Ná kandíxaníyó ña̱ káʼa̱n Jehová keʼéra chí nu̱únínu

1. ¿Ndáa ña̱ va̱ʼa kúú ña̱ káʼa̱n Jehová taxira ndaʼa̱yó?

JEHOVÁ káʼa̱nra taxira ña̱ kutakuyó ndiʼi tiempo. Sava na̱ ndásakáʼnu miíra koona chi ndiví (1 Cor. 15:50, 53). Soo ku̱a̱ʼáníyó ndátu koo ndiʼi tiempo nu̱ú ñuʼú yóʼo ta kǒoka kue̱ʼe̱ koo nu̱úyó (Apoc. 21:3, 4). Ni kúúyó na̱ kundoo nu̱ú ñuʼú yóʼo á na̱ ku̱ʼu̱n chí ndiví, ndiʼiyó chíndayáʼviníyó ña̱ káʼa̱n Jehová keʼéra xa̱ʼa̱yó.

2. ¿Nda̱chun va̱ʼa kándíxayó ña̱ koo chí nu̱únínu?

² Tá káʼa̱n Biblia xa̱ʼa̱ ña̱ koo chí nu̱únínu, ndákanixi̱níyó xa̱ʼa̱ ña̱ va̱ʼa ña̱ taxi Ndióxi̱ ndaʼa̱yó chí nu̱únínu. Ta kándíxaníyó ña̱ xi̱nuña saáchi mií Jehová káʼa̱nña (Rom. 15:13). Kúnda̱a̱-iniyó xa̱ʼa̱ ndiʼi ña̱ káʼa̱nra taxira ndaʼa̱yó chí nu̱únínu ta kúnda̱a̱-iniyó ña̱ ndiʼi tiempo sáxi̱nura ña̱ káʼa̱nra (Núm. 23:19). Ña̱kán kándíxaníyó ña̱ káʼa̱n Jehová keʼéra xa̱ʼa̱yó ta kuchiñuvara keʼéraña. Ta kándíxayó ña̱ koo chí nu̱únínu su̱ví iin xa̱ni kuití kúúña, chi ña̱ nda̱a̱ kúúña ta xi̱nuvaña.

3. ¿Ndáaña sakúaʼayó nu̱ú artículo yóʼo? (Salmo 27:14).

³ Yiváyó Jehová kúʼvi̱ní-inira xínira miíyó ta kúni̱ra ná kandíxayó ña̱ káʼa̱nra (kaʼvi Salmo 27:14).b Tá kándíxaníyó ña̱ káʼa̱n Jehová keʼéra chí nu̱únínu, saá kuchiñuyó ya̱ʼayó nu̱ú ña̱ íxayo̱ʼvi̱ xíʼinyó ta kusi̱í-iniyó kundatuyó ña̱ káʼa̱nra keʼéra. Nu̱ú artículo yóʼo sakúaʼayó ña̱ va̱ʼaní chíndeétáʼan ña̱ káʼa̱n Jehová keʼéra chí nu̱únínu xíʼinyó. Soo siʼna ná kotoyó nda̱chun kúú ña̱ káʼa̱nyó ña̱ nda̱a̱ táki̱ʼva íyo iin ka̱a ña̱ tíin tú barco saá íyo ña̱ ndátuyó koo chí nu̱únínu ta saátu nda̱chun íyoña nda̱a̱ táki̱ʼva íyo iin casco. Ta tándi̱ʼi saá sakúaʼayó nda̱saa kivi chika̱a̱yó ndee̱ ña̱ kandíxaníkayó ña̱ káʼa̱n Jehová keʼéra chí nu̱únínu.

TÁKI̱ʼVA ÍYO IIN KA̱A ÑA̱ TÍIN TÚ BARCO SAÁ ÍYO ÑA̱ NDÁTUYÓ KOO CHÍ NU̱ÚNÍNU

4. ¿Nda̱chun nda̱a̱ táki̱ʼva íyo iin ka̱a ña̱ tíin tú barco saá íyo ña̱ ndátuyó koo chí nu̱únínu? (Hebreos 6:19).

