“Xa̱ʼa̱ ña̱ ni̱kuʼvi̱ní-ini ta̱ Cristo xi̱nira miíyó kúú ña̱ kándíxayóra”

1, 2. a) ¿Ndáaña ndóʼoyó tá ndákanixi̱níyó xa̱ʼa̱ ña̱ ke̱ʼé ta̱ Jesús tá ki̱xira nu̱ú ñuʼú yóʼo? b) ¿Ndáaña sakúaʼayó nu̱ú artículo yóʼo?

TÁ XÍʼI̱ iin na̱ kúʼvi̱ní-iniyó xíniyó, ndeéní kúsuchí-iniyó. Sana tá ndákanixi̱níyó xa̱ʼa̱ ña̱ ndeéní ndo̱ʼona tá kúma̱ní kuvina ndeéní xóʼvi̱yó. Ta sana tá yáʼa tiempo ndákaʼányó xa̱ʼa̱ sava ña̱ ke̱ʼé na̱yóʼo ña̱ chíndeétáʼan xíʼinyó kusi̱í-iniyó. Tá kúú, iin ña̱ sa̱náʼa̱na miíyó á iin ña̱ ke̱ʼéna á ni̱ka̱ʼa̱nna ña̱ va̱ʼa chika̱a̱na ndee̱ xíʼinyó á saátu iin ña̱ sa̱kúaku̱ miíyó.

² Saá ndóʼoyó tá ndákanixi̱níyó xa̱ʼa̱ ña̱ ni̱xo̱ʼvi̱ní ta̱ Jesús tá ni̱xi̱ʼi̱ra. Ta tá xíyo Conmemoración saá kúú ña̱ káʼviníkayó xa̱ʼa̱ ña̱ ndáyáʼviní ke̱ʼéra xa̱ʼa̱yó, ta kúsuchíní-iniyó xa̱ʼa̱ ña̱ ndeéní ni̱xo̱ʼvi̱ra xa̱ʼa̱yó (1 Cor. 11:24, 25). Soo kúsi̱íní-iniyó tá ndákanixi̱níyó xa̱ʼa̱ ña̱ ke̱ʼéra xíʼin ña̱ ni̱ka̱ʼa̱nra tá ni̱xi̱yora nu̱ú ñuʼú yóʼo. Ta saátu tá ndakanixi̱níyó xa̱ʼa̱ ña̱ kéʼéra vitin ta saátu xa̱ʼa̱ ña̱ keʼéra chí nu̱únínu, táxiníña ndee̱ ndaʼa̱yó. Nu̱ú artículo yóʼo sakúaʼayó ña̱ tá ná ndakanixi̱níyó xa̱ʼa̱ ña̱yóʼo ta saátu xa̱ʼa̱ ña̱ kúʼvi̱ní-ini ta̱ Jesús xínira miíyó, saá kivi na̱ʼa̱yó ña̱ táxiyó tíxa̱ʼvi xa̱ʼa̱ ña̱ ke̱ʼéra.

¿NDÁAÑA CHINDEÉTÁʼAN XÍʼINYÓ ÑA̱ KUNDIKU̱NYÓ TA̱ JESÚS?

3. ¿Nda̱chun xíniñúʼu taxiyó tíxa̱ʼvi xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó?

