¿Á kivi chindeétáʼanyó xíʼin na̱ yiví ña̱ xa̱a̱na koona discípulo ta̱ Jesús?

1. ¿Ndáaña ke̱ʼé Jehová xa̱ʼa̱ iin tá iinyó?

NÁ NDAKANIXI̱NÍYÓ ndáa ki̱ʼva ni̱xa̱a̱yó ku̱uyó testigo Jehová. Sana na̱ yiváyó sa̱náʼa̱ miíyó xa̱ʼa̱ Ndióxi̱, á sana ni̱ya̱ʼa iin na̱ testigo Jehová veʼeyó ta na̱túʼunna xíʼinyó xa̱ʼa̱ra, á sanatu iin na̱ xi̱kachíñu xíʼinyó á iin na̱ xi̱kaʼvi xíʼinyó ti̱xin escuela na̱túʼun xíʼinyó xa̱ʼa̱ra (Mar. 13:10). Tándi̱ʼi, iin na̱ hermano xi̱niñúʼuna tiempona xíʼin ndee̱na ña̱ va̱ʼa sa̱náʼa̱na miíyó xa̱ʼa̱ Ndióxi̱. Ta tíxa̱ʼvi ña̱yóʼo ni̱xa̱a̱yó ni̱kuʼvi̱-iniyó xi̱niyó Jehová, ta ku̱nda̱a̱-iniyó ña̱ kúʼvi̱ní-inira xínira miíyó. Jehová ka̱nara miíyó ña̱ kooyó táʼan na̱ ñuura. Ta xa̱ʼa̱ ña̱ kúúyó discípulo ta̱ Jesús ndátuyó ndakiʼinyó ña̱ kutakuyó ndiʼi tiempo nu̱ú ñuʼú yóʼo (Juan 6:44). Táxiníyó tíxa̱ʼvi ndaʼa̱ Jehová xa̱ʼa̱ ña̱ xi̱niñúʼura iin na̱ hermano ña̱ va̱ʼa sa̱náʼa̱na miíyó xa̱ʼa̱ ña̱ nda̱a̱, ta saátu xa̱ʼa̱ ña̱ táxira kachíñuyó nu̱úra.

2. ¿Ndáaña sákuaʼayó nu̱ú artículo yóʼo?

² Vitin xa̱a̱ xíni̱yó ndáaña kúú ña̱ nda̱a̱, ña̱kán kúúmiíyó iin chiñu ña̱ ndáyáʼviní: ña̱ sanáʼa̱yó inkana ña̱ va̱ʼa xa̱a̱na kutakuna ndiʼi tiempo. Sava na̱ hermano va̱ása íxayo̱ʼvi̱ña xíʼinna ña̱ natúʼunna xíʼin na̱ yiví veʼe tá veʼe. Soo íxayo̱ʼvi̱ña xíʼinna ka̱ʼa̱nna xíʼin iin na̱ yiví á kúni̱na sákuaʼana xa̱ʼa̱ Ndióxi̱ á ña̱ kixáʼana kaʼvina xíʼin na̱ yiví. Tá ndóʼoyó táʼan ña̱yóʼo, ña̱ va̱xi nu̱ú artículo yóʼo chindeétáʼanña xíʼinyó. Yóʼo sákuaʼayó nda̱chun kúú ña̱ kúni̱yó sanáʼa̱yó na̱ yiví ña̱ va̱ʼa xa̱a̱na koona discípulo ta̱ Jesús. Ta saátu sákuaʼayó ndáaña kivi keʼéyó tá íxayo̱ʼvi̱ña xíʼinyó kixáʼayó kaʼviyó xíʼin iin na̱ yiví. Soo siʼna ná kotoyó nda̱chun kúú ña̱ va̱ása xíniñúʼu natúʼun kuitíyó xíʼin na̱ yiví xa̱ʼa̱ Ndióxi̱ chi saátu xíniñúʼu sanáʼa̱yóna.

TA̱ JESÚS XA̱ʼNDARA CHIÑU ÑA̱ NATÚʼUNYÓ XÍʼIN NA̱ YIVÍ TA SANÁʼA̱YÓNA

3. ¿Nda̱chun nátúʼunyó xíʼin na̱ yiví xa̱ʼa̱ Ndióxi̱?

