Apocalipsis káʼa̱nña xíʼún xa̱ʼa̱ ña̱ ndakiʼún chí nu̱únínu

1. ¿Ndáaña xíniñúʼu ndaka̱xin na̱ yiví keʼéna?

TIEMPO vitin, ndiʼi na̱ yiví xíniñúʼu ndaka̱xinna keʼéna iin ña̱ʼa: ¿á kundiku̱nna Jehová ta̱ kúúmií derecho ña̱ kaʼndachíñura?, ¿á ndakutáʼanna xíʼin ta̱ Ndi̱va̱ʼa ta̱ sáa̱-ini xíni Jehová? Iin kuitívana xíniñúʼu ndaka̱xinna kundiku̱nna. Ta ña̱ ndaka̱xinna kúú ña̱ chindeétáʼan xíʼinna á kutakuna á kuvina (Mat. 25:31-33, 46). Ti̱xin ña̱ gran tribulación, ndiʼi na̱ nda̱kú ná koo ini xíʼin Jehová, ndakiʼinna tuni̱ ña̱ va̱ʼa ka̱kuna (Apoc. 7:14; Ezeq. 9:4, 6). Ta na̱ yiví na̱ ndakiʼin tuni̱ tí kití yukú, na̱ ndiʼi-xa̱ʼa̱ koona (Apoc. 14:9-11).

2. a) ¿Ndáaña káʼa̱n Hebreos 10:35-39 xíʼinyó keʼéyó? b) ¿Ndáa ki̱ʼva chíndeétáʼan libro ña̱ Apocalipsis xíʼinyó?

² (Kaʼvi Hebreos 10:35-39). Iin ña̱ va̱ʼaní kúú ña̱ kéʼún tá xa̱a̱ chíndeétáʼún xíʼin Reino Ndióxi̱, ta sana kúni̱ún chindeétáʼún xíʼin inka na̱ yiví ña̱ ná kundiku̱nna Reinora. Tá saá kúni̱ún keʼún, ña̱ káʼa̱n libro ña̱ Apocalipsis kivi chindeétáʼanña xíʼún. Saáchi libro yóʼo nátúʼunña xíʼinyó ndáaña kundoʼo na̱ ku̱a̱ʼa̱n contra Jehová. Ta saátu nátúʼunña xíʼinyó ndáaña va̱ʼa ndakiʼin na̱ chíndeétáʼan xíʼin Reinora. Ndáyáʼviní kaʼviyó ña̱ va̱xi nu̱ú libro yóʼo, saáchi ña̱yóʼo chindeétáʼanña xíʼinyó ña̱ ndakundeéyó kachíñuyó nu̱ú Jehová. Ta kivitu kuniñúʼuyó ña̱ sákuaʼayó nu̱ú libro yóʼo ña̱ va̱ʼa chindeétáʼanyó xíʼin inkana ña̱ kixáʼana ndasakáʼnuna Jehová, ta ndakundeéna keʼéna ña̱yóʼo.

3. ¿Ndáa pregunta ndakuiinyó nu̱ú artículo yóʼo?

³ Nu̱ú artículo yóʼo ndakuiinyó pregunta yóʼo: ¿ndáaña ndakiʼin na̱ chíndeétáʼan xíʼin Reino Ndióxi̱? ta, ¿ndáaña kundoʼo na̱ yiví na̱ chíndeétáʼan xíʼin tí kití yukú tí color kúáʼa ña̱ yéʼe̱ní tí káʼa̱n libro ña̱ Apocalipsis xa̱ʼa̱?

ÑA̱ NDAKIʼIN NA̱ NDA̱KÚ ÍYO INI XÍʼIN NDIÓXI̱

4. ¿Ndáana ndíta xíʼin ta̱ Jesús xi̱ni ta̱ apóstol Juan?

