Kiviva koo si̱íyó

1. Ña̱ sakúaʼayó xa̱ʼa̱ Ndióxi̱, ¿ndáa ki̱ʼva chindeétáʼanña xíʼinyó ña̱ va̱ʼa si̱í kooyó?

KIVIVA kusi̱í-iniyó ndiʼi tiempo. Ta̱ Jesús ni̱ka̱ʼa̱nra xa̱ʼa̱ iin ña̱ kivi chindeétáʼan xíʼinyó tá ta̱xira iin discurso chí xi̱ní yukú. Ka̱chira: “Si̱íní íyo na̱ kúnda̱a̱-ini ña̱ xíniñúʼuna Ndióxi̱” (Mat. 5:3). Ta̱yóʼo xi̱kunda̱a̱-inira ña̱ ndiʼi miíyó na̱ yiví ku̱vaʼayó ña̱ kuni̱yó sakúaʼayó xa̱ʼa̱ Ndióxi̱ ta ndasakáʼnuyóra. Ña̱yóʼo kúú ña̱ káʼa̱n Biblia xa̱ʼa̱ tá káʼa̱nña ña̱ xíniñúʼuyó Ndióxi̱. Ta xa̱ʼa̱ ña̱ kúú Jehová iin Ndióxi̱ ta̱ si̱í-ini, ndiʼi miíyó na̱ ndásakáʼnu-ñaʼá kiviva xa̱a̱yó si̱íní kooyó (1 Tim. 1:11).

2, 3. a) ¿Ndáana kúú inkaka na̱ kivi kusi̱í-ini? b) ¿Ndáaña sakúaʼayó nu̱ú artículo yóʼo, ta nda̱chun ndáyáʼviní ka̱ʼa̱nyó xa̱ʼa̱ña?

² ¿Á tá kǒo tu̱ndóʼo íyo nu̱úyó saá kuití kúú ña̱ kivi si̱í kooyó? Va̱ásaví. Ta̱ Jesús tá ta̱xira iin discurso ni̱ka̱ʼa̱nra xa̱ʼa̱ iin ña̱ sándakanda̱ní-iniyó. Ta̱yóʼo ka̱chira: “Si̱íní íyo na̱ ndeéní kúsuchí-ini”, ña̱kán nda̱a̱ na̱ ndákavaní-ini xa̱ʼa̱ ña̱ ni̱ki̱ʼvina ku̱a̱chi á tá yáʼana iin tu̱ndóʼo ña̱ ndeéní nda̱a̱ na̱yóʼo kivi si̱íní koona. Ta saátu ni̱ka̱ʼa̱nra xa̱ʼa̱ “na̱ íxandi̱va̱ʼana xíʼin xa̱ʼa̱ ña̱ kéʼéna ña̱ va̱ʼa”, á xa̱ʼa̱ na̱ xóʼvi̱ ña̱ kúúna discípulora, kivitu si̱íní koo na̱yóʼova (Mat. 5:4, 10, 11). Soo, ¿ndáaña kivi keʼéyó ña̱ va̱ʼa si̱í kooyó ni tá yáʼayó nu̱ú tu̱ndóʼo?

³ Ta̱ Jesús ni̱ka̱ʼa̱nra ña̱ va̱ʼa si̱í kooyó va̱ása kúni̱ kachiña ña̱ nda̱a̱ ni iinví yichi̱ va̱ása koo tu̱ndóʼo nu̱úyó, chi ña̱ chindeétáʼan xíʼinyó ña̱ va̱ʼa si̱í kooyó kúú ña̱ kundi̱ʼi̱-iniyó xa̱ʼa̱ chiñu Ndióxi̱ ta saátu ña̱ kuyatinyó nu̱úra (Sant. 4:8). ¿Ndáa ki̱ʼva keʼéyó ña̱yóʼo? Nu̱ú artículo yóʼo ka̱ʼa̱nyó xa̱ʼa̱ u̱ni̱ ña̱ʼa ña̱ chindeétáʼan xíʼinyó ña̱ va̱ʼa si̱íní kooyó.

KAʼVI BIBLIA TA NDAKANIXI̱NÍ XA̱ʼA̱ÑA

4. ¿Ndáaña xíniñúʼu keʼéyó ña̱ va̱ʼa si̱íní kooyó? (Salmo 1:1-3).

