Na̱ va̱lí, ndakundeéndó kuaʼnundó xíʼin tu̱ʼun Ndióxi̱ ni xa̱a̱ nda̱kuchindó

1. ¿Ndáaña xa̱a̱ kéʼé ku̱a̱ʼání na̱ va̱lí?

NDIʼI ku̱i̱ya̱, ku̱a̱ʼání na̱ va̱lí ndákuchina. Ta miíún, ¿á xa̱a̱ nda̱kuchiún? Tá sa̱kán ke̱ʼún ña̱yóʼo, ndiʼi na̱ ndásakáʼnu Ndióxi̱ kúsi̱íní-inina xa̱ʼa̱ ña̱ ke̱ʼún ta saátu Jehová (Prov. 27:11). Ndakanixi̱ní xa̱ʼa̱ ndiʼi ña̱ xa̱a̱ kéʼún. Tá kúú, sana xa̱a̱ ku̱a̱ʼání ku̱i̱ya̱ káʼviún Biblia, ta ña̱yóʼo chi̱ndeétáʼanña xíʼún ña̱ ku̱nda̱a̱-iniún ña̱ tu̱ʼun mií Ndióxi̱ kúúña. Soo mií ña̱ ndáyáʼvi va̱ʼaka kúú ña̱ ni̱xa̱ún ku̱nda̱a̱-iniún xa̱ʼa̱ ta̱ xíʼin libro ña̱yóʼo, ta kúʼvi̱-iniún xíniúnra. Ta xa̱ʼa̱ ña̱ kúʼvi̱ní-iniún xíniúnra, nda̱kaxiún ña̱ ndataxiún miíún ndaʼa̱ra ta ni̱xa̱ún nda̱kuchiún. Va̱ʼaní ke̱ʼún.

2. ¿Ndáaña sakúaʼayó nu̱ú artículo yóʼo?

² Sana tá kúma̱ní ndakuchiún ni̱ya̱ʼún nu̱ú ku̱a̱ʼání tu̱ndóʼo. Soo tá ná ya̱ʼa tiempo kixikavaña nu̱ún. Ta̱ Ndi̱va̱ʼa kuni̱ra ña̱ sandákoún ña̱ kuʼvi̱-iniún kuniún Jehová ta kuxíkáún nu̱úra (Efes. 4:14). Soo va̱ása taxiún ña̱ keʼéra ña̱yóʼo. ¿Ndáaña chindeétáʼan xíʼún ña̱ nda̱kú koo iniún xíʼin Jehová ta saxínún ña̱ ki̱ndoún xíʼinra? Xíniñúʼu ndakundeún kuaʼnukaún xíʼin tu̱ʼun Ndióxi̱ ta kuxa-iniún xíʼin ña̱yóʼo (Heb. 6:1). Nu̱ú artículo yóʼo sakúaʼayó ndáa ki̱ʼva keʼún ña̱yóʼo.

ÑA̱ XÍNIÑÚʼU KEʼÚN ÑA̱ VA̱ʼA KUAʼNUKAÚN XÍʼIN TU̱ʼUN NDIÓXI̱

3. ¿Ndáaña xíniñúʼu keʼé ndiʼi na̱ ndásakáʼnu Ndióxi̱ tá xa̱a̱ nda̱kuchina?

³ Tá ndákuchina iinna, xíniñúʼu chika̱a̱na ndee̱ ña̱ kundiku̱nna consejo ña̱ ta̱xi ta̱ apóstol Pablo ndaʼa̱ na̱ cristiano na̱ ñuu Éfeso. Ta̱yóʼo ni̱ka̱ʼa̱nra xíʼinna ña̱ ná chika̱a̱na ndee̱ ña̱ xa̱a̱na koona na̱ yiví na̱ xu̱xa-ini (Efes. 4:13). Xíʼin ña̱yóʼo xi̱kuni̱ra ka̱ʼa̱nra xíʼinna ña̱ ná ndakundeéna kuaʼnuna xíʼin tu̱ʼun Ndióxi̱. Ta̱ Pablo ni̱ka̱ʼa̱nra xa̱ʼa̱ ña̱ xáʼnuyó xíʼin tu̱ʼun Ndióxi̱, ña̱ íyoña nda̱a̱ táki̱ʼva íyo iin ña̱ xáʼnu iin ña̱ lée loʼo. Tá káku iin ña̱ lée loʼo kúsi̱íkaví-ini na̱ yiváña xíʼinña. Soo su̱ví ndiʼi tiempoví kooña iin ña̱ lée loʼo, chi xíniñúʼu kuaʼnuña ta xa̱a̱ña kooña iin na̱ yiví na̱ chée (1 Cor. 13:11). Ki̱ʼva saá kúu xíʼin miíyó na̱ ndásakáʼnu Ndióxi̱, tá xa̱a̱ ndi̱ʼi nda̱kuchiyó xíniñúʼu ndakundeéyó kuaʼnukayó xíʼin tu̱ʼun Ndióxi̱. Yóʼo sakúaʼayó xa̱ʼa̱ sava ña̱ʼa ña̱ kivi chindeétáʼan xíʼinyó ña̱ va̱ʼa keʼéyó ña̱yóʼo.

