Kundiku̱nndó yichi̱ na̱ profeta: Habacuc
1. ¿Nda̱chun va̱ʼa kúnda̱a̱-iniyó xíʼin ña̱ ndo̱ʼo ta̱ Habacuc?
1 Ña̱ xítoyó ku̱a̱ʼa̱n xáʼnuní tu̱ndóʼo ñuyǐví yóʼo, kivi ndoʼoyó nda̱a̱ tá ndo̱ʼo ta̱ Habacuc, chi ta̱yóʼo ni̱nda̱ka̱tu̱ʼunra Jehová nda̱chun táxira ña̱ íyoní tu̱ndóʼo (Hab. 1:3; 2 Tim. 3:1, 13). Tá ná ndakanixi̱níyó xa̱ʼa ña̱ ni̱ka̱ʼa̱n ta̱ Habacuc xíʼin xa̱ʼa ña̱ nda̱kúní ni̱xi̱yo inira xíʼin Ndióxi̱, ña̱yóʼo chindeéña miíyó ña̱ ndakú koo iniyó tiempo vitin, nani ndátuyó kixa̱a̱ ki̱vi̱ káʼnu Jehová (2 Ped. 3:7).
2. ¿Nda̱saa va̱ʼa koo nda̱kú-iniyó nda̱a̱ tá ki̱ʼva ni̱xi̱yo ta̱ Habacuc?
2 Nda̱kú ná koo iniyó. Ta̱ Habacuc su̱ví nina tu̱ndóʼo ña̱ ndo̱ʼora níndakanixi̱níra xa̱ʼa, ña̱ ni̱ndi̱ʼi̱ka-inira xa̱ʼa kúú chiñu Ndióxi̱ (Hab. 2:1). Jehová ni̱ka̱ʼa̱nra xíʼin ta̱ Habacuc ña̱ sáxi̱nura tu̱ʼun ña̱ ni̱ka̱ʼa̱nra, ta na̱ kándíxa-ñaʼá ka̱kuna (Hab. 2:2-4). ¿Ndáaña kúni̱ kachi ña̱yóʼo xíʼinyó na̱ ndóo tiempo vitin? Ña̱ ndáyáʼvika kúú ña̱ kandíxayó ña̱ kixa̱a̱ tiempo ndiʼi-xa̱ʼa ña̱ kini nu̱úka ña̱ kuxini̱yó ndáa ki̱vi̱ kixa̱a̱ña. Tá ndinuʼu-iniyó kándíxayó Ndióxi̱ ña̱yóʼo chindeé miíyó ña̱ kundi̱ʼi̱ka-iniyó xa̱ʼa ña̱ kakayó natúʼunyó xa̱ʼa Ndióxi̱ (Heb. 10:38, 39).
3. ¿Nda̱chun xíniñúʼu ndasakáʼnuyó Jehová xíʼin ña̱ si̱í-ini?
3 Kúsi̱í-iniyó ña̱ ndásakáʼnuyó Jehová. Ku̱a̱ʼání ña̱ ndoʼoyó tá ná kixaʼá ta̱ Gog ña̱ Magog keʼéra ña̱ ndi̱va̱ʼa xíʼin na̱ ñuu Ndióxi̱ (Ezeq. 38:2, 10-12). Tá ki̱vi̱ xíyo iin guerra ndiʼina ndóʼo. Ndíʼi-xa̱ʼa ña̱ʼana, kǒo ña̱ʼa kuxuna va̱ása ndóokana tá ni̱xi̱yona tá ya̱chi̱. ¿Ndáaña keʼéyó tá saá ná ndoʼoyó? Ta̱ Habacuc xi̱xini̱ra ña̱ kixi tu̱ndóʼo nu̱úra, ña̱kán va̱ʼaka iin chika̱a̱-inira ña̱ ndasakáʼnura Jehová xíʼin ña̱ si̱í-ini (Hab. 3:16-19). Ta saátu miíyó tá ndásakáʼnuyó Jehová xíʼin ña̱ si̱í-ini, ña̱yóʼo chindeéña miíyó ña̱ koo ndakú-iniyó nu̱ú ndiʼi tu̱ndóʼo (Neh. 8:10; Heb. 12:2).
4. ¿Ndáa ña̱ʼa kúú ña̱ xíniñúʼu keʼéyó tiempo vitin xíʼin chí nu̱únínu?
4 Jehová sanáʼa̱kavara na̱ ka̱ku tá ki̱vi̱ ná kixa̱a̱ tu̱ndóʼo káʼnu (Hab. 2:14). Na̱ yiví na̱ ndataku sakuaʼatu na̱yóʼova xa̱ʼa Jehová. Ná natúʼunkayó xa̱ʼara tiempo vitin xíʼin xa̱ʼa ndiʼi ña̱ va̱ʼa ña̱ keʼéra (Sal. 34:1; 71:17).