ARTÍCULO ÑA̱ KAʼVIYÓ 13
Ná kundi̱ʼi̱-iniyó xa̱ʼa̱ ña̱ ndóʼo na̱ ku̱a̱ʼa̱nyó sánáʼa̱yó
“Ku̱ndáʼvi-inira xi̱nirana [...]. Ta ki̱xáʼara sa̱náʼa̱rana ku̱a̱ʼání ña̱ʼa” (MAR. 6:34).
YAA 70 Ná nandukúyó na̱ kúni̱ kunda̱a̱-ini xa̱ʼa Ndióxi̱
ÑA KA̱ʼA̱NYÓ XA̱ʼA̱a
1. Ka̱ʼa̱n ndáaña kúú iin ña̱ va̱ʼaní kúúmií ta̱ Jesús.
IIN ña̱ va̱ʼaní kúúmií ta̱ Jesús kúú ña̱ kúnda̱a̱-inira xíʼin ña̱ ndóʼo miíyó na̱ yiví ta ndíʼi̱ní-inira xa̱ʼa̱yó. Tá ni̱xi̱yora nu̱ú ñuʼú yóʼo, ku̱si̱í-inira xíʼin na̱ xi̱kusi̱í-ini ta xa̱kura xíʼin na̱ xi̱xaku (Rom. 12:15). Tá kúú, tá nda̱ndikó na̱ 70 discípulo xíʼin ña̱ si̱í-ini xa̱ʼa̱ ña̱ va̱ʼaní xi̱niso̱ʼo na̱ yiví ña̱ sa̱náʼa̱na, saá ta̱ Jesús ni̱kusi̱íní-inira xíʼinna (Luc. 10:17-21). Soo tá xi̱nira ña̱ xáku na̱ yiví xa̱ʼa̱ ña̱ ni̱xi̱ʼi̱ ta̱ Lázaro, ni̱kusuchíní-inira ta xa̱kura xíʼinna (Juan 11:13).
2. ¿Nda̱chun ni̱ndi̱ʼi̱-ini ta̱ Jesús xíʼin ña̱ ndóʼo na̱ yiví?
2 Ni su̱ví ta̱ yiví ku̱a̱chi níxikuu ta̱ Jesús soo ku̱ndáʼvi-inira xi̱nira na̱ yiví ku̱a̱chi. ¿Ndáa xa̱ʼa̱ kúú ña̱ saá ni̱xi̱yo-inira? Chi xi̱kuni̱níra na̱ yiví. Táki̱ʼva xa̱a̱ ni̱ka̱ʼa̱nyó nu̱ú artículo ña̱ ni̱ya̱ʼa, xi̱kuʼvi̱ní-inira xi̱xinira na̱ yiví (Prov. 8:31). Ña̱yóʼo chi̱ndeétáʼan xíʼinra ña̱ va̱ʼa kunda̱a̱-inira ndáaña ndákanixi̱nína. Ta̱ apóstol Juan ni̱ka̱ʼa̱nra ña̱yóʼo: “Xíni̱ va̱ʼara ndáaña íyo ini na̱ yiví” (Juan 2:25). Ta̱ Jesús, xi̱kundáʼviní-inira xi̱xinira na̱ yiví, ta ku̱a̱ʼá na̱yóʼo tá xi̱nina nda̱saa ni̱xi̱yo inira xíʼinna ka̱ndíxana ña̱ na̱túʼunra xíʼinna xa̱ʼa̱ Ndióxi̱. Tá chíka̱a̱kayó ndee̱ ña̱ kundiku̱nyó yichi̱ra, saá kúú ña̱ ndani̱ʼikayó na̱ yiví na̱ kúni̱ sakuaʼa xa̱ʼa̱ Ndióxi̱ (2 Tim. 4:5).
3, 4. a) Tá kúnda̱a̱-iniyó xíʼin ña̱ ndóʼo na̱ yiví, ¿ndáaña chindeétáʼan xíʼinyó ña̱ ku̱ʼu̱nyó natúʼunyó xíʼinna xa̱ʼa̱ Ndióxi̱? b) ¿Ndáaña ka̱ʼa̱nyó xa̱ʼa̱ nu̱ú artículo yóʼo?