⁴ Nu̱ú carta ña̱ chi̱ndaʼá ta̱ apóstol Pablo ku̱a̱ʼa̱n nu̱ú na̱ hebreo, chi̱táʼanra ña̱ kándíxayó koo chí nu̱únínu xíʼin iin ka̱a ña̱ tíin tú barco (kaʼvi Hebreos 6:19). Iin yichi̱ tá ku̱a̱ʼa̱n ta̱ apóstol Pablo xíʼin tú barco, ndeéní ki̱xáʼa kúun sa̱vi̱ ta na̱ ku̱a̱ʼa̱n xíʼin tú barco kán chi̱kaa̱na ka̱a ña̱ tíin tú barco nu̱ú ti̱kui̱í tasaá va̱ása kanindaanú yu̱u̱ (Hech. 27:29, 39-41). Ña̱kán ña̱ xi̱xikaní ta̱ Pablo nu̱ú mar, va̱ʼaní xi̱kunda̱a̱-inira ña̱ va̱ʼaní xi̱chindeétáʼan ka̱a yóʼo xíʼin tú barco. Nda̱a̱ táki̱ʼva chíndeétáʼan ka̱a yóʼo xíʼin tú barco, saátu va̱ʼaní chíndeétáʼan ña̱ káʼa̱n Jehová keʼéra chí nu̱únínu xíʼinyó ña̱ va̱ása kuxíkáyó nu̱ú Jehová tá yáʼayó nu̱ú tu̱ndóʼo. Ña̱ kandíxaníyó ña̱ ndakundoo va̱ʼayó chí nu̱únínu chindeétáʼanña xíʼinyó ña̱ ya̱ʼayó nu̱ú tu̱ndóʼo. Ná ndakaʼányó chi ta̱ Jesús ni̱ka̱ʼa̱nra ña̱ ixandi̱va̱ʼana xíʼinyó (Juan 15:20). Ña̱kán, ña̱ ndakanixi̱níyó xa̱ʼa̱ ña̱ káʼa̱n Jehová taxira ndaʼa̱yó chí nu̱únínu, ña̱yóʼo chindeétáʼan xíʼinyó ña̱ chika̱a̱yó ndee̱ ña̱ ndasakáʼnuyóra.

5. Ña̱ xi̱kunda̱a̱-ini ta̱ Jesús ña̱ ndakiʼinra ña̱ va̱ʼa, ¿ndáa ki̱ʼva chi̱ndeétáʼanña xíʼinra ni xi̱kunda̱a̱-inira ña̱ kuvira?

⁵ Xa̱ʼa̱ ña̱ xi̱ndatu ta̱ Jesús ña̱ ndakiʼinra ña̱ va̱ʼa, ña̱yóʼo chi̱ndeétáʼan xíʼinra ni xi̱kunda̱a̱-inira ña̱ xo̱ʼvi̱níra tá ná kuvira. Tá ku̱i̱ya̱ 33 ña̱ Pentecostés, ta̱ apóstol Pedro ni̱ka̱ʼa̱nra xa̱ʼa̱ iin profecía ña̱ va̱xi nu̱ú salmo ta ña̱yóʼo liviní káʼa̱nña xa̱ʼa̱ ta̱ Jesús, chi xa̱ʼa̱ ña̱ xi̱kandíxa ta̱ Jesús ña̱ ndakiʼinra chí nu̱únínu va̱ʼaní táxi̱n ni̱xi̱yo inira ni xi̱kunda̱a̱-inira ña̱ kuvira: “Tá tákui̱ kandíxakai̱ yóʼó, saáchi va̱ása sandákoún yi̱ʼi̱ ini Ya̱vi̱ nu̱ú ndúxu̱nna, saátu ni va̱ása taxiún ña̱ ta̱ʼyi̱ ku̱ñui̱ kán, chi nda̱kú íyo inii̱ xíʼún. Sakútún níma̱i̱ xíʼin ña̱ si̱í-ini” (Hech. 2:25-28; Sal. 16:8-11). Ni xi̱kunda̱a̱-ini ta̱ Jesús ña̱ kuvira, soo xi̱kandíxara ña̱ sandátaku yivárara ta ndikóra koora xíʼinra chí ndiví (Heb. 12:2, 3).

6. ¿Ndáaña ni̱ka̱ʼa̱n iin ta̱ hermano xa̱ʼa̱ ña̱ ndátura ndakiʼinra chí nu̱únínu?

