱a̱na kuniñúʼuna ku̱a̱ʼá ña̱ʼa ña̱ keʼéna ña̱ va̱ása va̱ʼa xíʼinyó. Sava kuniñúʼuna ña̱ vatá ña̱ sana sandáʼvi miíyó á inka ña̱ vatá ña̱ kama kúnda̱a̱-iniyó xíʼin, saátu nda̱a̱ ku̱ni̱na kanina miíyó (Mat. 5:11). Jehová va̱ása kasira nu̱úna ña̱ kuniñúʼuna ña̱ kúni̱na (Efes. 6:12; Rev. 12:17). Soo va̱ása xíniñúʼu yi̱ʼvíyó. ¿Nda̱chun va̱ása yi̱ʼvíyó?
15, 16. a) ¿Ndáaña u̱ni̱ ni̱ka̱ʼa̱n Jehová xíniñúʼu ndakaʼányó xa̱ʼa̱ ta nda̱saa kítáʼanña xíʼin Isaías 25:4, 5? b) ¿Ndáaña kundoʼo na̱ sáa̱-ini xíni miíyó káchi Isaías 41:11, 12?
15 Ña̱ u̱ni̱ ña̱ ndakaʼányó xa̱ʼa̱ kúú ña̱ káʼa̱n Jehová xíʼinyó xa̱ʼa̱ na̱ sáa̱-ini xíni miíyó, ña̱ kǒo kuchiñu ni iin ña̱ʼa ña̱ kuniñúʼuna xíʼinyó. Nda̱a̱ táki̱ʼva sási iin nama̱ sa̱táyó tá ndeéní kóon sa̱vi̱, saá íxaa Jehová sáka̱kura miíyó nu̱ú na̱ va̱ása va̱ʼa (kaʼvi Isaías 25:4, 5).g Ni ná keʼé na̱ sáa̱-ini xíni miíyó ña̱ va̱ása va̱ʼa xíʼinyó, su̱ví ndiʼi tiempo saxo̱ʼvi̱ña miíyó (Is. 65:17).
16 Ña̱ va̱ʼa kandíxakayó Jehová, miíra káʼa̱n xíʼinyó ndáaña kundoʼo na̱ sáa̱-ini xíni miíyó (kaʼvi Isaías 41:11, 12).h Ni ku̱a̱ʼání ña̱ʼa ná keʼéna xíʼinyó, ndiʼi na̱ sáa̱-ini xíni na̱ ñuu Ndióxi̱ na̱ ndiʼi-xa̱ʼa̱va kúúna.
NDÁAÑA KIVI KEʼÉYÓ ÑA̱ VA̱ʼA KANDÍXAKAYÓ JEHOVÁ
Kandíxakayó Jehová tá ná kaʼviyó Biblia ndiʼi ki̱vi̱ ña̱ va̱ʼa sakuaʼakayó xa̱ʼa̱ra. (Koto párrafo 17 xíʼin 18).k
17, 18. a) ¿Nda̱chun chíndeétáʼan ña̱ káʼviyó Biblia xíʼinyó ña̱ kandíxakayó Ndióxi̱? Ka̱ʼa̱n xa̱ʼa̱ iin ejemplo. b) ¿Nda̱chun xíniñúʼu ndakanixi̱níyó xa̱ʼa̱ texto ña̱ ku̱i̱ya̱ 2019?
17 Kándíxaníyó Jehová tá xáa̱yó kúnda̱a̱ka-iniyó xa̱ʼa̱ra. Ta ña̱ va̱ʼa kunda̱a̱ka-iniyó xa̱ʼa̱ra xíniñúʼu kaʼviyó Biblia ta ndakanixi̱níyó xa̱ʼa̱ ña̱ káʼviyó. Nu̱ú Biblia va̱xi sava historia ña̱ náʼa̱ nu̱úyó nda̱saa sa̱káku Jehová na̱ ñuura tiempo kán, xa̱ʼa̱ ña̱yóʼo kándíxaníyó ña̱ kundaara miíyó tiempo vitin.
