Tá táxi Ndióxi̱ castigo, ¿á ku̱a̱ʼá tiempo táxira ña̱ ndandikó-inina xa̱ʼa̱ ña̱ kéʼéna?

NA̱ KÁʼA̱N ti̱xin tú radio kúú na̱ xíni̱ á koon sa̱vi̱. Tá kúnda̱a̱-inina ña̱ va̱xi sa̱vi̱ tá ndeéní sa̱tá iin ñuu káʼnu, ta xa̱ʼa̱ ña̱ ndíʼi̱-inina xa̱ʼa̱ na̱ yiví, kama nátúʼunna xíʼinna xa̱ʼa̱ ña̱yóʼo, ña̱ va̱ʼa ka̱kuna.

Ki̱ʼva saá íyo ña̱ kéʼé Jehová, káʼa̱nra xíʼin ndiʼi na̱ yiví na̱ ndóo nu̱ú ñuʼú yóʼo xa̱ʼa̱ ña̱ kundoʼona ña̱ íyo nda̱a̱ táki̱ʼva íyo sa̱vi̱ tá ndeéní, tá ndáa ni iin yichi̱ ta̱ʼán kunina koon. ¿Ndáa ki̱ʼva kéʼéraña? ¿Nda̱chun va̱ʼa kúnda̱a̱-iniyó ña̱ ku̱a̱ʼá tiempo táxira ndaʼa̱ na̱ yiví ña̱ ndandikó-inina? Ña̱ va̱ʼa kunda̱a̱-iniyó xa̱ʼa̱ ña̱yóʼo, ná ka̱ʼa̱nyó xa̱ʼa̱ sava ña̱ ni̱ka̱ʼa̱n Jehová xíʼin na̱ xi̱ndoo tá tiempo xi̱naʼá.

ÑA̱ NI̱KA̱ʼA̱N NDIÓXI̱ TÁ TIEMPO XI̱NAʼÁ

Tá tiempo xi̱naʼá, Jehová ku̱a̱ʼá yichi̱ ni̱ka̱ʼa̱nra ña̱ taxira castigo ndaʼa̱ na̱ va̱ása xíniso̱ʼo ña̱ káʼa̱nra (Prov. 10:25; Jer. 30:23). Ndiʼi yichi̱ ña̱ ku̱u ña̱yóʼo, xa̱a̱ ya̱chi̱kaví ni̱ka̱ʼa̱nra xíʼinna xa̱ʼa̱ tu̱ndóʼo ña̱ kixi nu̱úna ña̱ íyo nda̱a̱ táki̱ʼva íyo sa̱vi̱ tá ndeéní, ta ni̱ka̱ʼa̱nra xíʼinna ndáaña xíniñúʼu kéʼéna ña̱ va̱ʼa sákusi̱ína-inira (2 Rey. 17:12-15; Neh. 9:29, 30). Ta ña̱ va̱ʼa chika̱a̱ra ndee̱ xíʼinna ña̱ keʼéna ña̱ va̱ʼa, xi̱niñúʼura na̱ ndásakáʼnu-ñaʼá na̱ ndóo nu̱ú ñuʼú yóʼo ña̱ ka̱ʼa̱nna xíʼinna xa̱ʼa̱ ña̱ kundoʼona, ta saátu xa̱ʼa̱ ña̱ xíniñúʼu ndi̱ku̱n nasamana miína (Amós 3:7).

Iin ta̱ ke̱ʼé ña̱yóʼo xi̱kuu ta̱ Noé. Ku̱a̱ʼání ku̱i̱ya̱ na̱túʼunra xíʼin na̱ yiví na̱ xi̱keʼé ña̱ va̱ása va̱ʼa, xa̱ʼa̱ ña̱ si̱lóʼo kúma̱ní ña̱ koon sa̱vi̱ kini (Gén. 6:9-13, 17). Ta saátu, ni̱ka̱ʼa̱nra xíʼinna xa̱ʼa̱ ndáaña xíniñúʼu keʼéna ña̱ va̱ʼa ka̱kuna. Ta xa̱ʼa̱ ña̱ chi̱ka̱a̱níra ndee̱ ña̱ ke̱ʼéra ña̱yóʼo, ni̱xa̱a̱ra xi̱kunaníra iin ta̱ va̱ʼaní nátúʼun xa̱ʼa̱ Ndióxi̱ (2 Ped. 2:5).

