Ndiʼiyó kivi chindeétáʼan xíʼin na̱ sa̱kán sákuaʼa xa̱ʼa̱ Ndióxi̱ ña̱ xa̱a̱na ndakuchina

1, 2. ¿Ndáana kivi chindeétáʼan xíʼin iin na̱ sa̱kán sákuaʼa xa̱ʼa̱ Ndióxi̱ ña̱ va̱ʼa xa̱a̱na ndakuchina?

ÑÁ AMY ñá íyo chí Fiyi, káchiñá: “Xi̱kutóoníi̱ ndiʼi ña̱ xi̱sanáʼa̱na yi̱ʼi̱ xa̱ʼa̱ Biblia. Ta xi̱kunda̱a̱va-inii̱ ña̱ kúúña ña̱ nda̱a̱, soo kǒo níxi̱chika̱i̱ ndee̱ ña̱ nasamai̱ ña̱ kéʼíi̱. Iin ña̱ chi̱ndeétáʼan xíʼi̱n ña̱ va̱ʼa ni̱xa̱i̱ ke̱ʼíi̱ ña̱yóʼo ta nda̱kuchii̱ kúú ña̱ xi̱kitáʼi̱n xíʼin na̱ hermano”. Íyo iin ña̱ ndáyáʼviní sákuaʼayó xíʼin ña̱ ndo̱ʼo ñá Amy: sana va̱ʼaníka xa̱a̱ na̱ káʼviyó xíʼin kuaʼnuna xíʼin tu̱ʼun Ndióxi̱ ta ndakuchina tá ná chindeétáʼan na̱ congregación xíʼinna.

² Ndiʼi na̱ publicador kivi chika̱a̱na ndee̱ ña̱ va̱ʼa kuaʼnuka ña̱ congregación (Efes. 4:16). Iin ñá precursora ñá íyo chí Vanuatu ñá naní Leilani, káchiñá: “Na̱ yiví káʼa̱nna ña̱ iníísaá na̱ ñuu kúú na̱ kivi chindeétáʼan xíʼin iin na̱ va̱lí ña̱ va̱ʼa kuaʼnuna. Ta ki̱ʼva saátu íyo ña̱ kéʼéyó tá chíndeétáʼanyó xíʼin na̱ yiví ña̱ va̱ʼa xa̱a̱na koona discípulo ta̱ Cristo: iníísaá na̱ congregación kúú na̱ kivi chindeétáʼan xíʼin iin na̱ yiví ña̱ va̱ʼa xa̱a̱na ndakuchina”. Ña̱ va̱ʼa kuaʼnu iin na̱ va̱lí, xíniñúʼu chindeétáʼan na̱ veʼena xíʼinna, na̱ migona ta saátu na̱ maestrona, saáchi ndiʼi na̱yóʼo kivi chika̱a̱na ndee̱ xíʼinna ta sanáʼa̱nana xa̱ʼa̱ ña̱ʼa ña̱ ndáyáʼviní. Ta ki̱ʼva saá kivi chindeétáʼan iin na̱ publicador xíʼin na̱ sa̱kán sákuaʼa xa̱ʼa̱ Ndióxi̱ ña̱ va̱ʼa xa̱a̱na ndakuchina, tá ná taxina consejo ndaʼa̱na, chika̱a̱na ndee̱ xíʼinna ta chinúuna iin yichi̱ va̱ʼa nu̱úna (Prov. 15:22).

3. ¿Ndáaña sákuaʼayó xíʼin ña̱ káʼa̱n ñá Ana, ta̱ Dorín ta saátu ñá Leilani?

³ ¿Nda̱chun xíniñúʼu taxiyó ná chindeétáʼan inka na̱ publicador xíʼin na̱ káʼviyó xíʼin? Ná kotoyó ndáaña káʼa̱n iin ñá precursora especial ñá naní Ana ñá íyo chí Moldavia, káchiñá: “Íyo ku̱a̱ʼání ña̱ xíniñúʼu na̱ káʼviyó xíʼin, ta va̱ása kuchiñu iinlá miíyó chindeétáʼanyó xíʼinna”. Inka ta̱ precursor especial ta̱ naní Dorín ta̱ íyo país kán, káchira: “Sava yichi̱ inka na̱ publicador káʼa̱nna iin ña̱ʼa ña̱ xáa̱ nda̱a̱ níma̱ na̱ káʼvii̱ xíʼin. Ta yi̱ʼi̱ ni kǒo níndakanixi̱níi̱ xa̱ʼa̱ ña̱yóʼo”. Ñá Leilani káʼa̱nñá nda̱chun kúú ña̱ xíniñúʼu taxiyó ña̱ chindeétáʼan inkana xíʼinyó, káchiñá: “Tá ná kuni na̱ káʼviyó xíʼin ña̱ kúʼvi̱-ini inka na̱ hermano xíninana, ña̱yóʼo kivi chindeétáʼan xíʼinna ña̱ kunda̱a̱-inina ña̱ ndixa kúúyó na̱ ñuu Ndióxi̱” (Juan 13:35).