4. ¿Ndáaña chindeétáʼan xíʼún ña̱ kuaʼnukaún xíʼin tu̱ʼun Ndióxi̱, ta nda̱chun? (Filipenses 1:9).

⁴ Chika̱a̱ ndee̱ ña̱ kuʼvi̱ka-iniún kuniún Jehová. Xíʼin ña̱ kéʼún náʼún ña̱ kúʼvi̱ní-iniún xíniún Jehová. Soo kivikava chika̱ún ndee̱ ña̱ kuʼvi̱ka-iniún kuniúnra. ¿Ndáa ki̱ʼva keʼúnña? Ta̱ apóstol Pablo ni̱ka̱ʼa̱nra xa̱ʼa̱ ña̱yóʼo nu̱ú Filipenses 1:9 (kaʼviña). Ta̱yóʼo xi̱kuni̱ra ña̱ ná kuʼvi̱ka-ini na̱ ñuu Filipos kunina Jehová, ña̱kán ni̱ka̱ʼa̱nra xa̱ʼa̱na xíʼinra. Xíʼin ña̱yóʼo sákuaʼayó ña̱ kiviva xa̱a̱yó kuʼvi̱ka-iniyó kuniyó Jehová. Soo xíniñúʼu chika̱a̱yó ndee̱ ña̱ kunda̱a̱ va̱ʼa iniyó xa̱ʼa̱ra ta vií va̱ʼa koo ña̱ ndakanixi̱níyó. Ña̱yóʼo kúni̱ kachiña: ña̱ tá xáa̱yó kúnda̱a̱ va̱ʼa iniyó xa̱ʼa̱ Jehová xáa̱yó kúʼvi̱níka-iniyó xíniyóra, kútóoníkayó ki̱ʼva ña̱ íyora, saátu ki̱ʼva ña̱ kéʼéra ña̱ʼa. Kúni̱níkayó sakúsi̱íyó-inira ta kǒo kúni̱yó sakúsuchíyó-inira. Ña̱kán, chíka̱a̱níyó ndee̱ ña̱ kunda̱a̱-iniyó ndáa ña̱ʼa kúú ña̱ kúni̱ra ná keʼéyó ta chíka̱a̱yó ndee̱ ña̱ keʼéyóña.

5, 6. ¿Ndáa inka ña̱ kivi keʼéyó ña̱ kuʼvi̱ka-iniyó kuniyó Jehová?

⁵ Inka ki̱ʼva ña̱ kuʼvi̱ka-iniyó kuniyó Jehová, kúú ña̱ sakúaʼa va̱ʼakayó xa̱ʼa̱ se̱ʼera, chi ta̱yóʼo va̱ʼaní kéʼéra nda̱a̱ táki̱ʼva kéʼé yivára (Heb. 1:3). Ta iin ki̱ʼva ña̱ sakúaʼayó xa̱ʼa̱ ta̱ Jesús kúú ña̱ kaʼviyó ku̱mí saá Evangelio ña̱ káʼa̱n xa̱ʼa̱ra. ¿Á chíka̱ún ndee̱ ña̱ kaʼviún Biblia ndiʼi ki̱vi̱? Tá ta̱ʼán kaʼviúnña, kivi chika̱ún ndee̱ ña̱ kixáʼún kaʼviúnña. Tá ná kaʼviún xa̱ʼa̱ ña̱ ke̱ʼé ta̱ Jesús xíʼin xa̱ʼa̱ ña̱ ni̱ka̱ʼa̱nra, koto va̱ʼún ndáa ki̱ʼva íyora. Ta̱yóʼo va̱ʼaní na̱ yiví xi̱kuura ta ndiʼina xi̱kuni̱ kuyatin nu̱úra, ta nda̱a̱ xi̱numira na̱ va̱lí (Mar. 10:13-16). Xa̱ʼa̱ ña̱kán va̱ʼaní xi̱kuni na̱ discípulora tá xi̱xiyona xíʼinra, ña̱kán va̱ása níxi̱yiʼvína ka̱ʼa̱nna xíʼinra xa̱ʼa̱ ña̱ xi̱ndakanixi̱nína (Mat. 16:22). Ta̱ Jesús xi̱keʼéra saá, chi saá íyo yivára va̱ʼaní-inira. Ña̱kán kivi ka̱ʼa̱nyó xíʼinra xa̱ʼa̱ ndiʼi ña̱ ndóʼoyó. Ta va̱ása yíʼviyó tá káʼa̱nyó xíʼinra, chi kúnda̱a̱-iniyó ña̱ va̱ása ndakanixi̱níra ña̱ va̱ása va̱ʼa xa̱ʼa̱yó. Chi ta̱yóʼo kúʼvi̱ní-inira xínira miíyó ta ndíʼi̱-inira xa̱ʼa̱yó (1 Ped. 5:7).