⁶ Ña̱ káʼa̱n Ndióxi̱ keʼéra chí nu̱únínu xa̱a̱ chíndeétáʼanña xíʼin ku̱a̱ʼání na̱ hermano ña̱ ya̱ʼa nu̱ú tu̱ndóʼo. Ná kotoyó ña̱ ndo̱ʼo ta̱ hermano Leonard Chinn, ta̱ hermano yóʼo ni̱xi̱yora chí Inglaterra ta nda̱kúní ni̱xi̱yo inira xíʼin Ndióxi̱. Tá ni̱xi̱yo Primera Guerra Mundial, chi̱kaa̱nara veʼeka̱a ta va̱ása níxiinra ku̱ʼu̱nra nu̱ú ku̱a̱chi. Ki̱ʼva u̱vi̱ yo̱o̱ kǒo nítaxina ña̱ ka̱ʼa̱nra xíʼin nda̱a̱ ni iin na̱ yiví, ta tándi̱ʼi ta̱xina chiñu ña̱ yo̱ʼvi̱ní ndaʼa̱ra. Tá ni̱ya̱ʼa loʼo tiempo, ta̱yóʼo ni̱ka̱ʼa̱nra: “Xíʼin ña̱ ndo̱ʼi̱ yóʼo sa̱kúaʼi̱ ña̱ ndáyáʼviní kandíxayó ña̱ káʼa̱n Jehová taxira ndaʼa̱yó chí nu̱únínu ña̱ va̱ʼa kuchiñuyó ya̱ʼayó nu̱ú tu̱ndóʼo. Yichi̱ va̱ʼa ña̱ chi̱núu ta̱ Jesús nu̱úyó, na̱ apóstol, na̱ profeta xíʼin ndiʼika ña̱ va̱xi nu̱ú Biblia va̱ʼaní chíka̱a̱ña ndee̱ xíʼinyó ña̱ kundatuyó ndakiʼinyó ña̱ va̱ʼa chí nu̱únínu”. Ña̱ xi̱ndatu ta̱ Leonard ndakiʼinra chí nu̱únínu va̱ʼaní chi̱ndeétáʼanña xíʼinra chí táki̱ʼva ni̱xi̱yo iin ka̱a ña̱ tíin tú barco saá ni̱xi̱yoña nu̱úra, ta saátu kivi chindeétáʼanña xíʼin miíyó.

7. Tu̱ndóʼo ña̱ yáʼayó nu̱ú, ¿ndáa ki̱ʼva ndásandakúña-iniyó? (Romanos 5:3-5; Santiago 1:12).

⁷ Tá yáʼayó nu̱ú tu̱ndóʼo ta kíʼinyó kuenta ndáa ki̱ʼva chíndeétáʼan Jehová xíʼinyó, va̱ʼaníka kandíxayó ña̱ káʼa̱nra keʼéra xa̱a̱yó chí nu̱únínu (kaʼvi Romanos 5:3-5; Santiago 1:12). Tá sa̱kán ki̱xáʼayó sákuaʼayó xa̱ʼa̱ Jehová, sana loʼova xi̱kandíxayó ña̱ káʼa̱nra keʼéra xa̱ʼa̱yó, soo vitin va̱ʼaní kándíxayó ña̱ káʼa̱n Jehová keʼéra. Ta̱ Ndi̱va̱ʼa kúni̱ra ña̱ ná kundi̱ʼi̱ní-iniyó tá ná ndakava-iniyó xíʼin tu̱ndóʼo ña̱ yáʼayó nu̱ú, soo mií Jehová kúú ta̱ chindeétáʼan xíʼinyó ña̱ ya̱ʼayó nu̱ú ña̱yóʼo.

ÑA̱ NDÁTUYÓ NDAKIʼINYÓ CHÍ NU̱ÚNÍNU ÍYOÑA NDA̱A̱ TÁKI̱ʼVA ÍYO IIN CASCO

8. ¿Nda̱chun táki̱ʼva íyo iin casco saá íyo ña̱ ndátuyó ndakiʼinyó chí nu̱únínu? (1 Tesalonicenses 5:8).