Ni chi̱ka̱a̱ní ta̱ Noé ndee̱ ña̱ na̱túʼunra xíʼin na̱ yiví na̱ xi̱ndoo tá tiempo ña̱ ni̱xi̱yora, va̱ása níxiniso̱ʼona ña̱ ni̱ka̱ʼa̱nra ta ni va̱ása níkandíxana Ndióxi̱. Xa̱ʼa̱ ña̱yóʼo, ndi̱ʼi-xa̱ʼa̱ ndiʼina tá kóon sa̱vi̱ kini (Mat. 24:39; Heb. 11:7). Soo va̱ása níkivi ka̱ʼa̱nna ña̱ kǒo níndatúʼun Ndióxi̱ xíʼinna, xa̱ʼa̱ ña̱ kundóʼona.

Saátu inkaka yichi̱, xa̱a̱ ya̱chi̱ví ni̱ka̱ʼa̱n Jehová xíʼin na̱ yiví, xa̱ʼa̱ castigo ña̱ kixi nu̱úna ña̱ íyo nda̱a̱ táki̱ʼva íyo sa̱vi̱ tá ndeéní. Soo, ta̱xikara ku̱a̱ʼá tiempo ndaʼa̱na ña̱ va̱ʼa nasamana ña̱ kéʼéna. Saá ke̱ʼéra tá ta̱xira u̱xu̱ plaga ndaʼa̱ na̱ ñuu Egipto. Tá kúú, ná kotoyó ña̱ ku̱u tá kúma̱níka kixaa̱ plaga ña̱ u̱xa̱, tá ko̱on ñíʼin á ñíí ña̱ ndeéní. Jehová chi̱ndaʼára ta̱ Moisés xíʼin ta̱ Aarón, ña̱ ka̱ʼa̱nna xíʼin ta̱ faraón xíʼin na̱ káchíñu nu̱úra xa̱ʼa̱ ña̱ kundoʼona. Chi ña̱ ñíʼin á ñíí yóʼo kixáʼaña koonña inka ki̱vi̱, ¿á ni̱xi̱yo ku̱a̱ʼá tiempo nu̱úna ña̱ ndukúna nu̱ú ka̱kuna? Ña̱ Biblia káchiña: “Ndiʼi na̱ káchíñu nu̱ú ta̱ faraón na̱ xi̱niso̱ʼo ña̱ ni̱ka̱ʼa̱n Jehová, sa̱kǎkuna na̱ káchíñu nu̱úna xíʼin kití sa̱na̱na. Soo na̱ va̱ása níxiniso̱ʼo ña̱ ni̱ka̱ʼa̱n Jehová sa̱ndákoona na̱ káchíñu nu̱úna xíʼin kití sa̱na̱ chí yuku̱” (Éx. 9:18-21). Ta xa̱a̱ ya̱chi̱ví ni̱ka̱ʼa̱n Jehová xíʼinna xa̱ʼa̱ ña̱yóʼo. Tíxa̱ʼvi ña̱yóʼo, na̱ yiví na̱ xi̱niso̱ʼo ni̱ka̱kuna nu̱ú ña̱ plaga yóʼo.

Ta saátu, ni̱ka̱ʼa̱n Jehová xíʼin ta̱ faraón xíʼin na̱ káchíñu nu̱úra tá si̱lóʼo kúma̱ní ña̱ kixaa̱ plaga ña̱ u̱xu̱. Soo na̱kán va̱ása níxiniso̱ʼona ña̱ ni̱ka̱ʼa̱nra (Éx. 4:22, 23). Xa̱ʼa̱ ña̱kán, xi̱nina tá ni̱xi̱ʼi̱ se̱ʼena na̱ nu̱ú. Iin ña̱ suchí-ini xi̱kuu ña̱yóʼo (Éx. 11:4-10; 12:29). ¿Á ni̱xi̱yo tiempo nu̱úna ña̱ nasamana ña̱ kéʼéna? Ni̱xi̱yovaña. ¿Nda̱chun káʼa̱nyó ña̱yóʼo? Ta̱ Moisés ni̱ka̱ʼa̱nra xíʼin na̱ israelita xa̱ʼa̱ ña̱ kixaa̱ ña̱ plaga yóʼo, ta saátu ni̱ka̱ʼa̱nra xíʼinna ndáaña xíniñúʼu keʼéna ña̱ va̱ʼa sakǎkuna na̱ veʼena (Éx. 12:21-28). Ta, ¿nda̱saa kúú na̱ xi̱niso̱ʼo ña̱ ni̱ka̱ʼa̱nra? Na̱ ni̱ka̱ku ta ke̱ena ña̱ ñuu Egipto xi̱kuu u̱ni̱ millón na̱ yiví. Ta su̱ví nda̱saa na̱ israelita níxikuuna, chi saátu ku̱a̱ʼání na̱ yiví na̱ inka ñuu xíʼin sava na̱ ñuu Egipto (Éx. 12:38; nota).