4. ¿Ndáaña sakuaʼayó nu̱ú artículo yóʼo?

⁴ Sana kivi ndakanixi̱níyó ña̱yóʼo: “¿Ndáaña kivi keʼíi̱ xa̱ʼa̱ iin na̱ sa̱kán sákuaʼa xa̱ʼa̱ Ndióxi̱ tá su̱ví yi̱ʼi̱ kúú na̱ sánáʼa̱na xa̱ʼa̱ Biblia?”. Nu̱ú artículo yóʼo kunda̱a̱-iniyó ndáaña kivi keʼéyó tá káʼa̱n iin na̱ hermano xíʼinyó ña̱ ku̱ʼu̱nyó xíʼinna ña̱ kaʼvina xíʼin iin na̱ yiví, ta saátu ndáaña kivi keʼéyó tá sa̱kán ki̱xáʼa iin na̱ yiví xáʼa̱nna reunión. Ta sakuaʼayó ndáaña kivi keʼé na̱ anciano ña̱ va̱ʼa chindeétáʼanna xíʼin na̱ sa̱kán sákuaʼa xa̱ʼa̱ Ndióxi̱ ña̱ va̱ʼa xa̱a̱na ndakuchina.

TÁ KÁʼA̱N IIN NA̱ HERMANO XÍʼINYÓ ÑA̱ KU̱ʼU̱NYÓ XÍʼINNA ÑA̱ KAʼVINA XÍʼIN IIN NA̱ YIVÍ

5. ¿Ndáaña xíniñúʼu keʼéyó tá káʼa̱n iin na̱ hermano xíʼinyó ña̱ ku̱ʼu̱nyó xíʼinna ña̱ kaʼvina xíʼin iin na̱ yiví?

⁵ Mií na̱ hermano na̱ káʼvi xíʼin iin na̱ yiví kúú na̱ xíniñúʼu chindeétáʼan xíʼinna ña̱ va̱ʼa kunda̱a̱-inina xa̱ʼa̱ tu̱ʼun Ndióxi̱. Tá káʼa̱n iin na̱ hermano xíʼinyó ña̱ ku̱ʼu̱nyó xíʼinna ña̱ kaʼvina xíʼin iin na̱ yiví, ná ndakaʼányó chi xíniñúʼu chindeétáʼanyó xíʼinna (Ecl. 4:9, 10). Tá saá, ¿ndáaña kivi keʼéyó ña̱ va̱ʼa vií saxínuyó chiñuyó?

6. ¿Ndáa ki̱ʼva kundiku̱nyó ña̱ káʼa̱n Proverbios 20:18 tá ku̱a̱ʼa̱nyó xíʼin na̱ hermano ña̱ kaʼvina xíʼin iin na̱ yiví?

⁶ Ná sakuaʼa kúeeyó. Siʼna ná ka̱ʼa̱nyó xíʼin na̱ hermano ña̱ natúʼun loʼona xíʼinyó ndáa ki̱ʼva íyo na̱ káʼvina xíʼin (kaʼvi Proverbios 20:18).b Kivi nda̱ka̱tu̱ʼunyóna ndáaña ndóʼo na̱ káʼvina xíʼin, ndáa lección kaʼvina ta ndáaña kúni̱na ná sakuaʼa na̱ yiví kán. Ta saátu kivi nda̱ka̱tu̱ʼunyóna ndáaña kivi ka̱ʼa̱nyó ta ndáaña va̱ása kívi ka̱ʼa̱nyó á ndáaña kivi keʼéyó, ta ndáa ki̱ʼva chika̱a̱yó ndee̱ xíʼin na̱ káʼvina xíʼin ña̱ va̱ʼa kuaʼnukana xíʼin tu̱ʼun Ndióxi̱. Sana va̱ása natúʼunvína xíʼinyó xa̱ʼa̱ ndiʼi ña̱ ndóʼo na̱ káʼvina xíʼina, soo ña̱ ka̱ʼa̱nna xíʼinyó kiviva kuniñúʼuyóña ña̱ va̱ʼa chindeétáʼanyó xíʼin na̱ yiví kán. Iin ñá misionera ñá naní Joy nátúʼunñá xa̱ʼa̱ ña̱yóʼo xíʼin na̱ xáʼa̱n xíʼinñá ña̱ kaʼviñá xíʼin na̱ yiví. Káchiñá: “Ña̱yóʼo chíndeétáʼanña xíʼin na̱ xáʼa̱n xíʼi̱n ña̱ va̱ʼa kundi̱ʼi̱ka-inina xa̱ʼa̱ na̱ káʼvii̱ xíʼin, ta saátu kúnda̱a̱-inina ndáaña ka̱ʼa̱nna xíʼinna”.