3 Ta̱ apóstol Pablo xi̱xini va̱ʼara ña̱ xíniñúʼu ku̱ʼu̱nra natúʼunra xíʼin na̱ yiví xa̱ʼa̱ Ndióxi̱, ta saátu xíniñúʼu keʼé miíyó (1 Cor. 9:16). Soo tá kúnda̱a̱-iniyó xíʼin ña̱ ndóʼo na̱ yiví ta ndíʼi̱-iniyó xa̱ʼa̱na, ku̱ʼu̱nyó natúʼunyó xíʼinna xa̱ʼa̱ ña̱ kúni̱yó chindeétáʼanyó xíʼinna, ta su̱ví xa̱ʼa̱ ña̱ kúni̱ kuitíyó saxi̱nuyó chiñuyó kúúña. Kúnda̱a̱-iniyó ña̱ “tá táxiyó ña̱ʼa ndaʼa̱ inkana ndeéka kúsi̱í-iniyó ta su̱víka ña̱ ndákiʼinyóña” (Hech. 20:35). Tá ndákaʼányó xa̱ʼa̱ ña̱yóʼo kusi̱íníka-iniyó tá ku̱a̱ʼa̱nyó nátúʼunyó xíʼin na̱ yiví.
4 Nu̱ú artículo yóʼo, ka̱ʼa̱nyó xa̱ʼa̱ ndáaña kivi keʼéyó ta na̱ʼa̱yó ña̱ kúnda̱a̱-iniyó xíʼin ña̱ ndóʼo na̱ yiví ta kundi̱ʼi̱-iniyó xa̱ʼa̱na tá ku̱a̱ʼa̱nyó natúʼunyó xíʼinna xa̱ʼa̱ Ndióxi̱. Ña̱ nu̱ú, ka̱ʼa̱nyó xa̱ʼa̱ nda̱saa xi̱xito ta̱ Jesús na̱ yiví ta ndáaña sákuaʼayó xíʼin ña̱yóʼo. Saátu ka̱ʼa̱nyó xa̱ʼa̱ ku̱mí ña̱ʼa ña̱ kivi keʼéyó ña̱ va̱ʼa kundiku̱nyó yichi̱ra (1 Ped. 2:21).
¿NDA̱SAA NI̱NA̱ʼA̱ TA̱ JESÚS ÑA̱ NI̱NDI̱ʼI̱-INIRA XA̱ʼA̱ NA̱ YIVÍ NA̱ SA̱NÁʼA̱RA?
Ta̱ Jesús na̱túʼunra tu̱ʼun va̱ʼa xíʼin na̱ yiví saáchi ku̱nda̱a̱-inira xíʼin ña̱ ndóʼona. Koto párrafo 5 xíʼin 6).
5, 6. a) ¿Ndáana ni̱ndi̱ʼi̱-ini ta̱ Jesús xa̱ʼa̱? b) Nda̱a̱ táki̱ʼva ni̱ka̱ʼa̱n Isaías 61:1, 2, ¿nda̱chun ku̱ndáʼvi-ini ta̱ Jesús xi̱nira na̱ yiví na̱ sa̱náʼa̱ra xa̱ʼa̱ Ndióxi̱?
5 Ná ka̱ʼa̱nyó xa̱ʼa̱ iin yichi̱, tá ni̱na̱ʼa̱ ta̱ Jesús ña̱ ku̱nda̱a̱-inira xíʼin ña̱ ndo̱ʼo na̱ xi̱ndiku̱nñaʼá ta ni̱ndi̱ʼi̱-inira xa̱ʼa̱na. Miíra xíʼin na̱ xi̱ndiku̱nñaʼá na̱túʼunnína xa̱ʼa̱ Ndióxi̱ ta ni va̱ása níndakiʼin ndee̱na. Ni va̱ása níxi̱yo tiempona ña̱ kuxuna. Xa̱ʼa̱ ña̱yóʼo ta̱ Jesús ni̱xa̱ʼa̱nra xíʼinna iin nu̱ú kǒo na̱ yiví ña̱ va̱ʼa kundoona ndakiʼin ndee̱na. Soo iin tiʼvi na̱ yiví, ni̱xa̱ʼa̱nna nda̱a̱ nu̱ú ndóona. ¿Ndáaña ke̱ʼé ta̱ Jesús tá xi̱nira ndiʼi na̱ yiví kán? “Ku̱ndáʼvi-inira xi̱niranab chi íyona táki̱ʼva íyo tí ndikachi tí kǒo pastor. Ta ki̱xáʼara sa̱náʼa̱rana ku̱a̱ʼání ña̱ʼa” (Mar. 6:30-34).
