¿Ndáa ki̱ʼva táxi̱n koo iniyó tá íyo ña̱ sándi̱ʼi̱-iniyó?

1. ¿Ndáa ki̱ʼva íyo na̱ táxi̱n íyo ini, ta á chíndeétáʼan ña̱yóʼo xíʼinyó? (Filipenses 4:6, 7).

NDIÓXI̱ táxira ña̱ táxi̱n koo iniyó. Soo na̱ ñuyǐví yóʼo va̱ása kúnda̱a̱-inina xa̱ʼa̱ña, ta Ndióxi̱ táxira ña̱yóʼo ndaʼa̱ na̱ va̱ʼaní kítáʼan xíʼinra ta ña̱yóʼo kúú ña̱ chíndeétáʼan xíʼinyó ña̱ va̱ása ndi̱ʼiní-iniyó (kaʼvi Filipenses 4:6, 7). Va̱ʼaní kítáʼanyó xíʼin na̱ hermanoyó ta saátu va̱ʼaní kítáʼanyó xíʼin Jehová ta̱ sándi̱ko-iniyó (1 Tes. 5:23). Tá xáa̱yó kúnda̱a̱ka-iniyó xa̱ʼa̱ Jehová, xáa̱yó kándíxakayóra ta ndíku̱nyó ña̱ káʼa̱nra. Xa̱ʼa̱ ña̱yóʼo táxi̱n íyo iniyó ta va̱ása ndíʼi̱ní-iniyó tá íyo tu̱ndóʼo nu̱úyó.

2. ¿Nda̱chun va̱ʼa kúnda̱a̱-iniyó ña̱ kiviva táxi̱n koo iniyó?

² Soo, ¿á ndixa kivi táxi̱n koo iniyó tá íyoní tu̱ndóʼo nu̱úyó? ¿Á kivi táxi̱n koo iniyó tá íyo iin kue̱ʼe̱ xíkun nu̱ú ndóoyó tá iin kama ndóʼoyó iin tu̱ndóʼo tá íyo ku̱a̱chi nu̱ú ndóoyó á tá íxandi̱va̱ʼana xíʼinyó? Tá kúu ña̱yóʼo, ndiʼivayó kivi yi̱ʼvíyó. Soo ta̱ Jesús ta̱xira consejo yóʼo ndaʼa̱ na̱ discípulora: “Va̱ása kundi̱ʼi̱ní-inindó ta va̱ása yi̱ʼvíndó” (Juan 14:27). Ta xa̱a̱ ku̱a̱ʼání na̱ hermano xíʼin ná hermana ndíku̱nna consejo yóʼo. Jehová chíndeétáʼan xíʼinna ña̱ táxi̱n koo inina tá ku̱a̱yaʼana nu̱ú tu̱ndóʼo ña̱ yo̱ʼvi̱ní.

KIVIVA TÁXI̱N KOO INIYÓ TÁ ÍYO IIN KUE̱ʼE̱ XÍKUN NU̱Ú NDÓOYÓ

3. ¿Ndáaña kivi kundoʼoyó tá ndíkaa̱ iin kue̱ʼe̱ xíkun nu̱ú ndóoyó?

³ Iin kue̱ʼe̱ xíkun kivi nasamaña ña̱ tákuyó. Ná ndakanixi̱níyó xa̱ʼa̱ ña̱ kue̱ʼe̱ COVID-19. Ni̱nda̱ka̱tu̱ʼunna ku̱a̱ʼání na̱ yiví ta na̱yóʼo ni̱ka̱ʼa̱nna ña̱ i̱xayo̱ʼvi̱ña xíʼinna ku̱su̱nna tá xi̱ndikaa̱ ña̱ kue̱ʼe̱ yóʼo. Ta saátu tá xi̱ndikaa̱ kue̱ʼe̱ yóʼo ku̱a̱ʼání na̱ yiví ni̱xa̱a̱na ki̱ʼinna kue̱ʼe̱ ña̱ ndíʼi̱-ini ta nda̱kava-inina ta saátu ki̱xáʼana xíʼina ku̱a̱ʼání ndixi, xíniñúʼuna droga, ki̱xáʼana íxandi̱va̱ʼana xíʼin na̱ veʼena, ta xi̱kuni̱na kaʼnína miína. Tá íyo iin kue̱ʼe̱ ña̱ xíkun nu̱ú íyoún, ¿ndáaña kivi keʼún ña̱ va̱ása ndi̱ʼiní-iniún ta táxi̱n koo iniún?

