Ña̱ ka̱ʼnu̱-iniyó: ndáyáʼviní kuumiíyó ña̱yóʼo ña̱ va̱ʼa sakusi̱íyó-ini Jehová

“Tá ki̱xáʼa ta̱ primoi̱ ndáʼyi̱ra xíʼi̱n, ki̱xáʼíi̱ kúʼnii̱ su̱kúnra, ta xi̱kuni̱i̱ kaʼníi̱ra” (Paul).

“Ti̱xin veʼi̱, nda̱a̱ ndáaka ña̱ xi̱keʼéna xíʼi̱n kamaní xi̱sa̱i̱. Ta xi̱sandíʼi-xa̱ʼíi̱ mueble, juguete xíʼin ndiʼika ña̱ʼa ña̱ íyo yatin nu̱úi̱” (Marco).

Sana miíyó va̱ása xa̱a̱víyó keʼéyó táʼan ña̱yóʼo. Soo sava yichi̱, ndiʼiyó íxayo̱ʼvi̱ña xíʼinyó ña̱ ka̱ʼnu̱-iniyó. ¿Nda̱chun? Saáchi ndiʼiyó kúúmiíyó ku̱a̱chi ña̱ sa̱ndáya̱ʼa ta̱ Adán ndaʼa̱yó (Rom. 5:12). Savana íxayo̱ʼvi̱ña xíʼinna ña̱ ka̱ʼnu̱-inina, nda̱a̱ táki̱ʼva ndo̱ʼo ta̱ Paul xíʼin ta̱ Marco. Inkana chíka̱a̱na ndee̱ ña̱ va̱ása ndakanikaxi̱nína xa̱ʼa̱ ña̱ va̱ása va̱ʼa xíʼin xa̱ʼa̱ ña̱ yíʼvina. Ta saátu, inkana íxayo̱ʼvi̱ña xíʼinna ña̱ ka̱ʼnu̱-inina ta va̱ása keʼéna ña̱ kini, ña̱ koʼona ku̱a̱ʼání ndixi á ña̱ kuniñúʼuna droga.

Na̱ va̱ása xáʼnu̱-ini xíʼin ña̱ ndákanixi̱nína, ña̱ kúni̱na, á ña̱ kéʼéna, kivi xa̱a̱na sandíʼi-xa̱ʼa̱na ña̱ tákuna. ¿Ndáaña kivi keʼéyó ña̱ va̱ása kundoʼoyó ña̱yóʼo? Xíniñúʼu sakuaʼayó ka̱ʼnu̱-iniyó. Ña̱ va̱ʼa keʼéyó ña̱yóʼo, ná ka̱ʼa̱nyó xa̱ʼa̱ u̱ni̱ pregunta. Ña̱ nu̱ú, ¿ndáaña kúú ña̱ ka̱ʼnu̱-iniyó? Ña̱ u̱vi̱, ¿nda̱chun ndáyáʼviní kuumiíyó ña̱yóʼo? Ña̱ u̱ni̱, ¿ndáaña kivi keʼéyó ña̱ va̱ʼa kuumiíyó ña̱yóʼo, iin táʼan “ña̱ va̱ʼa ña̱ kúúmií espíritu”? (Gál. 5:22, 23). Ta saátu kotoyó ndáaña kivi keʼéyó, tá íxayo̱ʼvi̱ña xíʼinyó ña̱ ka̱ʼnu̱-iniyó sava yichi̱.

¿NDÁAÑA KÚÚ ÑA̱ KA̱ʼNU̱-INIYÓ?

Na̱ yiví na̱ xáʼnu̱-ini, va̱ása kéʼéna ña̱ kúni̱ miína. Chi na̱yóʼo vií ndákanixi̱nína xa̱ʼa̱ ña̱ ka̱ʼa̱nna á ña̱ keʼéna, chi kúni̱na sakusi̱ína-ini Ndióxi̱.