6 ¿Nda̱chun ku̱ndáʼvi-ini ta̱ Jesús xi̱nirana? Saáchi xi̱nira na̱ yiví ña̱ “íyona táki̱ʼva íyo tí ndikachi tí kǒo pastor”. Sana ku̱nda̱a̱-inira ña̱ savana kúúna na̱ ndáʼvi ta xíniñúʼu kachíñunína ña̱ va̱ʼa taxina ña̱ kuxu na̱ veʼena. Inkatuna sana ni̱xi̱ʼi̱ na̱ veʼena ta xi̱kusuchíní-inina. Sana ku̱nda̱a̱va-inira xa̱ʼa̱ nda̱saa ni̱xi̱yona saáchi nda̱a̱ miíra saá ndo̱ʼo, táki̱ʼva xa̱a̱ ni̱ka̱ʼa̱nyó nu̱ú artículo ña̱ ni̱ya̱ʼa. Xa̱ʼa̱ ña̱ ni̱ndi̱ʼi̱ní-inira xa̱ʼa̱na ña̱kán ni̱xa̱ʼa̱nra na̱túʼunra xíʼinna xa̱ʼa̱ Ndióxi̱ (kaʼvi Isaías 61:1, 2).c
7. ¿Nda̱saa kivi kundiku̱nyó yichi̱ ta̱ Jesús?
7 ¿Nda̱saa kivi kundiku̱nyó yichi̱ ta̱ Jesús? Tiempo vitin, na̱ yiví “íyona táki̱ʼva íyo ndikachi tí kǒo pastor”, ta íyoní tu̱ndóʼo nu̱úna. Soo miíyó, kúúmiívayó ña̱ xíniñúʼuna: tu̱ʼun Ndióxi̱ (Rev. 14:6). Ña̱kán miíyó kéʼéyó táki̱ʼva ke̱ʼé ta̱ Jesús ta ku̱a̱ʼa̱nyó nátúʼunyó xíʼinna xa̱ʼa̱ Ndióxi̱ chi kúndáʼvi-iniyó xíniyó na̱ ndáʼvi (Sal. 72:13). Kúndáʼviní-iniyó xíniyó na̱ yiví ta ndúkúyó ndáaña keʼéyó ña̱ va̱ʼa chindeétáʼanyó xíʼinna.
¿NDA̱SAA NÁʼA̱YÓ ÑA̱ NDÍʼI̱-INIYÓ XA̱ʼA̱ NA̱ YIVÍ NA̱ SÁNÁʼA̱YÓ?
Ná ndakanixi̱níyó xa̱ʼa̱ ndáa ña̱ʼa kúú ña̱ xíniñúʼu iin iin na̱ yiví. (Koto párrafo 8 xíʼin 9).
8. ¿Ndáaña kivi chindeétáʼan xíʼinyó ña̱ va̱ʼa ndi̱ʼi̱ka-iniyó xa̱ʼa̱ na̱ yiví na̱ ku̱a̱ʼa̱nyó sánáʼa̱yó? Ka̱ʼa̱n xa̱ʼa̱ iin ejemplo.
8 Ña̱ va̱ʼa ndi̱ʼi̱ka-iniyó xa̱ʼa̱ ña̱ ndóʼo na̱ ku̱a̱ʼa̱nyó sánáʼa̱yó, xíniñúʼu kunda̱a̱ va̱ʼa iniyó xa̱ʼa̱ ña̱ ndákanixi̱nína xíʼin ña̱ ndóʼona, ta vií keʼéyó xíʼinna táki̱ʼva kúni̱yó ná keʼéna xíʼinyód (Mat. 7:12). Ná ka̱ʼa̱nyó xa̱ʼa̱ ku̱mí ña̱ʼa ña̱ kivi chindeétáʼan xíʼinyó ña̱ va̱ʼa keʼéyó ña̱yóʼo. Ña̱ nu̱ú, ná ndakanixi̱níyó xa̱ʼa̱ ña̱ xíniñúʼu iin iin na̱ yiví. Tá ku̱a̱ʼa̱nyó nátúʼunyó xa̱ʼa̱ Ndióxi̱ nda̱a̱ táki̱ʼva íyo iin na̱ doctor saá íyoyó. Iin doctor ta̱ xíni va̱ʼa, ndíʼi̱-inira xa̱ʼa̱ iin iin na̱ íxatátanra. Ndáka̱tu̱ʼunrana ta xíniso̱ʼora tá káʼa̱nna xíʼinra ndáaña ndóʼona. Va̱ása kama káʼa̱nra xíʼinna ndáa ta̱tán kúú ña̱ xíniñúʼuna, chi xíto va̱ʼarana ña̱ va̱ʼa kunda̱a̱-inira ndáa ta̱tán kivi chindeétáʼan xíʼinna. Ki̱ʼva saá íyo miíyó, su̱ví iin nu̱ú kúú ña̱ káʼa̱nyó xíʼin ndiʼi na̱ yiví, chi xíto va̱ʼayó ndáa ña̱ʼa kúú ña̱ xíniñúʼu iin iinna ta nda̱saa ndákanixi̱nína.