⁸ Tu̱ʼun Ndióxi̱ káʼa̱ntuña ña̱ nda̱a̱ táki̱ʼva íyo iin casco saá íyo ña̱ ndátuyó ndakiʼinyó chí nu̱únínu (kaʼvi 1 Tesalonicenses 5:8). Na̱ soldado xíniñúʼuna casco ña̱ va̱ʼa kundaana xi̱nína nu̱ú na̱ sáa̱-ini xíni miína. Ta ki̱ʼva saátu xíniñúʼu kundaaníyó ña̱ ndákanixi̱níyó, chi ta̱ Ndi̱va̱ʼa kúni̱níra ña̱ ná ndakanixi̱ní xa̱ʼa̱ ña̱ va̱ása va̱ʼa. Ta̱ Ndi̱va̱ʼa ku̱a̱ʼání ña̱ʼa xíniñúʼura ña̱ ixayaku̱a̱ra ña̱ ndákanixi̱níyó tasaá ndakavayó ta keʼéyó ña̱ va̱ása va̱ʼa. Soo nda̱a̱ táki̱ʼva ndáa iin casco xi̱ní iin ta̱ soldado, ña̱ ndátuyó ndakiʼinyó chí nu̱únínu chindeétáʼanña xíʼinyó ña̱ va̱ʼaní koo ña̱ ndákanixi̱níyó tasaá nda̱kúní koo iniyó xíʼin Jehová.

9. ¿Ndáaña kéʼé na̱ yiví na̱ kǒo kándíxa ña̱ káʼa̱n Jehová keʼéra chí nu̱únínu?

⁹ Ña̱ ndátuyó kooyó ndiʼi tiempo chíndeétáʼanña xíʼinyó ña̱ vií ndaka̱xinyó ña̱ keʼéyó. Soo tá nina xa̱ʼa̱ ña̱ kúni̱ miíyó ná ndakanixi̱níyó, loʼo tá loʼo kivi xa̱a̱yó nandósóyó xa̱ʼa̱ ña̱ kutakuyó ndiʼi tiempo. Ná ndakanixi̱níyó xa̱ʼa̱ ña̱ ndo̱ʼo sava na̱ cristiano na̱ ni̱xi̱yo chí ñuu Corinto. Na̱ cristiano kán sa̱ndákoona ña̱ kandíxana ña̱ káʼa̱n Ndióxi̱, ña̱ sandátakura na̱ ni̱xi̱ʼi̱ (1 Cor. 15:12). Ta̱ Pablo ni̱ka̱ʼa̱nra ña̱ na̱ yiví na̱ va̱ása níxi̱kandíxa ña̱ ndataku na̱ ni̱xi̱ʼi̱, xi̱keʼéna ña̱ xi̱kuni̱ miína (1 Cor. 15:32). Saátu tiempo vitin, ku̱a̱ʼání na̱ yiví va̱ása kándíxana ña̱ káʼa̱n Ndióxi̱ keʼéra chí nu̱únínu ta kéʼéna ña̱ kúni̱ miína ña̱ va̱ʼa koo si̱ína. Soo miíyó kándíxanívayó ña̱ káʼa̱n Ndióxi̱ taxira ndaʼa̱yó chí nu̱únínu. Ña̱ ndátuyó ndakiʼinyó, táki̱ʼva íyo iin casco saá íyoña, saáchi chíndeétáʼanña xíʼinyó ña̱ vií ndakanixi̱níyó ta va̱ása ndakanixi̱níyó xa̱ʼa̱ ña̱ kúni̱ mií kuitíyó, chi ña̱yóʼo kivi sakúxíkáña miíyó nu̱ú Jehová (1 Cor. 15:33, 34).

10. Ña̱ ndátuyó ndakiʼinyó chí nu̱únínu, ¿ndáa ki̱ʼva chíndeétáʼanña xíʼinyó ña̱ va̱ása kandíxayó tu̱ʼun vatá?