³ Tá ná ndakanixi̱níyó xa̱ʼa̱ ki̱ʼva ña̱ xi̱taku ta̱ Jesús nu̱ú ñuʼú xíʼin ña̱ ni̱xi̱ʼi̱ra xa̱ʼa̱yó, saá kúú ña̱ taxiníkayó tíxa̱ʼvi xa̱ʼa̱ ña̱ ke̱ʼéra xa̱ʼa̱yó. Tá ni̱xi̱ka ta̱ Jesús na̱túʼunra xa̱ʼa̱ Ndióxi̱ nu̱ú ñuʼú yóʼo, sa̱náʼa̱ra na̱ yiví ndáaña va̱ʼa kúú ña̱ keʼé Reino Ndióxi̱. Ta ndiʼi ña̱ sa̱náʼa̱ra yóʼo ndáyáʼviníña nu̱úyó. Táxiníyó tíxa̱ʼvi xa̱ʼa̱ ña̱ ni̱xi̱ʼi̱ra xa̱ʼa̱yó chi ña̱yóʼo chíndeétáʼanña xíʼinyó ña̱ va̱ʼa kutáʼanyó xíʼin Jehová ta saátu xíʼin mií ta̱ Jesús. Saátu miíyó na̱ kándíxaní ta̱ Jesús kivi ni̱ʼíyó ña̱ kutakuyó ndiʼi tiempo ta kivitu ndikóyó kuniyó na̱ veʼeyó na̱ ni̱xi̱ʼi̱ (Juan 5:28, 29; Rom. 6:23). Kǒo ña̱ níkeʼévíyó ña̱ va̱ʼa ndakiʼinyó ndiʼi ña̱ va̱ʼa yóʼo, ta ni va̱ása kiviví chaʼviyó ndiʼi ña̱ ke̱ʼé Jehová xíʼin ta̱ Jesús xa̱ʼa̱yó (Rom. 5:8, 20, 21). Soo, ¿ndáa ki̱ʼva náʼa̱yó ña̱ táxiyó tíxa̱ʼvi ndaʼa̱ Jehová xíʼin ta̱ Jesús xa̱ʼa̱ ña̱ ke̱ʼéna xa̱ʼa̱yó? Ná kotoyó.

4. ¿Ndáaña ke̱ʼé ñá María Magdalena ña̱ va̱ʼa na̱ʼa̱ñá ña̱ táxiñá tíxa̱ʼvi xa̱ʼa̱ ña̱ ke̱ʼé ta̱ Jesús xa̱ʼa̱ñá? (Koto na̱ʼná).

⁴ Ná ndakanixi̱níyó xa̱ʼa̱ ñá María Magdalena. Ñáyóʼo xi̱xoʼvi̱níña chi xi̱ñuʼu u̱xa̱ na̱ ta̱chí ndi̱va̱ʼa iniñá. Sana xi̱ndakanixi̱níñá ña̱ kǒo na̱ kivi chindeétáʼan xíʼinñá. Ná ndakanixi̱níyó ndáa ki̱ʼva ku̱niñá tá sa̱ndáʼa ta̱ Jesús miíñá. Sana ta̱xiníñá tíxa̱ʼvi ndaʼa̱ra. Xa̱ʼa̱ ña̱kán nda̱kundiku̱nñá sa̱tára ta xi̱niñúʼuñá tiempoñá, ndee̱ñá xíʼin xu̱ʼúnñá ña̱ va̱ʼa chindeétáʼanñá xíʼinra (Luc. 8:1-3). Ni chi̱ndayáʼviníva ñá María ña̱ ke̱ʼé ta̱ Jesús xa̱ʼa̱ñá, soo sana va̱ása níxi̱kunda̱a̱-iniñá ña̱ keʼé ta̱ Jesús. Chi kuvira xa̱ʼa̱ na̱ yiví ta “ndiʼi na̱ kándíxa miíra kǒo ndiʼi-xa̱ʼa̱na chi kutakuna ndiʼi tiempo” (Juan 3:16). Ta iin ki̱ʼva ña̱ ni̱na̱ʼa̱ ñá María ña̱ táxiñá tíxa̱ʼvi xa̱ʼa̱ ña̱ ke̱ʼé ta̱ Jesús xa̱ʼa̱ñá kúú ña̱ nda̱kú ni̱xi̱yo-iniñá xíʼinra. Tá xi̱tikaa ta̱ Jesús ndaʼa̱ yitu̱n, ñá María ki̱ndooñá yatin kán ña̱ va̱ʼa chindeétáʼanñá xíʼinra ta saátu xíʼin inkaka na̱ xi̱ndita kán (Juan 19:25). Ta saátu ñá María xíʼin inkaka ná ñaʼá ni̱xa̱ʼa̱nná xíʼin aceite tá xáʼa̱n támi ña̱ va̱ʼa chika̱a̱nárá kuñu̱ ta̱ Jesús tá xa̱a̱ ni̱ndu̱xu̱nra (Mar. 16:1, 2). Jehová ta̱xivara ña̱ va̱ʼa ndaʼa̱ ñá María xa̱ʼa̱ ña̱ nda̱kú ni̱xi̱yo-iniñá xíʼin ta̱ Jesús. Sana ku̱si̱íní-iniñá tá xi̱niñá ta̱ Jesús ña̱ nda̱takura. Va̱ʼaníva ke̱eñá chi loʼoníva na̱ discípulo ki̱ta ta̱ Jesús nu̱ú tá nda̱takura (Juan 20:11-18).