³ Tá ni̱xi̱yo ta̱ Jesús nu̱ú ñuʼú yóʼo xa̱ʼndara iin chiñu nu̱ú na̱ discípulora, ta chiñu yóʼo u̱vi̱ ndáta̱ʼvíña. Ña̱ nu̱ú, ni̱ka̱ʼa̱nra xíʼinna ña̱ ná natúʼunna xa̱ʼa̱ Reino Ndióxi̱ xíʼin na̱ yiví, ta sa̱náʼa̱rana ndáa ki̱ʼva keʼénaña (Mat. 10:7; Luc. 8:1). Ni̱ka̱ʼa̱nra xíʼinna ndáaña keʼéna tá ná kandíxa na̱ yiví kuniso̱ʼona xa̱ʼa̱ Reino Ndióxi̱, ta ndáaña keʼéna tá ná va̱ása kandíxa na̱ yiví yóʼo kuniso̱ʼona (Luc. 9:2-5). Saátu ni̱ka̱ʼa̱nra ña̱ ku̱a̱ʼání na̱ yiví sakuaʼana xa̱ʼa̱ Ndióxi̱ saáchi ni̱ka̱ʼa̱nra xíʼinna ña̱ “natúʼunna tu̱ʼun va̱ʼa xa̱ʼa̱ Reino Ndióxi̱ iníísaá nu̱ú ñuʼú” (Mat. 24:14; Hech. 1:8). Ni ná kandíxa na̱ yiví kuniso̱ʼona á va̱ása, na̱yóʼo xi̱niñúʼu natúʼunna xíʼinna xa̱ʼa̱ Reino Ndióxi̱ ta saátu xa̱ʼa̱ ña̱ keʼé Reino yóʼo chí nu̱únínu.

4. Nda̱a̱ táki̱ʼva káchi Mateo 28:18-20, ¿ndáa inka ña̱ʼa xíniñúʼu keʼéyó ni xa̱a̱ nátúʼunyó xa̱ʼa̱ Reino Ndióxi̱ xíʼin na̱ yiví?

⁴ ¿Ndáa inka ña̱ʼa kúú ña̱ xi̱niñúʼu keʼé na̱ discípulo ta̱ Jesús? Ni̱ka̱ʼa̱nra xíʼinna ña̱ ná sanáʼa̱na na̱ yiví ña̱ keʼéna ndiʼi ña̱ sa̱náʼa̱rana. Soo savana káʼa̱nna ña̱ na̱ discípulo na̱ ni̱xi̱yo tá siglo nu̱ú kuití kúú na̱ xi̱niñúʼu keʼé chiñu yóʼo. ¿Á ña̱ nda̱a̱ kúú ña̱yóʼo? Va̱ása, saáchi ta̱ Jesús ni̱ka̱ʼa̱nra ña̱ nda̱a̱ tiempo ña̱ ndóoyó vitin ndakundeéyó keʼéyó chiñu ña̱ ndáyáʼviní yóʼo, nda̱a̱ ná ndiʼi-xa̱ʼa̱ ñuyǐví (kaʼvi Mateo 28:18-20).b Ta sana tá nda̱kutáʼan ta̱ Jesús xíʼin yáʼaka 500 na̱ discípulora saá kúú ña̱ xa̱ʼndara chiñu yóʼo nu̱úna (1 Cor. 15:6). Ta nu̱ú visión ña̱ ni̱na̱ʼa̱ ta̱ Jesús nu̱ú ta̱ Juan, ni̱na̱ʼa̱ra ña̱ kúni̱ra ña̱ ndiʼi na̱ discípulora ná chindeétáʼanna xíʼin inka na̱ yiví ña̱ xa̱a̱na sákuaʼana xa̱ʼa̱ Jehová (Apoc. 22:17).

5. Nda̱a̱ táki̱ʼva káchi 1 Corintios 3:6-9, ¿ndáa ejemplo xi̱niñúʼu ta̱ Pablo ña̱ na̱ʼa̱ra ndáa ki̱ʼva kítáʼan ña̱ nátúʼunyó xíʼin na̱ yiví xíʼin ña̱ sánáʼa̱yóna?