Xíʼin ña̱ ke̱ʼé ta̱ Jesús, ni̱na̱ʼa̱ra nu̱úyó ndáaña kúni̱ kachi ña̱ ka̱ʼnu̱-iniyó. Ña̱ Biblia káchiña: “Tá ni̱ka̱ʼa̱n ndi̱va̱ʼana xíʼinra kǒo níka̱ʼa̱n ndi̱va̱ʼara xíʼinna. Tá ki̱xáʼara xóʼvi̱ra, kǒo níka̱ʼa̱n ndi̱va̱ʼara xíʼinna. Chi sa̱ndákoora ndiʼi ña̱yóʼo ndaʼa̱ ta̱ nda̱kúní tíin ku̱a̱chi” (1 Ped. 2:23). Tá xi̱tikaa se̱ʼe Ndióxi̱ ndaʼa̱ yitu̱n na̱ sáa̱-ini xíniñaʼá xi̱xaku̱ndaanara, soo ta̱yóʼo ni̱na̱ʼa̱ra ña̱ xíni̱ra ka̱ʼnu̱-inira (Mat. 27:39-44). Saátu ni̱na̱ʼa̱ra ña̱yóʼo, tá xi̱kuni̱ na̱ su̱tu̱ ña̱ ná ka̱ʼa̱nra iin ña̱ va̱ása va̱ʼa, tasaá chika̱a̱na ku̱a̱chira (Mat. 22:15-22). Ta saátu va̱ʼaní ni̱na̱ʼa̱ra ña̱yóʼo, tá xi̱kuni̱ iin tiʼvi na̱ judío kaninara xíʼin yu̱u̱. Nu̱úka ña̱ keʼéra ña̱ va̱ása va̱ʼa xíʼinna, chi̱se̱ʼéra miíra tasaá ki̱tara ini templo (Juan 8:57-59).

¿Á kivi kundiku̱nyó yichi̱ ta̱ Jesús? Kiviva. Ta̱ apóstol Pedro ka̱ʼyíra ña̱yóʼo: “Ta̱ Cristo ni̱xo̱ʼvi̱ra xa̱ʼa̱ ndóʼó, tasaá sa̱ndákoora iin yichi̱ nu̱úndó, ña̱ xíniñúʼu viíní kundiku̱nndó” (1 Ped. 2:21). Ni kúúyó na̱ yiví ku̱a̱chi, kiviva chika̱a̱yó ndee̱ ña̱ kundiku̱nyó yichi̱ ta̱ Jesús. ¿Nda̱chun ndáyáʼviní keʼéyó ña̱yóʼo?

¿NDÁCHUN NDÁYÁʼVINÍ ÑA̱ KA̱ʼNU̱-INIYÓ?

Tá kúni̱yó sakusi̱íyó-ini Jehová xíniñúʼu ka̱ʼnu̱-iniyó. Ni xa̱a̱ ku̱a̱ʼání ku̱i̱ya̱ kúú ña̱ nda̱kú íyo iniyó xíʼinra, kiviva ndiʼi-xa̱ʼa̱ ña̱ kítáʼanyó xíʼinra tá va̱ása xáʼnu̱-iniyó xíʼin ña̱ káʼa̱nyó á ña̱ kéʼéyó.

Ná kotoyó ña̱ ndo̱ʼo ta̱ Moisés, “iin ta̱a ta̱ vitání-ini nu̱ú ndiʼika na̱ ta̱a na̱ ni̱xi̱yo nu̱ú ñuʼú” tá tiempo xi̱naʼá (Núm. 12:3). Ku̱a̱ʼání ku̱i̱ya̱ xi̱niñúʼu kundeé-inira xa̱ʼa̱ ña̱ xi̱ka̱ʼa̱n kúáchi na̱ ñuu Israel xíʼinra. Soo iin ki̱vi̱ va̱ása níxa̱ʼnu̱-inira ta ni̱sa̱a̱níra xíʼinna, chi tuku ki̱xáʼana káʼa̱n kúáchina xa̱ʼa̱ ña̱ kǒo ti̱kui̱í. Ta kue̱ʼe̱ní ni̱ka̱ʼa̱nra xíʼinna: “Kuniso̱ʼo ndóʼó na̱ va̱ása kándíxa. ¿Á kúni̱ndó ña̱ ná tavándi̱ ti̱kui̱í kándíka yu̱u̱ yóʼo koʼondó?” (Núm. 20:2-11).

Ta̱ Moisés va̱ása níxa̱ʼnu̱-inira. Ta va̱ása níndasakáʼnura Jehová, xa̱ʼa̱ ña̱ ke̱ʼéra milagro ña̱ ta̱xira ti̱kui̱í koʼona (Sal. 106:32, 33). Ta xa̱ʼa̱ ña̱yóʼo va̱ása nítaxi Jehová ki̱ʼvira nu̱ú ñuʼú ña̱ ni̱ka̱ʼa̱nra taxira ndaʼa̱na (Núm. 20:12). Sana ndiʼi tiempo ña̱ xi̱taku ta̱ Moisés, nda̱ndikó-inira xa̱ʼa̱ ña̱ va̱ása níxa̱ʼnu̱-inira (Deut. 3:23-27).