7. ¿Nda̱chun ndáyáʼviní ña̱ ná sakuaʼa kúeeyó?

⁷ Tá ná ku̱ʼu̱nyó xíʼin iin na̱ hermano ña̱ kaʼvina xíʼin na̱ yiví, xa̱a̱ ya̱chi̱ka ná sakuaʼa kúeeyó xa̱ʼa̱ ña̱ kaʼvina (Esd. 7:10). Ta̱ Dorín ta̱ xa̱a̱ ni̱ka̱ʼa̱nyó xa̱ʼa̱ nu̱ú párrafo 3, káchira: “Kúsi̱íní-inii̱ tá xa̱a̱ sákuaʼa kúee na̱ ku̱a̱ʼa̱n xíʼi̱n xa̱ʼa̱ ña̱ kaʼvindi̱. Chi saá kivi chindeétáʼanna xíʼin na̱ káʼvii̱ xíʼin”. Ta saátu va̱ʼaní yichi̱ chinúuyó nu̱ú na̱ káʼvina xíʼin, chi kiʼinna kuenta ña̱ u̱vi̱ saáyó xa̱a̱ káʼvi kúeeyó xa̱ʼa̱ ña̱ sanáʼa̱yóna. Ni tá va̱ása kívi viíní kaʼviyó iin lección, ná taváyó tiempo ña̱ kotoyó ndáaña kúú ña̱ ndáyáʼvi va̱ʼaka va̱xi nu̱úña.

8. ¿Ndáaña chindeétáʼan xíʼinyó ña̱ káxiníka koo ña̱ ka̱ʼa̱nyó ti̱xin oración tá xa̱a̱ káʼviyó xíʼin na̱ yiví?

⁸ Ndáyáʼviní keʼéyó oración tá káʼviyó xíʼin na̱ yiví, ña̱kán xa̱a̱ ya̱chi̱ka ná ndakanixi̱níyó ndáaña ka̱ʼa̱nyó xíʼin Ndióxi̱ tá ná ka̱ʼa̱nna xíʼinyó keʼéyó iin oración. Saá kúú ña̱ káxiníka koo ña̱ ka̱ʼa̱nyó (Sal. 141:2). Iin ñá hermana ñá íyo chí Japón ñá naní Hanae, nda̱a̱ tiempo vitin ndákaʼánñá xa̱ʼa̱ oración ña̱ xi̱keʼé iin ñá hermana ñá xi̱xa̱ʼa̱n xíʼin ñá xi̱sanáʼa̱-ñaʼá. Ñáyóʼo káchiñá: “Xi̱kiʼi̱n kuenta ña̱ va̱ʼaní xi̱kitáʼanñá xíʼin Jehová, ta xi̱kuni̱i̱ koi̱ nda̱a̱ táki̱ʼva íyoñá. Ta saátu, tá xi̱ka̱ʼa̱nñá ki̱víi̱ ti̱xin oración xi̱kunda̱a̱-inii̱ ña̱ kúʼvi̱ní-iniñá xíniñá yi̱ʼi̱”.

9. Nda̱a̱ táki̱ʼva káchi Santiago 1:19, ¿ndáaña kivi keʼéyó ña̱ va̱ʼa chindeétáʼanyó xíʼin na̱ hermano na̱ káʼvi xíʼin na̱ yiví?