¹⁰ Ña̱ ndátuyó ndakiʼinyó chíndeétáʼanña xíʼinyó ña̱ va̱ása ndakanixi̱níyó ña̱ kǒo kúchiñuyó sakúsi̱íyó ini Jehová. Sana iinna kivi ndakanixi̱nína: “Va̱ása ndakiʼinvíi̱ ña̱ kutakui̱ ndiʼi tiempo. Su̱ví na̱ yiví va̱ʼaví kúi̱. Va̱ása kiviví keʼíi̱ ndiʼi ña̱ kúni̱ Jehová”. Ná ndakaʼányó chi táʼan ña̱yóʼo ni̱ka̱ʼa̱n ta̱ Elifaz xíʼin ta̱ Job tá ka̱chira xíʼinra: “Kǒo nda̱a̱ ni iin na̱ yiví kivi koo nda̱kú-ini xíʼin Ndióxi̱”. Tándi̱ʼi, saá ni̱ka̱ʼa̱nkara ña̱yóʼo: “Ni na̱ ángel va̱ása kándíxara ta ni ndiví va̱ása yi̱i̱ña nu̱úra” (Job 15:14, 15). Tu̱ʼun vatáva kúú ña̱ ni̱ka̱ʼa̱n ta̱ Elifaz. Ná ndakaʼányó chi ta̱ Ndi̱va̱ʼa kúú ta̱ kúni̱ ná ndakanixi̱níyó saá. Ta̱ Ndi̱va̱ʼa kúnda̱a̱-inira ña̱ tá ná ndakundeéyó ndakanixi̱níyó saá, loʼo tá loʼo va̱ása kandíxakayó ña̱ káʼa̱n Ndióxi̱ taxira ndaʼa̱yó chí nu̱únínu. Ña̱kán ná kǒo kandíxayó ña̱yóʼo, va̱ʼaka ná ndakanixi̱níyó xa̱ʼa̱ ña̱ káʼa̱n Jehová taxira ndaʼa̱yó. Ta ná kandíxaníyó ña̱ kúni̱va Jehová ña̱ ná kutakuyó ndiʼi tiempo, ta chindeétáʼanvara xíʼinyó ña̱ ni̱ʼíyó ña̱yóʼo (1 Tim. 2:3, 4).

¿NDÁAÑA KIVI KEʼÉYÓ ÑA̱ VA̱ʼA KANDÍXAKAYÓ ÑA̱ KÁʼA̱N NDIÓXI̱?

11. ¿Nda̱chun xíniñúʼu kundatuyó nda̱a̱ ná saxínu Jehová ña̱ káʼa̱nra keʼéra?

¹¹ Sana ixayo̱ʼvi̱vaña xíʼinyó kundatuyó ña̱ káʼa̱n Jehová keʼéra xa̱ʼa̱yó chí nu̱únínu ta kixáʼayó kuni̱yó ña̱ kamaní ná saxínuraña. Soo xa̱ʼa̱ ña̱ ndiʼi tiempo íyo Jehová, loʼova kúúña nu̱úra soo nu̱ú miíyó ku̱a̱ʼáníva kúúña (2 Ped. 3:8, 9). Ta̱kán sáxi̱nuvara ña̱ ni̱ka̱ʼa̱nra keʼéra, ta sana su̱ví tiempo ña̱ kúni̱ miíyó keʼéraña. ¿Ndáaña chindeétáʼan xíʼinyó ña̱ ndakundeéyó kandíxayó ña̱ káʼa̱n Ndióxi̱ taxira ndaʼa̱yó ta kundatuyó ña̱ saxínuraña? (Sant. 5:7, 8).

12. Nda̱a̱ táki̱ʼva káchi Hebreos 11:1, 6, ¿ndáa ki̱ʼva kítáʼan ña̱ ndátuyó koo chí nu̱únínu xíʼin ña̱ kándíxayó Ndióxi̱?

¹² Ña̱ koo yatinyó nu̱ú Jehová kúú ña̱ chindeétáʼan xíʼinyó ña̱ kandíxayó ña̱ káʼa̱nra keʼéra chí nu̱únínu, chi saxínuvaraña. Ña̱ va̱ʼa kandíxayó ña̱ káʼa̱n Jehová taxira ndaʼa̱yó chí nu̱únínu, xíniñúʼu kandíxayó ña̱ íyora “ta táxira ña̱ va̱ʼa ndaʼa̱ na̱ chíka̱a̱ní ndee̱ ña̱ nandukúnara” (kaʼvi Hebreos 11:1, 6). Tá ná kandíxaníkayó ña̱ íyo Jehová, kandíxaníkayó ña̱ káʼa̱nra keʼéra chí nu̱únínu. Ná kotoyó ndáaña keʼéyó ña̱ kivi viíka kutáʼanyó xíʼinra tasaá kǒo kaka-iniyó ña̱ saxínuvara ña̱ káʼa̱nra.

13. ¿Nda̱saa kivi kitáʼanyó xíʼin Ndióxi̱?