18 Ná ndakanixi̱níyó xa̱ʼa̱ ejemplo ña̱ xi̱niñúʼu ta̱ Isaías, ña̱ va̱ʼa kunda̱a̱-iniyó nda̱saa ndáa Jehová miíyó. Chítáʼanra Jehová xíʼin iin pastor ta̱ ndáa ndikachi sa̱na̱ra. Káchira: “Táki̱ʼva íxaa iin pastor, kundaara ndikachi sa̱na̱ra, xíʼin ndaʼa̱ra ndakiʼinrarí ta kunumindaararí ku̱ʼu̱n xíʼinra” (Is. 40:11). Tá kúnda̱a̱-iniyó ña̱ ndáa Jehová miíyó, va̱ʼaní kúniyó ta va̱ása yíʼviyó. Ña̱ va̱ása yi̱ʼvíníyó tá yáʼayó nu̱ú tu̱ndóʼo, na̱ esclavo fiel y discreto nda̱ka̱xinna tu̱ʼun ña̱ va̱xi nu̱ú Isaías 41:10 ña̱ koo texto ña̱ ku̱i̱ya̱ 2019: “Va̱ása ndi̱ʼi̱ní-iniún, chi yi̱ʼi̱ kúú Ndióxi̱ miíún”. Ná ndakanixi̱níyó xa̱ʼa̱ tu̱ʼun yóʼo ña̱ kivi sandi̱koña-iniyó, saá kúú ña̱ ndakúka koo iniyó, ta kandíxaníyó ña̱ chindeétáʼan Ndióxi̱ xíʼinyó ña̱ va̱ʼa ya̱ʼayó nu̱ú tu̱ndóʼo ña̱ va̱xi nu̱úyó.
YAA 38 Jehová kundaa yóʼó
a Texto ña̱ ku̱i̱ya̱ 2019 káʼa̱nña xíʼinyó xa̱ʼa̱ u̱ni̱ ña̱ʼa ña̱ chindeétáʼan xíʼinyó ña̱ va̱ása kundi̱ʼi̱ní-iniyó tá íyo tu̱ndóʼo ñuyǐví yóʼo á nu̱ú miíyó. Artículo yóʼo ka̱ʼa̱n xa̱ʼa̱ u̱ni̱ ña̱ʼa ña̱ chindeé miíyó, tasaá va̱ása kundi̱ʼi̱ní-iniyó ta kandíxakayó ña̱ mií Jehová chindeétáʼan xíʼinyó. Ná ndakaniníxi̱níyó xa̱ʼa̱ texto ña̱ ku̱i̱ya̱ yóʼo ta va̱ása nandósoyó xa̱ʼa̱ña. Xíʼin ña̱yóʼo ndakiʼinyó ndee̱ ña̱ va̱ʼa kundeé-iniyó xíʼin tu̱ndóʼo ña̱ va̱xi.
b Isaías 41:10: “Va̱ása yi̱ʼvíún, chi yi̱ʼi̱ íyoi̱ xíʼún. Va̱ása ndi̱ʼi̱ní-iniún, chi yi̱ʼi̱ kúú Ndióxi̱ miíún. Yi̱ʼi̱ taxi ndee̱ ndaʼún. Yi̱ʼi̱ chindeé yóʼó”.
d ÑA̱ KÚNI̱ KACHIÑA: Ña̱ káʼa̱n xa̱ʼa̱ iin ña̱ʼa ña̱ koo chí nu̱únínu kúni̱ kachiña ña̱ ndixa xi̱nuña. Ña̱ káʼa̱n Jehová chíndeétáʼanníña xíʼinyó vitin ña̱ va̱ása ndi̱ʼi̱ní-iniyó tá ná kixi tu̱ndóʼo nu̱úyó.