4. ¿Nda̱chun va̱ʼa táxi̱n íyo iniyó xa̱ʼa̱ ña̱ kúnda̱a̱-iniyó xa̱ʼa̱ profecía ña̱ ni̱ka̱ʼa̱n ta̱ Jesús?

⁴ Ta̱ Jesús ni̱ka̱ʼa̱nra ña̱ ki̱vi̱ so̱ndíʼi kooní kue̱ʼe̱ xíkun “kooña ñuu yóʼo ta kooña ñuu káa” (Luc. 21:11). Ta xa̱ʼa̱ ña̱ xa̱a̱ xíni̱yó xa̱ʼa̱ ña̱yóʼo táxi̱n íyo iniyó. Xítoyó ndáa ki̱ʼva xínu ndiʼi ña̱ ni̱ka̱ʼa̱n ta̱ Jesús. Ña̱kán miíyó na̱ ndóo tiempo so̱ndíʼi vitin ndíku̱nyó consejo ña̱ sa̱ndákoo ta̱ Jesús ña̱ káchi: “Kuenta koondó, va̱ása yi̱ʼvíndó” (Mat. 24:6).

5. a) Nda̱a̱ táki̱ʼva káchi Filipenses 4:8, 9, ¿ndáaña xíniñúʼu ndukúyó nu̱ú Jehová tá kíxáʼa iin kue̱ʼe̱ xíkun nu̱ú íyoyó? b) ¿Ndáa ki̱ʼva chíndeétáʼan audio ña̱ Biblia xíʼinyó tá xíniso̱ʼoyóña?

⁵ Tá kíxáʼa iin kue̱ʼe̱ xíkun, ndiʼivayó yíʼviyó ta ndíʼi̱-iniyó. Saá ndo̱ʼo iin ñá hermana ñá naní Desi.b Xíʼin COVID-19, ni̱xi̱ʼi̱ xitoñá, primoñá ta saátu ta̱ médico ta̱ xi̱ ixatátanñaʼá, xa̱ʼa̱ ña̱kán xi̱yiʼvíníñá kiʼin kue̱ʼe̱ yóʼo miíñá ta saátu ña̱ kiʼinña siʼíñá ñá xa̱a̱ ku̱chée. Ta xi̱yiʼvíñá ña̱ kǒoka chiñu kachíñuñá ta xi̱ndakanixi̱níñá míí taváñá xu̱ʼún ña̱ satáñá ña̱ kuxuñá á ña̱ chaʼviñá veʼe nu̱ú íyoñá. Xi̱ndakaniníxi̱níñá xa̱ʼa̱ ña̱yóʼo ta nda̱a̱ va̱ása níkivi ku̱su̱nñá. Soo va̱ása níndi̱ʼi̱ka-iniñá, ¿nda̱chun? Saáchi ke̱ʼéñá oración nu̱ú Jehová ta ni̱ka̱ʼa̱nñá xíʼinra ña̱ ná taxira ña̱ táxi̱n koo iniñá ta ndakanixi̱níñá xa̱ʼa̱ ña̱ʼa ña̱ kivi chindeétáʼan xíʼinñá (kaʼvi Filipenses 4:8, 9). Ña̱ va̱ʼa kuniso̱ʼoñá ña̱ káʼa̱n Jehová, xi̱chika̱a̱ñá audio ña̱ Biblia ña̱ va̱ʼa kuniso̱ʼoñá. Ñáyóʼo káchiñá: “Tá xi̱xiniso̱ʼi̱ ña̱yóʼo va̱ása ní xi̱ndiʼika-inii̱ ta xi̱ndakaʼíi̱n ña̱ ndíʼi̱níva-ini Jehová xa̱ʼíi̱” (Sal. 94:19).