9. a) ¿Ndáaña va̱ása xíniñúʼu ndakanixi̱níyó? b) ¿Ndáaña xíniñúʼu va̱ʼaka keʼéyó?
9 Va̱ása xíniñúʼu ndakanixi̱níyó ña̱ xa̱a̱ xíni̱vayó ndáaña ndóʼo na̱ yiví na̱ nátúʼunyó xíʼin, ni ña̱ kándíxana ta nda̱chun kándíxanaña (Prov. 18:13). Va̱ʼaka vií ná nda̱ka̱tu̱ʼunyóna tasaá kunda̱a̱-iniyó xa̱ʼa̱ña (Prov. 20:5). Tá kúú, kivi nda̱ka̱tu̱ʼunyóna xa̱ʼa̱ chiñu ña̱ káchíñuna, xa̱ʼa̱ na̱ veʼena, xa̱ʼa̱ ña̱ ndákanixi̱nína xíʼin inkaka ña̱ʼa tá saá kéʼéna ñuu nu̱ú ndóoyó. Ña̱kán miívana ka̱ʼa̱n xíʼinyó nda̱chun xíniñúʼunína ña̱ káʼa̱n tu̱ʼun Ndióxi̱. Tá xa̱a̱ ku̱nda̱a̱-iniyó xa̱ʼa̱na saá kúú ña̱ kivi chindeétáʼanyó xíʼinna táki̱ʼva ke̱ʼé ta̱ Jesús (chitáʼanña xíʼin 1 Corintios 9:19-23).
Ná ndakanixi̱níyó nda̱saa íyo na̱ yiví na̱ nátúʼunyó xíʼin xa̱ʼa̱ Ndióxi̱. (Koto párrafo 10 xíʼin 11).
10, 11. Nda̱a̱ táki̱ʼva káchi 2 Corintios 4:7, 8, ¿ndáaña kúú ña̱ u̱vi̱ ña̱ kivi chindeétáʼan xíʼinyó ña̱ kundi̱ʼi̱-iniyó xa̱ʼa̱ ña̱ ndóʼo na̱ yiví? Ka̱ʼa̱n xa̱ʼa̱ iin na̱ ke̱ʼé ña̱yóʼo.
10 Ña̱ u̱vi̱, ña̱ kivi keʼéyó kúú ña̱ ná ndakanixi̱níyó nda̱saa íyona. Ña̱yóʼo chindeétáʼan xíʼinyó ña̱ kunda̱a̱-iniyó xíʼin ña̱ ndóʼona, chi saátu miíyó íyo tu̱ndóʼo nu̱úyó xa̱ʼa̱ ña̱ kúúyó na̱ yiví ku̱a̱chi (1 Cor. 10:13). Xíni̱yó ña̱ íxayo̱ʼvi̱ña xíʼinyó ña̱ íyoyó nu̱ú ñuyǐví ta̱ Ndi̱va̱ʼa ta mií Jehová kivi chindeétáʼan xíʼinyó ña̱ ndakú koo iniyó (kaʼvi 2 Corintios 4:7, 8).e Soo ná ndakanixi̱níyó nda̱saa íyo na̱ yiví na̱ va̱ása kítáʼan xíʼin Ndióxi̱ ta ni saá chíka̱a̱na ndee̱ ña̱ ya̱ʼana nu̱ú tu̱ndóʼo ña̱ ndóʼona. Táki̱ʼva ke̱ʼé ta̱ Jesús, kúndáʼviní-iniyó xíniyóna ta nátúʼunyó xíʼinna xa̱ʼa̱ ña̱ va̱ʼa ña̱ koo chí nu̱únínu (Is. 52:7).