⁴ Ti̱xin iin visión xi̱ni ta̱ apóstol Juan u̱vi̱ tiʼvi na̱ yiví na̱ chíndeétáʼan xíʼin Reino Ndióxi̱ ña̱ ndákiʼinna ña̱ kutakuna ndiʼi tiempo ta saátu ndákiʼinna ku̱a̱ʼáníka ña̱ va̱ʼa. Siʼna xi̱nira 144,000 na̱ yiví (Apoc. 7:4). Na̱ íyo nu̱ú ñuʼú yóʼo kúúna, ta nda̱kaxinnana ña̱ ku̱ʼu̱nna chí ndiví ña̱ va̱ʼa ndakutáʼanna xíʼin ta̱ Jesús. Tasaá inkáchi kaʼndachíñuna nu̱ú ñuʼú yóʼo ti̱xin Reino Ndióxi̱ (Apoc. 5:9, 10; 14:3, 4). Ta̱ Juan xi̱nira ña̱ ndítana xíʼin ta̱ Jesús chí yuku̱ Sion ña̱ íyo chí ndiví (Apoc. 14:1).

5. ¿Ndáaña xa̱a̱ ku̱nu̱mí kundoʼo na̱ nda̱kaxin Ndióxi̱ ku̱ʼu̱n chí ndiví na̱ kíndo̱oka nu̱ú ñuʼú yóʼo?

⁵ Tá tiempo ña̱ ni̱xi̱yo na̱ apóstol ki̱xáʼa Jehová ndáka̱xinra na̱ yiví na̱ koo táʼan na̱ 144,000, ta nda̱a̱ tiempo vitin ndáka̱xinkarana (Luc. 12:32; Rom. 8:17). Soo iin ángel ni̱ka̱ʼa̱n xíʼin ta̱ apóstol Juan, ña̱ ndáa si̱lóʼo kuití na̱yóʼo kindo̱o nu̱ú ñuʼú yóʼo tiempo so̱ndíʼi vitin. Tá kúma̱níka kixáʼa ña̱ gran tribulación, na̱ kíndo̱o yóʼo ndakiʼinna “sello”, ña̱yóʼo kúni̱ kachiña ña̱ kúsi̱í-ini Jehová xíʼinna ta xa̱a̱ na̱ ku̱ʼu̱n chí ndiví kúúna (Apoc. 7:2, 3; 12:17). Ti̱xin ña̱ gran tribulación Jehová ndakiʼinra na̱yóʼo ña̱ ku̱ʼu̱nna chí ndiví ña̱ va̱ʼa ndakutáʼanna xíʼin na̱ xa̱a̱ íyo kán xa̱ʼa̱ ña̱ nda̱kú ni̱xi̱yo inina. Tasaá na̱ 144,000 yóʼo kaʼndachíñuna xíʼin ta̱ Jesús ti̱xin Reino Ndióxi̱ (Mat. 24:31; Apoc. 5:9, 10).

6, 7. a) ¿Ndáa inka tiʼvi na̱ yiví xi̱ni ta̱ Juan, ta ndáaña kúnda̱a̱-iniyó xa̱ʼa̱na? b) ¿Nda̱chun xíniñúʼu kundi̱ʼi̱-iniyó xa̱ʼa̱ ña̱ va̱xi nu̱ú Apocalipsis capítulo 7 ni kúúyó na̱ ku̱ʼu̱n chí ndiví á na̱ kundoo nu̱ú ñuʼú yóʼo?

⁶ Tándi̱ʼi, ta̱ Juan xi̱nira ku̱a̱ʼání na̱ yiví ta ku̱a̱ʼáníka kúúna nu̱ú na̱ 144,000, saáchi nda̱a̱ ni iinna va̱ása kúchiñu kaʼvi na̱yóʼo (Apoc. 7:9, 10). ¿Ndáaña kúnda̱a̱-iniyó xa̱ʼa̱ na̱yóʼo? Ta̱ Juan, káchira: “Na̱yóʼo kúú na̱ ni̱ka̱ku nu̱ú tu̱ndóʼo káʼnu ta nda̱katana ti̱ko̱to̱ náni̱na ta da̱sayaanaña xíʼin ni̱i̱ tí ndikachi” (Apoc. 7:14). Na̱ yiví na̱ ka̱ku ti̱xin ña̱ gran tribulación kundoona nu̱ú ñuʼú yóʼo, ta ku̱a̱ʼání ña̱ va̱ʼa ndakiʼinna (Sal. 37:9-11, 27-29; Prov. 2:21, 22; Apoc. 7:16, 17).