¹³ Ná ka̱ʼa̱nyó xíʼin Jehová ta ná kaʼviyó tu̱ʼunra. Ña̱ nda̱a̱ kúúña va̱ása kívi kuniyó Jehová, soo kiviva kitáʼanyó xíʼinra. Ta kivitu ka̱ʼa̱nyó xíʼinra chi ta̱kán xíniso̱ʼovara ña̱ káʼa̱nyó (Jer. 29:11, 12). Ta kivitu kuniso̱ʼo miíyóra tá káʼviyó tu̱ʼunra ta ndákanixi̱níyó xa̱ʼa̱ña. Tá ná sakúaʼayó ndáa ki̱ʼva xi̱ndaa Jehová na̱ ñuura tiempo xi̱naʼá, saá kúú ña̱ kandíxaníkayó ña̱ káʼa̱nra keʼéra chí nu̱únínu. “Saáchi ndiʼi ña̱ ni̱ka̱ʼyi̱ xi̱naʼá ni̱ka̱ʼyi̱ña ña̱ va̱ʼa sanáʼa̱ña miíyó, chi tu̱ʼun Ndióxi̱ chíndeétáʼanña xíʼinyó ña̱ va̱ʼa ndakú koo iniyó, ta sándi̱koña-iniyó ña̱ va̱ʼa kundatuyó ña̱ taxi Ndióxi̱ ndaʼa̱yó chí nu̱únínu” (Rom. 15:4).

14. ¿Nda̱chun iin ña̱ va̱ʼa kúú ña̱ ndakanixi̱níyó xa̱ʼa̱ ña̱ kéʼé Jehová xa̱ʼa̱ inkana?

¹⁴ Ná ndakanixi̱níyó ndáa ki̱ʼva xa̱a̱ sáxi̱nu Jehová ña̱ káʼa̱nra keʼéra. Ná ndakanixi̱níyó xa̱ʼa̱ ña̱ ke̱ʼéra xa̱ʼa̱ ta̱ Abrahán xíʼin ñá Sara. Xa̱ʼa̱ ña̱ xa̱a̱ chéena va̱ása kivika koo se̱ʼena, soo Jehová ni̱ka̱ʼa̱nra xíʼinna ña̱ koo iin se̱ʼena (Gén. 18:10). ¿Ndáaña keʼé ta̱ Abrahán? Ña̱ Biblia káchiña: “Ka̱ndíxara ña̱ xa̱a̱ra koora yivá ndiʼi na̱ ñuu nda̱a̱ táki̱ʼva ni̱ka̱ʼa̱n Ndióxi̱ xíʼinra” (Rom. 4:18). Nu̱ú miíyó na̱ yiví va̱ása kivikaví koo se̱ʼe ta̱ Abrahán xíʼin ñá Sara, soo ta̱kán xi̱kandíxaníra ña̱ saxínu Jehová ña̱ ni̱ka̱ʼa̱nra xíʼinra. Tasaá ku̱uva chi Jehová sa̱xínura ña̱ ki̱ndoora xíʼinra (Rom. 4:19-21). Táʼan relato yóʼo sánáʼa̱ña miíyó ña̱ kiviva kandíxayó ña̱ sáxi̱nu Jehová ña̱ káʼa̱nra ni yo̱ʼvi̱níña nu̱ú miíyó.

15. ¿Nda̱chun xíniñúʼu ndakanixi̱níyó xa̱ʼa̱ ña̱ xa̱a̱ kéʼé Jehová xa̱ʼa̱yó?

¹⁵ Ná ndakanixi̱níyó xa̱ʼa̱ ña̱ xa̱a̱ kéʼé Jehová xa̱ʼa̱ miíyó. ¿Á ndákanixi̱níyó ndáa ki̱ʼva xa̱a̱ chíndeétáʼan Jehová xíʼinyó nda̱a̱ táki̱ʼva káchi nu̱ú tu̱ʼunra? Tá kúú, ta̱ Jesús ni̱ka̱ʼa̱nra ña̱ taxiva Jehová ña̱ xíniñúʼuyó (Mat. 6:32, 33). Saátu ni̱ka̱ʼa̱n ta̱ Jesús ña̱ taxiva Jehová espíritu santora ndaʼa̱yó tá ná ndukúyóña nu̱úra (Luc. 11:13). Ta xa̱a̱ sáxi̱nuva Jehová ña̱yóʼo. Ta sana ndákanixi̱níyó xa̱ʼa̱ inkaka ña̱ xa̱a̱ kéʼé Jehová xa̱ʼa̱yó. Tá kúú, ña̱ íxakáʼnu-inira xa̱ʼa̱yó, ña̱ sándi̱kora-iniyó xíʼin ña̱ táxira ña̱ xíniñúʼuyó ña̱ va̱ʼa sákuaʼakayó xa̱ʼa̱ra (Mat. 6:14; 24:45; 2 Cor. 1:3). Tá ndákanixi̱níyó xa̱ʼa̱ ña̱ xa̱a̱ kéʼé Jehová xa̱ʼa̱yó, saá kandíxaníkayó ña̱ sáxi̱nura ña̱ káʼa̱nra keʼéra chí nu̱únínu.