11 Ná kotoyó ña̱ ndo̱ʼo ta̱ hermano ta̱ naní Sergey. Tá kúma̱níka sakuaʼara xa̱ʼa̱ Jehová, va̱ása si̱í níxi̱yo inira ña̱ natúʼunra xíʼin na̱ yiví. Tá ni̱ya̱ʼa tiempo ki̱xáʼara sákuaʼara xa̱ʼa̱ Biblia. Miíra káʼa̱n: “Tá sa̱kuaʼi̱ xa̱ʼa̱ Biblia ku̱nda̱a̱-inii̱ ña̱ xíniñúʼu natúʼun na̱ cristiano xa̱ʼa̱ ña̱ kándíxana xíʼin inkana. Nda̱kanixi̱níi̱ ña̱ va̱ása kuchiñui̱ keʼíi̱ ña̱yóʼo”. Soo ta̱ Sergey nda̱kanixi̱níra xa̱ʼa̱ ña̱ nda̱saa koo na̱ yiví, tá ná va̱ása sakuaʼana xa̱ʼa̱ Jehová ni xa̱ʼa̱ ña̱ sánáʼa̱ Biblia. Káchira: “Kúsi̱íní-inii̱ ta va̱ʼaní kúni̱ xíʼin ña̱ sa̱kuaʼi̱. Ku̱nda̱a̱-inii̱ ña̱ saátu na̱ yiví xíniñúʼuní kunda̱a̱-inina xa̱ʼa̱ ña̱ sánáʼa̱ Biblia”. Tá ku̱nda̱a̱-inira xa̱ʼa̱ ña̱yóʼo va̱ása níyi̱ʼvíkara ña̱ ku̱ʼu̱nra natúʼunra xíʼin na̱ yiví xa̱ʼa̱ Ndióxi̱. ¿Ndáaña va̱ʼa nda̱kiʼinra xa̱ʼa̱ ña̱yóʼo? Miíra káʼa̱n: “Nda̱kanda̱ní-inii̱ chi ña̱yóʼo chi̱ka̱a̱kaña ndee̱ xíʼi̱n ña̱ natúʼunkai̱ xíʼin na̱ yiví, ta saátu ña̱ kunda̱a̱ va̱ʼaka-inii̱ xa̱ʼa̱ ña̱ sánáʼa̱ Biblia”.f
Sava na̱ yiví xíniñúʼuna ku̱a̱ʼá tiempo ña̱ va̱ʼa kuaʼnuna xíʼin tu̱ʼun Ndióxi̱. (Koto párrafo 12 xíʼin 13).
12, 13. ¿Nda̱chun xíniñúʼu kúee koo iniyó xíʼin na̱ káʼviyó Biblia xíʼin? Ka̱ʼa̱n xa̱ʼa̱ iin ejemplo.
12 Ña̱ u̱ni̱, ña̱ kivi keʼéyó kúú ña̱ kúee ná koo iniyó xíʼin na̱ káʼviyó Biblia xíʼin. Ná ndakaʼányó chi sana ña̱ nu̱ú kúú ña̱ xíniso̱ʼona ña̱ káʼa̱n Biblia ña̱ xa̱a̱ xíni̱ va̱ʼayó xa̱ʼa̱. Ku̱a̱ʼánína kándíxanína ña̱ káʼa̱n na̱ veʼe-ñu̱ʼuna, ta sana ndákanixi̱nína ña̱yóʼo kúú ña̱ chíndeétáʼan xíʼinna ña̱ va̱ʼa kítáʼanna xíʼin na̱ veʼena, saátu ña̱ ndíku̱nna costumbre na̱ ñuuna. ¿Nda̱saa kivi chindeétáʼanyó xíʼinna?
13 Ná ndakanixi̱níyó xa̱ʼa̱ ña̱yóʼo. ¿Ndáaña kéʼéna tá xa̱a̱ ku̱yatá iin puente? Na̱ yiví yáʼakavana nu̱ú puente ña̱ yatá nani ku̱a̱ʼa̱n kúva̱ʼa puente ña̱ xa̱á. Tá ndi̱ʼi ke̱ʼéna puente yóʼo saá sándiʼi-xa̱ʼa̱na ña̱ yatá. Ki̱ʼva saá kéʼéyó xíʼin na̱ yiví, tá kúma̱níka ka̱ʼa̱nyó xíʼin iinna ña̱ ná sandákoona ña̱ sánáʼa̱ na̱ veʼe-ñu̱ʼuna xíʼin inkaka ña̱ kándíxana, xíniñúʼu siʼna chindeétáʼanyó xíʼinna ña̱ ná kuʼvi̱-inina kunina ña̱ sánáʼa̱ tu̱ʼun Ndióxi̱, chi iin ña̱ xa̱á kúú ña̱yóʼo nu̱úna. Saá kúú ña̱ kuni̱na sandákoona ña̱ kándíxana. Ta kivi ya̱ʼa ku̱a̱ʼá tiempo saá nasamana ña̱ ndíku̱nna (Rom. 12:2).
14, 15. Ka̱ʼa̱n nda̱saa kivi chindeétáʼanyó xíʼin iin na̱ yiví na̱ va̱ása xíni̱ xa̱ʼa̱ ña̱ kooyó nu̱ú iin ñuʼú livi ndiʼi saá tiempo.