⁹ Ná chindeétáʼanyó xíʼin na̱ hermano na̱ káʼvi xíʼin na̱ yiví. Iin ñá precursora especial ñá íyo chí Nigeria ñá naní Omamuyovbi, káchiñá: “Iin ña̱ va̱ʼaní kivi keʼé na̱ hermano na̱ ku̱a̱ʼa̱n xíʼinyó kúú ña̱ viíní kuniso̱ʼona ña̱ káʼa̱nyó xíʼin na̱ káʼviyó xíʼin. Ta saátu tá va̱ʼaní íyo ña̱ káʼa̱nna ni loʼo kúúña, saáchi kúnda̱a̱-inina ña̱ miívayó kúú na̱ xíniñúʼu ndakanika nu̱ú na̱ káʼviyó xíʼin”. Tá saá, ¿ama kúú ña̱ xíniñúʼu ka̱ʼa̱nyó ta ndáaña xíniñúʼu ka̱ʼa̱nyó? (Prov. 25:11). Viíní ná kuniso̱ʼoyó ña̱ káʼa̱n na̱ hermano na̱ sánáʼa̱ na̱ yiví, ta saátu ña̱ káʼa̱n mií na̱ yiví kán (kaʼvi Santiago 1:19).c Chi saá kúú ña̱ koo tu̱ʼvayó ña̱ va̱ʼa chindeétáʼanyó xíʼin na̱ hermano yóʼo. Soo saátu xíniñúʼu kiʼinníyó kuenta ña̱ va̱ása ku̱a̱ʼání koo ña̱ ka̱ʼa̱nyó, ña̱ va̱ása ka̱ʼnu̱yó tu̱ʼun na̱ hermano kán á ña̱ kixáʼayó ka̱ʼa̱nyó xa̱ʼa̱ inka ña̱ʼa. Soo kivi ka̱ʼa̱nyó xíʼinna xa̱ʼa̱ iin ejemplo á xa̱ʼa̱ iin pregunta ña̱ va̱ʼa káxika kunda̱a̱-inina xa̱ʼa̱ ña̱ káʼvina. Sana sava yichi̱ túviyó ña̱ va̱ása xíni̱kayó ndáaña ka̱ʼa̱nyó. Soo tá ná ka̱ʼa̱nyó xíʼin na̱ yiví kán ña̱ va̱ʼaní íyo ña̱ kéʼéna ta kundi̱ʼi̱-iniyó xa̱ʼa̱na, saá kúú ña̱ chindeétáʼanyó xíʼinna ña̱ kuaʼnuna xíʼin tu̱ʼun Ndióxi̱.

10. Tá ná natúʼunyó xíʼin na̱ sa̱kán sákuaʼa xa̱ʼa̱ Ndióxi̱ xa̱ʼa̱ ña̱ ndo̱ʼoyó, ¿ndáa ki̱ʼva kivi chindeétáʼanña xíʼinna?

¹⁰ Ná natúʼunyó xíʼinna xa̱ʼa̱ ña̱ ndo̱ʼoyó. Tá kivi, ná natúʼunyó xíʼin na̱ sa̱kán sákuaʼa xa̱ʼa̱ Ndióxi̱, ndáa ki̱ʼva ni̱xa̱a̱yó na̱kunda̱a̱-iniyó xa̱ʼa̱ ña̱ nda̱a̱, ndáa ki̱ʼva ni̱ya̱ʼayó nu̱ú iin tu̱ndóʼo ta ndáa ki̱ʼva xa̱a̱ xíniyó chíndeétáʼan Jehová xíʼinyó (Sal. 78:4, 7). Chi sana mií ña̱yóʼo kúú ña̱ xíniñúʼu kuniso̱ʼo na̱ yiví kán. Sana ña̱yóʼo chindeétáʼan xíʼinna ña̱ kandíxakana Ndióxi̱ á chika̱a̱ña ndee̱ xíʼinna ña̱ xa̱a̱na ndakuchina, á chindeétáʼanña xíʼinna ña̱ kunda̱a̱-inina ndáa ki̱ʼva ya̱ʼana nu̱ú iin tu̱ndóʼo (1 Ped. 5:9). Iin ta̱ precursor ta̱ íyo chí Brasil ta̱ naní Gabriel ndákaʼánra ndáaña kúú ña̱ chi̱ndeétáʼan xíʼinra tá sa̱kán sa̱kuaʼara xa̱ʼa̱ Biblia, káchira: “Ña̱ xi̱natúʼun na̱ hermano xíʼi̱n, sa̱náʼa̱ña yi̱ʼi̱ ña̱ kúnda̱a̱va-ini Jehová ndáa tu̱ndóʼo kúú ña̱ yáʼayó nu̱ú. Tá ku̱chiñu na̱yóʼo ni̱ya̱ʼana nu̱ú tu̱ndóʼo yóʼo, kuchiñutu yi̱ʼi̱va ya̱ʼi̱ nu̱úña”.

TÁ KÍXÁʼA NA̱ SA̱KÁN SÁKUAʼA XA̱ʼA̱ NDIÓXI̱ XÁʼA̱NNA REUNIÓN

11, 12. ¿Nda̱chun xíniñúʼu viíní ndakiʼinyó na̱ sa̱kán sákuaʼa xa̱ʼa̱ Ndióxi̱ tá xáa̱na reunión?