5. ¿Ndáa ki̱ʼva taxiyó tíxa̱ʼvi ndaʼa̱ Jehová xíʼin ta̱ Jesús xa̱ʼa̱ ña̱ ke̱ʼéna xa̱ʼa̱yó?

⁵ Saátu miíyó kivi na̱ʼa̱yó ña̱ táxiyó tíxa̱ʼvi xa̱ʼa̱ ña̱ ke̱ʼé Jehová xíʼin ta̱ Jesús xa̱ʼa̱yó. ¿Ndáa ki̱ʼva keʼéyóña? Ná kuniñúʼuyó tiempoyó, ndee̱yó xíʼin xu̱ʼúnyó ña̱ va̱ʼa keʼékayó chiñu Ndióxi̱. Tá kúú, kivi ku̱ʼu̱nyó kachíñuyó nu̱ú kúva̱ʼa veʼe nu̱ú ndásakáʼnuyó Jehová á ña̱ chindeétáʼanyó xíʼinna ña̱ ndasaviíyóña.

XA̱ʼA̱ ÑA̱ KÚʼVI̱-INIYÓ XÍNIYÓ JEHOVÁ XÍʼIN TA̱ JESÚS KÚʼVI̱-INIYÓ XÍNIYÓ NA̱ YIVÍ

6. ¿Nda̱chun va̱ʼaní chíndeétáʼan ña̱ ni̱xi̱ʼi̱ ta̱ Jesús xíʼin iin tá iinyó?

⁶ Tá ndákanixi̱níyó ña̱ kúʼvi̱ní-ini Jehová xíʼin ta̱ Jesús xínina miíyó, saátu miíyó kúni̱yó kuʼvi̱níka-iniyó kuniyóna (1 Juan 4:10, 19). Ta kúʼvi̱níka-iniyó xíniyóna tá kúnda̱a̱-iniyó ña̱ ni̱xi̱ʼi̱ ta̱ Jesús xa̱ʼa̱ iin tá iinyó. Saá ke̱ʼé ta̱ apóstol Pablo, ta̱xiníra tíxa̱ʼvi xa̱ʼa̱ ña̱ ke̱ʼé ta̱ Jesús. Xa̱ʼa̱ ña̱kán nu̱ú carta ña̱ ka̱ʼyíra ka̱chira: “Se̱ʼe Ndióxi̱ [...] ni̱kuʼvi̱ní-ini xi̱ni yi̱ʼi̱ ta ni̱xi̱ʼi̱ra xa̱ʼíi̱” (Gál. 2:20). Xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó, kivi xa̱a̱yó kutáʼan viíyó xíʼin Jehová (Juan 6:44). Ndákanda̱ní-iniyó xa̱ʼa̱ ña̱ yaʼviní cha̱ʼvi Jehová ña̱ va̱ʼa kutáʼanra xíʼinyó, ¿á su̱ví saá? Xa̱ʼa̱ ña̱kán kúʼvi̱ní-iniyó xíniyó Jehová xíʼin ta̱ Jesús. Ta ndiʼiyó kivi ndakanixi̱níyó xa̱ʼa̱ ña̱yóʼo: “Tá kúʼvi̱-inii̱ xínii̱ Jehová xíʼin ta̱ Jesús, ¿ndáaña xíniñúʼu keʼíi̱?”.

