¿Ndáana kúú na̱ kítáʼan xíʼún nu̱ú Internet?

¿Ndáaña kéʼé iin na̱ kúú migoyó? Na̱ migoyó kúú iin na̱ kúʼvi̱ní-ini xíni miíyó. Tá xa̱ʼní ta̱ David ta̱ Goliat saá kúú ña̱ va̱ʼaní ni̱xa̱a̱ ta̱ Jonatán ki̱táʼanra xíʼinra (1Sa 18:1). Iin tá iinna xi̱tona ndáaña va̱ʼa kúú ña̱ kúúmiína tasaá va̱ʼaníka ni̱xa̱a̱na ki̱táʼanna. Ña̱kán tá kúni̱yó koo na̱ migoyó, xíniñúʼu taváyó tiempo ta chika̱a̱yó ndee̱ ña̱ kuxini̱ va̱ʼayóna. Va̱ása íxayo̱ʼvi̱víña xíʼinyó koo na̱ migoyó nu̱ú Internet, saáchi xíniñúʼu katavi̱ ndaʼa̱ kuitíyó sa̱tá iin solicitud tasaá xa̱a̱na koona migoyó. Soo na̱ yiví na̱ ndáni̱ʼíyó nu̱ú Internet chíse̱ʼéna ku̱a̱ʼání ña̱ʼa xa̱ʼa̱na, ta sándaana nda̱saa ña̱ kúni̱ kuitína kunda̱a̱-iniyó xa̱ʼa̱. Ña̱kán xíniñúʼu viíní ndaka̱xinyó na̱ koo migoyó nu̱ú Internet, ta tá iin na̱ yiví na̱ va̱ása xíni̱yó chi̱ndaʼána solicitud ndaʼa̱yó, ná va̱ása ndakanixi̱níyó ña̱ xíniñúʼu ndakiʼinyóña xa̱ʼa̱ ña̱ yíʼviyó sa̱a̱na xíʼinyó. Ta xa̱ʼa̱ ña̱ íyoní ña̱ va̱ása va̱ʼa nu̱ú Internet, savana va̱ása xíínna nandukúna na̱ koo migona nu̱ú ña̱yóʼo. Soo tá kúni̱ún koo na̱ migoún nu̱ú Internet, ¿ndáaña xíniñúʼu kiʼún kuenta xíʼin?

TÁNDI̱ʼI XI̱TONDÓ VIDEO ÑA̱ NANÍ TÁ KÍʼVIÚN NU̱Ú INTERNET KUENTA KOÚN, NDAKUIINNDÓ PREGUNTA YÓʼO:

• 

  ¿Ndáaña xíniñúʼu kiʼún kuenta xíʼin tá kúma̱ní sandáún iin ña̱ʼa nu̱ú Internet?

• 

  ¿Nda̱chun xíniñúʼu viíní ndaka̱xiún na̱ koo migoún nu̱ú Internet?

• 

  ¿Nda̱chun xíniñúʼu kiʼinníún kuenta nda̱saa tiempo kuniñúʼún Internet? (Ef 5:15, 16).