⁵ Ta̱ apóstol Pablo chi̱táʼanra chiñu ña̱ kúúmiíyó xíʼin chiñu ña̱ kúúmií na̱ chíʼi planta, tasaá ni̱na̱ʼa̱ra ña̱ va̱ása xíniñúʼu chiʼi kuitíyó ña̱ nda̱a̱ níma̱ na̱ yiví, saáchi íyo inka ña̱ xíniñúʼu keʼéyó. Ña̱yóʼo sa̱ndákaʼánra na̱ ñuu Corinto tá ka̱chira: “Yi̱ʼi̱ kúú ta̱ chi̱ʼi, ta̱ Apolos kúú ta̱ ni̱ko̱so̱ña [...]. Ndóʼó kúú ñuʼú nu̱ú chíʼi Ndióxi̱” (kaʼvi 1 Corintios 3:6-9).c Miíyó na̱ káchíñu xíʼin Ndióxi̱ va̱ása chíʼi kuitíyó ña̱ nda̱a̱ níma̱ na̱ yiví, chi saátu kóso̱yóña ta kíʼinyó kuenta xíʼinña á xa̱a̱ ku̱a̱ʼa̱n xáʼnuña níma̱na (Juan 4:35). Soo kúnda̱a̱-iniyó ña̱ mií Ndióxi̱ kúú ta̱ sákuaʼnuña níma̱na.

6. ¿Ndáa chiñu kúú ña̱ kéʼé iin na̱ sánáʼa̱ na̱ yiví?

⁶ Nándukúyó na̱ yiví na̱ kúni̱ “kutaku ndiʼi tiempo” (Hech. 13:48). Ña̱ va̱ʼa xa̱a̱na koona discípulo ta̱ Jesús xíniñúʼu chindeétáʼanyó xíʼinna 1) kunda̱a̱-inina xíʼin ña̱ káʼa̱n Biblia, 2) kandíxana ña̱ káʼa̱nña, 3) keʼéna ndiʼi ña̱ sákuaʼana nu̱úña (Juan 17:3; Col. 2:6, 7; 1 Tes. 2:13). Tá ndiʼiyó na̱ íyo ti̱xin congregación ná na̱ʼa̱yó ña̱ kúʼvi̱-iniyó xíniyó na̱ sa̱kán sákuaʼa xa̱ʼa̱ Ndióxi̱, ta saátu tá vií ndákiʼinyóna tá va̱xina reunión, saá kúú ña̱ kivi chindeétáʼanyó xíʼinna (Juan 13:35). Sana ku̱a̱ʼá tiempo xíniñúʼuyó ña̱ va̱ʼa sanáʼa̱yó na̱ yiví, ta saátu xíniñúʼu chika̱a̱níyó ndee̱ ña̱ chindeétáʼanyó xíʼinna ña̱ va̱ása kandíxakana ña̱ vatá á ña̱ va̱ása keʼékana ña̱ va̱ása va̱ʼa (2 Cor. 10:4, 5). Sana ku̱a̱ʼá yo̱o̱ xíniñúʼu chindeétáʼanyó xíʼin iin na̱ yiví ña̱ va̱ʼa nasamana ña̱ kéʼéna, tasaá kivi xa̱a̱na ndakuchina. Ta ku̱a̱ʼáníva ña̱ va̱ʼa ndakiʼinna.

SÁNÁʼA̱YÓ NA̱ YIVÍ SAÁCHI KÚʼVI̱-INIYÓ XÍNIYÓNA TA SAÁTU KÚʼVI̱-INIYÓ XÍNIYÓ JEHOVÁ

7. ¿Nda̱chun nátúʼunyó xíʼin na̱ yiví ta sánáʼa̱yóna ña̱ va̱ʼa xa̱a̱na koona discípulo ta̱ Jesús?