¹¹ Ña̱ va̱ʼa xa̱a̱ iin na̱ yiví kuaʼnuna xíʼin tu̱ʼun Ndióxi̱ ta ndakuchina, xíniñúʼu ku̱ʼu̱n ni̱ʼina reunión chi kán ku̱a̱ʼání ña̱ va̱ʼa sakuaʼana (Heb. 10:24, 25). Ta tá ná ku̱ʼu̱nna ña̱ yichi̱ nu̱ú reunión sana mií na̱ sánáʼa̱-ñaʼá kúú na̱ ni̱ka̱ʼa̱n xíʼinna ña̱ ná ku̱ʼu̱nna. Tá saá ndiʼivayó kivi chika̱a̱ ndee̱ xíʼinna ña̱ va̱ʼa ndakundeéna ku̱ʼu̱nna reunión. ¿Ndáa ki̱ʼva kivi keʼéyó ña̱yóʼo?

¹² Viíní ná ndakiʼinyó na̱ sa̱kán sákuaʼa xa̱ʼa̱ Ndióxi̱ (Rom. 15:7). Tá viíní ná ndakiʼinyóna tá ni̱xa̱a̱na iin reunión, sana kuni̱na ku̱ʼu̱n ni̱ʼikana. Viíní ná chindeéyóna ta ná na̱ʼa̱yó inkaka na̱ hermano nu̱úna, soo ná kǒo sakúkaʼanyó nu̱úna. Ta ná va̱ása ndakanixi̱níyo ña̱ xa̱a̱ íyova na̱ chíndeétáʼan xíʼinna; chi sana ta̱ʼán kixaa̱ na̱ sánáʼa̱-ñaʼá á íyo inkaka chiñu kéʼéna. Ná kuniso̱ʼoyó ña̱ káʼa̱nna á ná kundi̱ʼi̱-iniyó xa̱ʼa̱na. ¿Ndáa ki̱ʼva chindeétáʼan ña̱yóʼo xíʼinna? Ná kotoyó ndáaña káʼa̱n ta̱ Dimitri, ta̱yóʼo xa̱a̱ íyo loʼo ku̱i̱ya̱ nda̱kuchira ta vitin kúúra siervo ministerial. Tá ndákaʼánra xa̱ʼa̱ reunión ña̱ nu̱ú ni̱xa̱ʼa̱nra káchira: “Tá ni̱xa̱i̱, xa̱ʼa̱ ña̱ kúkaʼan nu̱úi̱ ki̱ndoi̱ ndátui̱ chí yéʼé salón. Iin ta̱ hermano xi̱nira yi̱ʼi̱ ta viíkaví nda̱kiʼinra yi̱ʼi̱ ku̱a̱ʼi̱n xíʼinra chí ini salón. Nda̱kandaní-inii̱ saáchi ku̱a̱ʼánína ku̱yatinna ta chi̱ndeéna yi̱ʼi̱. Ku̱tóoníi̱ ña̱ ke̱ʼéna xíʼi̱n xa̱ʼa̱ ña̱kán xi̱kuni̱i̱ ñá ndiʼi ki̱vi̱ ná koo reunión. Nda̱a̱ ni iin yichi̱ ta̱ʼán kundoʼi̱ táʼan ña̱yóʼo”.

13. ¿Ndáa ki̱ʼva chindeétáʼan ña̱ kéʼéyó xíʼin na̱ sa̱kán sákuaʼa xa̱ʼa̱ Ndióxi̱?

¹³ Ná chinúuyó iin yichi̱ va̱ʼa nu̱úna. Ki̱ʼva ña̱ kéʼéyó kivi chindeétáʼanña xíʼin na̱ sa̱kán sákuaʼa xa̱ʼa̱ Ndióxi̱ ña̱ va̱ʼa kandíxana ña̱ nda̱ni̱ʼína ña̱ nda̱a̱ (Mat. 5:16). Iin ta̱ precursor ta̱ íyo chí Moldavia ta̱ naní Vitali, káchira: “Tá xi̱nii̱ ndáa ki̱ʼva íyo ña̱ táku na̱ hermano, ndáa ki̱ʼva ndákanixi̱nína ta ndáa ki̱ʼva kéʼéna, sa̱xínu̱na-inii̱ ña̱ kandíxai̱ ña̱ na̱ testigo Jehová kúúna religión ña̱ nda̱a̱”.

14. ¿Ndáa ki̱ʼva kivi chindeétáʼan ña̱ kéʼéyó xíʼin inkana ña̱ kuaʼnuna xíʼin tu̱ʼun Ndióxi̱?