6. Tá ná kaʼviyó tu̱ʼun Ndióxi̱ ta ku̱ʼu̱nyó reunión, ¿ndáa ki̱ʼva chindeétáʼan ña̱yóʼo xíʼinyó?

⁶ Tá kíxáʼa iin kue̱ʼe̱ xíkun, va̱ása kívika keʼéyó ña̱ xi̱keʼéyó tá ya̱chi̱. Soo ná va̱ása taxiyó ña̱ kasi ña̱yóʼo nu̱úyó ña̱ kaʼviyó tu̱ʼun Ndióxi̱ á ña̱ ku̱ʼu̱nyó reunión. Nu̱ú video xíʼin tutu ña̱ tává na̱ ñuu Ndióxi̱ kivi ndani̱ʼíyó ña̱ káʼa̱n xa̱ʼa̱ na̱ hermano na̱ kúúmií táʼan tu̱ndóʼo ña̱ kúúmiíyó ta ndákundeéna nda̱kú íyo inina xíʼin Jehová (1 Ped. 5:9). Ti̱xin reunión káʼa̱nna xa̱ʼa̱ texto ña̱ va̱ʼaní chíndeétáʼan xíʼinyó ña̱ va̱ása ndakava-iniyó ta chíndeétáʼantuña xíʼinyó ña̱ chika̱a̱yó ndee̱ xíʼin inkana (Rom. 1:11, 12). Tá ná ndakanixi̱níyó ndáa ki̱ʼva chi̱ndeétáʼan Jehová xíʼin na̱ xi̱kachíñu nu̱úra tá xi̱kiʼin kue̱ʼe̱ miína, tá xi̱yiʼvína á tá xi̱kuni mitúʼunna, kandíxaníkayóra ta va̱ása kaka-iniyó ña̱ saátu chindeétáʼanra xíʼin miívayó.

7. ¿Ndáa ki̱ʼva kundiku̱nyó yi̱chi̱ ta̱ apóstol Juan?

⁷ Tá ndíkaa̱ iin kue̱ʼe̱ xíkun, ña̱yóʼo kivi kasiña nu̱úyó ña̱ kutáʼanyó xíʼin na̱ hermanoyó. Soo ná va̱ása sandákooyó ña̱ ka̱ʼa̱nyó xíʼinna. Tá kúu ña̱yóʼo kivi xa̱a̱yó kundoʼoyó nda̱a̱ táki̱ʼva ndo̱ʼo ta̱ apóstol Juan, chi ta̱yóʼo xi̱kuni̱níra kuni nu̱úra migora ta̱ Gayo (3 Juan 13, 14). Soo ta̱yóʼo ni̱ka̱ʼa̱nra ña̱ va̱ása kívi kunira ta̱ Gayo. Ña̱kán ña̱ ke̱ʼéra kúú ña̱ chi̱ndaʼára iin carta ku̱a̱ʼa̱n ndaʼa̱ra. Tá va̱ása kívi kuni nu̱úyó na̱ hermanoyó, iin ña̱ kivi keʼéyó kúú ña̱ ka̱ʼa̱nyó xíʼinna xíʼin teléfono keʼéyó videollamada nu̱úna á kivitu chindaʼáyó mensaje ndaʼa̱na. Tá ná ndakundeéyó ka̱ʼa̱nyó xíʼin na̱ hermanoyó va̱ása kuni mitúʼunyó ta táxi̱n koo iniyó. Soo, ¿ndáaña kivi keʼéyó tá ndeéní ndíʼi̱-iniyó? Ná natúʼunyó xíʼin na̱ anciano xa̱ʼa̱ ña̱ ndóʼoyó ta ná taxiyó ña̱ chika̱a̱na ndee̱ xíʼinyó (Is. 32:1, 2).