⁷ ¿Nda̱chun nátúʼunyó xíʼin na̱ yiví ta sánáʼa̱yóna ña̱ va̱ʼa xa̱a̱na koona discípulo ta̱ Jesús? Ña̱ nu̱ú, saáchi kúʼvi̱-iniyó xíniyó Jehová. Tá chíka̱a̱yó ndee̱ ña̱ natúʼunyó xíʼin na̱ yiví ta saátu ña̱ sanáʼa̱yóna, saá náʼa̱yó ña̱ kúʼvi̱-iniyó xíniyó Ndióxi̱ (1 Juan 5:3). Ná ndakanixi̱níyó xa̱ʼa̱ ña̱yóʼo: xa̱ʼa̱ ña̱ kúʼvi̱-iniyó xíniyó Jehová ña̱kán ki̱xáʼayó nátúʼunyó xíʼin na̱ yiví veʼe tá veʼe. Soo sana i̱xayo̱ʼvi̱ña xíʼinyó keʼéyó ña̱yóʼo tá xa̱ʼa̱, ta sana ni̱yi̱ʼvíyó tá ni̱xa̱ʼa̱nyó ña̱ yichi̱ nu̱ú na̱túʼunyó xíʼin na̱ yiví. Soo ke̱ʼéyó ña̱yóʼo saáchi xi̱kunda̱a̱-iniyó ña̱ mií ta̱ Jesús kúú ta̱ kúni̱ ná keʼéyó chiñu yóʼo. Ta vitin, sana va̱ása íxayo̱ʼvi̱kaña xíʼinyó natúʼunyó xíʼin na̱ yiví xa̱ʼa̱ Ndióxi̱, soo ¿á íxayo̱ʼvi̱ña xíʼinyó kaʼviyó xíʼinna? Sana yíʼviníyó keʼéyó ña̱yóʼo, soo ná ka̱ʼa̱nyó xíʼin Jehová ña̱ chindeétáʼanra xíʼinyó ña̱ va̱ása yi̱ʼvíyó, ta saátu ña̱ chindeétáʼanra xíʼinyó ña̱ ka̱ʼa̱nyó xíʼin na̱ yiví á kúni̱na kaʼviyó xíʼinna. Tasaá chindeétáʼanra xíʼinyó ña̱ kutóokayó sanáʼa̱yó na̱ yiví.

8. Nda̱a̱ táki̱ʼva káchi Marcos 6:34, ¿nda̱chun sánáʼa̱yó na̱ yiví xa̱ʼa̱ ña̱ nda̱a̱?

⁸ Ña̱ u̱vi̱, sánáʼa̱yó na̱ yiví xa̱ʼa̱ ña̱ nda̱a̱ saáchi kúʼvi̱-iniyó xíniyóna. Iin yichi̱, ta̱ Jesús xíʼin na̱ discípulora ku̱naánína saáchi ni̱xi̱kana iníísaá ki̱vi̱ na̱túʼunna xíʼin na̱ yiví xa̱ʼa̱ Ndióxi̱, ña̱kán ndu̱kúna iin lugar nu̱ú kivi ndakindee̱na. Soo tá ni̱xa̱a̱na kán, xa̱a̱ ndátu ku̱a̱ʼání na̱ yiví na̱yóʼo. Ta̱ Jesús ku̱ndáʼviní-inira xi̱nirana, “ta ki̱xáʼara sánáʼa̱rana ku̱a̱ʼá ña̱ʼa” (kaʼvi Marcos 6:34).d ¿Nda̱chun ke̱ʼé ta̱ Jesús ña̱yóʼo? Saáchi ku̱nda̱a̱-inira xíʼin ña̱ ndóʼo na̱ yiví kán ta xi̱kuni̱ra chindeétáʼanra xíʼinna. Xi̱kunda̱a̱-inira ña̱ xóʼvi̱nína ta xi̱niñúʼu natúʼunra xíʼinna xa̱ʼa̱ ña̱ ndátuna ndakiʼinna chí nu̱únínu. Tiempo vitin ni si̱íva náʼa̱ na̱ yiví soo íyova tu̱ndóʼo nu̱úna, ña̱kán xíniñúʼu natúʼunyó xíʼinna xa̱ʼa̱ ña̱ ndátuna ndakiʼinna chí nu̱únínu. Na̱yóʼo íyona nda̱a̱ táki̱ʼva íyo ndikachi tí nda̱ñúʼu tí kǒo xi̱toʼo. Ta̱ apóstol Pablo ni̱ka̱ʼa̱nra ña̱ kǒo Ndióxi̱na ta kǒo ña̱ ndátuna ndakiʼinna chí nu̱únínu (Efes. 2:12). Na̱yóʼo ku̱a̱ʼa̱nna chí yichi̱ nu̱ú ku̱a̱ʼa̱n na̱ ndiʼi-xa̱ʼa̱ (Mat. 7:13). Tá ná ndakanixi̱níyó xa̱ʼa̱ ña̱ ndóʼo na̱ yiví na̱ íyo nu̱ú territorio ña̱ kúúmiíyó, saá kuni̱yó chindeétáʼanyó xíʼinna xa̱ʼa̱ ña̱ kúʼvi̱-iniyó xíniyóna ta kúndáʼvi-iniyó xíniyóna. Ta iin ki̱ʼva ña̱ chindeétáʼanyó xíʼinna kúú ña̱ ka̱ʼa̱nyó xíʼinna á kúni̱na kaʼviyó xíʼinna.

