Ndáa ki̱ʼva kuniñúʼuyó tratado ña̱ kixáʼayó natúʼunyó xíʼin na̱ yiví

Nda̱a̱ tá yo̱o̱ enero 2018, ña̱ Tutu nu̱ú va̱xi ña̱ keʼéyó reunión chí nu̱ú kixáʼa ña̱ nu̱ú página, va̱xi sava ña̱ chíndeétáʼan xíʼinyó ña̱ natúʼunyó xíʼin na̱ yiví. Nu̱ú ña̱yóʼo káʼa̱nna xíʼinyó ña̱ xíniñúʼu chika̱a̱yó ndee̱ ña̱ ka̱ʼa̱nyó xíʼin na̱ yiví nu̱úka ña̱ taxi kuitíyó tutu ña̱ kúúmiíyó ndaʼa̱na. Ta inka ña̱ chíndeétáʼan xíʼinyó kúú sava video ña̱ yáʼa ti̱xin reunión nu̱ú sánáʼa̱na miíyó ndáa ki̱ʼva kuniñúʼunyó Biblia ña̱ kixáʼayó natúʼunyó xíʼin na̱ yiví. Soo, ¿á ña̱yóʼo kúni̱ kachiña ña̱ va̱ásaka kuniñúʼukayó tutu ña̱ kúúmiíyó ña̱ nátúʼunyó xíʼin na̱ yiví tá ku̱a̱ʼa̱nyó veʼe tá veʼe? Va̱ása. Chi sava ña̱ tratado kuchiñu kuniñúʼuyóña ña̱ kixáʼayó natúʼunyó xíʼin na̱ yiví. Yóʼo va̱xi sava ña̱ kivi chindeétáʼan xíʼinyó ndáa ki̱ʼva kuniñúʼuyóña:

1. Keʼé pregunta ña̱ va̱xi chí nu̱ú kixáʼa ña̱ nu̱ú página ta kundatu ná ndakuiinna.

2. Na̱ʼa̱yó texto ña̱ va̱xi chí iniña nu̱úna. Tá kúúmiína tiempo, kuchiñu kaʼviyó ña̱ va̱xi nu̱ú tratado yóʼo xíʼinna.

3. Taxiyó tratado yóʼo ndaʼa̱na, ta ka̱ʼa̱nyó xíʼinna ña̱ ná kaʼvina ndiʼi ña̱ va̱xi nu̱úña tá kúúmiína tiempo.

4. Tá xa̱a̱ ku̱yatin ku̱ʼu̱nyó, ná sanáʼa̱yó pregunta ña̱ va̱xi chí xa̱ʼa̱ nu̱úna nu̱ú káʼa̱nña “ndakanixi̱ní xa̱ʼa̱ ña̱yóʼo” ta kindo̱oyó ña̱ ndikóyó inka ki̱vi̱ ña̱ na̱ʼa̱yó ndáa ña̱ káʼa̱n Biblia xa̱ʼa̱ña.

Tá xa̱a̱ ndi̱kóyó, ná ndakuiinyó pregunta ña̱ ki̱ndooyó ka̱ʼa̱nyó xa̱ʼa̱ xíʼinna ta ná ndakooyó inka pregunta ña̱ ndakuiinyó inka ki̱vi̱. Kivi ndaka̱xinyó iin pregunta ña̱ va̱xi nda̱a̱ nu̱ú ndíʼi página ña̱ tratado yóʼo á kivitu ndaka̱xinyó iin pregunta ña̱ va̱xi nu̱ú sitio ña̱ kúúmiíyó chí nu̱ú Internet. Tá va̱ʼaní xi̱niso̱ʼona, ná ndakooyó ña̱ folleto Ndióxi̱ káʼa̱nra tu̱ʼun va̱ʼa xíʼinyó á inka tutu ña̱ kúúmiíyó ña̱ xíniñúʼuyó tá káʼviyó xíʼin na̱ yiví.