⁶ Xi̱kundáʼviní-ini ta̱ Jesús xi̱xinira na̱ yiví. Ta ta̱ apóstol Mateo ni̱ka̱ʼa̱nra xa̱ʼa̱ ña̱yóʼo, tá ka̱chira: “Tá xi̱nira ndiʼi na̱ yiví kán, ku̱ndáʼvikaví-inira xi̱nirana saáchi xi̱nira ña̱ íxandi̱va̱ʼana xíʼinna ta sa̱ndákoonana nda̱a̱ táki̱ʼva íyo ndikachi tí kǒo xi̱toʼo” (Mat. 9:36). ¿Ndáa ki̱ʼva kúni Jehová xínira na̱ yiví? Ta̱ Jesús ni̱ka̱ʼa̱nra xa̱ʼa̱ yivára tá ka̱chira: “Kǒo kúni̱ra ña̱ ná ndañúʼu ni iin na̱ va̱lí yóʼo” (Mat. 18:14). Ta kúsi̱íní-iniyó ña̱ kúnda̱a̱-iniyó ña̱ kúʼvi̱ní-ini Jehová xínira miíyó. Tá chíka̱a̱kayó ndee̱ ña̱ kuxini̱kayó ta̱ Jesús, saá kúú ña̱ xáa̱yó kúʼvi̱ka-iniyó xíniyó Jehová.

7. ¿Nda̱chun ndáyáʼviní koo migoún na̱ xu̱xa-ini xíʼin tu̱ʼun Ndióxi̱?

⁷ Íyo inkaka ña̱ kivi keʼún ña̱ kuʼvi̱ka-iniún kuniún Jehová ta kuaʼnukaún xíʼin tu̱ʼunra. ¿Ndáaña kúúña? Ndaka̱xin na̱ hermano na̱ xa̱a̱ xu̱xa-ini xíʼin tu̱ʼun Ndióxi̱ ña̱ ná koona migoún. Na̱ hermano yóʼo, ndiʼi tiempo kúsi̱íní-inina ta va̱ása ndándikó-inina xa̱ʼa̱ ña̱ nda̱kaxinna kachíñuna nu̱ú Jehová. Ka̱ʼa̱n xíʼinna ná natúʼunna xa̱ʼa̱ iin ña̱ ndo̱ʼona. Ta tá ndáka̱xiún iin ña̱ ndáyáʼviní keʼún, ka̱ʼa̱n xíʼinna ná chindeétáʼanna xíʼún. Chi tu̱ʼun Ndióxi̱ káchiña tá ndúkúyó consejo nu̱ú inkana va̱ʼaní kána ña̱ kéʼéyó (Prov. 11:14).

8. ¿Ndáaña kivi keʼún tá xíka-iniún xa̱ʼa̱ ña̱ sánáʼa̱ tu̱ʼun Ndióxi̱?