14 Tá kúee íyo iniyó xíʼin na̱ yiví, va̱ása kundatuyó ña̱ xa̱a̱ ndi̱ku̱n kama kandíxana á kunda̱a̱-inina xíʼin ña̱ káʼa̱n Biblia. Tá kíʼinyó kuenta xíʼin ña̱ ndóʼona saá kuniñúʼu viíyó Biblia ña̱ chindeétáʼanyó xíʼinna ndiʼi tiempo ña̱ xíniñúʼunaña. Tá kúú, ná ndakanixi̱níyó xa̱ʼa̱ ña̱ káʼa̱n Biblia xíʼinyó ña̱ kundooyó ndiʼi tiempo nu̱ú iin ñuʼú livi. Ku̱a̱ʼánína va̱ása xíni̱na xa̱ʼa̱ ña̱yóʼo. Savana ndákanixi̱nína ña̱ tá xíʼi̱yó kǒoka ña̱ ndátuyó. Ta inkana ndákanixi̱ní ña̱ ndiʼi na̱ va̱ʼa ku̱a̱ʼa̱nna koona chí ndiví. ¿Nda̱saa kivi chindeétáʼanyó xíʼinna ña̱ xa̱a̱na kandíxana ña̱ sánáʼa̱ Biblia?
15 Iin ta̱ hermano káʼa̱nra xa̱ʼa̱ ña̱ kéʼéra. Ña̱ nu̱ú, káʼvira Génesis 1:28 nu̱úna ta ndáka̱tu̱ʼunrana ndáa míí xi̱kuni̱ Ndióxi̱ koo na̱ yiví ta nda̱saa xi̱kuni̱ra koona. Ku̱a̱ʼání na̱ yiví ndákuiinna ta káchina, nu̱ú ñuʼú yóʼo xi̱kuni̱ra koona ta si̱íní koona. Saátu káʼvira Isaías 55:11 nu̱úna ta ndáka̱tu̱ʼunrana á xa̱a̱ na̱sama ña̱ xi̱kuni̱ Ndióxi̱. Ku̱a̱ʼána káʼa̱nna ña̱ va̱ása nínasamaña. Tándíʼi káʼvitura Salmo 37:10, 11 nu̱úna ta ndáka̱tu̱ʼunrana: “Nda̱a̱ táki̱ʼva káchi Biblia, ¿nda̱saa koo na̱ yiví chí nu̱únínu?”. Xíʼin ña̱yóʼo chíndeétáʼanra xíʼin savana ña̱ va̱ʼa kunda̱a̱-inina ña̱ kúni̱kava Ndióxi̱ koo na̱ yiví va̱ʼa nu̱ú ñuʼú livi ndiʼi saá tiempo.
Ña̱ kivi keʼéyó ña̱ va̱ʼa chindeétáʼanyó xíʼin na̱ yiví, kúú ña̱ chindaʼáyó iin carta ndaʼa̱na xíʼin tu̱ʼun va̱ʼa, ña̱ kivi chindeétáʼan xíʼinna. (Koto párrafo 16 xíʼin 17).
16, 17. Xa̱ʼa̱ ña̱ káʼa̱n Proverbios 3:27, ¿nda̱saa kivi na̱ʼa̱yó ña̱ kúnda̱a̱-iniyó xíʼin ña̱ ndóʼo na̱ yiví ta ndíʼi̱-iniyó xa̱ʼa̱na? Ka̱ʼa̱n xa̱ʼa̱ iin ejemplo.