7. ¿Nda̱a̱ táki̱’va xítoyó nu̱ú na̱ʼná, ¿ndáa ki̱ʼva na̱ʼa̱yó ña̱ kúʼvi̱-iniyó xíniyó Jehová xíʼin ta̱ Jesús? (2 Corintios 5:14, 15; 6:1, 2).

⁷ Xa̱ʼa̱ ña̱ kúʼvi̱ní-iniyó xíniyó Jehová xíʼin ta̱ Jesús ña̱yóʼo chíndeétáʼanña xíʼinyó ña̱ kuʼvi̱-iniyó kuniyó inkana (kaʼvi 2 Corintios 5:14, 15; 6:1, 2). Ta iin ki̱ʼva ña̱ na̱ʼa̱yó ña̱yóʼo kúú ña̱ natúʼunyó xa̱ʼa̱ Ndióxi̱ xíʼin ndiʼi na̱ yiví. Ni nda̱a̱ ndáaka ñuu ke̱ena, ki̱ʼva ña̱ íyona, ni kúúna na̱ ku̱i̱ká á na̱ nda̱ʼví. Tasaá kúú ña̱ chíndeétáʼanyó xíʼin Jehová, “chi ña̱ kúni̱ra kúú ña̱ ná ka̱ku ndiʼi na̱ yiví, ta ná xa̱a̱na kunda̱a̱ káxi inina mií ña̱ nda̱a̱ xa̱ʼa̱ra” (1 Tim. 2:4).

8. ¿Ndáa ki̱ʼva na̱ʼa̱yó ña̱ kúʼvi̱-iniyó xíniyó na̱ hermano?

⁸ Inka ki̱ʼva ña̱ na̱ʼa̱yó ña̱ kúʼvi̱-iniyó xíniyó Jehová xíʼin ta̱ Jesús kúú ña̱ kuʼvi̱-iniyó kuniyó na̱ hermanoyó (1 Juan 4:21). Tá kúú, ndíʼi-iniyó xa̱ʼa̱na ta chíndeétáʼanyó xíʼinna tá ku̱a̱yaʼana nu̱ú tu̱ndóʼo ña̱ yo̱ʼvi̱ní. Sándi̱koyó inina tá xíʼi̱ iin na̱ veʼena, ta xáʼa̱nyó xítoyóna tá ndeéndóʼona, saátu chíka̱a̱níyó ndee̱ xíʼinna tá ndákava-inina (2 Cor. 1:3-7; 1 Tes. 5:11, 14). Saátu káʼa̱nyó xa̱ʼa̱na xíʼin Ndióxi̱ chi kúnda̱a̱-iniyó ña̱ “tá káʼa̱n iin na̱ yiví na̱ nda̱kúní-ini xíʼin Ndióxi̱, ña̱ káʼa̱n na̱yóʼo kúúmiíníña ndee̱ ta va̱ʼaní chíndeétáʼanña xíʼin inkana” (Sant. 5:16).

9. ¿Ndáa inka ki̱ʼva na̱ʼa̱yó ña̱ kúʼvi̱-iniyó xíniyó na̱ hermano?