⁸ Tá xíka-iniún xa̱ʼa̱ sava ña̱ʼa, kaʼvi xa̱ʼa̱ña. Nda̱a̱ táki̱ʼva íyo ña̱ sa̱kuaʼayó nu̱ú párrafo 2, ta̱ Ndi̱va̱ʼa va̱ása taxira ña̱ ná kuaʼnún xíʼin tu̱ʼun Ndióxi̱. Ta iin ña̱ xíniñúʼuníra kúú ña̱ ná kaka-iniyó. Ta̱yóʼo kúni̱ra ña̱ ná ndakoún ña̱ kandíxaún ña̱ va̱xi nu̱ú tu̱ʼun Ndióxi̱. Tá kúú, sana iin na̱ yiví ka̱ʼa̱nna xíʼún xa̱ʼa̱ ña̱ evolución, ña̱ su̱ví Ndióxi̱ kúú ta̱ ní ixava̱ʼa miíyó. Ta ña̱ káʼa̱n na̱yóʼo íxayaku̱a̱ña ki̱vi̱ Jehová. Sana tá ni̱xi̱yo loʼún va̱ása níxi̱ndakanixi̱níún xa̱ʼa̱ ña̱yóʼo. Soo vitin ña̱ xa̱a̱ ku̱chéeka loʼún, sana na̱ maestro kixáʼana sánáʼa̱na yóʼó xa̱ʼa̱ ña̱ evolución ti̱xin escuela. Ta sana kivi ndakanixi̱níún ña̱ ndixava kúú ña̱ sánáʼa̱na. Soo kiʼin va̱ʼún kuenta, chi sana na̱ maestro va̱ása kúnda̱a̱ví-inina á íyo iin ta̱ i̱xava̱ʼa miíyó chi va̱ása nándukúna xa̱ʼa̱ ña̱yóʼo. Ndakaʼán ña̱ káʼa̱n Proverbios 18:17: “Na̱ siʼna kíxaa̱ táxi ku̱a̱chi, náʼa̱ ña̱ káʼa̱nna ña̱ nda̱a̱. Soo tá kíxáʼa káʼa̱n inka na̱ táxi ku̱a̱chi yóʼo, kíxáʼana kéʼéna pregunta xíʼin na̱ siʼna ta̱xi ku̱a̱chi ña̱ va̱ʼa kita mií ña̱ nda̱a̱”. ¿Ndáaña kivi sákuaʼún xíʼin texto yóʼo? Va̱ása kandíxaún ndiʼi ña̱ sákuaʼún ti̱xin escuela. Ta iin ña̱ chindeétáʼan xíʼún kúú ña̱ kaʼviún tu̱ʼun Ndióxi̱, ta saátu kaʼviún tutu ña̱ tává na̱ ñuura. Ta kivitu nda̱ka̱tu̱ʼún iin na̱ hermano na̱ xi̱kandíxa ña̱ evolución, ta kivi nda̱ka̱tu̱ʼúnna ndáaña chi̱ndeétáʼan xíʼinna ña̱ ni̱xa̱a̱na ka̱ndíxana ña̱ íyo iin ta̱ i̱xava̱ʼa miíyó ta kúʼvi̱ní-inira xínira miíyó.b Tá ná keʼún ña̱yóʼo va̱ʼaní chindeétáʼanña xíʼún tasaá va̱ása kaka-iniún.

9. ¿Ndáaña sákuaʼún xíʼin ña̱ ndo̱ʼo ñá Melissa?

⁹ Iin ña̱ chi̱ndeétáʼanní xíʼin iin ñá hermana ñá naní Melissa kúú ña̱ nandukú va̱ʼaña xa̱ʼa̱ ña̱ʼa ña̱ i̱xava̱ʼa Ndióxi̱.c Ñáyóʼo káchiñá: “Na̱ maestro sánáʼa̱nína xa̱ʼa̱ ña̱ evolución ti̱xin escuela, ta káʼa̱nna ña̱ kúúña ña̱ nda̱a̱. Ta xa̱ʼa̱ ña̱yóʼo xi̱yiʼvíi̱ kaʼvii̱ xa̱ʼa̱ ña̱ evolución, chi xi̱ndakanixi̱níi̱ ña̱ kivi xa̱i̱ sandákoi̱ ña̱ kandíxai̱ Ndióxi̱. Soo saá ki̱xáʼa ndákanixi̱níi̱, ña̱ kútóova Jehová nandukúyó xa̱ʼa̱ ña̱ xíka-iniyó xa̱ʼa̱, tasaá ki̱xáʼíi̱ nándukúi̱ xa̱ʼa̱vaña. Ta iin ña̱ chi̱ndeétáʼan xíʼi̱n ña̱ va̱ása kaka-inii̱ kúú ña̱ ki̱xáʼíi̱ ka̱ʼvii̱ libro ña̱ naní ¿Existe un Creador que se interese por nosotros?, ta saátu folleto ña̱ naní ¿Es la vida obra de un Creador?, El origen de la vida. Cinco cuestiones dignas de análisis. Va̱ʼaní chi̱ndeétáʼan ña̱yóʼo xíʼi̱n tá ka̱ʼvii̱ña. Va̱ʼaníkava tá ya̱chi̱ níkaʼvii̱ña”.

10, 11. ¿Ndáaña chindeétáʼan xíʼún ña̱ kǒo keʼún ña̱ kini? (1 Tesalonicenses 4:3, 4).

