ÑA̱ KÉʼÉYÓ NA̱ TESTIGO

Chindeétáʼan xíʼin na̱ kǒo xáʼa̱n veʼe-ñu̱ʼu ña̱ kunda̱a̱-inina xa̱ʼa̱ ta̱ i̱xava̱ʼa ndiʼi ña̱ʼa

¿Á kǒo nátúʼún xíʼin na̱ yiví na̱ kǒo xáʼa̱n ni iin veʼe-ñu̱ʼu chi ndákanixi̱níún ña̱ va̱ása kuniso̱ʼona yóʼó? Tá saá ndóʼún, ndakaʼán chi ku̱a̱ʼání na̱ kúú testigo Jehová tiempo vitin tá ya̱chi̱ kǒo níxi̱xa̱ʼa̱nna ni iin veʼe-ñu̱ʼu, ta savana kǒo níxikandíxana ña̱ íyo Ndióxi̱. Sava yichi̱ ña̱ xi̱xiniñúʼuna kúú, ña̱ chindeétáʼan inka na̱ yiví xíʼinna ña̱ kunda̱a̱-inina ña̱ íyova ña̱ náʼa̱ ña̱ ndixa íyo Ndióxi̱ (Ro 1:20; 10:14).

TÁNDI̱ʼI XI̱TONDÓ VIDEO ÑA̱ NANÍ NDAKAʼÁNNDÓ CHI NA̱ KǑO KÁNDÍXA NDIÓXI̱ KIVIVA XA̱A̱NA KANDÍXANARA: NA̱ YIVÍ NA̱ KǑO KÚÚMIÍ IIN RELIGIÓN, NDAKUIINDÓ PREGUNTA YÓʼO:

¿Ndáa ki̱ʼva chíndeétáʼan ña̱ ndo̱ʼo ta̱ Tommaso xíʼún ña̱ natúʼún xíʼin na̱ yiví na̱ kǒo xáʼa̱n veʼe-ñu̱ʼu?

Ña̱ ndakuiún

Ndáa ki̱ʼva keʼúnña

Tá ndáni̱ʼún iin na̱ yiví na̱ kǒo kándíxa Ndióxi̱, vií ka̱ʼún xíʼinna, ta viíní kuniso̱ʼún ña̱ káʼa̱nna xíʼún (2Ti 2:24). Ka̱ʼa̱n xa̱ʼa̱ ña̱ kútóona kuniso̱ʼona. ¿Á kúni̱ na̱ yiví yóʼo kotona ndáaña chi̱ndeétáʼan xíʼin inkana ña̱ kandíxana ña̱ íyo iin ta̱ i̱xava̱ʼa ndiʼi ña̱ʼa? Tá saá íyoña, kuniñúʼu tutu xíʼin video ña̱ kivi chindeétáʼan xíʼin na̱ yiví yóʼo. Ña̱ folleto ¿Es la vida obra de un Creador? Xíʼin El origen de la vida. Cinco cuestiones dignas de análisis xa̱a̱ kúúmiíyóña ti̱xin tutu ña̱ káʼa̱n ndáa ki̱ʼva natúʼunyó xíʼin na̱ yiví ña̱ va̱ʼa kamaka ndani̱ʼúnña.

Tá xa̱ʼa̱, sana yíʼviún natúʼún xíʼin na̱ yiví na̱ kǒo kándíxa ña̱ íyo Ndióxi̱. Tá saá ndóʼún, ka̱ʼa̱n xíʼin iin na̱ publicador na̱ xa̱a̱ ku̱a̱ʼá ku̱i̱ya̱ ñúʼu ti̱xin ñuu Ndióxi̱ ña̱ chindeétáʼanna xíʼún. Ta ndakaʼán: saáchi ni sava na̱ yiví kǒo kandíxana ña̱ íyo Jehová, soo miíra chindeétáʼan xíʼún ña̱ ndani̱ʼún na̱ yiví na̱ kúni̱ sakúaʼa xa̱ʼa̱ra (Hch 13:48).