KIVIVA TÁXI̱N KOO INIYÓ TÁ IIN KAMA NDÓʼOYÓ TU̱NDÓʼO

8. ¿Ndáaña kivi kundoʼoyó tá iin kama kúu iin tu̱ndóʼo?

⁸ ¿Á xa̱a̱ ndeéní kúun sa̱vi̱ nu̱ú íyoún á ni̱ta̱an á ni̱xi̱xi ñuu nu̱ú íyoún? Ndeéní ndíʼi̱-iniyó tá kúu ña̱yóʼo. Ta tá ni̱xi̱ʼi̱ iin na̱ veʼeyó á ndi̱ʼi̱-xa̱ʼa̱ ndiʼi ña̱ʼayó sana kúsuchíní-iniyó, xóʼvi̱-iniyó á nda̱a̱ sáa̱yó. Ña̱yóʼo va̱ása kúni̱ kachiña ña̱ va̱ása kándíxaún Ndióxi̱ á ña̱ kútóoníún kuumiíún ña̱ʼa. Iin ña̱ yo̱ʼvi̱níva kúú ña̱ ni̱ya̱ʼún nu̱ú, ña̱kán inkana va̱ása ndakanda̱ví-inina xíʼin ña̱ keʼún tá ku̱a̱yaʼaún nu̱ú tu̱ndóʼo (Job 1:11). Soo ni yo̱ʼvi̱níva ña̱ ku̱a̱yaʼayó nu̱ú kivi táxi̱n koo iniyó. Ná kotoyó ndáa ki̱ʼva táxi̱n koo iniyó.

9. ¿Ndáa ki̱ʼva chíndeétáʼan ña̱ ni̱ka̱ʼa̱n ta̱ Jesús xíʼinyó ña̱ koo tu̱ʼvayó tá kúma̱níka kixi iin tu̱ndóʼo nu̱úyó?

⁹ Nu̱ú yivíví yóʼo, na̱ yiví ndákanixi̱nína ña̱ va̱ása kundoʼovína nda̱a̱ ni iin tu̱ndóʼo. Soo miíyó kúnda̱a̱va-iniyó ña̱ kuu ña̱yóʼo, chi saá ni̱ka̱ʼa̱n ta̱ Jesús. Kooníkava tu̱ndóʼo ta sava ña̱yóʼo saxóʼvi̱ña miíyó. Ta Jesús ni̱ka̱ʼa̱nra xíʼin na̱ discípulora ña̱ tá kúma̱ní ndiʼi-xa̱ʼa̱ ñuyǐví yóʼo ndeéní ta̱an ta koo inkaka tu̱ndóʼo (Luc. 21:11). Ta saátu ni̱ka̱ʼa̱nra ña̱ kooní na̱ ndi̱va̱ʼa-ini ta xítoyó ña̱ xínu ña̱yóʼo, saáchi íyo ku̱a̱ʼání na̱ kéʼé ña̱ va̱ása va̱ʼa, kánitáʼanna ta xáʼnína na̱ yiví (Mat. 24:12). Ta ni̱ka̱ʼa̱nkara ña̱ su̱ví nda̱saa na̱ va̱ása ndásakáʼnu Ndióxi̱ kúú na̱ xo̱ʼvi̱, chi saátu nda̱a̱ na̱ ndásakáʼnu Ndióxi̱ xo̱ʼvi̱vana. Tasaá kúuva tiempo vitin, chi xóʼvi̱nína íxaa tu̱ndóʼo (Is. 57:1; 2 Cor. 11:25). Sana va̱ása tavá túviví Jehová miíyó nu̱ú tu̱ndóʼo, soo taxivara ña̱ xíniñúʼuyó ña̱ va̱ʼa táxi̱n koo iniyó.

10. ¿Á náʼa̱yó ña̱ kándíxayó Ndióxi̱ tá xa̱a̱ ya̱chi̱ka íyo tu̱ʼvayó tá kúma̱ní kuu iin tu̱ndóʼo? (Proverbios 22:3).