¹⁰ Chika̱a̱ ndee̱ ña̱ kǒo ndakanixi̱níún xa̱ʼa̱ ña̱ʼa ña̱ va̱ása va̱ʼa. Tá xa̱a̱ xa̱ʼnún saá kúú ña̱ kuni̱níkaún ku̱sún xíʼin iin na̱ yiví, ta sana inkana ixandúxana xíʼún ña̱ keʼún ña̱yóʼo. Ta̱ Ndi̱va̱ʼa kúni̱ra ña̱ ná ki̱ʼviún ku̱a̱chi yóʼo. Soo, ¿ndáaña chindeétáʼan xíʼún ña̱ va̱ása keʼúnña? (kaʼvi 1 Tesalonicenses 4:3, 4). Tá káʼún xíʼin Jehová ka̱ʼa̱n xíʼinra xa̱ʼa̱ ña̱ ndóʼún, ta ka̱ʼa̱n xíʼinra ná chindeétáʼanra xíʼún ña̱ ndakú koo iniún (Mat. 6:13). Ndakaʼán, chi Jehová íyora ña̱ chindeétáʼanra xíʼún ta va̱ása ka̱ʼa̱nra xa̱ʼa̱ ña̱ va̱ása va̱ʼa kéʼún (Sal. 103:13, 14). Saátu kivi chindeétáʼan ña̱ va̱xi nu̱ú tu̱ʼun Ndióxi̱ xíʼún. Ñá Melissa ñá xa̱a̱ ni̱ka̱ʼa̱nyó xa̱ʼa̱ nu̱ú párrafo chí sa̱tá, xi̱niñúʼu chika̱a̱ñá ndee̱ ña̱ va̱ása ndakanikaxi̱níñá xa̱ʼa̱ ña̱ʼa ña̱ kini, ñáyóʼo káchiñá: “Iin ña̱ chi̱ndeétáʼan xíʼi̱n ña̱ va̱ása ndakanikaxi̱níi̱ xa̱ʼa̱ ña̱ʼa ña̱ kini, kúú ña̱ ndiʼi ki̱vi̱ xi̱kaʼvii̱ tu̱ʼun Ndióxi̱. Ta ña̱yóʼo xi̱sandákaʼánña yi̱ʼi̱ ña̱ kuenta mií Jehová kúi̱ ta kúnii̱ ña̱ yatin koora xíʼi̱n” (Sal. 119:9).

¹¹ Na̱ yiváún kivi chindeétáʼanna xíʼún tá yáʼún nu̱ú tu̱ndóʼo, ña̱kán natúʼun xíʼinna xa̱ʼa̱ ña̱ ndóʼún. Ixayo̱ʼvi̱vaña xíʼún ña̱ ka̱ʼún xíʼinna xa̱ʼa̱ ña̱ ndóʼún, soo ndáyáʼviní keʼún ña̱yóʼo. Ñá Melissa ni̱ka̱ʼa̱nñá ña̱yóʼo: “Ni̱ka̱ʼi̱n xíʼin Jehová ña̱ ná chindeétáʼanra xíʼi̱n ña̱ ndakú koo inii̱, tándi̱ʼi na̱túʼi̱n xíʼin yivái̱ xa̱ʼa̱ ña̱ xi̱ndoʼi̱. Nda̱a̱ va̱ʼa ku̱nii̱ tá ke̱ʼíi̱ ña̱yóʼo. Ta kúnda̱a̱-inii̱ ña̱ ku̱si̱íva-ini Jehová xíʼin ña̱ ke̱ʼíi̱”.

12. ¿Ndáaña chindeétáʼan xíʼún ña̱ vií ndaka̱xiún ña̱ keʼún?

¹² Taxi ná chindeétáʼan tu̱ʼun Ndióxi̱ xíʼún. Tá ná ya̱ʼa tiempo, saá kixáʼa miíún loʼo tá loʼo ndaka̱xiún ña̱ keʼún. Chi vitin loʼovaún ta ta̱ʼán kuxini̱ún ña̱ vií ndaka̱xiún ña̱ keʼún. ¿Ndáaña kivi keʼún ña̱ vií ndaka̱xiún ña̱ keʼún tasaá kutáʼan viíún xíʼin Jehová? (Prov. 22:3). Iin ñá hermana ñá naní Kari káʼa̱nñá ndáaña chi̱ndeétáʼan xíʼinñá ña̱ vií nda̱kaxinñá ña̱ ke̱ʼéñá. Ñáyóʼo ku̱nda̱a̱-iniñá ña̱ na̱ hermano na̱ xa̱a̱ xu̱xa-ini, va̱ása ndátuvína ña̱ ka̱ʼa̱n káxi tu̱ʼun Ndióxi̱ xa̱ʼa̱ iin tá iin ña̱ ndáka̱xinna keʼéna, chi xa̱a̱ sa̱kúaʼavana ña̱ ndakunina ndáaña kúú ña̱ va̱ʼa ta ndáaña kúú ña̱ va̱ása va̱ʼa. Ta ñáyóʼo káʼa̱nkañá: “Nu̱úka ña̱ kundatui̱ ña̱ koo iin ña̱ ka̱ʼa̱n káxi xíʼi̱n xa̱ʼa̱ ña̱ʼa ña̱ keʼíi̱, xi̱niñúʼu chika̱i̱ ndee̱ ña̱ kunda̱a̱-inii̱ ndáa ki̱ʼva ndákanixi̱ní Jehová xa̱ʼa̱ ña̱ kúni̱i̱ keʼíi̱”. Ña̱kán tá káʼviún tu̱ʼun Ndióxi̱ ndakanixi̱ní xa̱ʼa̱ ña̱yóʼo: “¿Ndáaña sánáʼa̱ relato yóʼo yi̱ʼi̱ xa̱ʼa̱ ki̱ʼva ña̱ ndákanixi̱ní Jehová? ¿Á íyo iin ña̱ va̱xi yóʼo kivi chindeétáʼan xíʼi̱n ña̱ keʼíi̱ ña̱ va̱ʼa? ¿Ndáaña va̱ʼa ndakiʼi̱n tá ná kuniso̱ʼi̱ consejo yóʼo?” (Sal. 19:7; Is. 48:17, 18). Tá káʼviún tu̱ʼun Ndióxi̱ ta ndákanixi̱níún xa̱ʼa̱ña, saá kúú ña̱ va̱ása ixayo̱ʼvi̱ña xíʼún ña̱ vií koo ña̱ ndaka̱xiún keʼún tasaá sakúsi̱íún-ini Jehová. Tá chíka̱ún ndee̱ ña̱ kunda̱a̱-iniún ndáaña ndakanixi̱ní Jehová xa̱ʼa̱ sava ña̱ʼa, kǒo xíniñúʼu kundatuvíún ña̱ koo iin ña̱ ka̱ʼa̱n káxi xíʼún xa̱ʼa̱ iin ña̱ʼa. Tá ná keʼún ña̱yóʼo, saá kúú ña̱ na̱ʼún ña̱ xa̱a̱ xu̱xa-iniún xíʼin tu̱ʼun Ndióxi̱.

