Ná kuniñúʼuyó folleto Ndióxi̱ káʼa̱nra tu̱ʼun va̱ʼa xíʼinyó

1. ¿Ndáa ki̱ʼva na̱kuva̱ʼa folleto Ndióxi̱ káʼa̱nra tu̱ʼun va̱ʼa xíʼinyó?

¹ Táki̱ʼva sa̱kuaʼayó nu̱ú Ña̱ Nátúʼunyó xa̱ʼa Reino ña̱ yo̱o̱ julio, iin ña̱ xíniñúʼuníyó ña̱ va̱ʼa nátúʼunyó xa̱ʼa Ndióxi̱ kúú folleto Ndióxi̱ káʼa̱nra tu̱ʼun va̱ʼa xíʼinyó. Nu̱ú tutu yóʼo, texto ña̱ káʼa̱n Biblia xa̱ʼa va̱ása níchinúunaña nu̱úña ña̱ va̱ʼa kaʼvinaña tá káchi míí Biblia. Ndiʼi tutu ña̱ kána na̱kuva̱ʼaña ña̱ va̱ʼa kaʼvi mií na̱ yivíña, soo folleto yóʼo síín íyoña chi xíniñúʼuna iinna sanáʼa̱-ñaʼá xíʼinña. Ña̱kán tá táxiyóña ndaʼa̱na ná ka̱ʼa̱nyó xíʼinna ndáa ki̱ʼva káʼviyóña xíʼin na̱ yiví tasaá va̱ʼa kunina ña̱ liviní ña̱ʼa sakuaʼana nu̱úña (Mat. 13:44).

2. ¿Nda̱saa va̱ʼa kuniñúʼuyó folleto Ndióxi̱ káʼa̱nra tu̱ʼun va̱ʼa xíʼinyó ña̱ yichi̱ nu̱ú?

² Ña̱ yichi̱ nu̱ú. Kivi ka̱ʼún ña̱yóʼo: “Va̱xii̱ kotoi̱ yóʼó chi ku̱a̱ʼání na̱ yiví ndíʼi̱-inina xa̱ʼa ña̱ koo chí nu̱únínu. ¿Á kixa̱a̱ iin ki̱vi̱ ña̱ va̱ʼa ndakundooyó túvi yóʼó? [Kundatún ná ndakuiinna.] Ña̱ Biblia káʼa̱nña xa̱ʼa ña̱ʼa va̱ʼa ña̱ taxi Ndióxi̱ ndaʼa̱yó chí nu̱únínu. Nu̱ú folleto yóʼo va̱xi sava pregunta ña̱ káʼa̱n Biblia xa̱ʼa”. Taxi folleto ndaʼa̱na ta ka̱ʼa̱n xíʼinna ná ndaka̱xinna pregunta ña̱ va̱xi satáña. Ka̱ʼa̱n xíʼinna ndáa ki̱ʼva káʼviyó xíʼin na̱ yiví ta kaʼvi párrafo iin ña̱ va̱xi nu̱ú lección ña̱ nda̱ka̱xinna. Inkatu ña̱ kivi keʼún kúú ña̱ ndaka̱xiún iin pregunta ña̱ va̱xi nu̱ú folleto yóʼo ta na̱ʼa̱ña nu̱úna, ka̱ʼa̱n xíʼinna folleto yóʼo kivi chindeéñaʼá ña̱ va̱ʼa kunda̱a̱-inina ña̱ káʼa̱n Biblia xa̱ʼaña. Tá va̱xi iin video ña̱ kítáʼan xíʼinña nu̱ú jw.org kivi kuniñúʼúnña.

3. Ka̱ʼa̱n ndáa ki̱ʼva kaʼviyó xíʼin na̱ yiví ña̱ kuniñúʼuyó folleto Ndióxi̱ káʼa̱nra tu̱ʼun va̱ʼa xíʼinyó.

³ Nda̱saa kuniñúʼuyóña ña̱ kaʼviyó xíʼin na̱ yiví. 1) Kaʼvi pregunta ña̱ va̱xi letra tu̱ún. 2) Tándi̱ʼi kaʼvi párrafo nu̱úna. 3) Kaʼvi texto ña̱ va̱xi letra cursiva, ña̱ va̱ʼa chindéúnna ña̱ ndakuiinna tá kachi Biblia xa̱ʼa pregunta ña̱ letra tu̱ún. Xíniñúʼu ndakani va̱ʼa xi̱níún xa̱ʼa inka pregunta ña̱ keʼún xíʼinna. 4) Tá íyo inkaka párrafo va̱xi ti̱xin ña̱ pregunta yóʼo keʼé ña̱ xa̱ni̱ka̱ʼa̱nyó xa̱ʼa ña̱ 2 xíʼin ña̱ 3. Tá íyotu iin video ña̱ káʼa̱n xa̱ʼa pregunta yóʼo, ta kúma̱ní kuninaña, va̱ʼa na̱ʼúnña nu̱úna. 5) Tándi̱ʼi ka̱ʼa̱n xíʼinna ná ndakuiinna ña̱ káʼa̱n pregunta, saá kuniún á ndixa na̱kunda̱a̱-inina xíʼinña.

4. ¿Ndáaña chindeé miíyó ña̱ va̱ʼa kuniñúʼu viíyó folleto yóʼo?

⁴ Sakuaʼa va̱ʼa xíʼin tutu yóʼo, ta tá kívi ndiʼi yichi̱ kuniñúʼúnña. Tá kúma̱ní kixaʼún kaʼviún xíʼinna, ndakanixi̱ní xa̱ʼana nda̱saa va̱ʼa kuniñúʼún texto ña̱ va̱xi nu̱ú lección yóʼo xíʼinna ña̱ va̱ʼa ná ndakanixi̱nína xíʼinña tasaá kunda̱a̱ va̱ʼa inina xíʼinña (Prov. 15:28; Hech. 17:2, 3). Tá ná sakuaʼa va̱ʼún xíʼin folleto yóʼo ndiʼi yichi̱ kuni̱ún kuniñúʼunña ña̱ va̱ʼa sanáʼún inkana.