¹⁴ Tá iin na̱ sa̱kán sákuaʼa xa̱ʼa̱ Ndióxi̱ kúni̱na xa̱a̱na ndakuchina, xíniñúʼu keʼéna ndiʼi ña̱ sákuaʼana. Ta ña̱yóʼo kivi ixayo̱ʼvi̱ña xíʼinna. Soo tá ná kunina ndáaña va̱ʼa kúú ña̱ ndákiʼin miíyó xa̱ʼa̱ ña̱ ndíku̱nyó ña̱ káʼa̱n tu̱ʼun Ndióxi̱, kuni̱na kundiku̱nna yichi̱yó (1 Cor. 11:1). Ná kotoyó ndáaña ndo̱ʼo ñá Hanae ñá xa̱a̱ ni̱ka̱ʼa̱nyó xa̱ʼa̱ nu̱ú párrafo 8. Ñáyóʼo káchiñá: “Na̱ hermano xi̱keʼéna nda̱a̱ táki̱ʼva íyo ndiʼi ña̱ xi̱sakuaʼi̱. Tá xi̱nii̱ ña̱ kéʼéna, sa̱kuaʼi̱ chika̱i̱ ndee̱ xíʼin inkana, ña̱ ixakáʼnu-inii̱ xa̱ʼa̱na ta kuʼvi̱-inii̱ kunii̱na. Ndiʼi tiempo xi̱ka̱ʼa̱nna ña̱ va̱ʼa xa̱ʼa̱ inkana. Ta yi̱ʼi̱ xi̱kuni̱i̱ koi̱ nda̱a̱ táki̱ʼva íyo na̱kán”.

15. Nda̱a̱ táki̱ʼva káchi Proverbios 27:17, ¿nda̱chun xíniñúʼu kooyó migo na̱ sa̱kán kíxáʼa xáʼa̱n reunión?

¹⁵ Ná kooyó migo na̱ sa̱kán sákuaʼa xa̱ʼa̱ Ndióxi̱. Tá xáʼa̱nna reunión ná na̱ʼa̱yó ña̱ ndíʼi̱-iniyó xa̱ʼa̱na (Filip. 2:4). Ta saátu kivi chika̱a̱yó ndee̱ ña̱ kuxini̱kayóna tá ná nda̱ka̱tu̱ʼunyóna xa̱ʼa̱ na̱ veʼena, xa̱ʼa̱ chiñuna, ta saátu ndáaña ndákanixi̱nína xa̱ʼa̱ ña̱ sákuaʼana nu̱ú Biblia, soo ná kiʼinyó kuenta ña̱ va̱ása sakúkaʼanyó nu̱úna. Kivi ka̱ʼa̱nyó xíʼinna ña̱ kúsi̱íní-iniyó xa̱ʼa̱ ña̱ na̱samana sava ña̱ kéʼéna. Saá kúú ña̱ kivi xa̱a̱yó kooyó migona ta chindeétáʼanyó xíʼinna ña̱ kuaʼnuna xíʼin tu̱ʼun Ndióxi̱ ta ndakuchina (kaʼvi Proverbios 27:17).d Ñá Hanae vitin xa̱a̱ kúúñá precursora regular, ta nátúʼunñá ndáaña ndo̱ʼoñá tá ki̱xáʼañá xáʼa̱nñá reunión, káchiñá: “Xa̱ʼa̱ ña̱ ki̱xáʼa íyoka na̱ migoi̱ ti̱xin congregación ki̱xáʼíi̱ kúni̱kai̱ ku̱ʼi̱n reunión. Ni ndeéní xi̱kunaíi̱ soo xi̱xaʼanvai̱. Xi̱kusi̱íní-inii̱ xa̱ʼa̱ ña̱ xi̱kitáʼi̱n xíʼin na̱ migoi̱, ta ña̱yóʼo chi̱ndeétáʼanña xíʼi̱n ña̱ kǒo kutáʼankai̱ xíʼin na̱ yiví na̱ va̱ása ndásakáʼnu Ndióxi̱. Ta xa̱ʼa̱ ña̱ xi̱kunii̱ yatinka koi̱ xíʼin Jehová ta saátu xíʼin na̱ hermano, ni̱xa̱i̱ nda̱kuchii̱”.

16. ¿Ndáaña kivi keʼéyó ña̱ va̱ʼa kusi̱í-ini na̱ sa̱kán sákuaʼa xa̱ʼa̱ Ndióxi̱ ña̱ kundika̱a̱na ti̱xin congregación?