13. ¿Ndáa ki̱ʼva chindeétáʼan na̱ migoún xíʼún? (Proverbios 13:20).

¹³ Na̱ kúʼvi̱-ini xíni Jehová kúú na̱ ndukún koo migoún. Nda̱a̱ táki̱ʼva sa̱kúaʼayó nu̱ú párrafo 7, na̱ migoún kúú na̱ kivi chika̱a̱ka ndee̱ xíʼún ña̱ kachíñukaún nu̱ú Ndióxi̱ (kaʼvi Proverbios 13:20).d Ná kotoyó ndáaña ndo̱ʼo iin ñá hermana ñá nani Sara. Ñáyóʼo va̱ása níxi̱kusi̱íka-iniñá kachíñuñá nu̱ú Ndióxi̱, soo íyo iin ña̱ chi̱ndeétáʼan xíʼinñá. Ñá Sara káchiñá: “Mií tiempo ña̱ íxayo̱ʼvi̱níña xíʼi̱n, saá kúú ña̱ nda̱ni̱ʼíi̱ na̱ migoi̱ na̱ va̱ʼaní chi̱ndeétáʼan xíʼi̱n. Iin ñá migai̱ xi̱ndakutáʼanñá xíʼi̱n ndiʼi semana ña̱ kaʼvindi̱ tutu La Atalaya, ta inka ñá migai̱ chi̱ka̱a̱ñá ndee̱ xíʼi̱n ña̱ taxii̱ comentario ti̱xin reunión. Na̱ migoi̱ kúú na̱ va̱ʼaní chi̱ndeétáʼan xíʼi̱n ña̱ chika̱i̱ ndee̱ ña̱ kaʼvii̱ Biblia, ta saátu ña̱ ka̱ʼi̱n xíʼin Ndióxi̱. Loʼo tá loʼo ki̱xáʼíi̱ kítáʼan va̱ʼakai̱ xíʼin Jehová tasaá ki̱xáʼa tukui̱ kúsi̱í-inii̱ káchíñui̱ nu̱úra”.

14. ¿Ndáa ki̱ʼva nda̱ni̱ʼí ta̱ Julien na̱ va̱ʼaní kutáʼan xíʼinra?

