Carta ña̱ chindeétáʼan xíʼinyó kundeé-iniyó nda̱a̱ nu̱ú ndíʼi

1, 2. a) ¿Ndáa ki̱ʼva xi̱ndoo na̱ hebreo tá ka̱ʼyi ta̱ apóstol Pablo carta ku̱a̱ʼa̱n nu̱úna? b) ¿Nda̱chun va̱ʼaní tiempo ni̱xa̱a̱ carta nu̱úna?

NA̱ HEBREO na̱ xi̱ndoo chí Jerusalén ta saátu chí Judea, ni̱ya̱ʼana nu̱ú tu̱ndóʼo tá xa̱a̱ ni̱xi̱ʼi̱ ta̱ Jesús. Tá sa̱kán ki̱xáʼa íyo congregación chí Jerusalén, ndeéní ki̱xáʼana íxandi̱va̱ʼana xíʼinna (Hech. 8:1). Ta tá xa̱a̱ ni̱ya̱ʼa 20 ku̱i̱ya̱, na̱ cristiano na̱ xi̱ndoo chí Judea ni̱ya̱ʼana nu̱ú tu̱ndóʼo, saáchi xi̱kuma̱ní ña̱ kuxuna ta kǒo xu̱ʼún níxi̱yo ndaʼa̱na (Hech. 11:​27-30). Tá ku̱i̱ya̱ 61 va̱ʼava xi̱ndoona soo kixaa̱ iin tiempo ña̱ ixandi̱va̱ʼanína xíʼinna. Ta mií tiempo saá nda̱kiʼinna iin carta ña̱ chi̱ndaʼá ta̱ apóstol Pablo ndaʼa̱na ta va̱ʼaní chi̱ndeétáʼan ña̱yóʼo xíʼinna ña̱ va̱ʼa koo tu̱ʼvana.

² Mií tiempo ña̱ kuniñúʼu na̱ hebreo carta yóʼo kúú ña̱ ni̱xa̱a̱ña ndaʼa̱na, saáchi xa̱a̱ ku̱nu̱mí kixaa̱ tiempo ña̱ xo̱ʼvi̱na ta nu̱ú carta yóʼo ta̱ Pablo ta̱xira consejo ndaʼa̱na ña̱ chindeétáʼan xíʼinna ña̱ kundeé-inina xíʼin tu̱ndóʼo ña̱ ya̱ʼana nu̱ú. Saáchi xa̱a̱ ku̱nu̱mí ndiʼi-xa̱ʼa̱ ñuu Jerusalén nda̱a̱ táki̱ʼva ni̱ka̱ʼa̱n ta̱ Jesús (Luc. 21:20). Ni ta̱ Pablo ni na̱ cristiano na̱ xi̱ndoo chí Judea va̱ása níxi̱kunda̱a̱-inina ama kuu ña̱yóʼo. Soo xi̱niñúʼu viíní kuniñúʼu na̱ cristiano tiempo yóʼo ña̱ va̱ʼa kandíxakana Ndióxi̱ ta ndakúka koo inina, tasaá koo tu̱ʼvana tá ná kixi tu̱ndóʼo nu̱úna (Heb. 10:25; 12:​1, 2).

3. ¿Nda̱chun ndáyáʼvi kotoyó ña̱ káʼa̱n carta ña̱ Hebreo tiempo vitin?

³ Saátu miíyó xa̱a̱ ku̱nu̱mí ya̱ʼayó nu̱ú iin tu̱ndóʼo ña̱ ndeéníka ña̱ ni̱ya̱ʼa na̱ cristiano hebreo nu̱ú (Mat. 24:21; Apoc. 16:​14, 16). Consejo ña̱ ta̱xi Jehová ndaʼa̱ na̱ cristiano kán kivi chindeétáʼanña xíʼin miíyó. Ña̱kán ná ka̱ʼa̱nyó xa̱ʼa̱ sava ña̱yóʼo.

“NÁ CHIKAA̱YÓ NDEE̱ ÑA̱ XA̱A̱YÓ KOOYÓ NA̱ YIVÍ XU̱XA”

4. ¿Ndáa tu̱ndóʼo ki̱xi nu̱ú na̱ cristiano na̱ xi̱kuu judío? (Koto na̱ʼná).