¹⁰ Tá xa̱a̱ íyo tu̱ʼvayó tá ná koo iin tu̱ndóʼo, va̱ása ndi̱ʼiní-iniyó. Soo, ¿á ña̱yóʼo kúni̱ kachiña ña̱ va̱ása kándíxayó ña̱ kundaa Jehová miíyó? Va̱ása. Chi tá xa̱a̱ íyo tu̱ʼvayó tá kúma̱níka kuu iin tu̱ndóʼo saá náʼa̱yó ña̱ kándíxayó ña̱ kundaa Jehová miíyó. ¿Nda̱chun va̱ʼa káʼa̱nyó ña̱yóʼo? Saáchi Biblia káʼa̱nña xíʼinyó, ña̱ ná koo tu̱ʼvayó tá kúma̱níka kixi iin tu̱ndóʼo nu̱úyó (kaʼvi Proverbios 22:3).c Nu̱ú revista, ti̱xin reunión ta saátu tá sáya̱ʼana anuncio, na̱ ñuu Ndióxi̱ káʼa̱nnína xíʼinyó ña̱ ná koo tu̱ʼvayó tá kúma̱níka kixi iin tu̱ndóʼo.d Tá kándíxayó Jehová, ¿ndáaña keʼéyó? Kuniso̱ʼoyó ndiʼi consejo ña̱ táxina ndaʼa̱yó, ta ña̱yóʼo chindeétáʼanña xíʼinyó tá ná kuu iin tu̱ndóʼo.

11. ¿Ndáaña sákuaʼayó xíʼin ña̱ ndo̱ʼo ñá Margaret?

¹¹ Ná ndakanixi̱níyó xa̱ʼa̱ ña̱ ndo̱ʼo iin ñá hermana ñá naní Margaret. Na̱ chíñu ni̱ka̱ʼa̱nna xíʼinñá ña̱ ná kitañá veʼeñá saáchi ki̱xáʼa xíxi̱ chí nu̱ú íyoñá. Xa̱ʼa̱ ña̱ ku̱a̱ʼání na̱ yiví xi̱kuni̱na keena ñuu kán, iin chu̱tú carretera xíʼin carro ta va̱ása níkivika ku̱ʼu̱nñá. Ni̱xi̱yoní ñi̱ʼma̱, ta ñá Margaret xi̱niñúʼu kindo̱oñá ini carroñá. Ta xa̱ʼa̱ ña̱ xa̱a̱ íyo tu̱ʼvañá ni̱ka̱kuvañá, saáchi níʼiñá iin mapa ña̱ chi̱ndeétáʼan xíʼinñá ña̱ na̱samañá yichi̱ nu̱ú ku̱ʼu̱nñá. Tá kúma̱níka kuu tu̱ndóʼo yóʼo, xa̱a̱ ni̱xa̱ʼa̱nvañá ña̱ yichi̱ kán. Ña̱kán tá ku̱u tu̱ndóʼo yóʼo, va̱ása ní ixayo̱ʼvi̱kaña xíʼinñá ku̱ʼu̱nñá chí yichi̱ kán ta ni̱ka̱kuñá xa̱ʼa̱ ña̱ xa̱a̱ ya̱chi̱ka ni̱xi̱yo tu̱ʼvañá.

12. ¿Nda̱chun ndíku̱nyó ña̱ káʼa̱nna xíʼinyó tá kúu iin tu̱ndóʼo?