⁴ ÑA̱ NU̱Ú: Ña̱ va̱ʼa si̱íní kooyó xíniñúʼu kaʼviyó tu̱ʼun Ndióxi̱ ta ndakanixi̱níyó xa̱ʼa̱ña. Ta̱ Jesús ni̱ka̱ʼa̱nra xa̱ʼa̱ tu̱ʼun Ndióxi̱ ña̱ íyoña nda̱a̱ táki̱ʼva íyo ña̱ xíxiyó. Tá kúú miíyó na̱ yiví xíʼin kití xíniñúʼu kuxuyó ndiʼi ki̱vi̱ ña̱ va̱ʼa kutakuyó. Soo iinlá miíyó na̱ yiví kúú na̱ xíniñúʼu kaʼvi tu̱ʼun Ndióxi̱ ta xíniñúʼuní keʼéyó ña̱yóʼo. Ta̱ Jesús ni̱ka̱ʼa̱nra ña̱yóʼo: “Su̱ví si̱táva̱ʼa kuití kúú ña̱ taxi kutaku na̱ yiví chi xíniñúʼu kuniso̱ʼona ndiʼi ña̱ káʼa̱n Jehová” (Mat. 4:4). Ña̱kán xíniñúʼu chika̱a̱níyó ndee̱ ña̱ ndiʼi ki̱vi̱ kaʼviyó tu̱ʼun Ndióxi̱. Ta̱ ka̱ʼyí salmo ni̱ka̱ʼa̱nra ña̱ si̱íní íyo na̱ kútóo kaʼvi ley Jehová ñuú xíʼin káʼñu (kaʼvi Salmo 1:1-3).b

5, 6. a) ¿Ndáaña kivi sakúaʼayó nu̱ú Biblia? b) ¿Ndáa ki̱ʼva chindeétáʼan Biblia xíʼinyó tá ná kaʼviyóña?

⁵ Xa̱ʼa̱ ña̱ kúʼvi̱ní-ini Jehová xínira miíyó xíniñúʼura tu̱ʼunra ña̱ Biblia ña̱ va̱ʼa ka̱ʼa̱nra xíʼinyó ndáaña xíniñúʼu keʼéyó ña̱ va̱ʼa si̱íní kooyó. Tá kúú káʼa̱nra xíʼinyó ndáa xa̱ʼa̱ kúú ña̱ i̱xava̱ʼara miíyó, ndáa ki̱ʼva kooyó migora á ndáaña xíniñúʼu keʼéyó ña̱ va̱ʼa ixakáʼnu-inira xa̱ʼa̱ ku̱a̱chiyó. Ta saátu káʼa̱nra xíʼinyó xa̱ʼa̱ ña̱ va̱ʼa ña̱ ndakiʼinyó chí nu̱únínu (Jer. 29:11). Tá sákuaʼayó xa̱ʼa̱ ndiʼi ña̱yóʼo nu̱ú Biblia sákusi̱íníña-iniyó.

⁶ Nda̱a̱ táki̱ʼva xa̱a̱ sa̱kúaʼayó, nu̱ú Biblia va̱xi ku̱a̱ʼání consejo ña̱ kivi chindeétáʼan xíʼinyó, ta tá ná kundiku̱nyó ña̱ káʼa̱nña saá kúú ña̱ si̱íní kooyó. Ña̱kán, tá íyoní tu̱ndóʼo nu̱úyó ta sándi̱ʼi̱níña-iniyó ná taváyó tiempo ña̱ kaʼviyó tu̱ʼun Ndióxi̱ ta ndakanixi̱níyó xa̱ʼa̱ña. Ta̱ Jesús ni̱ka̱ʼa̱nra: “Na̱ si̱íka íyo kúú na̱ xíniso̱ʼo tu̱ʼun Ndióxi̱ ta kéʼéna ña̱ káʼa̱nña” (Luc. 11:28).

7. ¿Ndáaña xíniñúʼu keʼéyó tá káʼviyó tu̱ʼun Ndióxi̱?