⁴ Na̱ hebreo na̱ ndu̱u cristiano na̱ chi̱ndaʼá ta̱ Pablo carta yóʼo nu̱ú, kǒo níxi̱kandíxakana ña̱ xi̱kandíxa na̱ judío, ta i̱xayo̱ʼvi̱vaña xíʼinna. Na̱ judío xi̱kúú na̱ nda̱kaxin Jehová ña̱ va̱ʼa xa̱a̱na koona na̱ ñuura. Ku̱a̱ʼání ku̱i̱ya̱ ñuu Jerusalén xi̱kuuña iin ñuu ña̱ ndáyáʼviní, chi kán ni̱xi̱yo ta̱ rey ta̱ nda̱kaxin Jehová ta saátu kán ni̱xi̱yo templora. Ndiʼi na̱ judío na̱ nda̱kúní ni̱xi̱yo ini xi̱ndiku̱nna ley ta̱ Moisés saátu xi̱ndiku̱nna ña̱ xi̱ka̱ʼa̱n na̱ xi̱niʼi yichi̱ nu̱úna. Xi̱ka̱ʼa̱nna xíʼinna ndáaña kuxuna, ña̱ ta̱ʼnda̱ nu̱ú yi̱i̱na saátu ndáa ki̱ʼva keʼéna xíʼin na̱ yiví na̱ inka ñuu. Soo tá xa̱a̱ ni̱xi̱ʼi̱ ta̱ Jesús, Jehová kǒo níxikuni̱kara ña̱ so̱kóna ña̱ʼa nu̱úra ini templo. I̱xayo̱ʼvi̱va ña̱yóʼo xíʼin na̱ judío na̱ ndu̱u cristiano, saáchi va̱ʼaní xi̱ndiku̱nna ña̱ xi̱ka̱ʼa̱n ley (Heb. 10:​1, 4, 10). Ta nda̱a̱ ta̱ apóstol Pedro i̱xayo̱ʼvi̱ ña̱yóʼo xíʼin, ni va̱ʼaní xi̱kandíxara Ndióxi̱ (Hech. 10:​9-14; Gál. 2:​11-14). Na̱ xi̱niʼi yichi̱ nu̱ú na̱ judío ki̱xáʼana íxandi̱va̱ʼana xíʼinna xa̱ʼa̱ ña̱ ki̱xáʼana kándíxana.

5. ¿Ndáana ni̱xi̱yo contra xíʼin na̱ cristiano na̱ xi̱ndoo chí Judea?

⁵ U̱vi̱ tiʼvi xi̱kuu na̱ yiví na̱ ni̱xi̱yo contra na̱ cristiano na̱ xi̱ndoo chí Judea. Iin tiʼvi na̱yóʼo xi̱kuu na̱ xi̱niʼi yichi̱ nu̱ú na̱ judío ta xi̱ka̱ʼa̱nna xa̱ʼa̱na ña̱ ni̱xi̱yona contra Ndióxi̱. Saátu ni̱xi̱yo iin tiʼvi na̱ yiví na̱ xi̱ka̱ʼa̱n ña̱ xi̱kuuna cristiano soo xi̱kuni̱kana kundiku̱nna ña̱ káʼa̱n ley ta̱ Moisés tasaá kǒo ixandi̱va̱ʼana xíʼinna (Gál. 6:12). ¿Ndáaña chi̱ndeétáʼan xíʼin na̱ cristiano yóʼo ña̱ nda̱kú koo inina xíʼin Jehová?

6. ¿Ndáaña ni̱ka̱ʼa̱n ta̱ Pablo xíʼin na̱ hebreo keʼéna? (Hebreos 5:14–6:1).

⁶ Nu̱ú carta ña̱ chi̱ndaʼá ta̱ Pablo ku̱a̱ʼa̱n nu̱ú na̱ hebreo, ni̱ka̱ʼa̱nra xíʼinna ná kaʼvina tu̱ʼun Ndióxi̱ ta ná ndakanixi̱nína xa̱ʼa̱ña (kaʼvi Hebreos 5:14–6:1). Xi̱niñúʼura Escrituras Hebreas ña̱ va̱ʼa sa̱náʼa̱rana ña̱ va̱ʼaníka ndásakáʼnu na̱ cristiano Ndióxi̱ nu̱úka ña̱ xi̱keʼé na̱ judío.a Ta̱ Pablo ni̱ka̱ʼa̱nkara xíʼin na̱ cristiano ña̱ ná sakúaʼakana xa̱ʼa̱ Ndióxi̱ ta ná kunda̱a̱-inina xíʼinña chi saá kúú ña̱ kunda̱a̱-inina ndáaña kúú ña̱ vatá ta kǒo kandíxanaña.

7. ¿Ndáaña íxayo̱ʼvi̱ xíʼinyó tiempo vitin?