¿Ndáaña sákuaʼayó xíʼin ña̱yóʼo? Ni xa̱a̱ ku̱a̱ʼání ku̱i̱ya̱ ndásakáʼnuyó Jehová, xíʼin ña̱ to̱ʼó xíniñúʼu ka̱ʼa̱nyó xíʼin na̱ sása̱a̱ miíyó á na̱ xíniñúʼu taxiyó consejo ndaʼa̱ (Efes. 4:32; Col. 3:12). Ña̱ nda̱a̱ kúúña, tá xa̱a̱ ku̱a̱ʼa̱n kúchéeyó íxayo̱ʼvi̱ña xíʼinyó ña̱ kúee koo iniyó. Soo ná ndakaʼányó xa̱ʼa̱ ña̱ ndo̱ʼo ta̱ Moisés. Va̱ása kúni̱yó sandíʼi-xa̱ʼa̱yó ña̱ kítáʼanyó xíʼin Jehová, xa̱ʼa̱ ña̱ va̱ása kúchiñuyó ka̱ʼnu̱-iniyó. Tá saá, ¿ndáaña xíniñúʼu keʼéyó ña̱ va̱ʼa kuumiíyó ña̱yóʼo?

¿NDÁAÑA XÍNIÑÚʼU KEʼÉYÓ ÑA̱ VA̱ʼA KA̱ʼNU̱-INIYÓ?

Ná ka̱ʼa̱nyó xíʼin Ndióxi̱ taxira espíritu santo ndaʼa̱yó. ¿Nda̱chun xíniñúʼu keʼéyó ña̱yóʼo? Saáchi ña̱ ka̱ʼnu̱-iniyó kúú táʼan ña̱ va̱ʼa ña̱ kúúmií espíritu Ndióxi̱, ta ta̱yóʼo táxiraña ndaʼa̱ na̱ ndúkúña nu̱úra (Luc. 11:13). Jehová xíniñúʼura espíritu santora, ña̱ va̱ʼa taxira ndee̱ ndaʼa̱yó ña̱ na̱ʼa̱yó ña̱yóʼo (Filip. 4:13). Ta saátu kivi chindeétáʼanra xíʼinyó ña̱ kuumiíyó inkaka ña̱ va̱ʼa ña̱ kúúmií espíritu, tá kúú ña̱ kuʼvi̱-iniyó, ña̱yóʼo kivi chindeétáʼanña xíʼinyó ña̱ ndakundeéyó ka̱ʼnu̱-iniyó (1 Cor. 13:5).

Ná va̱ása keʼéyó nda̱a̱ ni iin ña̱ʼa ña̱ kivi ixayo̱ʼvi̱ xíʼinyó ña̱ ka̱ʼnu̱-iniyó. Ná va̱ása ki̱ʼviyó nu̱ú Internet ta kotoyó ña̱ʼa ña̱ va̱ása va̱ʼa, ta saátu ná kiʼinyó kuenta xíʼin ndiʼi ña̱ sísikíyó á ña̱ xítonde̱ʼéyó (Efes. 5:3, 4). Xíniñúʼu kuxíkayó nu̱ú ndiʼi ña̱ʼa ña̱ kivi chindaʼá miíyó ña̱ xa̱a̱yó keʼéyó ña̱ va̱ása va̱ʼa (Prov. 22:3; 1 Cor. 6:12). Iin na̱ yiví na̱ kútóo keʼé ña̱ kini, va̱ása xíniñúʼu kaʼvina libro á kotona película nu̱ú kána na̱ kéʼé táʼan ña̱yóʼo.