⁷ Ni kúúyó na̱ ku̱ʼu̱n chí ndiví á na̱ kundoo nu̱ú ñuʼú yóʼo, ¿á kándíxayó ña̱ xi̱nu ña̱ va̱xi nu̱ú Apocalipsis capítulo 7? Iin tiempo ña̱ ndáyáʼviní koo ña̱yóʼo nu̱ú ndiʼi miíyó na̱ ndásakáʼnu Ndióxi̱. Ta kusi̱íní-iniyó xa̱ʼa̱ ña̱ nda̱kaxinyó chindeétáʼanyó xíʼin Reino Ndióxi̱. ¿Ndáaña káʼa̱nka libro ña̱ Apocalipsis xa̱ʼa̱ ña̱ gran tribulación? (Mat. 24:21).

ÑA̱ KUNDOʼO NA̱ KU̱A̱ʼA̱N CONTRA NDIÓXI̱

8. ¿Ndáa ki̱ʼva kixáʼa ña̱ gran tribulación, ta ndáaña keʼé ku̱a̱ʼání na̱ yiví?

⁸ Nda̱a̱ táki̱ʼva xa̱a̱ sa̱kuaʼayó nu̱ú artículo ña̱ ni̱ya̱ʼa, na̱ chíñu xa̱a̱ ku̱nu̱mí sandíʼi-xa̱ʼa̱na Babilonia ña̱ káʼnu, ña̱ kúú ndiʼi veʼe-ñu̱ʼu vatá ña̱ íyo nu̱ú ñuʼú yóʼo (Apoc. 17:16, 17). Tasaá kixáʼa ña̱ gran tribulación. ¿Á kixáʼa na̱ yiví ndasakáʼnuna Jehová tá ná kunina kixáʼa kuu ña̱yóʼo? Va̱ásaví, chi inkava ña̱ keʼéna. Apocalipsis capítulo 6 káʼa̱nña ña̱ na̱ yiví na̱ va̱ása ndásakáʼnu Jehová chise̱ʼéna miína tañu yuku̱, ña̱yóʼo kúni̱ kachiña ña̱ kundaa-inina xu̱ʼún ña̱ kúúmiína á na̱ chíñu. Ta xa̱a̱na koona contra Jehová xa̱ʼa̱ ña̱ va̱ása chíndeétáʼanna xíʼin Reinora (Luc. 11:23; Apoc. 6:15-17).

9. ¿Nda̱chun kiʼin na̱ yiví kuenta ña̱ síín íyo na̱ ndásakáʼnu Jehová ti̱xin ña̱ gran tribulación, ta ndáaña kundoʼo na̱ ndásakáʼnu Jehová?

⁹ Ti̱xin ña̱ gran tribulación, iinlá na̱ ndásakáʼnu Jehová kúú na̱ síín koo. Saáchi iinlá na̱yóʼo kúú na̱ ndakundeé ndasakáʼnu Jehová ta va̱ása chindeétáʼanna xíʼin tí “kití yukú” (Apoc. 13:14-17). Tá ná kuni na̱ íyo contra xíʼin Jehová ña̱ nda̱kúní íyo ini na̱ ndásakáʼnu-ñaʼá, sa̱a̱nína xíʼinna. Ta xa̱ʼa̱ ña̱yóʼo ndakutáʼan ku̱a̱ʼání na̱ yiví ña̱ ixandi̱va̱ʼana xíʼin na̱ ñuu Ndióxi̱ na̱ ndóo nu̱ú iníísaá ñuʼú. Tu̱ʼun Ndióxi̱ káʼa̱nña xa̱ʼa̱ na̱yóʼo ña̱ kunanína Gog ña̱ Magog (Ezeq. 38:14-16).