⁹ Inka ki̱ʼva ña̱ na̱ʼa̱yó ña̱ kúʼvi̱-iniyó xíniyó na̱ hermanoyó kúú ña̱ vií kutáʼanyó xíʼinna. Kúni̱yó ixakáʼnu-iniyó xa̱ʼa̱na nda̱a̱ táki̱ʼva kéʼé Jehová. Ná ndakanixi̱níyó xa̱ʼa̱ ña̱yóʼo: tá Jehová ta̱xira ña̱ ná kuvi se̱ʼera xa̱ʼa̱ ku̱a̱chiyó, ¿á su̱ví kama xíniñúʼu ixakáʼnu-iniyó xa̱ʼa̱ na̱ hermanoyó tá ke̱ʼéna iin ña̱ va̱ása va̱ʼa xíʼinyó? Va̱ása kúni̱yó kooyó táki̱ʼva ni̱xi̱yo ta̱a ta̱ na̱túʼun ta̱ Jesús xa̱ʼa̱. Ta̱ xi̱kachíñura nu̱ú, i̱xakáʼnuva-inira xa̱ʼa̱ra ni ku̱a̱ʼání xu̱ʼún xi̱níkara nu̱úra, soo mií ta̱ ta̱a kán va̱ása níxiinra ixakáʼnu-inira xa̱ʼa̱ ta̱ xi̱níka nu̱úra ni loʼoníva xi̱kuu ña̱yóʼo (Mat. 18:23-35). Ña̱kán tá va̱ása vií kítáʼún xíʼin iin na̱ hermano, ¿á kivi chika̱ún ndee̱ ña̱ vií ndakutáʼún xíʼinna tá kúma̱níka koo Conmemoración? (Mat. 5:23, 24). Tásaá ná keʼún, náʼún ña̱ kúʼvi̱ní-iniún xíniún Jehová xíʼin ta̱ Jesús.

10, 11. ¿Ndáa ki̱ʼva kivi na̱ʼa̱ na̱ anciano ña̱ kúʼvi̱-inina xínina Jehová xíʼin ta̱ Jesús? (1 Pedro 5:1, 2).

¹⁰ Iin ki̱ʼva ña̱ na̱ʼa̱ na̱ anciano ña̱ kúʼvi̱-inina xínina Jehová xíʼin ta̱ Jesús kúú: ña̱ viíní kundaana ndikachi válí sa̱na̱ ta̱ Jesús (kaʼvi 1 Pedro 5:1, 2). Ta̱ Jesús káxiní ni̱ka̱ʼa̱nra xa̱ʼa̱ ña̱yóʼo xíʼin ta̱ apóstol Pedro. Chi xa̱ʼa̱ ña̱ ni̱ka̱ʼa̱n ta̱ Pedro ña̱ va̱ása xíni̱ra ta̱ Jesús u̱ni̱ yichi̱, xi̱kuni̱ra na̱ʼa̱ra nu̱ú ta̱ Jesús ña̱ kúʼvi̱va-inira xínirara. Tá nda̱taku ta̱ Jesús, ña̱yóʼo ni̱nda̱ka̱tu̱ʼunra ta̱ Pedro: “Simón se̱ʼe ta̱ Juan, ¿á kúʼvi̱-iniún xíniún yi̱ʼi̱?”. Sana xi̱kuni̱níva ta̱ Pedro keʼéra nda̱a̱ ndáaka ña̱ʼa ña̱ va̱ʼa na̱ʼa̱ra nu̱ú ta̱ Jesús ña̱ kúʼvi̱ní-inira xínirara. Ta ta̱ Jesús ni̱ka̱ʼa̱nra xíʼinra: “Kundaa ndikachi válí sa̱na̱i̱” (Juan 21:15-17). Tasaá ke̱ʼéva ta̱ Pedro, chi va̱ʼaní xi̱ndaara na̱ discípulo ta̱ Jesús ta saá ni̱na̱ʼa̱ra ña̱ kúʼvi̱ní-inira xínirara.

¹¹ ¿Nda̱saa kivi na̱ʼa̱ na̱ anciano ña̱ ndíku̱nna ña̱ ni̱ka̱ʼa̱n ta̱ Jesús xíʼin ta̱ Pedro tá xíyo Conmemoración? Kivi na̱ʼa̱na ña̱ kúʼvi̱ní-inina xínina Jehová xíʼin ta̱ Jesús tá ná chika̱a̱na ndee̱ xíʼin na̱ hermano ta saátu chindeétáʼanna xíʼin na̱ inactivo (Ezeq. 34:11, 12). Saátu kivi chindeétáʼanna xíʼin na̱ sa̱kán sákuaʼa xa̱ʼa̱ tu̱ʼun Ndióxi̱ xíʼin na̱ xáʼa̱n ña̱ Conmemoración ña̱ yichi̱ nu̱ú. Chi ña̱ kúni̱na kúú ña̱ viíní keʼéna xíʼinna, chi na̱yóʼo kivi xa̱a̱na koona discípulo ta̱ Jesús.