9. Nda̱a̱ táki̱ʼva káchi Filipenses 2:13, ¿ndáa ki̱ʼva chindeétáʼan Jehová xíʼinyó?

⁹ Sana va̱ása xíínyó ka̱ʼa̱nyó xíʼin na̱ yiví á kúni̱na kaʼviyó xíʼinna, saáchi kúnda̱a̱-iniyó ña̱ xíniñúʼuyó ku̱a̱ʼání tiempo ña̱ va̱ʼa sanáʼa̱yóna. Tá saá íyo ña̱ ndóʼoyó, ná natúʼunyó xíʼin Jehová xa̱ʼa̱ ña̱yóʼo ta ná ka̱ʼa̱nyó xíʼinra ña̱ chindeétáʼanra xíʼinyó ña̱ kutóoyó ndani̱ʼíyó iin na̱ yiví na̱ kúni̱ sákuaʼa xa̱ʼa̱ Biblia (kaʼvi Filipenses 2:13).e Ta̱ apóstol Juan ni̱ka̱ʼa̱nra ña̱ ndakuiinva Ndióxi̱ oración ña̱ kéʼéyó tá kítáʼanña xíʼin ña̱ kúni̱ra (1 Juan 5:14, 15) Ña̱kán kivi kandíxayó ña̱ chindeétáʼanva Jehová xíʼinyó ña̱ kuni̱yó sanáʼa̱yó na̱ yiví ña̱ va̱ʼa xa̱a̱na koona discípulo ta̱ Jesús.

¿NDÁAÑA KIVI KEʼÉYÓ ÑA̱ VA̱ʼA YA̱ʼAYÓ NU̱Ú INKA ÑA̱ ÍXAYO̱ʼVI̱ XÍʼINYÓ?

10, 11. ¿Nda̱chun íxayo̱ʼvi̱ña xíʼinyó kixáʼayó kaʼviyó xíʼin iin na̱ yiví?

¹⁰ Kúnda̱a̱va-iniyó ña̱ ndáyáʼviní chindeétáʼanyó xíʼin na̱ yiví ña̱ va̱ʼa xa̱a̱na koona discípulo ta̱ Jesús. Soo kivi kasi sava ña̱ʼa nu̱úyó ña̱ keʼéyó ña̱yóʼo. Ná ka̱ʼa̱nyó xa̱ʼa̱ savaña ta ná kotoyó ndáa ki̱ʼva ya̱ʼayó nu̱úña.

¹¹ ¿Á íxayo̱ʼvi̱ña xíʼinyó taváyó ku̱a̱ʼáka tiempo ña̱ va̱ʼa sanáʼa̱yó na̱ yiví xa̱ʼa̱ Ndióxi̱? Sava na̱ publicador íxayo̱ʼvi̱ña xíʼinna saáchi xa̱a̱ ku̱chéena á ndeé ndóʼona. Tá saá íyo ña̱ ndóʼoyó ná ndakanixi̱níyó xa̱ʼa̱ ña̱ sa̱kuaʼayó xíʼin kue̱ʼe̱ coronavirus: ña̱ kiviva kuniñúʼuyó teléfono á Internet ña̱ va̱ʼa kaʼviyó xíʼin na̱ yiví. Ña̱kán ni ndóoyó veʼeyó kiviva kaʼviyó xíʼinna. Sava na̱ yiví kúni̱vana sákuaʼana xa̱ʼa̱ Ndióxi̱, soo va̱ása kúnaʼa̱na hora ña̱ kéeyó nátúʼunyó xa̱ʼa̱ Ndióxi̱. Ña̱kán kiviva ka̱ʼa̱nyó xíʼinna ña̱ sanáʼa̱yóna tá íyo tiempo nu̱úna, tá kúú tá xi̱ta̱a̱n á tá xi̱ku̱aá. Saá íyo ña̱ ke̱ʼé ta̱ Jesús chi sa̱náʼa̱ra ta̱ Nicodemo tá xi̱ku̱aá saáchi saá xi̱kuni̱ mií ta̱ Nicodemo (Juan 3:1, 2).

