Ná kuniñúʼu viíyó ña̱ libro Enseña

Na̱ yiví na̱ káʼviyó xíʼin tá sakuaʼana ku̱a̱ʼa̱nna xa̱ʼa ña̱ káʼa̱n Biblia ta kíxaʼána kéʼéna ña̱ káʼa̱nña, kúni̱ kachiña xa̱ku̱a̱ʼa̱n xáʼnuna xíʼin tu̱ʼun Ndióxi̱ (Sal. 1:1-3). Tá xíniñúʼu viíyó ña̱ libro Enseña, kuchiñuvayó chindeéyóna ña̱ kuaʼnukana xíʼin tu̱ʼun Ndióxi̱.

Pregunta ña̱ kíxaʼá. Iin iin capítulo kíxaʼáña xíʼin pregunta ta nu̱ú mií capítulo ndani̱ʼíyó respuesta. Va̱ʼa keʼéyóña xíʼinna, ña̱ va̱ʼa ná kutóokana sakuaʼana ña̱ káʼa̱n capítulo yóʼo xa̱ʼa, soo va̱ása kundatunyó ña̱ ndakuiinnaña. Inkatu ña̱ kivi keʼéyó kúúña ka̱ʼa̱nyó xíʼinna ña̱ ná ka̱ʼa̱n loʼona xa̱ʼa iin iin pregunta ña̱ va̱xi yóʼo. Sana su̱víña ka̱ʼa̱nna, soo va̱ása ndi̱ku̱n ka̱ʼa̱nyó xíʼinna ña̱ va̱ása va̱ʼaña. Chi ña̱ ndakuiinna chindeéña miíyó ña̱ kunda̱a̱-iniyó ndáaña kúú ña̱ xíniñúʼu natúʼunkayó xa̱ʼa xíʼinna (Prov. 16:23; 18:13).

Apéndice. Tá xa̱na̱kunda̱a̱-inina xíʼin ña̱ káʼa̱n capítulo, kivi ka̱ʼa̱nyó xíʼinna ña̱ ná kaʼvi miína apéndice ña̱ káʼa̱n xa̱ʼaña. Inka yichi̱ tá ná kaʼviyó xíʼinna va̱ʼa nda̱ka̱tu̱ʼunyóna sava ña̱ʼa, tasaá kuniyó á na̱kunda̱a̱ loʼo inina xíʼinña. Tá va̱ʼatu túviyó ná tavá loʼoyó tiempoyó ña̱ va̱ʼa kaʼviyó iin táʼvi apéndice á iin nííña xíʼinna. Kivi kaʼviyó párrafo ta keʼéyó pregunta xa̱ʼa ña̱yóʼo.

Recuadro nu̱ú va̱xi ña̱ sa̱kuaʼayó. Nu̱ú ndíʼi iin iin capítulo va̱xi iin recuadro nu̱ú ndákuiinña pregunta ña̱ va̱xi chí xa̱ʼa capítulo. Ta ná kaʼviyóña xíʼinna saá kuniyó á na̱kunda̱a̱ va̱ʼa inina xíʼinña ta á kivi natúʼunnaña. Tándi̱ʼi ka̱ʼviyó texto ña̱ va̱xi ini recuadro xíʼinna, ná ka̱ʼa̱nyó xíʼinna ña̱ ná kuniñúʼuna texto yóʼo ña̱ natúʼunna xíʼinyó (Hech. 17:2, 3).