TÁ KÚʼVI̱-INIYÓ XÍNIYÓ TA̱ JESÚS, VA̱ÁSA YÍʼVIYÓ

12. Ña̱ ni̱ka̱ʼa̱n ta̱ Jesús ñuú tá kúma̱níka kuvira, ¿ndáa ki̱ʼva chíndeétáʼanña xíʼinyó ña̱ va̱ása yi̱ʼvíyó? (Juan 16:32, 33).

¹² Ña̱yóʼo ni̱ka̱ʼa̱n ta̱ Jesús xíʼin na̱ discípulora ñuú tá kúma̱ní kuvira: “Koova tu̱ndóʼo nu̱úndó ñuyǐví yóʼo. Soo ndakú koo inindó, chi yi̱ʼi̱ xa̱a̱ ku̱chiñuvai̱ xíʼin ñuyǐví yóʼo” (kaʼvi Juan 16:32, 33). ¿Ndáaña chi̱ndeétáʼan xíʼin ta̱ Jesús ña̱ va̱ása yi̱ʼvíra tá xi̱kuni̱ na̱ sáa̱-ini xíni miíra keʼéna ña̱ va̱ása va̱ʼa xíʼinra tasaá nda̱kú koo inira? Ña̱ ka̱ndíxaníra Jehová. Ta xa̱ʼa̱ ña̱ xi̱kunda̱a̱-inira ña̱ saátu xo̱ʼvi̱ na̱ discípulo ni̱ka̱ʼa̱nra xíʼin Jehová ña̱ ná kundaarana (Juan 17:11). ¿Ndáa ki̱ʼva chíndeétáʼan ña̱yóʼo xíʼinyó ña̱ va̱ása yi̱ʼvíyó? Ña̱yóʼo chíndeétáʼanníña xíʼinyó saáchi kúnda̱a̱-iniyó ña̱ kúúmiíníka Jehová ndee̱ nu̱ú na̱ sáa̱-ini xíni miíyó (1 Juan 4:4). Ta íyo tu̱ʼvara ña̱ chindeétáʼanra xíʼinyó. Tá ná kundaa-iniyó Jehová, kuchiñuvayó ya̱ʼayó nu̱ú ña̱ sáyi̱ʼví miíyó ta ndakú koo iniyó.

13. ¿Ndáa ki̱ʼva ni̱na̱ʼa̱ ta̱ José ta̱ ñuu Arimatea ña̱ ndakú ni̱xi̱yo inira?

¹³ Ná ndakanixi̱níyó xa̱ʼa̱ ta̱ José ta̱ ni̱xi̱yo chí ñuu Arimatea, xi̱ ixato̱ʼóní na̱ judío ta̱kán. Ta̱yóʼo táʼan na̱ Sanedrín xi̱kuura. Soo tá xa̱ʼa̱ xi̱yiʼvíníra. Ta̱ Juan ka̱chira ña̱ “ta̱yóʼo xi̱kuura discípulo ta̱ Jesús, soo xa̱ʼa̱ ña̱ xi̱yi̱ʼvíra xi̱xinira na̱ judío kǒo níka̱ʼa̱nra xíʼin ni iinna xa̱ʼa̱ ña̱yóʼo” (Juan 19:38). Ni xi̱kutóovara sakúaʼara ña̱ káʼa̱n xa̱ʼa̱ Reino Ndióxi̱, soo va̱ása nína̱ʼa̱ túvira ña̱ kándíxara ta̱ Jesús. Sana xi̱yiʼvíra ña̱ va̱ása ixato̱ʼókanara. Soo Biblia káʼa̱nña xíʼinyó ña̱ tá xa̱a̱ ni̱xi̱ʼi̱ ta̱ Jesús, ta̱ José “i̱xandakú-inira ta ni̱xa̱ʼa̱nra nu̱ú ta̱ Pilato ta ni̱ka̱ʼa̱nra xíʼinra ña̱ ná taxira ña̱ sandúxu̱nra ta̱ Jesús” (Mar. 15:42, 43). Ta̱yóʼo va̱ása níchise̱ékara ña̱ kúúra discípulo ta̱ Jesús.

