¿Á ndákaʼún xa̱ʼa̱ ña̱yóʼo?

¿Á ka̱ʼviún ndiʼi Tutu Ña̱ Nátúʼun xíʼinyó? Koto á kuchiñún ndakuiún ndiʼi ña̱yóʼo:

Tá káʼa̱n Santiago 5:11 ña̱ “kúni̱ní Jehová xínira miíyó” ta “kúndáʼvi-inira” xínira miíyó, ¿ndáa ki̱ʼva chíndeétáʼan ña̱yóʼo xíʼinyó?

Kúnda̱a̱-iniyó chi xa̱ʼa̱ ña̱ kúndáʼviní-ini Jehová xínira miíyó íxakáʼnu-inira xa̱ʼa̱yó tá kéʼéyó ña̱ va̱ása va̱ʼa. Santiago 5:11 chíndeétáʼanña xíʼinyó kunda̱a̱-iniyó ña̱ íyo Jehová ña̱ chindeétáʼanra xíʼinyó. Ta ndáyáʼviní kundiku̱nyó yichi̱ra (w21.01, página 21).

¿Nda̱chun ta̱xi Jehová chiñu ndaʼa̱ savana ña̱ kuniʼina yichi̱ nu̱ú inkana?

Xa̱ʼa̱ ña̱ kúʼvi̱-ini Jehová xínira miíyó ña̱kán ta̱xira ña̱ ná kuniʼi savana yichi̱ nu̱úyó. Ta tíxa̱ʼvi ña̱yóʼo, na̱ veʼe Jehová viíní íyona ta táxi̱n íyona. Na̱ familia na̱ íxato̱ʼó ña̱yóʼo, kúnda̱a̱-inina ndáana kúú na̱ káʼa̱n ndáa ki̱ʼva keʼéna iin chiñu, ta ndáana kúú na̱ kuniʼi yichi̱ nu̱úna ña̱ keʼénaña (w21.02, página 3).

Miíyó na̱ ndásakáʼnu Ndióxi̱, ¿nda̱chun xíniñúʼu kiʼinyó kuenta tá xíniñúʼuyó aplicación ña̱ va̱ʼa chindaʼáyó mensaje?

Tá xíniñúʼuyó ña̱ aplicación yóʼo, xíniñúʼu viíní ndaka̱xinyó ndáana kutáʼanyó xíʼin. Soo íxayo̱ʼvi̱vaña xíʼinyó ndaka̱xinyóna tá xíniñúʼuyó aplicación nu̱ú chíndaʼáyó mensaje (1 Tim. 5:13). Ta iin ña̱ i̱yoní kúú ña̱ kuniñúʼuyó ña̱yóʼo, saáchi kivi xaxáyó noticia ña̱ ta̱ʼán kunda̱a̱ káxi-iniyó xa̱ʼa̱, á kuniñúʼuyó aplicación yóʼo ña̱ taváyó xu̱ʼún ndaʼa̱ na̱ hermanoyó (w21.03, página 31).

¿Nda̱chun ta̱xi Ndióxi̱ ni̱xo̱ʼvi̱ ta̱ Jesús ta ni̱xi̱ʼi̱ra?

Ña̱ nu̱ú, ta̱ Jesús xi̱niñúʼu kuvira ndaʼa̱ iin yitu̱n ña̱ va̱ʼa ndatavára na̱ judío ndaʼa̱ iin chiʼña ña̱ nda̱kiʼinna (Gál. 3:10, 13). Ña̱ u̱vi̱, Ndióxi̱ ta̱xira ná xo̱ʼvi̱ se̱ʼera ña̱ va̱ʼa xa̱a̱ra koora su̱tu̱ káʼnu. Ta ña̱ u̱ni̱, Jehová ta̱xira ni̱xo̱ʼvi̱ se̱ʼera ña̱ va̱ʼa na̱ʼa̱ra ña̱ kuchiñuva na̱ yiví nda̱kú koo inina xíʼinra ni ná ya̱ʼana nu̱ú tu̱ndóʼo ña̱ ndeéní (Job 1:9-11) (w21.04, página 16 xíʼin 17).

¿Ndáaña kivi keʼéyó tá kǒo na̱ yiví ndáni̱ʼíyó ti̱xin veʼena?

Kivi ku̱ʼu̱nyó natúʼunyó xíʼin na̱ yiví hora ña̱ ndóona veʼena. Ta saátu kivi nasamayó lugar nu̱ú kivi natúʼunyó xíʼin na̱ yiví. Ta kivitu nasamayó ki̱ʼva ña̱ nátúʼunyó xíʼinna, tá kúú, ña̱ kaʼyíyó carta (w21.05, página 15 xíʼin 16).

