ÑA̱ KÉʼÉYÓ NA̱ TESTIGO
Nandukú ndáaña ndákanixi̱ní Jehová
Xa̱ʼa̱ ña̱ kúni̱yó kusi̱í-ini Jehová xíʼin ña̱ kéʼéyó, xíniñúʼu kiʼinyó kuenta á kítáʼanña xíʼin ña̱ ndákanixi̱níra, ta ni tá va̱ása káxi káʼa̱n tu̱ʼun Ndióxi̱ xa̱ʼa̱ ña̱ kúni̱yó keʼéyó ná kiʼinníyó kuenta xíʼinña (Pr 27:11). ¿Ndáa ki̱ʼva keʼéyóña?
Ná kaʼviyó tu̱ʼun Ndióxi̱ ndiʼi ki̱vi̱. Tá káʼviyóña ndiʼi ki̱vi̱ saá kúú ña̱ táváyó tiempo ña̱ kutáʼankayó xíʼin Jehová. Ná kotoyó ndáa ki̱ʼva ke̱ʼé Jehová xíʼin na̱ ñuura ta saátu ná ndakanixi̱níyó xa̱ʼa̱ na̱ ke̱ʼé ña̱ va̱ʼa xíʼin na̱ ke̱ʼé ña̱ va̱ása va̱ʼa, chi ña̱yóʼo chindeétáʼanña xíʼinyó ña̱ kunda̱a̱-iniyó ndáaña ndákanixi̱ní Jehová. Ña̱kán tá yáʼayó nu̱ú tu̱ndóʼo ña̱ yo̱ʼvi̱ní espíritu santo Ndióxi̱ chindeétáʼan xíʼinyó ña̱ ndakaʼányó xa̱ʼa̱ ña̱ ka̱ʼviyó nu̱ú tu̱ʼunra (Jn 14:26).
Ná kaʼvi va̱ʼayó xa̱ʼa̱ña. Tá kúma̱níka ndaka̱xiún ña̱ keʼún, ndakanixi̱ní xa̱ʼa̱ ña̱yóʼo: “¿Ndáa texto ña̱ va̱xi nu̱ú Biblia kúú ña̱ chindeétáʼan xíʼi̱n ña̱ kunda̱a̱-inii̱ ndáaña ndákanixi̱ní Jehová xíʼin ña̱ kúnii̱ keʼíi̱?”. Ka̱ʼa̱n xíʼin Jehová ná chindeétáʼanra xíʼún, kuniñúʼu tutu ña̱ tává na̱ ñuura ña̱ íyo tu̱ʼun miíún ña̱ va̱ʼa ndani̱ʼún ña̱ chindeétáʼan xíʼún ta keʼé ña̱ va̱xi nu̱ú tu̱ʼun Ndióxi̱ (Sl 25:4).
TÁNDI̱ʼI XI̱TONDÓ VIDEO ÑA̱ NANÍ XÍNIÑÚʼU NDAKÚ KOO INIYÓ: NÁ SAKÚAʼA VA̱ʼAKAYÓ XA̱ʼA̱ NDIÓXI̱, NDAKUIINNDÓ PREGUNTA YÓʼO
¿Ndáaña xi̱ ixayo̱ʼvi̱ xíʼin ñá loʼo ñá ni̱ya̱ʼa nu̱ú video yóʼo?
¿Ndáa ki̱ʼva chindeétáʼan tutu ña̱ tává na̱ ñuu Ndióxi̱ xíʼún tá káʼviúnña?
Tá táváyó tiempo ña̱ kaʼviyó ta ndakanixi̱níyó xa̱ʼa̱ña, ¿ndáa ki̱ʼva chindeétáʼanña xíʼinyó ña̱ vií koo ña̱ ndaka̱xinyó keʼéyó? (Heb 5:13, 14).