¹⁶ Tá ku̱a̱ʼa̱n xáʼnuka iin na̱ yiví xíʼin tu̱ʼun Ndióxi̱ ná chika̱a̱yó ndee̱ ña̱ chindeétáʼanyó xíʼinna ña̱ kunda̱a̱-inina ña̱ kúúna táʼan na̱ congregación. Iin ki̱ʼva ña̱ keʼéyó ña̱yóʼo kúú ña̱ na̱ʼa̱yó ña̱ va̱ʼa íyo iniyó xíʼinna (Heb. 13:2). Iin ta̱ hermano ta̱ íyo chí Moldavia ta̱ naní Denís, ndákaʼánra ndáaña ndo̱ʼora tá sa̱kán ki̱xáʼara káʼvira Biblia: “Ku̱a̱ʼání yichi̱ xi̱kana na̱ hermano yi̱ʼi̱ xíʼin ñá síʼíi̱ ña̱ ku̱ʼu̱nndi̱ veʼena. Tá xi̱natúʼunna xíʼindi̱ ndáa ki̱ʼva chi̱ndeétáʼan Jehová xíʼinna, ña̱yóʼo xi̱chika̱a̱níña ndee̱ xíʼinndi̱. Ta ña̱yóʼo sa̱xínu̱ña-inindi̱ ña̱ kuni̱ndi̱ kachíñundi̱ nu̱ú Jehová, ta saátu ña̱ si̱íní koondi̱”. Tá xáa̱ iin na̱ yiví ndúuna publicador kivi ka̱ʼa̱nyó xíʼinna ña̱ ku̱ʼu̱nna xíʼinyó natúʼunyó xa̱ʼa̱ Ndióxi̱. Iin ta̱ hermano ta̱ íyo chí Brasil ta̱ naní Diego káchira: “Ku̱a̱ʼání na̱ hermano xi̱ka̱ʼa̱nna xíʼi̱n ña̱ ku̱ʼi̱n xíʼinna ña̱ natúʼunndi̱ xa̱ʼa̱ Ndióxi̱. Ña̱yóʼo chi̱ndeétáʼanña xíʼi̱n ña̱ kuxini̱kai̱na. Ku̱a̱ʼání ña̱ sa̱kuaʼi̱ xíʼin ña̱yóʼo ta ku̱yatinkai̱ nu̱ú Jehová xíʼin ta̱ Jesús”.

¿NDÁAÑA KIVI KEʼÉ NA̱ ANCIANO?

17. ¿Ndáaña kivi keʼé na̱ anciano xa̱ʼa̱ na̱ sa̱kán sákuaʼa xa̱ʼa̱ Ndióxi̱?

¹⁷ Tavána tiempo ña̱ va̱ʼa kuxini̱na na̱ sa̱kán sákuaʼa xa̱ʼa̱ Ndióxi̱. Ndóʼó na̱ anciano, tá ná na̱ʼa̱ndó ña̱ kúʼvi̱-inindó xínindó na̱ sa̱kán sákuaʼa xa̱ʼa̱ Ndióxi̱ ta ndíʼi̱-inindó xa̱ʼa̱na, ña̱yóʼo kivi chindeétáʼanña xíʼinna ña̱ xa̱a̱na ndakuchina. ¿Á kivi tavándó loʼo tiempo tá xa̱a̱ ndíʼi reunión ña̱ va̱ʼa natúʼunndó xíʼinna? Na̱yóʼo kiʼinna kuenta ña̱ ndíʼi̱-inindó xa̱ʼa̱na tá ndákaʼánndó ki̱vi̱na, tá kúú tá ná kixáʼana taxina comentario. ¿Á kivi tavándó tiempo ña̱ ku̱ʼu̱nndó xíʼin iin na̱ publicador ña̱ kaʼvina xíʼin iin na̱ yiví? Ña̱yóʼo va̱ʼaní chindeétáʼanña xíʼin na̱ sa̱kán sákuaʼa xa̱ʼa̱ Ndióxi̱. Iin ñá precursora ñá íyo chí Nigeria ñá naní Jackie, káchiñá: “Ku̱a̱ʼání na̱ káʼvii̱ xíʼin ndákanda̱-inina tá kúnda̱a̱-inina ña̱ anciano kúú ta̱ hermano ta̱ ni̱xa̱ʼa̱n xíʼi̱n ña̱ ka̱ʼvii̱ xíʼinna. Iin na̱ sánáʼi̱ xa̱ʼa̱ Biblia ni̱ka̱ʼa̱nna xíʼi̱n: ‘Ta̱ kúú pastor ti̱xin veʼe-ñu̱ʼu nu̱ú xáʼi̱n nda̱a̱ ni iin yichi̱ kǒo keʼéra ña̱yóʼo. Ta̱yóʼo ku̱a̱ʼa̱n kuitíra veʼe na̱ ku̱i̱ká á tá cháʼvinaraʼ”. Na̱ ni̱ka̱ʼa̱n ña̱yóʼo xa̱a̱ xáʼa̱nna reunión.