¹² Xa̱ʼa̱ ña̱ kúni̱ na̱ chíñu chindeétáʼanna xíʼinyó á ña̱ vií keʼéna chiñuna, sana ka̱ʼa̱nna xíʼinyó ña̱ ná kindo̱oyó veʼeyó á ña̱ keeyó á sanatu ka̱ʼa̱nna xíʼinyó keʼéyó inkaka ña̱ʼa. Soo sava na̱ yiví va̱ása xíínna kundiku̱nna ña̱ káʼa̱n na̱ chíñu xíʼinna, saáchi va̱ása xíínna sandákoona ña̱ʼana. Soo, ¿ndáaña kéʼé miíyó na̱ ndásakáʼnu Jehová? Biblia káchiña: “Xa̱ʼa̱ ña̱ ndíku̱nndó tátayó kandíxandó ña̱ káʼa̱n na̱ yiví na̱ kúúmií iin chiñu, tá kúú na̱ rey chi kúúmií na̱yóʼo iin chiñu ña̱ káʼnuka, ta kandíxatundó ña̱ káʼa̱n na̱ chíñu na̱ chi̱ndaʼára” (1 Ped. 2:13, 14). Saátu na̱ ñuu Ndióxi̱ káʼa̱nna xíʼinyó ndáa ki̱ʼva kundaayó miíyó. Tuku ta tuku káʼa̱nna xíʼinyó ña̱ ná taxiyó número celularyó xíʼin dirección nu̱ú ndóoyó ndaʼa̱ na̱ anciano ña̱ va̱ʼa ka̱ʼa̱nna xíʼinyó tá kúu iin tu̱ndóʼo. ¿A xa̱a̱ ta̱xiyóña ndaʼa̱na? Sana na̱ ñuu Ndióxi̱ ka̱ʼa̱nna xíʼinyó ña̱ ná kindo̱oyó iin lugar, ña̱ keeyó nu̱ú ndóoyó á ña̱ ndukúyó ña̱ʼa ña̱ kuniñúʼuyó. Á sana ka̱ʼa̱ntuna xíʼinyó ama ta ndáa ki̱ʼva chindeétáʼanyó xíʼin inkana. Tá va̱ása kándíxayó ña̱ káʼa̱nna, kivi kuviyó ta saátu na̱ anciano na̱ ndáa miíyó (Heb. 13:17). Ña̱yóʼo ni̱ka̱ʼa̱n ñá Margaret: “Ña̱ xi̱ndiku̱i̱n ña̱ ni̱ka̱ʼa̱n na̱ anciano xíʼi̱n ta saátu na̱ ñuu Ndióxi̱, ña̱yóʼo kúú ña̱ sa̱káku yi̱ʼi̱”.

13. ¿Ndáaña kéʼé sava na̱ hermano ña̱ va̱ʼa si̱í koo inina ta táxi̱n koo inina ni sándakoona nu̱ú xi̱ndoona?

¹³ Xa̱ʼa̱ ña̱ íyoní tu̱ndóʼo, íyo ku̱a̱chi á kánitáʼanna ñuu nu̱ú ndóona, ku̱a̱ʼání na̱ hermano sándakoona nu̱ú ndóona. Na̱yóʼo chíka̱a̱nína ndee̱ ña̱ ka̱anna ñuu nu̱ú ni̱xa̱a̱na koona, ta saátu ndákundeéna kéʼéna chiñu Jehová. Ndákundeéna nátúʼunna xa̱ʼa̱ Ndióxi̱ táki̱ʼva ke̱ʼé na̱ cristiano na̱ xi̱ndoo tiempo xi̱naʼá ni i̱xandi̱va̱ʼana xíʼinna (Hech. 8:4). Xa̱ʼa̱ ña̱ nátúʼunna xa̱ʼa̱ tu̱ʼun Ndióxi̱, ña̱yóʼo chíndeétáʼanña xíʼinna ña̱ ndakanixi̱nína xa̱ʼa̱ Reino Ndióxi̱ ta su̱ví xa̱ʼa̱ tu̱ndóʼo ña̱ ndóʼona. Ta xa̱ʼa̱ ña̱yóʼo kúsi̱í-inina ta táxi̱n íyo inina.

KIVI TÁXI̱N KOO INIYÓ NI ÍXANDI̱VA̱ʼA NA̱ CHÍÑU XÍʼINYÓ

14. ¿Ndáaña kivi kundoʼoyó tá íxandi̱va̱ʼa na̱ chíñu xíʼinyó?