14. ¿Ndáaña xíniñúʼu keʼéyó ta yíʼviyó xíniyó na̱ yiví?

¹⁴ ¿Á yíʼviún nda̱a̱ táki̱ʼva ndo̱ʼo ta̱ José ta̱ ñuu Arimatea? ¿Á kúkaʼan nu̱ún ka̱ʼún ña̱ kúún testigo Jehová ti̱xin escuela á nu̱ú káchíñún? ¿Á ndákanixi̱níún ña̱ va̱ʼaka chí nu̱únínuví saá koún publicador ta ndakuchiún? Va̱ása yi̱ʼvíún kuniún na̱ yiví va̱ʼaka keʼé ña̱ kúni̱ Jehová. Ka̱ʼa̱n xíʼin Jehová ná chindeétáʼanra xíʼún ta ná taxira ndee̱ ndaʼún ña̱ va̱ása yi̱ʼvíún kachíñún nu̱úra. Tá ná kiʼún kuenta ña̱ ndákuiinra oración ña̱ káʼún xíʼinra, saá ndakúka koo iniún ta va̱ása yi̱ʼvíún (Is. 41:10, 13).

ÑA̱ KUSI̱Í-INIYÓ KÚÚ ÑA̱ CHINDEÉTÁʼAN XÍʼINYÓ ÑA̱ KACHÍÑUYÓ NU̱Ú JEHOVÁ

15. Tá xi̱ni na̱ discípulo ta̱ Jesús ña̱ nda̱takura, ¿ndáa ki̱ʼva chi̱ndeétáʼan ña̱yóʼo xíʼinna? (Lucas 24:52, 53).

¹⁵ Ndeéní ku̱suchí-ini na̱ discípulo tá ni̱xi̱ʼi̱ ta̱ Jesús. Tá miíún níxi̱yo na̱kán, ¿ndáa ki̱ʼva kuniún? Na̱yóʼo xi̱kuʼvi̱ní-inina xi̱xininara soo tá kǒokara níxi̱yo xíʼinna nda̱kanixi̱nína ña̱ kǒoka ña̱ kivi keʼéna (Luc. 24:17-21). Soo tándi̱ʼi, ta̱ Jesús ki̱tara nu̱úna ta ni̱ka̱ʼa̱nra xíʼinna ña̱ xa̱a̱ sáxi̱nura profecía ña̱ va̱xi nu̱ú Biblia. Saátu ta̱xira iin chiñu ña̱ ndáyáʼviní ndaʼa̱na (Luc. 24:26, 27, 45-48). Tá ni̱ya̱ʼa 40 ki̱vi̱ ta̱ Jesús ndi̱kóra chí ndiví, soo na̱ discípulora va̱ása níkusuchíka-inina, chi ndeéní ku̱si̱í-inina. Xi̱kusi̱íní-inina chi ku̱ndaa̱-inina ña̱ tákuva ta̱ Jesús ta chindeétáʼanra xíʼinna ña̱ saxínuna chiñu ña̱ ta̱xira ndaʼa̱na. Ta xa̱ʼa̱ ña̱ xi̱kusi̱íní-inina, ña̱yóʼo chi̱ndeétáʼanña xíʼina ña̱ ndakundeéna nda̱sakáʼnuna Jehová (kaʼvi Lucas 24:52, 53; Hech. 5:42).

16. ¿Ndáa ki̱ʼva kundiku̱nyó yichi̱ ña̱ sa̱ndákoo na̱ discípulo ta̱ Jesús nu̱úyó?