10. Nda̱a̱ táki̱ʼva káchi Apocalipsis 19:19-21, ¿ndáaña keʼé Jehová tá ná kixáʼana ixandi̱va̱ʼana xíʼin na̱ ñuura?

¹⁰ ¿Ndáaña keʼé Jehová tá ná kixáʼana ixandi̱va̱ʼana xíʼin na̱ ñuura? Ta̱yóʼo káchira: “Ndeéní sa̱i̱” (Ezeq. 38:18, 21-23). Apocalipsis capítulo 19 káʼa̱nña xa̱ʼa̱ Jehová ña̱ chindaʼára se̱ʼera ña̱ va̱ʼa ndakiʼinra tu̱ʼun na̱ ñuura, ta sandíʼi-xa̱ʼa̱ra na̱ sáa̱-ini xíniñaʼá. Soo va̱ása kixi mitúʼun ta̱ Jesús saáchi kixi na̱ ángel xíʼin na̱ 144,000 xíʼinra (Apoc. 17:14; 19:11-15). ¿Ndáaña kuu tá ná kanitáʼanna? Kuchiñuna sandíʼi-xa̱ʼa̱na ndiʼi na̱ yiví na̱ ku̱a̱ʼa̱n contra Jehová (kaʼvi Apocalipsis 19:19-21).

KOO IIN VIKÓ TÍNDAʼA̱ TÁ NÁ SANDÍʼINA KANITÁʼANNA

11. ¿Ndáaña ndáyáʼviní káʼa̱n libro ña̱ Apocalipsis xa̱ʼa̱?

¹¹ ¿Ndáaña kundoʼo na̱ nda̱kú íyo ini tá ná kunina ndi̱ʼi-xa̱ʼa̱ ndiʼi na̱ sáa̱-ini xíni Ndióxi̱? Ndeéní kusi̱í-inina. Ta ni kusi̱íva-inina chí ndiví tá ná kunina ndiʼi-xa̱ʼa̱ Babilonia ña̱ káʼnu, soo koo inka ña̱ sákusi̱íní-inina (Apoc. 19:1-3). Ña̱yóʼo kúú: “vikó ña̱ tindaʼa̱ tí ndikachi”, saáchi ña̱yóʼo kúú ña̱ ndáyáʼvi va̱ʼaka káʼa̱n libro ña̱ Apocalipsis xa̱ʼa̱ (Apoc. 19:6-9).

12. ¿Ama kúú ña̱ tindaʼa̱ tí ndikachi? (Apocalipsis 21:1, 2).

¹² Tá kúma̱níka kixáʼa ña̱ Armagedón xa̱a̱ kundoova ndiʼi na̱ 144,000 chí ndiví, soo su̱ví iin tiempo ña̱ tindaʼa̱ tí ndikachi koo ña̱yóʼo. Tá saá, ¿ama koo vikó yóʼo? (kaʼvi Apocalipsis 21:1, 2). Tá ná ndiʼi Armagedón saáví koo vikó yóʼo, chi saá kúú ña̱ xa̱a̱ ndiʼi-xa̱ʼa̱ ndiʼi na̱ sáa̱-ini xíni Ndióxi̱ (Sal. 45:3, 4, 13-17).

13. ¿Ndáaña kúni̱ kachi ña̱ tindaʼa̱ tí ndikachi nu̱ú na̱ ku̱ʼu̱n chí ndiví?

¹³ ¿Ndáaña kúni̱ kachi ña̱ tindaʼa̱ tí ndikachi nu̱ú na̱ ku̱ʼu̱n chí ndiví? Tá xáa̱ iin ta̱a tíndaʼa̱ra xíʼin iin ñaʼá, saá kúú ña̱ inkáchi xáa̱na ndákutáʼanna. Ta ki̱ʼva saá koo ña̱ ndakutáʼan ta̱ Jesucristo ta̱ kúú Rey xíʼin na̱ 144,000, chi nda̱a̱ táki̱ʼva koo na̱ tindaʼa̱ saá koo na̱yóʼo. Tá ná kuu ña̱yóʼo saá kúú ña̱ kixáʼana kaʼndachíñuna sa̱tá ñuʼú yóʼo ti̱xin 1,000 ku̱i̱ya̱ (Apoc. 20:6).