¹⁴ Tá íxandi̱va̱ʼa na̱ chíñu xíʼinyó tá va̱ása táxikana ña̱ ndakutáʼanyó á ña̱ keeyó natúʼunyó xa̱ʼa̱ Ndióxi̱, ta saátu ña̱ keʼéyó inkaka chiñu, ña̱yóʼo kivi kindaaña ña̱ kúsi̱í-iniyó ta va̱ása táxi̱nka koo iniyó. Tá kúu ña̱yóʼo, kivi kundi̱ʼi̱-iniyó ta ndakanixi̱níyó ndáaña kundoʼokayó. Ta su̱ví ku̱a̱chiví kúú ña̱ ndakanixi̱níyó saá. Soo xíniñúʼu kiʼinníyó kuenta, chi tá íxandi̱va̱ʼana xíʼinyó kivi sandákooyó ña̱ kandíxayó Ndióxi̱ nda̱a̱ táki̱ʼva ni̱ka̱ʼa̱n ta̱ Jesús xíʼin na̱ discípulora (Juan 16:1, 2). Tá saá, ¿ndáaña kivi keʼéyó ña̱ va̱ʼa táxi̱n koo iniyó tá íxandi̱va̱ʼana xíʼinyó?

15. ¿Nda̱chun va̱ása xíniñúʼu yi̱ʼvíyó tá íxandi̱va̱ʼa na̱ chíñu xíʼinyó?

¹⁵ Tu̱ʼun Ndióxi̱ káchiña: “Ndiʼi na̱ kúni̱ ndasakáʼnu Ndióxi̱ ta kúni̱na kutáʼanna xíʼin ta̱ Cristo Jesús, ixandi̱va̱ʼatuna xíʼin na̱yóʼova” (2 Tim. 3:12). Iin ta̱ hermano ta̱ naní Andréi i̱xayo̱ʼvi̱ña xíʼinra kandíxara tu̱ʼun yóʼo tá va̱ása níxiinka na̱ chíñu taxina keʼéna chiñu Ndióxi̱ ñuu nu̱ú íyora. Ta̱yóʼo nda̱kanixi̱níra: “Ku̱a̱ʼání na̱ testigo Jehová íyo yóʼo, ta va̱ása kuchiñuvína taánna ndiʼi na̱yóʼo veʼeka̱a”. Soo ña̱yóʼo ndeékava sa̱ndíʼiña-inira. Soo inka na̱ hermano sa̱ndákoona ndiʼi ña̱yóʼo ndaʼa̱ Jehová ta kǒo níndakanixi̱nína ña̱ va̱ása kuchiñu na̱ chíñu taánna na̱yóʼo veʼeka̱a. Na̱yóʼo xi̱kunda̱a̱-inina ña̱ sana taánva na̱ chíñuna veʼeka̱a, soo kǒo níndi̱ʼiní-inina táki̱ʼva ndo̱ʼo ta̱ Andréi. Xa̱ʼa̱ ña̱yóʼo ta̱ Andréi chi̱kaa̱-inira ña̱ kundiku̱nra yichi̱ na̱ hermano yóʼo ta kandíxakara Jehová. Ta̱yóʼo ki̱xáʼa táxi̱n íyo inira ta vitin kúsi̱í-inira ni íyoní tu̱ndóʼo nu̱úra. Saátu miíyó kivi táxi̱n koo iniyó. Ña̱ nda̱a̱ kúú ña̱ ni̱ka̱ʼa̱n ta̱ Jesús ña̱ ixandi̱va̱ʼana xíʼinyó, soo saátu ni̱ka̱ʼa̱nra ña̱ kiviva nda̱kú koo iniyó (kaʼvi Juan 15:20; 16:33).

16. ¿Ndáaña xíniñúʼu kéʼéyó tá íxandi̱va̱ʼa na̱ chíñu xíʼinyó?