¹⁶ Ta miíyó, ¿ndáa ki̱ʼva kundiku̱nyó yichi̱ ña̱ sa̱ndákoo na̱ discípulo ta̱ Jesús nu̱úyó? Ña̱ kusi̱í-iniyó ndasakáʼnuyó Jehová ndiʼi ki̱vi̱, ta su̱ví nda̱saa tá xíyo kuití Conmemoración. Siʼna chiñu Ndióxi̱ xíniñúʼu kundi̱ʼi̱-iniyó xa̱ʼa̱. Tá kúú, savana násamana hora ña̱ kachíñuna ña̱ va̱ʼa ku̱a̱ʼáka tiempo keena natúʼunna xa̱ʼa̱ Ndióxi̱, ku̱ʼu̱nna reunión ta saátu ña̱ kaʼvina xíʼin na̱ veʼena ndiʼi semana. Savana loʼoka ña̱ʼa kúúmiína ña̱ va̱ʼa chindeétáʼanna ti̱xin congregación á ña̱ ku̱ʼu̱nna nu̱ú kúma̱ní na̱ publicador. Ña̱ nda̱a̱ kúúña xíniñúʼuva chika̱a̱yó ndee̱ ña̱ kachíñuyó nu̱ú Jehová, soo ta̱kán káʼa̱nra taxira ku̱a̱ʼání ña̱ va̱ʼa ndaʼa̱yó tá siʼnaka chiñura ná kundi̱ʼi̱-iniyó xa̱ʼa̱ (Prov. 10:22; Mat. 6:32, 33).

17. ¿Ndáaña xíniñúʼu keʼéyó tá xíyo Conmemoración? (Koto na̱ʼná).

¹⁷ Xa̱a̱ kúni̱níyó ná kixaa̱ ki̱vi̱ martes 4 tí abril ña̱ va̱ʼa ku̱ʼu̱nyó Conmemoración. Va̱ása xíniñúʼu kundatuvíyó nda̱a̱ ná kixaa̱ ki̱vi̱ kán ña̱ va̱ʼa ndakanixi̱níyó xa̱ʼa̱ ki̱ʼva ña̱ xi̱taku ta̱ Jesús, ña̱ ni̱xi̱ʼi̱ra xíʼin ña̱ ni̱na̱ʼa̱ miíra xíʼin yivára ña̱ ni̱kuʼvi̱ní-inina xi̱nina miíyó. Ná ndukúyó ki̱ʼva ña̱ keʼéyó ña̱yóʼo tiempo ña̱ xíyo Conmemoración. Tá kúú, kivi taváyó tiempo ña̱ kaʼviyó ña̱ va̱xi nu̱ú Tutu nu̱ú va̱xi ña̱ keʼéyó reunión, abril 2019 ña̱ naní “¿Ndáaña xíniñúʼu keʼéyó ña̱ va̱ʼa ku̱ʼu̱nyó Conmemoración?”. Ná kaʼviyó texto ña̱ chindeétáʼan xíʼinyó ña̱ taxikayó tíxa̱ʼvi xa̱ʼa̱ ña̱ ke̱ʼé ta̱ Jesús xa̱ʼa̱yó, xa̱ʼa̱ ña̱ ni̱kuʼvi̱-inira xi̱nira miíyó, xa̱ʼa̱ ña̱ ndakúní ni̱xi̱yo-inira xíʼin ña̱ si̱íní ni̱xi̱yo-inira. Ná ndakanixi̱níyó ndáa ki̱ʼva na̱ʼa̱yó ña̱ táxiníyó tíxa̱ʼvi xa̱ʼa̱ ña̱ ke̱ʼéra xa̱ʼa̱yó. Ta ná va̱ása kaka-iniyó chi ta̱ Jesús chíndayáʼviníra ndiʼi ña̱ kéʼéyó ña̱ va̱ʼa ndakaʼányó xa̱ʼa̱ra tá xíyo Conmemoración (Apoc. 2:19).