⁷ Tá káʼviyó tu̱ʼun Ndióxi̱ xíniñúʼu taváyó tiempo ña̱ kúee kaʼviyóña ta ndakanixi̱níyó xa̱ʼa̱ña. Ná ka̱ʼa̱nyó xa̱ʼa̱ iin ejemplo. Tá iinna íxava̱ʼana comida ña̱ kútóoníyó kuxuyó, ta xa̱ʼa̱ ña̱ ndíʼi̱ní-iniyó á ku̱a̱ʼání ña̱ʼa ndákanixi̱níyó xa̱ʼa̱, kamaní xíxiyóña. Soo tá ndi̱ʼi xi̱xiyóña ndákanixi̱níyó á va̱ʼa kúeekaví níxixii̱ña ña̱ va̱ʼa kunii̱ á ya̱sín ku̱va̱ʼaña. Ki̱ʼva saá kivi kundoʼoyó xíʼin Biblia, tá ndíʼi̱ní-iniyó iin kama kuití káʼviyóña. Ña̱kán xíniñúʼu taváyó tiempo ña̱ ndakanixi̱níyó xa̱ʼa̱ ña̱ káʼa̱nña. Tá kúú, ndáa ki̱ʼva ni̱xi̱yo na̱ yiví na̱ káʼa̱nña xa̱ʼa̱ á ndáa ki̱ʼva xi̱ka̱ʼa̱nna. Chi tá saá ná keʼéyó si̱íní kooyó.

8. ¿Ndáa ki̱ʼva sáxi̱nu ta̱ “esclavo ta̱ nda̱kúní-ini ta̱ ndíchiní” chiñu ña̱ ta̱xi ta̱ Jesús ndaʼa̱ra? (Koto ña̱ káʼa̱n nota).

⁸ Ta̱ Jesús ta̱xira chiñu ndaʼa̱ ta̱ “esclavo ta̱ nda̱kúní-ini ta̱ ndíchiní” ña̱ taxira ndiʼi ña̱ xíniñúʼuyó ña̱ sakúaʼayó xa̱ʼa̱ Ndióxi̱ mií tiempo ña̱ xíniñúʼuyóña (Mat. 24:45).c Ta Biblia kúú ña̱ xíniñúʼukara ña̱ va̱ʼa tavára publicación ña̱ xíniñúʼuyó (1 Tes. 2:13). Ta ña̱yóʼo kúú ña̱ chíndeétáʼan xíʼinyó ña̱ kunda̱a̱-iniyó ndáa ki̱ʼva ndákanixi̱ní Jehová. Ña̱kán kúú ña̱ káʼviyó revista La Atalaya xíʼin ¡Despertad!, ta káʼvituyó inkaka artículo ña̱ va̱xi nu̱ú jw.org. Ta saátu xa̱a̱ káʼvi kúeeyó ndiʼi ña̱ sákuaʼayó ti̱xin reunión, xítotuyó programa ña̱ kána yo̱o̱ tá yo̱o̱ nu̱ú JW Broadcasting^® tá xa̱a̱ íyoña tu̱ʼun miíyó. Tá ná kaʼviyó ndiʼi ña̱yóʼo ta kotonde̱ʼéyó video, va̱ʼaní chindeétáʼanña xíʼinyó ña̱ ndixa si̱í kooyó.

NÁ KUNISO̱ʼOYÓ ÑA̱ KÁʼA̱N JEHOVÁ XÍʼINYÓ

9. ¿Ndáa inka ña̱ʼa kúú ña̱ xíniñúʼu keʼéyó ña̱ va̱ʼa xa̱a̱yó ndixa si̱í kooyó?

⁹ ÑA̱ U̱VI̱: Ña̱ va̱ʼa ndixa si̱í kooyó xíniñúʼu kuniso̱ʼoyó ña̱ káʼa̱n Jehová. Iin ta̱ ka̱ʼyí ña̱ salmo ka̱chira: “Si̱íní íyo na̱ ndásakáʼnu Jehová tá kéʼéna ña̱ káʼa̱nra” (Sal. 128:1). Ña̱ íxato̱ʼóyó Jehová kúni̱ kachiña ña̱ va̱ása keʼéyó ña̱ʼa ña̱ kúndasíra xínira (Prov. 16:6). Ña̱kán chíka̱a̱níyó ndee̱ ña̱ sákuaʼayó ña̱ káʼa̱n Biblia xa̱ʼa̱ ndáaña kúú ña̱ va̱ʼa xíʼin ña̱ va̱ása va̱ʼa (2 Cor. 7:1). Tá ná keʼéyó ña̱ kútóo Jehová ta kundasíyó ña̱ kúndasíra xínira, saá kúú ña̱ si̱íní xa̱a̱yó kooyó (Sal. 37:27; 97:10; Rom. 12:9).