16 Ña̱ ku̱mí, ña̱ kivi keʼéyó kúú ña̱ ná ndakanixi̱níyó nda̱saa kivi na̱ʼa̱yó ña̱ va̱ʼa íyo iniyó xíʼin na̱ yiví. Tá kúú, tá káni ndaʼa̱yó yéʼé iin na̱ yiví, ta su̱ví hora ña̱ xíniñúʼu keʼéyóña kúúña nu̱úna, kivi ndukúyó ña̱ káʼnu-ini nu̱úna ta ka̱ʼa̱nyó xíʼinna ña̱ inka yichi̱ ndikóyó. Tá xíniñúʼuna ña̱ chindeétáʼanyó xíʼinna ña̱ keʼéna iin chiñu loʼo á ña̱ va̱ása kívi kitana ku̱ʼu̱nna satána, saá kúú ña̱ kivi chindeétáʼanyó xíʼinna (kaʼvi Proverbios 3:27).g
17 Ná kotoyó ndáaña kúu tá kúnda̱a̱-iniyó xíʼin ña̱ ndóʼo inkana ta ndíʼi-iniyó xa̱ʼa̱na. Tá ku̱nda̱a̱-ini iin ñá hermana, ña̱ ni̱xi̱ʼi̱ se̱ʼe iin na̱ familia mií ki̱vi̱ ña̱ ka̱ku ña̱ loʼo yóʼo, keʼéña iin ña̱ʼa ña̱ loʼo ña̱ va̱ʼa chindeétáʼanñá xíʼinna, ka̱ʼyíña iin carta nu̱ú ni̱ka̱ʼa̱nñá xíʼinna nda̱saa sándi̱ko ña̱ sánáʼa̱ Biblia iniyó. ¿Nda̱saa ku̱u ini na̱ familia kán? Ñá ni̱xi̱ʼi̱ se̱ʼe, nda̱kuiinñá carta ña̱ ka̱ʼyí ñá hermana ta ka̱chiñá: “Kuni ni̱kusuchíkaví-inii̱. Sana va̱ása kúnda̱a̱-iniún nda̱saa chi̱ndeétáʼan tu̱ʼun ña̱ ka̱ʼyíún xíʼinndi̱. Va̱ása kúnda̱a̱-inii̱ nda̱saa taxii̱ tíxa̱ʼvi ndaʼún xa̱ʼa̱ ña̱ va̱ʼaní chi̱ndeétáʼan tu̱ʼun ña̱ ni̱ka̱ʼún xíʼinndi̱. Kuni, nda̱a̱ 20 yichi̱ ka̱ʼvii̱ carta ña̱ chi̱ndaʼún ndaʼa̱ndi̱. Nda̱kanda̱ní-inii̱ ña̱ va̱ʼaní-iniún xíʼinndi̱, ta kúni̱níún xíniún ndi̱ʼi̱ ta chíka̱a̱ún ndeé xíʼinndi̱. Xíʼin ndiʼi níma̱ndi̱ táxindi̱ tíxa̱ʼvi ndaʼún”. Ña̱ ndixa kúúña, tá kúnda̱a̱-iniyó xíʼin ña̱ ndóʼo inkana kivi chindeétáʼanyó xíʼinna ta kundi̱ʼi̱-iniyó xa̱ʼa̱na.
VA̱ÁSA NDAKANIXI̱NÍYÓ ÑA̱ NDÁYÁʼVINÍYÓ XA̱ʼA̱ CHIÑU ÑA̱ KÉʼÉYÓ
18. Xa̱ʼa̱ ña̱ káʼa̱n 1 Corintios 3:6, 7, ¿nda̱saa xíniñúʼu kotoyó chiñu ña̱ kéʼéyó tá ku̱a̱ʼa̱nyó natúʼunyó xa̱ʼa̱ Ndióxi̱?
18 Va̱ása ndakanixi̱níyó ña̱ ndáyáʼviníyó xa̱ʼa̱ ña̱ kéʼéyó tá ku̱a̱ʼa̱nyó natúʼunyó xa̱ʼa̱ Ndióxi̱. Ni chíndeétáʼanyó xíʼin na̱ yiví ña̱ kuyatinna nu̱ú Ndióxi̱, soo su̱ví miíyó kúú na̱ ndáyáʼvika (kaʼvi 1 Corintios 3:6, 7).h Chi mií Jehová kúú ta̱ kána na̱ yiví ña̱ ná kuyatinna nu̱úra (Juan 6:44). Ta mií na̱ yiví kúú na̱ ka̱ʼa̱n á kandíxana ña̱ sánáʼa̱ Biblia á va̱ása kandíxanaña (Mat. 13:4-8). Ná ndakaʼányó chi ku̱a̱ʼání na̱ yiví va̱ása níxiinna kandíxana ña̱ sa̱náʼa̱ ta̱ Jesús, ni xi̱kuura iin maestro ta̱ va̱ʼaní nu̱ú ndiʼina. Xa̱ʼa̱ ña̱yóʼo ná va̱ása ndakava-iniyó tá xítoyó ña̱ ku̱a̱ʼá na̱ yiví na̱ nátúʼunyó xíʼin va̱ása xíinna kuniso̱ʼona ña̱ sánáʼa̱yó.
19. ¿Ndáaña va̱ʼa ndakiʼinyó tá ná ndi̱ʼi̱-iniyó xa̱ʼa̱ na̱ yiví na̱ sánáʼa̱yó?