12. ¿Ndáaña chindeétáʼan xíʼinyó tá túviyó ña̱ va̱ása íyo tu̱ʼvayó ña̱ sanáʼa̱yó na̱ yiví?

¹² ¿Á túviyó ña̱ va̱ása íyo tu̱ʼvayó ña̱ va̱ʼa kixáʼayó kaʼviyó xíʼin iin na̱ yiví? Sana ndákanixi̱níyó ña̱ va̱ása xíni̱níyó xa̱ʼa̱ ña̱ káʼa̱n Biblia á túviyó ña̱ kúma̱níka nu̱úyó ña̱ va̱ʼa kixáʼayó sanáʼa̱yó na̱ yiví. Tá saá íyo ña̱ ndóʼoyó ná ndakanixi̱níyó xa̱ʼa̱ u̱ni̱ ña̱ʼa ña̱ sáxi̱nu̱-iniyó ña̱ kuchiñuvayó kaʼviyó xíʼin na̱ yiví. Ña̱ nu̱ú, Jehová kúnda̱a̱-inira ña̱ kuchiñuvayó sanáʼa̱yó na̱ yiví (2 Cor. 3:5). Ña̱ u̱vi̱, ta̱ Jesús ta̱ kíʼin kuenta xíʼin ndiʼi ña̱ʼa ña̱ íyo chí ndiví xíʼin ña̱ íyo nu̱ú ñuʼú yóʼo, xa̱ʼndara chiñu nu̱úyó ña̱ sanáʼa̱yó na̱ yiví (Mat. 28:18). Ta ña̱ u̱ni̱, va̱ása íyo mitúʼunyó saáchi nda̱a̱ táki̱ʼva chi̱ndeétáʼan Jehová xíʼin ta̱ Jesús, saátu chindeétáʼanra xíʼin miíyó ña̱ kunda̱a̱-iniyó ndáaña ka̱ʼa̱nyó xíʼin na̱ yiví (Juan 8:28; 12:49). Ta saátu kivi ka̱ʼa̱nyó xíʼin ta̱ superintendente ña̱ grupo nu̱ú ndíka̱a̱yó, á xíʼin na̱ kúú precursor á iin na̱ xa̱a̱ ku̱a̱ʼání ku̱i̱ya̱ kúú publicador ña̱ va̱ʼa chindeétáʼanna xíʼinyó ña̱ kaʼviyó xíʼin iin na̱ yiví. Tá ná ku̱ʼu̱nyó xíʼin na̱yóʼo tá ku̱a̱ʼa̱nna kaʼvina xíʼin iin na̱ yiví, ña̱yóʼo kivi chindeétáʼanña xíʼinyó ña̱ viíka sanáʼa̱yó.

13. ¿Nda̱chun xíniñúʼu nasamayó ki̱ʼva ña̱ sánáʼa̱yó na̱ yiví?

¹³ ¿Á íxayo̱ʼvi̱ña xíʼinyó kuniñúʼuyó ña̱ xa̱á ña̱ táva na̱ ñuu Ndióxi̱ á ña̱ nasamayó ki̱ʼva ña̱ sánáʼa̱yó na̱ yiví? Na̱sama ki̱ʼva ña̱ káʼviyó xíʼin na̱ yiví. Saáchi vitin xíniñúʼuyó libro ña̱ naní Kivi koo si̱íún, ta xa̱a̱ ya̱chi̱ka xíniñúʼu kaʼvi kúeeyó libro yóʼo tá kúma̱níka kaʼviyó xíʼin iin na̱ yiví, ta saátu xa̱a̱ síín íyo ki̱ʼva ña̱ sánáʼa̱yóna. Saáchi vitin loʼoka párrafo káʼviyó ta ku̱a̱ʼáka tiempo nátúʼun-táʼanyó xíʼinna. Ku̱a̱ʼáka video xíniñúʼuyó, ta saátu ña̱ va̱xi nu̱ú sitio ña̱ kúúmiíyó nu̱ú Internet á nu̱ú JW Library^®. Tá túviyó ña̱ íxayo̱ʼvi̱ña xíʼinyó kuniñúʼuyó ña̱yóʼo, ná ka̱ʼa̱nyó xíʼin inkana ña̱ sanáʼa̱na miíyó ña̱ kuniñúʼuyóña. Íxayo̱ʼvi̱vaña xíʼinyó kuniñúʼuyó ña̱yóʼo á nasamayó ki̱ʼva ña̱ sánáʼa̱yó na̱ yiví. Chi kútóokayó keʼéyóña nda̱a̱ táki̱ʼva xi̱keʼéyóña tá ya̱chi̱. Soo Jehová chindeétáʼanra xíʼinyó ta saátu na̱ hermanoyó kivi chindeétáʼanna xíʼinyó ña̱ kixáʼayó kuniñúʼuyó ña̱ʼa xa̱á yóʼo, ta kusi̱íka-iniyó tá sánáʼa̱yó na̱ yiví. Iin ta̱ precursor ka̱chira: “Xa̱ʼa̱ ña̱ na̱sama ki̱ʼva ña̱ sánáʼa̱yó na̱ yiví va̱ʼaníka kúni miíyó ta saátu na̱ sánáʼa̱yó”.