IIN ÑUU ÑA̱ LIVINÍ XÍʼIN ÑA̱ NDÁTUYÓ NDAKIʼINYÓ CHÍ NU̱ÚNÍNU

14, 15. Nda̱a̱ táki̱ʼva káchi Apocalipsis 21, ¿ndáaña chítáʼanna xíʼin na̱ 144,000? (Koto na̱ʼná ña̱ va̱xi chí sa̱tá tutu yóʼo).

¹⁴ Apocalipsis capítulo 21 chítáʼanña na̱ 144,000 xíʼin iin ñuu ña̱ liviní, ña̱ naní “Jerusalén ña̱ xa̱á” (Apoc. 21:2, 9). Ta ña̱yóʼo káʼa̱nkaña xa̱ʼa̱ ñuu yóʼo: “Nu̱ú ka̱na xa̱ʼa̱ nama̱ yóʼo íyo 12 yu̱u̱, ta nu̱ú ña̱yóʼo ni̱ka̱ʼyi̱ 12 saá ki̱vi̱ na̱ 12 apóstol tí ndikachi”. Ta nda̱kanda̱níva-ini ta̱ Juan tá xi̱nira ña̱yóʼo, ta saátu ni̱kusi̱íní-inira. ¿Nda̱chun? Saáchi xi̱nira ña̱ sa̱tá iin yu̱u̱ yóʼo, ni̱ka̱ʼyi̱ ki̱vi̱ra (Apoc. 21:10-14; Efes. 2:20).

¹⁵ Ñuu yóʼo va̱ása kítáʼanña xíʼin nda̱a̱ ni iin ñuu. Chi calle káʼnu ña̱ kúúmií ñuu yóʼo na̱kuva̱ʼaña xíʼin oro ña̱ va̱ʼa, ta 12 perla na̱kuva̱ʼa 12 yéʼéña, nu̱ú ka̱na xa̱ʼa̱ nama̱ ñuu yóʼo ku̱a̱ʼání yu̱u̱ livi kúúmiíña, ta ki̱ʼvaní chu̱ʼunna ñuu yóʼo (Apoc. 21:15-21). Soo ta̱ Juan ki̱ʼinra kuenta ña̱ kúma̱ní iin ña̱ʼa. ¿Ndáaña kúúña? Ta̱yóʼo káchira: “Kǒo ni iin templo níxinii̱ ini ñuu yóʼo, saáchi Jehová Ndióxi̱ ta̱ kúúmií ndiʼi ndee̱ ta̱kán kúú temploña, ta saátu tí ndikachi. Ta ñuu yóʼo va̱ása xíniñúʼuña ña̱ kutuu̱n ñu̱ʼu á yo̱o̱ nu̱úña, saáchi ña̱ yéʼe̱ ña̱ kúúmií Ndióxi̱ kúú ña̱ túun nu̱úña, ta tí ndikachi kúú lámparaña” (Apoc. 21:22, 23). Na̱ kúú Jerusalén ña̱ xa̱á kuni nu̱úna Jehová ta koo yatinna xíʼinra (Heb. 7:27; Apoc. 22:3, 4). Saáchi Apocalipsis káʼa̱nña xa̱ʼa̱ Jehová xíʼin ta̱ Jesús ña̱ kúúna templo ñuu yóʼo.

16. ¿Ndáaña va̱ʼa ndakiʼin na̱ yiví tá ná kaʼndachíñu Reino Ndióxi̱ ti̱xin mil ku̱i̱ya̱?