10. Ni xa̱a̱ xíni̱vayó ndáaña kúú ña̱ kútóo Ndióxi̱, soo ¿ndáaka ña̱ xíniñúʼu keʼéyó? (Romanos 12:2).

¹⁰ (Kaʼvi Romanos 12:2). Sana iin na̱ yiví kúnda̱a̱-inina ña̱ mií Jehová kúú ta̱ kúúmií derecho ña̱ ka̱ʼa̱nra ndáa ña̱ʼa kúú ña̱ va̱ʼa ta ndáaña kúú ña̱ va̱ása va̱ʼa. Soo su̱ví ña̱yóʼo kuití xíniñúʼu kunda̱a̱-inina xa̱ʼa̱ chi xíniñúʼu keʼéna ña̱ káʼa̱nra. Ná káʼa̱nyó xa̱ʼa̱ iin ejemplo. Iin na̱ yiví kúnda̱a̱-inina ña̱ kúúmií na̱ chíñu derecho ña̱ ka̱ʼa̱nna ndáa velocidad xíniñúʼu kava na̱ yiví carro chí carretera nu̱ú ku̱a̱ʼa̱nna, soo ni kúnda̱a̱va-inina ña̱yóʼo kǒo xíínna kuniso̱ʼona. Ña̱kán kamaníka kávána ku̱a̱ʼa̱nna. Ta miíyó xíʼin ña̱ kéʼéyó kúú ña̱ na̱ʼa̱yó á ndixa íxato̱ʼóyó chiñu ña̱ xáʼnda Jehová nu̱úyó, ta kúnda̱a̱-iniyó ña̱yóʼo kúú ña̱ va̱ʼaníka (Prov. 12:28). Ta̱ David xi̱kunda̱a̱-inira ña̱ káʼa̱n Jehová kúú ña̱ va̱ʼaníka, ña̱kán ni̱ka̱ʼa̱nra ña̱yóʼo: “Sánáʼún yi̱ʼi̱ yichi̱ ña̱ taxi ña̱ kutakui̱. Na̱ íyo yatin nu̱ún si̱íní íyona, na̱ íyo chí ndaʼa̱ kúaʼún ndiʼi tiempo kusi̱í-inina” (Sal. 16:11).

11, 12. a) ¿Ndáaña xíniñúʼu kiʼinyó kuenta xíʼin tá ndíʼi̱ní-iniyó á ndákava-iniyó? b) ¿Ndáa ki̱ʼva chíndeétáʼan Filipenses 4:8 xíʼinyó tá ndáka̱xinyó ña̱ kotonde̱ʼéyó á kusíkíyó?

¹¹ Tá ndíʼi̱ní-iniyó á ndákava-iniyó, sana kuni̱yó keʼéyó ña̱ʼa ña̱ chindeétáʼan xíʼinyó nandósóyó xa̱ʼa̱ ña̱yóʼo. Soo xíniñúʼu kiʼinníyó kuenta ña̱ va̱ʼa ná kǒo keʼéyó ña̱ʼa ña̱ kúndasí Jehová xínira (Efes. 5:10-12, 15-17).