¹⁴ ¿Ndáaña kivi keʼún ña̱ va̱ʼa ndani̱ʼún na̱ migoún na̱ chindeétáʼan xíʼún? Iin ta̱ hermano ta̱ naní Julien ta̱ kúú anciano káchira: “Tá ni̱xi̱yo loʼi̱ xi̱kei̱ xi̱natúʼi̱n xíʼin na̱ yiví xa̱ʼa̱ Ndióxi̱ xíʼin na̱ hermano, ta na̱yóʼo ni̱xa̱a̱na ku̱una migoi̱. Na̱yóʼo xi̱kusi̱íní-inina tá xi̱natúʼunna xa̱ʼa̱ Ndióxi̱. Ta chi̱ndeétáʼanna xíʼi̱n ña̱ kivi kusi̱í-inii̱ natúʼi̱n xa̱ʼa̱ Ndióxi̱. Ki̱xáʼíi̱ nda̱kanixi̱níi̱ ña̱ koi̱ precursor. Ta saátu ki̱ʼi̱n kuenta ña̱ va̱ása níxi̱chika̱i̱ ndee̱ ña̱ ndukúi̱ na̱ hermano na̱ xa̱a̱ síín síín ku̱i̱ya̱ ña̱ koona migoi̱. Chi na̱yóʼo va̱ʼaníka chíndeétáʼanna xíʼinyó ña̱ kachíñuyó nu̱ú Ndióxi̱. Ta saátu tá ki̱xáʼíi̱ káchíñui̱ ti̱xin Betel, nda̱ni̱ʼíi̱ na̱ va̱ʼaní kítáʼan xíʼi̱n. Na̱yóʼo va̱ʼaní chi̱ndeétáʼanna xíʼi̱n ña̱ vií ndaka̱xii̱n ña̱ kotonde̱ʼíi̱, ña̱ kusíkíi̱ á inkaka ña̱ʼa. Ta ña̱yóʼo va̱ʼaní chi̱ndeétáʼanña xíʼi̱n ña̱ va̱ʼaka kutáʼi̱n xíʼin Jehová”.

15. ¿Ndáaña ni̱ka̱ʼa̱n ta̱ apóstol Pablo xíʼin ta̱ Timoteo? (2 Timoteo 2:20-22).

¹⁵ ¿Ndáaña keʼún tá íyo iin na̱ kéʼé ña̱ va̱ása va̱ʼa ti̱xin congregación? Ta̱ apóstol Pablo xi̱kunda̱a̱-inira ña̱ ti̱xin congregación ña̱ ni̱xi̱yo tá siglo nu̱ú ni̱xi̱yo sava na̱ yiví na̱ va̱ása níxi̱kutóo keʼé chiñu Ndióxi̱. Ña̱kán ni̱ka̱ʼa̱nra xíʼin ta̱ Timoteo ña̱ ná kǒo kutáʼanra xíʼin na̱yóʼo (kaʼvi 2 Timoteo 2:20-22). Xa̱a̱ chi̱ka̱a̱níyó ndee̱ ña̱ vií kutáʼanyó xíʼin Jehová ta ndáyáʼviníña nu̱úyó, ña̱kán ná va̱ása taxiyó ña̱ sakúxíkána miíyó nu̱úra (Sal. 26:4).

ÑA̱ KEʼÉYÓ KU̱A̱ʼÁKA CHIÑU NU̱Ú JEHOVÁ, VA̱ʼANÍ CHINDEÉTÁʼANÑA XÍʼINYÓ

16. ¿Ndáa inkaka ña̱ kivi ndaka̱xiún keʼún?

¹⁶ Ndaka̱xin keʼún ku̱a̱ʼáka chiñu ña̱ ndixa ndáyáʼvi. Chi ña̱yóʼo va̱ʼaníka chindeétáʼanña xíʼún ña̱ va̱ʼaníka kandíxaún Ndióxi̱ ta saátu ña̱ va̱ʼaníka kachíñún nu̱úra (Efes. 3:16). Tá kúú, kivi chika̱ún ndee̱ ña̱ viíka sakúaʼún xa̱ʼa̱ Ndióxi̱ ta saátu ña̱ kaʼvi ni̱ʼún tu̱ʼunra (Sal. 1:2, 3). Inkatu ña̱ kivi keʼún kúú ña̱ ka̱ʼa̱n ni̱ʼún xíʼin Ndióxi̱, ta nda̱a̱ níma̱ún ná kana ña̱ ka̱ʼún xíʼinra. Sanatu kivi chika̱ún ndee̱ ña̱ viíníka koo ña̱ ndaka̱xiún kusíkíún á ña̱ kotonde̱ʼún, ta kivitu sakúaʼún ña̱ viíka kuniñúʼún tiempo ña̱ kúúmiíún (Efes. 5:15, 16). Jehová kúsi̱íní-inira tá xítora ña̱ chíka̱a̱níún ndee̱ ña̱ sákuaʼakaún xa̱ʼa̱ra.

