“Ndakanixi̱níndó xa̱ʼa̱ ña̱yóʼo”

¿Ndáaña kúú ña̱ xíniñúʼu ndakanixi̱níyó xa̱ʼa̱? Filipenses 4:8 káchiña ña̱ xíniñúʼu ndakanixi̱níyó xa̱ʼa̱ ndiʼi ña̱ nda̱a̱, xa̱ʼa̱ ndiʼi ña̱ to̱ʼó, ndiʼi ña̱ va̱ása yaku̱a̱, ndiʼi ña̱ nda̱kú xíʼin ndiʼi ña̱ va̱ʼa. Ta su̱ví ña̱yóʼo kúni̱ kachiña ña̱ ndiʼi tiempo xíniñúʼu ndakanixi̱níyó xa̱ʼa̱ ña̱ va̱xi nu̱ú Biblia. Soo xíniñúʼu ndakanixi̱níyó xa̱ʼa̱ ña̱ sákusi̱í-ini Jehová, ta su̱ví xa̱ʼa̱ ña̱ʼa ña̱ kivi sándakava-iniyó ña̱ va̱ása nda̱kúka koo-iniyó xíʼin Jehová (Sl 19:14).

Ña̱ yo̱ʼvi̱ní kúúña sandákooyó ña̱ ndakanixi̱níyó xa̱ʼa̱ ña̱ va̱ása va̱ʼa. Soo xa̱ʼa̱ ña̱ kúúyó na̱ yiví ku̱a̱chi xíniñúʼu chika̱a̱yó ndee̱ ña̱ sandákooyóña ta saátu ña̱ chi̱ka̱a̱yó ndee̱ ña̱ kuchiñuyó nu̱ú ta̱ Ndi̱va̱ʼa “ta̱ xáʼndachíñu ñuyǐví yóʼo” (2Co 4:4). Xa̱ʼa̱ ña̱ kúúra ta̱ xáʼndachíñu ñuyǐví yóʼo, ndiʼi ña̱ʼa ña̱ va̱xi nu̱ú televisión, radio, Internet á inkaka página ña̱ va̱xi ña̱ kini nu̱ú ña̱ kǒo kútóo Jehová. Ña̱kán xíniñúʼu viíní ndaka̱xinyó ña̱ kotoyó á ña̱ kuniso̱ʼoyó, saáchi ña̱yóʼo kivi nasamaña ña̱ ndákanixi̱níyó ta nda̱a̱ kivi nasa̱ma ña̱ kéʼéyó (Snt 1:14, 15).

TÁNDI̱ʼI XI̱TONDÓ VIDEO NÁ KǑO KEʼÉYÓ ÑA̱ʼA ÑA̱ NDÁSAVITA ÑA̱ NDA̱KÚ ÍYO INIYÓ XÍʼIN NDIÓXI̱: ÑA̱ʼA ÑA̱ KINI XÍTONDE̱ʼÉYÓ Á ÑA̱ XÍSIKÍYÓ, NDAKUIINNDÓ ÑA̱ PREGUNTA YÓʼO:

• 

  ¿Ndáa ña̱ʼa xi̱xito ta̱ hermano nu̱ú celular, ta ndáaña ndo̱ʼora i̱xaa ña̱yóʼo?

• 

  ¿Ndáa ki̱ʼva chi̱ndeé Gálatas 6:7, 8 xíʼin Salmo 119:37 ta̱ hermano yóʼo?