¹² Nu̱ú carta ña̱ ka̱ʼyí ta̱ apóstol Pablo ku̱a̱ʼa̱n ndaʼa̱ na̱ ñuu Filipos, ni̱ka̱ʼa̱nra xíʼinna ña̱ ná ndakanixi̱nína xa̱ʼa̱ ndiʼi ña̱ʼa ña̱ nda̱kú, ndiʼi ña̱ʼa ña̱ va̱ása yaku̱a̱, ndiʼi ña̱ʼa ña̱ va̱ʼa xíʼin ndiʼi ña̱ʼa ña̱ chindeétáʼan xíʼinna ña̱ kuʼvi̱-inina kunitáʼanna (kaʼvi Filipenses 4:8). Nu̱ú versículo yóʼo ni va̱ása níka̱ʼa̱n káxira xa̱ʼa̱ ña̱ʼa ña̱ kivi sákusi̱í-iniyó. Soo consejo ña̱ ta̱xira va̱ʼaní chindeétáʼanña xíʼinyó ña̱ vií ndaka̱xinyó yaa ña̱ kuniso̱ʼoyó, pelicula ña̱ kotoyó, libro ña̱ kaʼviyó á videojuego ña̱ kusíkíyó. Ta ña̱yóʼo chindeétáʼan xíʼinyó ña̱ kunda̱a̱-iniyó ndáaña kútóo Jehová ta ndáaña va̱ása kútóora. Chi miíyó kúni̱yó keʼéyó ndiʼi ña̱ kútóora (Sal. 119:1-3). Tá saá ná keʼéyó va̱ʼaní koo ña̱ xínitúni̱yó ta si̱íní xa̱a̱yó kooyó (Hech. 23:1).

ÑA̱ NÁ KUNDAYÁʼVIKA NU̱ÚYÓ NÁ KOO ÑA̱ NDÁSAKÁʼNUYÓ JEHOVÁ

13. ¿Ndáaña kúú inka ña̱ chindeétáʼan xíʼinyó ña̱ ndixa si̱í kooyó? (Juan 4:23, 24).

¹³ ÑA̱ U̱NI̱: Ña̱ ná kundayáʼvika nu̱úyó ná koo ña̱ ndásakáʼnuyó Jehová. Xa̱ʼa̱ ña̱ i̱xava̱ʼara miíyó xíniñúʼu ndasakáʼnuyóra (Apoc. 4:11; 14:6, 7). Ña̱kán, ña̱ xíniñúʼu kundi̱ʼi̱ka-iniyó xa̱ʼa̱ kúú ña̱ ndasakáʼnuyóra nda̱a̱ táki̱ʼva kúni̱ miíra, nda̱a̱ táki̱ʼva náʼa̱ ña̱ espíritu santo yichi̱ nu̱úyó ta nda̱a̱ táki̱ʼva íyo ña̱ nda̱a̱ ña̱ sa̱kuaʼayó xa̱ʼa̱ra (kaʼvi Juan 4:23, 24). Kúni̱yó ña̱ ná kuniʼi espíritu santo yichi̱ nu̱úyó ña̱ va̱ʼa ndasakáʼnuyóra nda̱a̱ táki̱ʼva káʼa̱n mií tu̱ʼunra. Mií ña̱ xíniñúʼu kundi̱ʼi̱-iniyó xa̱ʼa̱ kúú ña̱ keʼéyó ña̱ kúni̱ Jehová ni lugar nu̱ú íyoyó va̱ása táxina ña̱ natúʼunyó xa̱ʼa̱ra. Tiempo vitin yáʼaka 100 na̱ hermano ñúʼuna veʼeka̱a xa̱ʼa̱ ña̱ kúúna testigo Jehová.d Ta ni ndóʼona ña̱yóʼo kúsi̱íní-inina chi va̱ʼa kéʼéna oración nu̱úra, va̱ʼa káʼvina ta va̱ʼa nátúʼunna xa̱ʼa̱ra xíʼin inkana. Ña̱kán ni káʼa̱n ndi̱va̱ʼana xíʼinyó, ni íxandi̱va̱ʼana xíʼinyó, kúsi̱í-iniyó chi íyo Jehová xíʼinyó ta ku̱a̱ʼání ña̱ va̱ʼa taxira ndaʼa̱yó chí nu̱únínu (Sant. 1:12; 1 Ped. 4:14).

ÑA̱ NDÓʼO NA̱ NDÁSAKÁʼNU NDIÓXI̱ TIEMPO VITIN

14. ¿Ndáaña ndo̱ʼo iin ta̱ hermano ta̱ ñuu Tayikistán, ta nda̱chun ndo̱ʼora saá?