17. Tá ná chindeétáʼún xíʼin inkana, ¿ndáaña va̱ʼa ndakiʼún xa̱ʼa̱ ña̱yóʼo?

¹⁷ Tá chíndeétáʼún xíʼin inkana, ña̱yóʼo va̱ʼaní chindeétáʼanña xíʼún ña̱ xa̱ún koún iin na̱ hermano na̱ xu̱xa-ini. Ta̱ Jesús ni̱ka̱ʼa̱nra: “Kúsi̱íka-iniyó tá táxiyó ña̱ʼa ndaʼa̱ inkana nu̱úka ña̱ ndakiʼinyóña” (Hech. 20:35). Tá xíniñúʼún tiempo ña̱ kúúmiíún ta saátu ndeún ña̱ chindeétáʼún xíʼin inkana, ña̱yóʼo va̱ʼaní chindeétáʼanña xíʼún. ¿Ndáa ki̱ʼva chindeétáʼún xíʼin inkana? Kivi chindeétáʼún xíʼin na̱ hermano na̱ ndeéndóʼo á kivitu chindeétáʼún xíʼin na̱ hermano na̱ xa̱a̱ chée ña̱ keʼún chiñu veʼena á ña̱ chindeétáʼún xíʼinna ña̱ kuniñúʼuna celular á tableta. Tá kúún iin ta̱ loʼo ta̱ xa̱a̱ nda̱kuchi, kivi chika̱ún ndee̱ ña̱ xa̱ún koún siervo ministerial ña̱ va̱ʼa chindeétáʼún xíʼin inka na̱ hermano (Filip. 2:4). Ta saátu kivi ku̱ʼún natúʼún xa̱ʼa̱ Ndióxi̱ xíʼin inka na̱ kǒo xíni̱ xa̱ʼa̱ra, tasaá na̱ʼún ña̱ kúʼvi̱-iniún xíniúnna (Mat. 9:36, 37). Ta inkaka ña̱ kivi keʼún kúú ña̱ chika̱ún ndee̱ ña̱ ku̱a̱ʼáka tiempo kachíñún nu̱ú Jehová.

18. Ña̱ kachíñún ku̱a̱ʼáka tiempo nu̱ú Jehová, ¿ndáa ki̱ʼva chindeétáʼanña xíʼún ña̱ va̱ʼaníka xa̱ún kutáʼún xíʼinra?

¹⁸ Tá ná kachíñún ku̱a̱ʼáka tiempo nu̱ú Jehová, ña̱yóʼo chindeétáʼanña xíʼún ña̱ va̱ʼaníka kutáʼún xíʼinra. Tá ná koún precursor kivi ku̱ʼún Escuela nu̱ú Sákuaʼa na̱ Nátúʼun xa̱ʼa̱ ña̱ Kaʼndachíñu Ndióxi̱ á Betel, á kivitu ku̱ʼún kachíñún nu̱ú íxava̱ʼana veʼe ña̱ ndásakáʼnuyó Ndióxi̱. Koto ña̱ ni̱ka̱ʼa̱n iin ñá precursora ñá o̱ko̱ iin ku̱i̱ya̱ ñá naní Kaitlyn: “Tá xa̱a̱ ndi̱ʼi nda̱kuchii̱, iin ña̱ va̱ʼaní chi̱ndeétáʼan xíʼi̱n ña̱ va̱ʼaka xa̱i̱ kutáʼi̱n xíʼin Jehová kúú ña̱ xi̱kei̱ xi̱natúʼi̱n xa̱ʼa̱ Ndióxi̱ xíʼin ná hermana ta saátu xíʼin na̱ hermano na̱ xa̱a̱ xu̱xa-ini. Ña̱ xi̱xitoi̱ xi̱keʼéna va̱ʼaní chi̱ndeétáʼanña xíʼi̱n ña̱ kuni̱kai̱ kaʼvii̱ tu̱ʼun Ndióxi̱ ta saátu ña̱ va̱ʼaní sanáʼi̱ na̱ yiví”.

19. ¿Ndáaña va̱ʼa ndakiʼún tá ná ndakundeún kuaʼnún xíʼin tu̱ʼun Ndióxi̱?

¹⁹ Tá chíka̱ún ndee̱ ña̱ kuaʼnukaún xíʼin tu̱ʼun Ndióxi̱, ku̱a̱ʼání ña̱ va̱ʼa taxira ndaʼún. Tasaá kúú ña̱ va̱ása kuniñúʼún tiempo ña̱ kúúmiíún ña̱ keʼún ña̱ʼa ña̱ va̱ása ndáyáʼvi (1 Juan 2:17). Ta ni va̱ása ya̱ʼún nu̱ú tu̱ndóʼo ña̱ kivi sáxo̱ʼvi̱ yóʼo. Si̱íníka xa̱ún koún ta ndiʼi ña̱ kéʼún va̱ʼaní kanaña (Prov. 16:3). Ta ña̱ kéʼún va̱ʼaní chindeétáʼanña xíʼin inka na̱ hermano ni kúúna na̱ va̱lí á na̱ xa̱a̱ chée (1 Tim. 4:12). Ta va̱ʼaní kuniún tá ná keʼún ña̱yóʼo ta saátu kusi̱í-iniún chi kúnda̱a̱-iniún ña̱ kíndo̱o-ini Jehová xíʼin ña̱ kéʼún ta kúúra migoún (Prov. 23:15, 16).