NÁ KUSI̱Í-INIYÓ XA̱ʼA̱ ÑA̱ NDÁTUYÓ NDAKIʼINYÓ CHÍ NU̱ÚNÍNU

16. ¿Nda̱chun iin regalo ña̱ va̱ʼaní kúú ña̱ káʼa̱n Jehová taxira ndaʼa̱yó chí nu̱únínu?

¹⁶ Ña̱ ndátuyó kutakuyó ndiʼi tiempo iin regalo ña̱ ndáyáʼviní ña̱ táxi Ndióxi̱ ndaʼa̱yó kúúña. Ta xa̱a̱ kúni̱níyó ni̱ʼíyó ña̱yóʼo ta va̱ása xíka-iniyó ña̱ ndakiʼinvayóña. Ña̱ ndátuyó ndakiʼinyó chí nu̱únínu íyoña nda̱a̱ táki̱ʼva íyo iin ka̱a ña̱ tíin tú barco, saáchi chíndeétáʼanña xíʼinyó ña̱ ya̱ʼayó nu̱ú tu̱ndóʼo, tá kúú ña̱ sáa̱-inina xínina miíyó á ña̱ kúni̱na kaʼnína miíyó. Saátu ña̱ ndátuyó ndakiʼinyó chí nu̱únínu íyoña nda̱a̱ táki̱ʼva íyo iin casco, saáchi chíndeétáʼanña xíʼinyó ña̱ kiʼinyó kuenta xíʼin ña̱ ndákanixi̱níyó ta va̱ása ndakanixi̱níyó xa̱ʼa̱ ña̱ kini tasaá keʼéyó ña̱ va̱ʼa. Ña̱ káʼa̱n Biblia koo chí nu̱únínu chíndeétáʼanña xíʼinyó ña̱ koo yatinkayó nu̱ú Ndióxi̱, ta saátu náʼa̱ña ña̱ kúʼvi̱ní-inira xínira miíyó. Ña̱kán, ña̱ ndakundeéyó kandíxaníkayó ña̱ káʼa̱n Ndióxi̱ taxira ndaʼa̱yó chí nu̱únínu chindeétáʼanníña xíʼinyó.

17. ¿Nda̱chun kúsi̱í-iniyó xa̱ʼa̱ ña̱ ndátuyó ndakiʼinyó chí nu̱únínu?

¹⁷ Nu̱ú carta ña̱ ka̱ʼyí ta̱ apóstol Pablo ku̱a̱ʼa̱n nu̱ú na̱ ñuu Roma, ña̱yóʼo ni̱ka̱ʼa̱nra xíʼinna: “Kusi̱í-inindó xa̱ʼa̱ ña̱ ndakiʼinndó chí nu̱únínu” (Rom. 12:12). Ta̱ Pablo xi̱kusi̱íva-inira chi xi̱kunda̱a̱-inira ña̱ ndakiʼinvara ña̱ kutakura ndiʼi tiempo chí nu̱ú ndiví tá nda̱kú ná koo inira xíʼin Jehová. Ta saátu miíyó kúsi̱í-iniyó xa̱ʼa̱ ña̱ ndátuyó ndakiʼinyó chí nu̱únínu, chi kúnda̱a̱-iniyó ña̱ saxínuva Jehová ña̱ káʼa̱nra keʼéra xa̱ʼa̱yó. Ta nda̱a̱ táki̱ʼva ni̱ka̱ʼa̱n iin ta̱ ka̱ʼyí salmo: “Si̱íní íyo [...] na̱ kándíxa ña̱ mií Jehová chindeétáʼan xíʼinna, [...] chi ta̱kán nda̱kúní-inira” (Sal. 146:5, 6).