¹⁶ Kúsi̱íní-ini na̱ ku̱ʼu̱n chí ndiví tá ndákanixi̱nína xa̱ʼa̱ Jerusalén ña̱ xa̱á. Ta saátu miíyó na̱ ndátu kundoo nu̱ú ñuʼú yóʼo, xíniñúʼu ndakanixi̱níyó xa̱ʼa̱ ñuu yóʼo ta kusi̱í-iniyó xíʼinña. Tá ná kaʼndachíñu Reino Ndióxi̱ ti̱xin 1,000 ku̱i̱ya̱, ta̱ Jesús xíʼin na̱ kúú Jerusalén ña̱ xa̱á taxina ku̱a̱ʼání bendición ndaʼa̱ na̱ yiví na̱ kundoo nu̱ú ñuʼú yóʼo. Ta ta̱ apóstol Juan xi̱nira ña̱ nda̱a̱ táki̱ʼva íyo “yu̱ta tá táxi ña̱ kutakuna” saá íyo bendición yóʼo, ta “u̱vi̱ saá yuʼú yu̱ta yóʼo íyo yitu̱n tú táxi ña̱ kutakuna”, “ta yu̱ku̱ ndaʼa̱ yitu̱n yóʼo kúú ña̱ sándaʼa na̱ yiví” (Apoc. 22:1, 2). Ndiʼi na̱ yiví na̱ kundoo tiempo kán, ndakiʼinna ndiʼi ña̱ va̱ʼa yóʼo ta si̱íní koona. Loʼo tá loʼo va̱ása kuumiíkana ku̱a̱chi. Tasaá va̱ása kooka kue̱ʼe̱, va̱ása kooka na̱ xo̱ʼvi̱, ta va̱ása kuakukana xa̱ʼa̱ ña̱ kúsuchí-inina (Apoc. 21:3-5).

17. ¿Ndáana ndakiʼin ña̱ va̱ʼa ti̱xin ña̱ mil ku̱i̱ya̱? (Apocalipsis 20:11-13).

¹⁷ ¿Ndáana ndakiʼin ña̱ va̱ʼa yóʼo? Siʼna na̱ gran muchedumbre na̱ ni̱ka̱ku ti̱xin ña̱ Armagedón, xíʼin na̱ va̱lí na̱ kaku nu̱ú ñuyǐví xa̱á. Soo su̱ví nda̱saa na̱yóʼo ndakiʼin ña̱ va̱ʼa yóʼo. Saáchi Apocalipsis capítulo 20 káʼa̱nña ña̱ ndataku na̱ ni̱xi̱ʼi̱ (kaʼvi Apocalipsis 20:11-13). ¿Ndáana kúú na̱ ndataku? Ndataku na̱ ke̱ʼé ña̱ va̱ʼa: na̱yóʼo kúú na̱ nda̱kúní ni̱xi̱yo ini xíʼin Jehová tá kúma̱níka kuvina. Saátu ndataku na̱ ke̱ʼé ña̱ va̱ása va̱ʼa: na̱yóʼo kúú na̱ va̱ása níxa̱a̱ kunda̱a̱-ini xa̱ʼa̱ Jehová tá ni̱xi̱ʼi̱na (Hech. 24:15; Juan 5:28, 29). ¿Á kúni̱ kachi ña̱yóʼo ña̱ ti̱xin ña̱ mil ku̱i̱ya̱ ndataku ndiʼi na̱ yiví na̱ ni̱xi̱ʼi̱? Va̱ása. Na̱ yiví na̱ va̱ása níxiin ndasakáʼnu Jehová tá kúma̱ní kuvina, va̱ása ndatakuna. Saáchi ni̱xi̱yova tiempo nu̱úna ña̱ sakúaʼana xa̱ʼa̱ Jehová, soo xíʼin ña̱ ke̱ʼéna ni̱na̱ʼa̱na ña̱ va̱ása kúni̱na kutakuna nu̱ú ñuyǐví xa̱á (Mat. 25:46; 2 Tes. 1:9; Apoc. 17:8; 20:15).