¹⁴ U̱ni̱ saá ña̱ sa̱kúaʼayó xa̱ʼa̱ yóʼo náʼa̱ña nu̱úyó ña̱ kiviva kusi̱í-iniyó ni nda̱a̱ ndáaka tu̱ndóʼo íyo nu̱úyó, chi íyo ku̱a̱ʼá na̱ hermano na̱ ndóo tiempo vitin na̱ xa̱a̱ ku̱chiñu ni̱ya̱ʼa nu̱ú ña̱yóʼo. Ná káʼa̱nyó xa̱ʼa̱ iin ta̱ hermano ta̱ 19 ku̱i̱ya̱ ta̱ naní Yovidón Boboyónov ta̱ íyo chí Tayikistán. Xa̱ʼa̱ ña̱ kǒo níxiinra keʼéra chiñu táʼan ña̱ kéʼé na̱ soldado, tá 4 tí octubre ña̱ ku̱i̱ya̱ 2019 nda̱kiʼinnara ku̱a̱ʼa̱n xíʼinna. Ta ku̱a̱ʼá yo̱o̱ chi̱kaa̱nara veʼeka̱a ta i̱xandi̱va̱ʼanína xíʼinra chi xi̱ka̱ʼa̱nna ña̱ kǒo íxato̱ʼóra ley. Ta ku̱a̱ʼání na̱ país na̱ tává noticia ni̱ka̱ʼa̱nna xa̱ʼa̱ ku̱a̱chi síkí ña̱ chi̱kaa̱na sa̱tá ta̱yóʼo. Ta ni̱ka̱ʼa̱nna xa̱ʼa̱ ña̱ ka̱ninara ta i̱xandúxana xíʼinra ña̱ ná chinaʼára ña̱ koora soldado ta kundixira uniforme na̱ soldado. Soo tá ni̱ya̱ʼa tiempo, chi̱ndaʼánara ku̱a̱ʼa̱nra iin lugar ña̱ keʼéra chiñu ña̱ yo̱ʼvi̱ní. Soo ta̱ chíñu país kán ni̱ka̱ʼa̱nra ña̱ ná tavánara veʼeka̱a. Ni ni̱ya̱ʼa ta̱ Yovidón Boboyónov nu̱ú ndiʼi prueba yóʼo, ni̱xi̱yo nda̱kú-inira xíʼin Ndióxi̱ ta xi̱kusi̱íva-inira. ¿Nda̱chun va̱ʼa xi̱kusi̱í-inira? Saáchi va̱ása nísandákoora ña̱ sakúaʼara xa̱ʼa̱ Ndióxi̱.

15. Tá xi̱ndika̱a̱ ta̱ Yovidón veʼeka̱a, ¿ndáaña ke̱ʼéra ña̱ va̱ʼa kǒo nísandákoora ña̱ sakúaʼara xa̱ʼa̱ Ndióxi̱?

¹⁵ Tá xi̱ndika̱a̱ ta̱ Yovidón veʼeka̱a, kǒo nísandákoora ña̱ sakúaʼara xa̱ʼa̱ Ndióxi̱ ni kǒo Biblia níxi̱kuumiíra ni tutu ña̱ tává na̱ ñuu Ndióxi̱. Tá saá, ¿ndáa ki̱ʼva xi̱keʼéra ña̱yóʼo? Tá xi̱xa̱ʼa̱n na̱ hermano ña̱ taxina ña̱ kuxura, ini bolsa nu̱ú xi̱chika̱a̱na ña̱ kuxura xi̱kaʼyína texto diario. Ña̱kán va̱ʼava xi̱kaʼvira Biblia ndiʼi ki̱vi̱ ta xi̱ndakanixi̱níra xa̱ʼa̱ña. Tá ki̱tara veʼeka̱a ta̱xira consejo yóʼo ndaʼa̱ na̱ ta̱ʼán ya̱ʼa nu̱ú tu̱ndóʼo ña̱ yo̱ʼvi̱ní, ka̱chira: “Ña̱ íyo ndíka̱a̱ndó vitin, chika̱a̱níndó ndee̱ ña̱ kuyatinndó nu̱ú Jehová ta ndáyáʼviní ña̱ kaʼvindó Biblia ta saátu tutu ña̱ tává na̱ ñuu Ndióxi̱”.

16. ¿Ndáaña xi̱ndakanixi̱ní ta̱ Yovidón xa̱ʼa̱?