⁷ Saátu tiempo vitin íyo na̱ yiví na̱ ku̱a̱ʼa̱n contra Ndióxi̱ ta kǒo kándíxana ña̱ káʼa̱nra ta saátu ku̱a̱ʼa̱nna contra miíyó. Sava na̱ yiví káʼa̱nna ña̱ va̱ása va̱ʼa íyo ña̱ kándíxayó chi íxato̱ʼóníyó ña̱ káʼa̱n Biblia xa̱ʼa̱ ndáana kivi ku̱su̱n xíʼin táʼan. Síínní íyo ña̱ kéʼé na̱ ñuyǐví yóʼo ta saátu ña̱ ndákanixi̱nína saáchi va̱ása kítáʼanña xíʼin ña̱ ndákanixi̱ní Jehová (Prov. 17:15). Ña̱kán xíniñúʼu kiʼinníyó kuenta ña̱ kǒo ndakanixi̱níyó nda̱a̱ táki̱ʼva ndákanixi̱ní na̱ ñuyǐví yóʼo ta ná kǒo taxiyó sakúxíkána miíyó nu̱ú Jehová (Heb. 13:9).

8. ¿Ndáaña xíniñúʼu keʼéyó ña̱ va̱ʼa xa̱a̱yó kooyó na̱ yiví xu̱xa-ini?

⁸ Ta̱ Pablo ni̱ka̱ʼa̱nra xíʼin na̱ cristiano ña̱ ná chikaa̱na ndee̱ ña̱ xa̱a̱na koona na̱ yiví na̱ xu̱xa-ini ta saátu xíniñúʼu keʼé miíyó. ¿Ndáa ki̱ʼva keʼéyó ña̱yóʼo? Xíniñúʼu viíní kaʼviyó tu̱ʼun Ndióxi̱ chi saá kúú ña̱ xa̱a̱yó kunda̱a̱ va̱’a iniyó ndáa ki̱ʼva ndákanixi̱níra ta xa̱a̱yó kuxini̱va̱ʼakayóra. Ta xíniñúʼu keʼékayó ña̱yóʼo ni xa̱a̱ nda̱kuchiyó. Ña̱kán ndiʼiyó xíniñúʼu kaʼvi ni̱ʼiyó tu̱ʼun Ndióxi̱ ta ndakanixi̱níyó xa̱ʼa̱ña ni loʼo á xa̱a̱ ku̱a̱ʼá ku̱i̱ya̱ ndásakáʼnuyó Ndióxi̱ (Sal. 1:2). Tá ná kaʼvi ni̱ʼiyó Biblia ña̱yóʼo chindeétáʼanña xíʼinyó ña̱ kandíxakayó Ndióxi̱ ta ña̱yóʼo kúú ña̱ ni̱ka̱ʼa̱n ta̱ apóstol Pablo xíʼin na̱ cristiano keʼéna (Heb. 11:​1, 6).

“NA̱ NÍʼI̱ ÑA̱ KUTAKUNA XA̱ʼA̱ ÑA̱ KÁNDÍXANA”

9. ¿Nda̱chun xi̱niñúʼu kandíxaní na̱ cristiano Ndióxi̱?

⁹ Xi̱niñúʼu kandíxaní na̱ cristiano kán Ndióxi̱ ña̱ va̱ʼa kundeé-inina xa̱ʼa̱ ña̱ xa̱a̱ ku̱nu̱mí kuu Judea (Heb. 10:​37-39). Ta̱ Jesús ni̱ka̱ʼa̱nra xíʼin na̱ cristiano ña̱ ná kununa ku̱ʼu̱nna chí yuku̱ tá ná kunina ndakasi na̱ soldado satá ñuu Jerusalén. Ndiʼi na̱ cristiano xi̱niñúʼu kandíxana consejo yóʼo ni xi̱ndoona chí Jerusalén á xi̱ndoona chí yuku̱ (Luc. 21:​20-24). Tiempo saá tá xi̱kanitáʼan na̱ soldado xíʼin iin ñuu, na̱ yiví na̱ xi̱ndoo chí yuku̱ xi̱ndiʼvina iin ñuu ña̱ ndási nama̱ satá ña̱ va̱ʼa ka̱kuna. Ña̱kán xi̱niñúʼu kandíxanína Ndióxi̱ ña̱ va̱ʼa kununa ku̱ʼu̱nna chí yuku̱.

10. ¿Ndáaña xi̱niñúʼu keʼé na̱ cristiano na̱ xi̱kandíxaní Ndióxi̱? (Hebreos 13:17).