ÑA̱ KUU TÁ NÁ NDIʼI ÑA̱ MIL KU̱I̱YA̱

18. ¿Ndáa ki̱ʼva koo na̱ yiví tá ná ndiʼi ña̱ 1,000 ku̱i̱ya̱?

¹⁸ Tá ná ndiʼi ña̱ 1,000 ku̱i̱ya̱. Ndiʼi na̱ yiví na̱ kundoo nu̱ú ñuʼú yóʼo va̱ása kuumiíkana ku̱a̱chi ña̱ sa̱ndákoo ta̱ Adán ndaʼa̱na, ta saátu va̱ása xo̱ʼvi̱kana (Rom. 5:12). Ta nda̱a̱ ni loʼoka chiʼña ña̱ sa̱ndákoo ta̱ Adán ndaʼa̱ na̱ yiví va̱ása kookaña. Ña̱kán tá ná ndiʼi ña̱ 1,000 ku̱i̱ya̱, ndiʼi na̱ yiví na̱ kundoo nu̱ú ñuʼú yóʼo kutakuna ndiʼi tiempo ta va̱ása kookana na̱ yiví ku̱a̱chi (Apoc. 20:5).

19. ¿Nda̱chun xíniñúʼu kotondosó tuku ta̱ Ndi̱va̱ʼa na̱ yiví?

¹⁹ Kúnda̱a̱-iniyó ña̱ su̱ví iin na̱ yiví ku̱a̱chi níxi̱kuu ta̱ Jesús ta nda̱kúní ni̱xi̱yo inira xíʼin Ndióxi̱ tá xi̱tondosó ta̱ Ndi̱va̱ʼa ta̱yóʼo. Soo, ¿á saá nda̱kú koo ini na̱ yiví na̱ kǒoka ku̱a̱chi kúúmií tá ná kotondosó ta̱ Ndi̱va̱ʼa miína nu̱ú ñuyǐví xa̱á? Iin tá iin na̱yóʼo na̱ʼa̱na á nda̱kú koo inina xíʼin Ndióxi̱ tá xa̱a̱ ná ndiʼi ña̱ 1,000 ku̱i̱ya̱, chi saá kita ta̱ Ndi̱va̱ʼa ya̱vi̱ naá nu̱ú kundika̱a̱ra (Apoc. 20:7). Ta na̱ nda̱kúní ná koo ini ndakiʼinna ña̱ kutakuna ndiʼi tiempo, ta sa̱ñána ndaʼa̱ tu̱ndóʼo (Rom. 8:21). Soo na̱ yiví na̱ va̱ása kandíxa Ndióxi̱ na̱ ndiʼi-xa̱ʼa̱ koona, nda̱a̱ táki̱ʼva kundoʼo ta̱ Ndi̱va̱ʼa xíʼin na̱ ta̱chí ndi̱va̱ʼa na̱ kítáʼan xíʼinra (Apoc. 20:8-10).

20. ¿Ndáa ki̱ʼva kúniún xa̱ʼa̱ ña̱ sa̱kúaʼayó nu̱ú libro ña̱ Apocalipsis?

²⁰ ¿Ndáa ki̱ʼva kúniún xa̱ʼa̱ ña̱ sa̱kúaʼún nu̱ú libro ña̱ Apocalipsis? ¿Á kúsi̱í-iniún xa̱ʼa̱ ña̱ íyoún tiempo ña̱ xínu profecía yóʼo? ¿Á kúni̱ún ka̱ʼún xíʼin na̱ yiví ña̱ ná ndakutáʼanna xíʼinyó ndasakáʼnuyó Ndióxi̱ nda̱a̱ táki̱ʼva kúni̱ra? (Apoc. 22:17). Kúsi̱íní-iniyó ña̱ káʼviyó xa̱ʼa̱ ña̱ kuu chí nu̱únínu, ña̱kán ndiʼiyó kúni̱yó ka̱ʼa̱nyó ña̱ ni̱ka̱ʼa̱n ta̱ apóstol Juan, tá ka̱chira: “Saá koo. Naʼa táta Jesús” (Apoc. 22:20).