Íyo iin ña̱ va̱ʼa ku̱u xa̱ʼa̱ ña̱ ni̱xa̱ku̱ iin ñá hermana

U̱VI̱ ná ñaʼá xíkaná ku̱a̱ʼa̱nná chí nu̱ú íxi̱kóna ña̱ʼa chí ñuu Baguio (Filipinas). Xi̱niná iin carro loʼo nu̱ú chíndósoyó tutu, soo va̱ása níkuyatinná. Ñá hermana Helen níndichiñá yatin sii̱n tú carro loʼo kán, xi̱toñá nu̱úná ta viíní ni̱xa̱ku̱ñá xíʼinná. Ná ñaʼá yóʼo va̱ása níxikunditaná, soo nda̱kanda̱-ininá xa̱ʼa̱ ña̱ ni̱xa̱ku̱ ñá Helen xíʼinná.

Tá ni̱ya̱ʼa loʼo, tá xa̱a̱ nda̱ndikóná veʼená xíʼin tú autobús, xi̱niná salón nu̱ú ndátakayó ta xi̱niná letra jw.org. Tasaá nda̱kaʼánná ña̱ inkáchi íyoña xíʼin letra ña̱ va̱xi nu̱ú carro loʼo nu̱ú chíndósoyó tutu. Nu̱uná tú autobús kán, ta xi̱toná ndáa hora kúú ña̱ ndákutáʼan iin tá iin congregación ti̱xin salón kán.

U̱vi̱ saá ná ñaʼá yóʼo ni̱xa̱ʼa̱nná iin reunión. Ta tá ni̱xa̱a̱ná salón ndi̱ku̱n nda̱kuniná ñá Helen. Ñá Helen káchiñá: “Tá ku̱yatinná nu̱úi̱ ki̱xáʼa ni̱yi̱ʼvíi̱, saáchi nda̱kanixi̱níi̱ ña̱ íyo iin ña̱ va̱ása va̱ʼa ke̱ʼíi̱”. Soo ná ñaʼá yóʼo ni̱ka̱ʼa̱nná xíʼin ñá Helen xa̱ʼa̱ ña̱ ku̱u.

U̱vi̱ saá ná ñaʼá yóʼo ku̱tóoníná ña̱ xi̱niso̱ʼoná ti̱xin reunión, ta va̱ʼaní ku̱niná xíʼin ndiʼi na̱ hermano. Tá xi̱niná ña̱ ki̱xáʼa na̱ hermano ndáya̱kunna salón tá xa̱a̱ ndi̱ʼi reunión, ni̱ka̱ʼa̱nná ña̱ chindeétáʼanná xíʼinna. Tiempo vitin iinñá va̱ása íyokañá país kán, ta inkañá ki̱xáʼañá xáʼa̱nñá reunión ta ki̱xáʼañá káʼviñá Biblia. Ndiʼi ña̱yóʼo ku̱uña xa̱ʼa̱ ña̱ viíní ni̱xa̱ku̱ ñá hermana kán xíʼinná.