14. a) ¿Ndáaña xíniñúʼu ndakaʼányó tá íxayo̱ʼvi̱ña xíʼinyó kixáʼayó kaʼviyó xíʼin na̱ yiví? b) ¿Ndáa ki̱ʼva chíka̱a̱ 1 Corintios 3:6, 7 ndee̱ xíʼinyó?

¹⁴ ¿Á íxayo̱ʼvi̱ña xíʼinyó kixáʼayó kaʼviyó xíʼin na̱ yiví na̱ íyo territorio ña̱ kúúmiíyó? Sava na̱ yiví va̱ása kútóona kuniso̱ʼona ña̱ nátúʼunyó xíʼinna á nda̱a̱ sásina nu̱úyó keʼéyó chiñu yóʼo. ¿Ndáaña chindeétáʼan xíʼinyó ña̱ va̱ʼa ndakundeéyó natúʼunyó xa̱ʼa̱ Ndióxi̱? Ná ndakaʼányó chi nása̱maní ña̱ íyo nu̱ú ñuʼú yóʼo, ta saátu ña̱ ndóʼo na̱ yiví kivi nasa̱mavaña. Tá kúú, na̱ va̱ása kútóo sákuaʼa xa̱ʼa̱ Ndióxi̱, kivi xa̱a̱na kunda̱a̱-inina ña̱ xíniñúʼu sákuaʼana xa̱ʼa̱ra (Mat. 5:3). Ta saátu sava na̱ yiví na̱ va̱ása níxi̱kutóo kiʼin tutu ña̱ kúúmiíyó, tá ni̱ya̱ʼa tiempo ki̱xáʼana sákuaʼana xa̱ʼa̱ Ndióxi̱. Ta ná ndakaʼányó chi nu̱ú Jehová kúú ña̱ káchíñuyó, ta̱yóʼo kúni̱ra ña̱ ná ndakundeéyó chiʼiyó ña̱ nda̱a̱ níma̱ na̱ yiví ta ko̱so̱yóña. Soo miíra kúú ta̱ sákuaʼnu ña̱yóʼo níma̱na (1 Cor. 3:6, 7). Ná va̱ása ndakava-iniyó tá kǒo na̱ yiví sánáʼa̱yó tiempo vitin, chi taxiva Jehová ña̱ va̱ʼa ndaʼa̱yó xa̱ʼa̱ ña̱ chíka̱a̱níyó ndee̱ ña̱ natúʼunyó xíʼin na̱ yiví.f

NÁ KUSI̱Í-INIYÓ SANÁʼA̱YÓ NA̱ YIVÍ ÑA̱ KOONA DISCÍPULO TA̱ JESÚS

15. ¿Ndáaña ndóʼo Jehová tá kíxáʼa iin na̱ yiví sákuaʼana xa̱ʼa̱ra ta kéʼéna ña̱ sákuaʼana?