18. ¿Ndáa ki̱ʼva kivi saxínu na̱ anciano ña̱ káʼa̱n Hechos 20:28?

¹⁸ Sanáʼa̱na na̱ hermano ta chika̱a̱na ndee̱ xíʼinna. Ndóʼó na̱ anciano kúúmiíndó iin chiñu ña̱ ndáyáʼviní ña̱ chindeétáʼanndó xíʼin na̱ publicador ña̱ viíka natúʼunna xíʼin na̱ yiví ta sanáʼa̱nana (kaʼvi Hechos 20:28).e Tá iin na̱ hermano yíʼvina kaʼvina xíʼin na̱ yiví tá ku̱a̱ʼa̱nndó xíʼinna, kivi ka̱ʼa̱nndó xíʼinna ña̱ chindeétáʼanndó xíʼinna ña̱ kaʼvindó xíʼin na̱ yiví kán. Ñá Jackie, ñá xa̱a̱ ni̱ka̱ʼa̱nyó xa̱ʼa̱ nu̱ú párrafo ña̱ ni̱ya̱ʼa, káchiñá: “Na̱ anciano ndáka̱tu̱ʼun ni̱ʼina yi̱ʼi̱ xa̱ʼa̱ na̱ yiví na̱ sánáʼi̱ xa̱ʼa̱ Biblia. Tá íyo iin ña̱ íxayo̱ʼvi̱ xíʼi̱n tá xa̱a̱ káʼvii̱ xíʼinna, va̱ʼaní consejo táxi na̱ anciano ndaʼíi̱”. Ku̱a̱ʼání ña̱ kivi keʼé na̱ anciano ña̱ va̱ʼa chika̱a̱na ndee̱ xíʼin na̱ hermano na̱ sánáʼa̱ na̱ yiví ña̱ kǒo ndakava-inina (1 Tes. 5:11). Ñá Jackie káchikañá: “Kúsi̱íní-inii̱ tá chíka̱a̱ na̱ anciano ndee̱ xíʼi̱n ta káʼa̱nna ña̱ ndáyáʼviní chiñu ña̱ kéʼíi̱. Tu̱ʼun ña̱ káʼa̱nna íyoña nda̱a̱ táki̱ʼva íyo iin vaso ti̱kui̱í vi̱xin tá xíʼiyó ki̱vi̱ niʼníní. Ña̱ káʼa̱nna xíʼi̱n chíndeétáʼanña xíʼi̱n ña̱ kunda̱a̱-inii̱ ña̱ va̱ʼava íyo chiñu ña̱ kéʼíi̱, tasaá kúsi̱íníka-inii̱ tá sánáʼi̱ na̱ yiví” (Prov. 25:25).

19. ¿Ndáaña kivi sakúsi̱í-ini ndiʼiyó?

¹⁹ Ni kǒova na̱ yiví káʼviyó xíʼin tiempo vitin, soo kiviva chindeétáʼanyó xíʼin iinna ña̱ kuaʼnuna xíʼin tu̱ʼun Ndióxi̱. Tá ku̱a̱ʼa̱nyó xíʼin iin na̱ hermano ña̱ kaʼvina xíʼin iin na̱ yiví, kiviva ka̱ʼa̱nyó sava ña̱ʼa ña̱ chindeétáʼan xíʼinna soo va̱ása ku̱a̱ʼání ka̱ʼa̱nyó. Ná kooyó migo na̱ sa̱kán sákuaʼa xa̱ʼa̱ Ndióxi̱ tá ku̱a̱ʼa̱nna reunión, ta ná chinúuyó iin yichi̱ va̱ʼaní nu̱úna. Ta na̱ anciano kivi chika̱a̱na ndee̱ xíʼin na̱ sa̱kán sákuaʼa xa̱ʼa̱ Ndióxi̱ tá ná tavána tiempo ña̱ natúʼunna xíʼinna, ta saátu tá ná ka̱ʼa̱nna tu̱ʼun va̱ʼa xíʼin na̱ hermano ta sanáʼa̱nana ndáa ki̱ʼva viíka sanáʼa̱na na̱ yiví. Kusi̱íní-iniyó tá ná chindeétáʼanyó xíʼin iin na̱ yiví ña̱ xa̱a̱na kuʼvi̱-inina kunina Jehová ta kachíñuna nu̱úra.