19 Ku̱a̱ʼání ña̱ va̱ʼa ndakiʼinyó tá kúnda̱a̱-iniyó xíʼin ña̱ ndóʼo na̱ ku̱a̱ʼa̱nyó sánáʼa̱yó ta chíndeétáʼanyó xíʼinna. Kusi̱íníka-iniyó keeyó natúʼunyó xíʼin na̱ yiví, saátu tá xítona ña̱ ndíʼi̱-iniyó xa̱ʼa̱na, sana kuni̱na kandíxana ña̱ káʼa̱n tu̱ʼun Ndióxi̱ (Hech. 13:48). Ña̱kán tá kúúmiíkayó tiempo, ná keʼéyó ña̱ va̱ʼa xíʼin ndiʼina (Gál. 6:10). Saá kúú ña̱ kusi̱íníka-iniyó ña̱ ndasakáʼnuyó yiváyó Jehová (Mat. 5:16).
YAA 64 Ná kachíñuyó ki̱vi̱ nu̱ú ndíʼi
a Tá ndíʼi̱-iniyó xa̱ʼa̱ na̱ yiví na̱ ku̱a̱ʼa̱nyó sánáʼa̱yó xa̱ʼa̱ Ndióxi̱, saá kúú ña̱ si̱íníka íyo iniyó ta nda̱a̱ ndáni̱ʼikayó na̱ kúni̱ kuyatin nu̱úra. ¿Nda̱chun? Nu̱ú artículo yóʼo ka̱ʼa̱nyó xa̱ʼa̱ ña̱ ke̱ʼé ta̱ Jesús, ta saátu kotoyó ku̱mí ña̱ʼa ña̱ kivi chindeétáʼan xíʼinyó ña̱ va̱ʼa kundi̱ʼi̱ka-iniyó xa̱ʼa̱ na̱ yiví na̱ ku̱a̱ʼa̱nyó sánáʼa̱yó.
b ÑA̱ KÚNI̱ KACHIÑA: Tu̱ʼun kúndáʼvi-ini kúni̱ kachiña ña̱ “xo̱ʼvi̱-iniyó kuniyó iin na̱ ndóʼo tu̱ndóʼo á iin na̱ xóʼvi̱”. Xa̱ʼa̱ ña̱yóʼo tá kúndáʼvi-iniyó xíniyó iin na̱ yiví keʼéyó iin ña̱ʼa ña̱ chindeétáʼanyó xíʼinna.
c Isaías 61:1, 2: “Espíritu mií Jehová íyo xíʼi̱n, xa̱ʼa̱ ña̱yóʼo nda̱ka̱xinra yi̱ʼi̱ ña̱ ka̱ʼi̱n xa̱ʼa̱ tu̱ʼun va̱ʼa xíʼin na̱ yiví na̱ ndáʼvi. Chi̱ndaʼára yi̱ʼi̱ ña̱ ku̱ʼi̱n chindeéi̱ na̱ kúsuchí-ini, ña̱ ku̱ʼi̱n ka̱ʼi̱n xa̱ʼa̱ na̱ ndási ta tavái̱na nu̱ú ñúʼuna; ta ku̱ʼi̱n natúʼi̱n xa̱ʼa̱ tiempo ña̱ keʼé Jehová ña̱ va̱ʼa, xíʼin xa̱ʼa̱ ki̱vi̱ ña̱ ndatiinra ku̱a̱chi; ta sandi̱koi̱-ini ndiʼi na̱ yiví na̱ kúsuchí-ini”.
d Koto artículo “Siga la Regla de Oro en su ministerio”, nu̱ú Tutu Ña̱ Nátúʼun xíʼinyó 15 tí mayo 2014.
e 2 Corintios 4:7, 8: “Soo kúúmiíyó tesoro yóʼo ña̱ ndíka̱a̱ ti̱xin vaso ña̱ ñuʼú, ña̱kán ndee̱ Ndióxi̱ kúú ña̱ chindeétáʼan xíʼinyó ta su̱ví ndee̱ miíyó kuniñúʼuyó. Yáʼayó nu̱ú ku̱a̱ʼání tu̱ndóʼo, soo kǒo ndákava-iniyó; ni íxayo̱ʼvi̱ña xíʼinyó chi kúchiñuvayó yáʼayó nu̱úña”.
g Proverbios 3:27: “Keʼé ña̱ va̱ʼa xíʼin na̱ xíniñúʼuña, tá kúúmiíún ña̱ kivi keʼúnña”.
h 1 Corintios 3:6, 7: “Yi̱ʼi̱ chi̱ʼi, ta̱ Apolos ni̱ko̱so̱, ta Ndióxi̱ kúú ta̱ sa̱kuaʼnuña; xa̱ʼa̱ ña̱yóʼo su̱ví na̱ chíʼiña kúú na̱ ndáyáʼvi, ni na̱ kóso̱ña, chi Ndióxi̱ kúú ta̱ sákuaʼnuña”.