Nda̱a̱ táki̱ʼva náʼa̱ ña̱ ejemplo yóʼo, Jehová ndiʼi yichi̱ ta̱xira ku̱a̱ʼá tiempo ndaʼa̱ na̱ yiví ña̱ kuniso̱ʼona ña̱ káʼa̱nra (Deut. 32:4). ¿Nda̱chun kéʼéra ña̱yóʼo? Ta̱ apóstol Pedro ni̱ka̱ʼa̱nra ña̱ va̱ása kúni̱ Jehová ña̱ ná ndiʼi-xa̱ʼa̱ ni iin na̱ yiví, chi kúni̱ra ná ndandikó-ini ndiʼina xa̱ʼa̱ ña̱ kéʼéna (2 Ped. 3:9). Chi Ndióxi̱ ndíʼi̱ní-inira xa̱ʼa̱ ndiʼi na̱ yiví. Xi̱kuni̱ra ná ndandikó-inina ta kundiku̱nna consejora, tá kúma̱níka ndatiinra ku̱a̱chi xíʼinna (Is. 48:17, 18; Rom. 2:4).

NÁ KUNISO̱ʼOYÓ ÑA̱ KÁʼA̱N NDIÓXI̱

Saátu tiempo vitin, ndiʼi na̱ yiví xíniñúʼu kuniso̱ʼona ña̱ káʼa̱n Ndióxi̱ xíʼinna. Tá ni̱xi̱yo ta̱ Jesús nu̱ú ñuʼú yóʼo, ni̱ka̱ʼa̱nra ña̱ na̱ ñuyǐví yóʼo ndiʼi-xa̱ʼa̱na ti̱xin ña̱ gran tribulación (Mat. 24:21). Káxiní ni̱ka̱ʼa̱nra xa̱ʼa̱ iin profecía, ña̱ na̱ʼa̱ nu̱ú na̱ ndíku̱nñaʼá ndáaña kuu tá xa̱a̱ kuyatin kixaa̱ ña̱ gran tribulación. Ni̱ka̱ʼa̱nra xa̱ʼa̱ ndiʼi ña̱ xítoyó tiempo vitin (Mat. 24:3-12; Luc. 21:10-13).

Xa̱ʼa̱ ña̱yóʼo, Jehová káʼa̱nra xíʼin ndiʼi na̱ yiví ña̱ ná ndasakáʼnunara ta kuniso̱ʼona ña̱ káʼa̱nra. Kúni̱ra ña̱ ndiʼi na̱ xíniso̱ʼo-ñaʼá vií ná koona, ta saátu ña̱ ndakiʼinna bendición nu̱ú ñuyǐví xa̱á (2 Ped. 3:13). Ña̱ va̱ʼa ná xa̱a̱ na̱ yiví kandíxana ña̱ káʼa̱n Jehová keʼéra, ña̱kán táxira ña̱ kunda̱a̱-inina xa̱ʼa̱ tu̱ʼunra, ta ña̱yóʼo kivi sakǎkuñana. Ta̱ Jesús ni̱ka̱ʼa̱nra ña̱ natúʼunna xa̱ʼa̱ tu̱ʼun Ndióxi̱ iníísaá ñuyǐví (Mat. 24:14). Xa̱ʼa̱ ña̱yóʼo, Jehová xíniñúʼura na̱ ndásakáʼnu-ñaʼá ña̱ natúʼunna xa̱ʼa̱ra xíʼin na̱ yiví na̱ íyo nu̱ú 240 país xíʼin ñuu válí. Kúni̱ra ña̱ ndiʼi na̱ yiví ná kuniso̱ʼona ña̱ káʼa̱nra ña̱ va̱ʼa ka̱kuna nu̱ú tu̱ndóʼo ña̱ íyo nda̱a̱ táki̱ʼva íyo sa̱vi̱ tá ndeéní, ña̱ kixaa̱ tá ná ndatiinra ku̱a̱chi xíʼin na̱ ñuyǐví (Sof. 1:14, 15; 2:2, 3).

Xa̱ʼa̱ ña̱yóʼo, su̱ví ña̱ ndáyáʼvika kúú ña̱ káʼa̱n ña̱ pregunta, xa̱ʼa̱ á ku̱a̱ʼá tiempo táxi Ndióxi̱ ndaʼa̱ na̱ yiví ña̱ ndandikó-inina xa̱ʼa̱ ña̱ kéʼéna. Chi ndiʼi yichi̱ ku̱a̱ʼáva tiempo táxira ndaʼa̱na. Ta ña̱ ndáyáʼvika kúú ña̱ miívana xíniñúʼu ndaka̱xin á nasamana ña̱ kéʼéna nani íyo tiempo nu̱úna. Soo miíyó ná ndakundeéyó natúʼunyó xíʼin ndiʼi na̱ yiví, ña̱ va̱ʼa ka̱kuna tá ná ndiʼi-xa̱a̱ ñuyǐví yóʼo.