¹⁶ Tá xi̱ndika̱a̱ ta̱ Yovidón veʼeka̱a kǒo nísandákoora ña̱ keʼéra ña̱ káʼa̱n Jehová. Nu̱úka ña̱ ndakanixi̱níra xa̱ʼa̱ ña̱ va̱ása va̱ʼa ta xa̱a̱ra keʼéraña, xi̱ndakanixi̱níra xa̱ʼa̱ ña̱ʼa ña̱ kútóo Jehová ta saátu xa̱ʼa̱ ña̱ʼa ña̱ ndáyáʼvika nu̱ú ta̱yóʼo. Xi̱tavára tiempo ña̱ kotora ña̱ʼa ña̱ i̱xava̱ʼa Ndióxi̱. Ndiʼi xi̱ta̱a̱n tá xi̱ndako̱ora, xi̱xiniso̱ʼora xi̱xita tí sa̱a̱ ta tá ñuú xi̱xitora yo̱o̱ xíʼin tí ki̱mi. Ta̱yóʼo ka̱chira: “Tá xi̱xitoi̱ ndiʼi ña̱ʼa ña̱ i̱xava̱ʼa Jehová, xi̱kusi̱íní-inii̱ xíʼinña ta va̱ʼaní xi̱kuni̱i̱”. Ña̱kán, tá chíndayáʼviníyó ndiʼi ña̱ táxi na̱ ñuu Ndióxi̱ ndaʼa̱yó ta saátu ña̱ʼa ña̱ i̱xava̱ʼa Jehová saá kúú ña̱ si̱íní kooyó, ta ña̱yóʼo chindeétáʼanña xíʼinyó ña̱ kundeé-iniyó ya̱ʼayó nu̱ú tu̱ndóʼo.

17. ¿Ndáa ki̱ʼva chindeétáʼan 1 Pedro 1:6, 7 xíʼin na̱ yáʼa nu̱ú tu̱ndóʼo táʼan ña̱ ni̱ya̱ʼa ta̱ Yovidón?

¹⁷ Ña̱ xi̱ndayáʼvika nu̱ú ta̱ Yovidón kúú ña̱ ndasakáʼnura Jehová. Ta̱yóʼo xi̱kunda̱a̱-inira ña̱ xi̱ndayáʼviní nda̱kú koo inira xíʼinra. Chi ta̱ Jesús ni̱ka̱ʼa̱nra: “Jehová Ndióxi̱ún ndasakáʼnún, mitúʼun ta̱yóʼo kachíñún nu̱ú” (Luc. 4:8). Na̱ xáʼndachíñu nu̱ú na̱ soldado ta saátu mií na̱ soldado xi̱kuni̱na ña̱ ná sandákoo ta̱ Yovidón kandíxara Ndióxi̱. Soo ta̱yóʼo ñuú xíʼin káʼñu xi̱ka̱ʼa̱nníra xíʼin Jehová ña̱ ná chindeétáʼanra xíʼinra ña̱ kundeé-inira ya̱ʼara nu̱ú tu̱ndóʼo ta nda̱kú koo inira xíʼinra. Ni ku̱a̱ʼání tu̱ndóʼo ni̱ya̱ʼa ta̱ Yovidón nu̱ú, va̱ása nísandákoora ña̱ kandíxara Ndióxi̱. Ta xa̱ʼa̱ ña̱yóʼo, kúsi̱íní-inira chi ni ka̱ninara ta chika̱a̱nara veʼeka̱a, kándíxaníkara Ndióxi̱ vitin nu̱úka ña̱ xi̱kandíxarara tá ya̱chi̱ (kaʼvi 1 Pedro 1:6, 7).

18. ¿Ndáaña xíniñúʼu keʼéyó ña̱ va̱ʼa si̱í kooyó?

¹⁸ Jehová kúnda̱a̱va-inira ndáaña xíniñúʼu miíyó na̱ yiví ña̱ va̱ʼa si̱í kooyó. Ña̱kán, tá ndíku̱nyó u̱ni̱ saá ña̱ sa̱kúaʼayó nu̱ú artículo yóʼo kiviva kusi̱í-iniyó ni yáʼayó nu̱ú tu̱ndóʼo. Tasaá kivi ka̱ʼa̱nyó tu̱ʼun yóʼo: “Si̱íní íyo na̱ ndásakáʼnu Jehová” (Sal. 144:15).