¹⁵ Jehová kúsi̱íní-inira tá kíxáʼa na̱ yiví sákuaʼana xa̱ʼa̱ ña̱ va̱xi nu̱ú Biblia ta nátúʼunna xíʼin inkana xa̱ʼa̱ ña̱yóʼo (Prov. 23:15, 16). Ta saátu kúsi̱íní-inira xíʼin chiñu ña̱ kéʼéyó tiempo vitin. Saáchi ni xi̱ndika̱a̱ kue̱ʼe̱ ña̱ coronavirus tá ku̱i̱ya̱ 2020, soo ka̱ʼviyó xíʼin 7,705,765 na̱ yiví ta chi̱ndeétáʼanyó xíʼin 241,994 na̱ yiví ña̱ ni̱xa̱a̱na nda̱taxina miína ndaʼa̱ Jehová ta nda̱kuchina. Ta na̱ nda̱kuchi yóʼo kivi kixáʼana kaʼvina xíʼin inka na̱ yiví ta xa̱a̱na koona discípulo ta̱ Jesús (Luc. 6:40). Sákusi̱íníyó-ini Jehová tá chíndeétáʼanyó xíʼin na̱ yiví ña̱ xa̱a̱na koona discípulo ta̱ Jesús.

16. ¿Ndáaña kivi chika̱a̱-iniyó keʼéyó?

¹⁶ Xíniñúʼu chika̱a̱nívayó ndee̱ ña̱ va̱ʼa sanáʼa̱yó na̱ yiví ña̱ xa̱a̱na kuʼvi̱-inina kunina Jehová. Soo miívara chindeétáʼan xíʼinyó ña̱ va̱ʼa sanáʼa̱yó na̱ yiví ña̱ xa̱a̱na koona discípulo ta̱ Jesús. ¿Á kivi chika̱a̱-iniyó nandukúyó iin na̱ yiví na̱ kivi kixáʼayó kaʼviyó xíʼin xa̱ʼa̱ Ndióxi̱? Tá nátúʼunyó xíʼin na̱ yiví ná ka̱ʼa̱nyó xíʼinna á kúni̱na kixáʼayó kaʼviyó xíʼinna xa̱ʼa̱ Ndióxi̱. Tá ná keʼéyó ña̱yóʼo, sana kuni̱vana kaʼviyó xíʼinna. Ta ná va̱ása kaka-iniyó ña̱ chindeétáʼanva Jehová xíʼinyó tá ná chika̱a̱yó ndee̱.

17. ¿Ndáaña kundoʼoyó tá ná kaʼviyó xíʼin na̱ yiví?

¹⁷ Iin chiñu ña̱ ndáyáʼviní kúú ña̱ natúʼunyó xíʼin na̱ yiví xa̱ʼa̱ Ndióxi̱ ta sanáʼa̱yóna xa̱ʼa̱ ña̱ nda̱a̱, ta chiñu yóʼo sákusi̱íníña-iniyó. Ta̱ apóstol Pablo chi̱ndeétáʼanra xíʼin ku̱a̱ʼání na̱ yiví na̱ ni̱xi̱yo chí ñuu Tesalónica ña̱ ni̱xa̱a̱na ndu̱una discípulo ta̱ Jesús. Ta siʼa ni̱ka̱ʼa̱nra xa̱ʼa̱ ña̱ xi̱ndoʼora: “¿Ndáaña ndátundi̱?, ¿ndáaña sakúsi̱í-inindi̱?, ¿á ndáaña koo corona ña̱ sakúsi̱í-inindi̱, ña̱ kunúu xi̱níndi̱ kuitandi̱ nu̱ú tátayó Jesús tá xa̱a̱ íyora yóʼo? ¿Á su̱ví ndóʼó kúúna? Saá íyoña, ndóʼó kúú na̱ sákusi̱í-inindi̱ ta va̱ʼaní kúnindi̱ xa̱ʼa̱ndó” (1 Tes. 2:19, 20; Hech. 17:1-4). Ta saátu ku̱a̱ʼání na̱ hermano tiempo vitin kúsi̱í-inina tá chíndeétáʼanna xíʼin na̱ yiví. Iin ñá hermana ñá naní Stéphanie, miíñá xíʼin yiíñá xa̱a̱ chíndeétáʼanna xíʼin ku̱a̱ʼání na̱ yiví ña̱ xa̱a̱na ndakuchina, ñáyóʼo káchiñá: “Ña̱ sákusi̱íní-inii̱ kúú ña̱ chíndeétáʼi̱n xíʼin na̱ yiví ña̱ ndataxina miína ndaʼa̱ Jehová ta ndakuchina”.