¹⁶ Tá va̱ása xíín na̱ chíñu taxina natúʼunyó xa̱ʼa̱ Ndióxi̱, sana na̱ sucursal á na̱ anciano kivi ka̱ʼa̱nna xíʼinyó ndáaña kivi keʼéyó ña̱ va̱ʼa kundaayó miíyó ña̱ ndakundeéyó sakúaʼayó xa̱ʼa̱ Jehová, ta saátu ña̱ ndakundeéyó natúʼunyó xa̱ʼa̱ra. Tá kúu ña̱yóʼo, ná kandíxayó ña̱ káʼa̱nna xíʼinyó ni sava yichi̱ kǒo kúnda̱a̱-iniyó nda̱chun káʼa̱nnaña (Sant. 3:17). Ta saátu ná va̱ása ka̱ʼa̱nyó xíʼin inkana xa̱ʼa̱ na̱ hermanoyó á xa̱ʼa̱ ña̱ kéʼéyó ti̱xin congregación (Ecl. 3:7).

17. Nda̱a̱ táki̱ʼva ke̱ʼé na̱ apóstol, ¿ndáaña chika̱a̱-iniyó keʼéyó?

¹⁷ Ta̱ Ndi̱va̱ʼa sáxo̱ʼvi̱ra na̱ ñuu Ndióxi̱, saáchi miíyó nda̱kiʼinyó chiñu ña̱ natúʼunyó xa̱ʼa̱ ta̱ Jesús (Apoc. 12:17). Soo ná va̱ása yi̱ʼvíyó nu̱ú ta̱ Ndi̱va̱ʼa xíʼin na̱ kítáʼan xíʼinra. Saáchi tá nátúʼunyó xíʼin na̱ yiví ta sánáʼa̱yóna, kúsi̱íní-iniyó ta saátu táxi̱n íyo iniyó. Tá siglo nu̱ú, tá ni̱ka̱ʼa̱n na̱ chíñu xíʼin na̱ apóstol ña̱ sandákoona ña̱ natúʼunna xa̱ʼa̱ Ndióxi̱, na̱yóʼo nda̱kú ni̱xi̱yo inina ta ka̱ndíxana Ndióxi̱. Ta saátu nda̱kundeéna na̱túʼunna xíʼin na̱ yiví ta xa̱ʼa̱ ña̱yóʼo ku̱si̱íní-inina (Hech. 5:27-29, 41, 42). Tá va̱ása xíín na̱ chiñu taxina natúʼunyó xa̱ʼa̱ Ndióxi̱ nu̱ú ndóoyó, xíniñúʼu kiʼinníyó kuenta tá kéʼéyó chiñu yóʼo (Mat. 10:16). Tá chíka̱a̱níyó ndee̱ ña̱ natúʼunyó xa̱ʼa̱ Ndióxi̱, ña̱yóʼo kivi sakǎkuña inka na̱ yiví, ta saátu kivi táxi̱n koo iniyó ta va̱ʼaní kuniyó saáchi ña̱yóʼo sakúsi̱íña-ini Jehová.

“NDIÓXI̱ TA̱ SÁNDI̱KO-INI NA̱ YIVÍ KOORA XÍʼINNDÓ”

18. ¿Ndáana taxi ña̱ táxi̱n koo iniyó?

¹⁸ Ni yo̱ʼvi̱ní ña̱ yáʼayó nu̱ú kiviva táxi̱n koo iniyó, chi iinlá mií Jehová kúú ta̱ kivi taxi ña̱ táxi̱n koo iniyó. Ná kandíxayó Jehová tá íyo iin kue̱ʼe̱ xíkun ñuu nu̱ú ndóoyó á tá iin kama ndóʼoyó tu̱ndóʼo á tá ixandi̱va̱ʼa na̱ chíñu xíʼinyó. Ná kundaa-iniyó na̱ ñuu Jehová ta ná ndakanixi̱níyó xa̱ʼa̱ ña̱ káʼa̱nra taxira ndaʼa̱yó chí nu̱únínu. Tásaá ná keʼéyó Ndióxi̱ ta̱ sándi̱ko-ini na̱ yiví koora xíʼinyó (Filip. 4:9). Nu̱ú inka artículo sakúaʼayó ndáaña kivi keʼéyó ña̱ va̱ʼa chindeétáʼanyó xíʼin na̱ hermano ña̱ táxi̱n koo inina ni tá yáʼana nu̱ú tu̱ndóʼo.