¿Ndáaña xi̱kuni̱ kachi ta̱ apóstol Pablo tá ni̱ka̱ʼa̱nra: “Nda̱a̱ táki̱ʼva íyo ta̱ ni̱xi̱ʼi̱ saá íyoi̱ i̱xaa ley”? (Gál. 2:19).

Ley ña̱ ta̱xi Jehová ndaʼa̱ ta̱ Moisés ni̱na̱ʼa̱ña nu̱ú na̱ yiví ña̱ ndiʼina kúúna na̱ yiví ku̱a̱chi, ta chi̱ndeétáʼanña xíʼin na̱ ñuu Israel ña̱ kuyatinna nu̱ú ta̱ Cristo (Gál. 3:19, 24). Ña̱kán ni̱xa̱a̱ ta̱ Pablo ka̱ndíxara ta̱ Jesús. Ta tá ni̱ka̱ʼa̱nra ña̱ nda̱a̱ táki̱ʼva íyo ta̱ ni̱xi̱ʼi̱ saá íyora i̱xaa ley, xi̱kuni̱ kachira ña̱ va̱ása ndíku̱nkara ley yóʼo (w21.06, página 31).

¿Ndáa ña̱ʼa kúú ña̱ kúndeé-ini Jehová xíʼin?

Jehová kúndeé-inira xíʼin ña̱ va̱ása íxato̱ʼóna ki̱vi̱ra, ña̱ va̱ása xíín na̱ yiví kaʼndachíñura nu̱úna, tá i̱xaso̱ʼona nu̱úra, ña̱ vatá ña̱ káʼa̱n ta̱ Ndi̱va̱ʼa, tá xóʼvi̱ na̱ ndásakáʼnu miíra, tá xíʼi̱ na̱ migora, tá sáxo̱ʼvi̱ na̱ yiví na̱ ndi̱va̱ʼa-ini inkana, tá xítora ña̱ kéʼéníka na̱ yiví ña̱ kini, ta saátu tá xítora sándiʼi-xa̱ʼa̱ na̱ yiví ñuʼú yóʼo (w21.07, página 9 nda̱a̱ 12).

Ña̱ ndo̱ʼo ta̱ José, ¿ndáaña sánáʼa̱ña miíyó xa̱ʼa̱ ña̱ kúee koo iniyó?

Ta̱ José ku̱ndeé inira nu̱ú ña̱ va̱ása va̱ʼa ke̱ʼé na̱ ñanira xíʼinra. Ta xa̱ʼa̱ ña̱yóʼo chi̱ka̱a̱na ku̱a̱chi síkíra, ta ku̱a̱ʼání ku̱i̱ya̱ xi̱ndika̱a̱ra veʼeka̱a chí ñuu Egipto (w21.08, página 12).

¿Ndáa profecía ni̱ka̱ʼa̱n Ageo 2:6-9, 20-22 xa̱ʼa̱?

Sava na̱ yiví va̱ása xíínna kuniso̱ʼona ña̱ nátúʼunyó xíʼinna xa̱ʼa̱ Reino Ndióxi̱, soo ku̱a̱ʼánína xíniso̱ʼovana. Si̱lóʼo kúma̱ní ta sankánda̱ Jehová ndiʼi ñuu, ña̱yóʼo kúni̱ kachiña ña̱ sandíʼi-xa̱ʼa̱ra ndiʼi na̱ kéʼé ña̱ va̱ása va̱ʼa (w21.09, página 15 nda̱a̱ 19).

¿Nda̱chun va̱ása xíniñúʼu ndakava-iniyó tá nátúʼunyó xíʼin na̱ yiví xa̱ʼa̱ Ndióxi̱?

Jehová xítora tá chíka̱a̱níyó ndee̱ ña̱ natúʼunyó xa̱ʼa̱ra, ta kúsi̱íní-inira xíʼin ña̱ kéʼéyó. Tá va̱ása kúnaáyó ta ndákundeéyó nátúʼunyó xíʼin na̱ yiví, saá ni̱ʼíyó ña̱ kutakuyó ndiʼi tiempo (w21.10, página 25 xíʼin 26).

¿Ndáa ki̱ʼva chíndeétáʼan Levítico 19 xíʼinyó ña̱ kundiku̱nyó consejo yóʼo: “Nda̱a̱ ndáaka ña̱ kéʼéndó na̱ʼa̱ndó ña̱ kúúndó na̱ yi̱i̱”? (1 Ped. 1:15).

Ña̱ versículo yóʼo sana nu̱ú Levítico 19:2 ka̱naña. Levítico 19 chíndeétáʼanña xíʼinyó kunda̱a̱-iniyó ndáa ki̱ʼva kundiku̱nyó consejo ña̱ va̱xi nu̱ú 1 Pedro 1:15 (w21.12, página 3 xíʼin 4).