e Tu̱ʼun “va̱ása yi̱ʼvíún”, va̱xiña u̱ni̱ yichi̱ nu̱ú Isaías 41:10, 13 xíʼin 14. Ku̱a̱ʼáníka yichi̱ va̱xi tu̱ʼun “yi̱ʼi̱”, ta ña̱yóʼo kúni̱ kachiña ña̱ mií Ndióxi̱ kúú ta̱ káʼa̱n saá. ¿Nda̱chun xi̱kuni̱ Jehová ña̱ ku̱a̱ʼá yichi̱ kaʼyí ta̱ Isaías tu̱ʼun yóʼo? Ña̱ va̱ʼa na̱ʼa̱ra nu̱úyó iin ña̱ ndáyáʼviní: tá kúni̱yó va̱ása yi̱ʼvíkayó xíniñúʼu kandíxaníyó Jehová.
f Isaías 46:3, 4: “Kuniso̱ʼondó ña̱ káʼi̱n, ndóʼó na̱ veʼe ta̱ Jacob, ta ndiʼi ndóʼó na̱ kíndo̱oka na̱ veʼe ta̱ Israel, nda̱a̱ tá ki̱vi̱ ka̱kundó yi̱ʼi̱ kúú ta̱ ndáa ndóʼó. Ni ná xa̱a̱ndó kuchéendó va̱ása nasa̱mai̱; ni ná xa̱a̱ndó kuvi̱xi xi̱níndó koi̱ xíʼinndó. Yi̱ʼi̱ kúú ta̱ xa̱a̱ kíʼin kuenta xíʼinndó ta saka̱kui̱ ndóʼó”.
g Isaías 25:4, 5: “Saáchi íyoún táki̱ʼva íyo iin veʼe ña̱ ndeé ku̱va̱ʼa nu̱ú ndási na̱ nda̱ʼví miína tá va̱xi tu̱ndóʼo nu̱úna, iin veʼe nu̱ú ndásina miína tá kóon sa̱vi̱ á tá niʼníní, iin veʼe nu̱ú ndásina miína tá íxandi̱va̱ʼana xíʼinna nda̱a̱ táki̱ʼva káni sa̱vi̱ sa̱tá iin nama̱. Nda̱a̱ táki̱ʼva íyo kaʼní ña̱ íyo nu̱ú ñuʼú yi̱chí, ndásiña xíʼin vi̱kó, saá ndásiún yuʼú na̱ kini”.
h Isaías 41:11, 12: “Koto, ndiʼi na̱ sáa̱-ini xíni yóʼó kukaʼan nu̱úna. Na̱ yiví na̱ kánitáʼan xíʼún na̱ ndiʼi-xa̱ʼa̱ kúúna. Nandukún na̱ kánitáʼan xíʼún ta va̱ása ndani̱ʼúnna. Na̱yóʼo na̱ ndiʼi-xa̱ʼa̱va kúúna ta va̱ása kunikaúnna”.
i ÑA̱ KÁʼA̱N XA̱ʼA̱ NA̱ʼNÁ: Iin familia yáʼana nu̱ú tu̱ndóʼo nu̱ú káchíñuna, tá ku̱a̱ʼa̱nna sanáʼa̱na na̱ yiví, escuela nu̱ú káʼvina, ta saátu kíʼin kue̱ʼe̱ miína.
j ÑA̱ KÁʼA̱N XA̱ʼA̱ NA̱ʼNÁ: Na̱ policía ni̱ki̱ʼvina iin veʼe nu̱ú ndátaka na̱ hermano, soo na̱yóʼo va̱ása yíʼvina.
k ÑA̱ KÁʼA̱N XA̱ʼA̱ NA̱ʼNÁ: Tá ná kaʼviyó xíʼin na̱ veʼeyó semana tá semana ña̱yóʼo taxi ndee̱ ndaʼa̱yó ña̱ kundeé-iniyó.