Sana íxayo̱ʼvi̱ña xíʼinyó ña̱ kundiku̱nyó consejo yóʼo, soo tá ná chika̱a̱yó ndee̱ ña̱ kundiku̱nyóña, Jehová taxira ndee̱ ndaʼa̱yó ña̱ ka̱ʼnu̱-iniyó xíʼin ña̱ kúni̱yó keʼéyó (2 Ped. 1:5-8). Chindeétáʼanra xíʼinyó ña̱ ka̱ʼnu̱-iniyó xíʼin ña̱ ndákanixi̱níyó, ki̱ʼva ña̱ káʼa̱nyó xíʼin ña̱ kéʼéyó. Chi ta̱ Paul xíʼin ta̱ Marco, na̱ ni̱ka̱ʼa̱nyó xa̱ʼa̱ chí nu̱ú ki̱xáʼa artículo yóʼo, ku̱chiñuna na̱samana ki̱ʼva ña̱ íyona. Ná ndakanixi̱níyó xa̱ʼa̱ iin ta̱ hermano ta̱ kamaní xi̱sa̱a̱ tá xi̱kavara carro. Ta sava yichi̱, nda̱a̱ xi̱ka̱ʼa̱n kúáchira xíʼin inkaka na̱ káva. ¿Ndáaña ke̱ʼéra ña̱ va̱ʼa na̱samara ki̱ʼva ña̱ íyora? Ta̱yóʼo káchira: “Ndiʼi ki̱vi̱ xíʼin ndiʼi níma̱i̱ xi̱ka̱ʼi̱n xíʼin Ndióxi̱. Xi̱kaʼvii̱ artículo ña̱ káʼa̱n xa̱ʼa̱ ña̱ ka̱ʼnu̱-iniyó, ta xi̱sakuaʼa xíʼin xi̱níi̱ texto ña̱ kivi chindeétáʼan xíʼi̱n. Xa̱a̱ ku̱a̱ʼání ku̱i̱ya̱ ndóʼi ña̱yóʼo, soo xa̱ʼa̱ ña̱ chíka̱i̱ ndee̱ ña̱ táxin koo inii̱ ndiʼi ki̱vi̱ va̱ʼaní chíndeétáʼanña xíʼi̱n. Soo tá íyo iin nu̱ú ku̱ʼi̱n, ya̱chi̱ kítai̱ veʼi̱ ña̱ va̱ʼa kǒo ndi̱ʼi̱ní-inii̱”.

SAVA ÍXAYO̱ʼVI̱ÑA XÍʼINYÓ ÑA̱ KA̱ʼNU̱-INIYÓ

Sava yichi̱ ixayo̱ʼvi̱ña xíʼinyó ña̱ ka̱ʼnu̱-iniyó. Tá ná ndoʼoyó ña̱yóʼo, sana kivi ndakanixi̱níyó ña̱ va̱ása xíniñúʼuka ka̱ʼa̱nyó xíʼin Jehová. Soo saá kúú ña̱ xíniñúʼuníka ka̱ʼa̱nyó xíʼinra, ta kama ná keʼéyó ña̱yóʼo. Ná ka̱ʼa̱n ndáʼviyó xíʼin Jehová ña̱ ná ixakáʼnu-inira xa̱ʼa̱yó, ta saátu ná ka̱ʼa̱nyó xíʼinra ña̱ chindeétáʼanra xíʼinyó, ta ná chika̱a̱-iniyó ña̱ va̱ása ki̱ʼvi tukuyó ku̱a̱chi ña̱ xa̱a̱ ni̱ki̱ʼviyó (Sal. 51:9-11). Tá xíʼin ndiʼi níma̱yó káʼa̱nyó xíʼinra ña̱ kundáʼvi-inira kunira miíyó, kuniso̱ʼovara ña̱ káʼa̱nyó (Sal. 102:17). Ta̱ apóstol Juan sándakaʼánra miíyó, ña̱ ni̱i̱ se̱ʼe Ndióxi̱ kúú ña̱ ndákata ku̱a̱chiyó (1 Juan 1:7; 2:1; Sal. 86:5). Ná ndakaʼányó chí Jehová káʼa̱nra xíʼinyó, ña̱ ku̱a̱ʼá yichi̱ ná ixakáʼnu-iniyó xa̱ʼa̱ inkana. Ña̱kán, kivitu kandíxa miíyó ña̱ ixakáʼnu-inira xa̱ʼa̱yó (Mat. 18:21, 22; Col. 3:13).

Va̱ása níkutóo Jehová ña̱ ke̱ʼé ta̱ Moisés nu̱ú ñuʼú yi̱chí. Soo i̱xakáʼnu-inira xa̱ʼa̱ra. Ta ña̱ Biblia káʼa̱nña xa̱ʼa̱ ta̱ Moisés ña̱ va̱ʼaní yichi̱ sa̱ndákoora nu̱úyó, chi xi̱kandíxaníra Ndióxi̱ (Deut. 34:10; Heb. 11:24-28). Ña̱ nda̱a̱ kúú ña̱ va̱ása nítaxi Jehová ki̱ʼvi ta̱ Moisés nu̱ú ñuʼú ña̱ ni̱ka̱ʼa̱nra taxira ndaʼa̱na, soo taxivara ña̱ koora ndiʼi tiempo nu̱ú ñuyǐví xa̱á. Ta saátu miíyó, kivi ndakiʼinyó ña̱yóʼo ta ná chika̱a̱yó ndee̱ ña̱ ka̱ʼnu̱-iniyó (1 Cor. 9:25).