¹⁰ Ta saátu xi̱niñúʼu kandíxaní na̱ cristiano yóʼo na̱ hermano na̱ nda̱kaxin ta̱ Jesús ña̱ kuniʼina yichi̱ nu̱ú na̱ congregación. Chi na̱ hermano yóʼo kúú na̱ ni̱ka̱ʼa̱n xíʼinna ama kúú ña̱ kununa ku̱ʼu̱nna chí yuku̱ ta ndáa ki̱ʼva keʼénaña (kaʼvi Hebreos 13:17). Ta̱ apóstol Pablo ni̱ka̱ʼa̱nra tu̱ʼun yóʼo xíʼin na̱ cristiano “kuniso̱ʼondó ña̱ káʼa̱n na̱ níʼi yichi̱ nu̱úndó”, su̱ví ña̱ xi̱kuni̱ kachira kúú ña̱ kuniso̱ʼo kuitína na̱ níʼi yichi̱ nu̱úna, chi xi̱niñúʼu kuniso̱ʼonana xa̱ʼa̱ ña̱ kándíxanínana. Na̱ cristiano kán xi̱niñúʼu kundaaní-inina na̱ níʼi yichi̱ nu̱úna tá kúma̱níka kixaa̱ tu̱ndóʼo nu̱úna. Tá va̱ʼaní xi̱xiniso̱ʼona tá kǒo tu̱ndóʼo níxi̱yo nu̱úna, kǒo ixayo̱ʼvi̱víña xíʼina kuniso̱ʼona tá ná kixi tu̱ndóʼo nu̱úna.

11. ¿Nda̱chun xíniñúʼu kandíxaníyó Ndióxi̱?

¹¹ Saátu miíyó xíniñúʼu kandíxaníyó Ndióxi̱ nda̱a̱ táki̱ʼva ke̱ʼé na̱ cristiano na̱ chi̱ndaʼá ta̱ Pablo carta nu̱ú. Tiempo ña̱ ndóoyó vitin ku̱a̱ʼání na̱ yiví kǒo kándíxana ña̱ ndiʼi-xa̱ʼa̱ ñuyǐví yóʼo ta nda̱a̱ kúsi̱kindaana miíyó xa̱ʼa̱ ña̱ kándíxayó ña̱yóʼo (2 Ped. 3:​3, 4). Loʼova kúú ña̱ káʼa̱n Biblia xa̱ʼa̱ ña̱ gran tribulación, ta íyo ku̱a̱ʼá ña̱ kǒo kúnda̱a̱-iniyó xa̱ʼa̱. Ña̱kán xíniñúʼu kandíxaníyó ña̱ sandíʼi-xa̱ʼa̱ Jehová ñuyǐví yóʼo mií tiempo ña̱ xa̱a̱ nda̱kaxinra ta kandíxaníyó ña̱ kundaara miíyó tiempo saá (Hab. 2:3).

12. ¿Ndáaña chindeétáʼan xíʼinyó ña̱ va̱ʼa ka̱kuyó tá ná kundikaa̱ ña̱ gran tribulación?

¹² Ta saátu xíniñúʼu kandíxaníyó ña̱ xíniñúʼu Jehová, “ta̱ ndixa kúú esclavo ta̱ nda̱kúní-ini ta̱ ndíchiní” ña̱ kuniʼira yichi̱ nu̱úyó tiempo vitin (Mat. 24:45). Ta nda̱a̱ táki̱ʼva ni̱ka̱ʼa̱nna xíʼin na̱ cristiano hebreo ndáaña keʼéna tá ná kixaa̱ na̱ romano, ta saátu ka̱ʼa̱nna xíʼinyó ndáaña keʼéyó tá ná kixaa̱ ña̱ gran tribulación. Ña̱kán, tiempo vitin kúú ña̱ xíniñúʼu kandíxaníkayó ña̱ káʼa̱n na̱ níʼi yichi̱ nu̱úyó ti̱xin ñuu Jehová. Tá tiempo vitin kǒo xíniso̱ʼoyó ña̱ káʼa̱nna ta kǒo kándíxayóna, ixayo̱ʼvi̱ña xíʼinyó kandíxayó ña̱ ka̱ʼa̱nna xíʼinyó tá ná kundikaa̱ ña̱ gran tribulación.

13. ¿Nda̱chun va̱ʼaní consejo ta̱xina ndaʼa̱na nu̱ú Hebreos 13:5?

¹³ Nani xi̱ndatu na̱ cristiano hebreo señal ña̱ na̱ʼa̱ nu̱úna ña̱ kivi kununa ku̱ʼu̱nna, xi̱niñúʼu chikaa̱nína ndee̱ ña̱ kachíñuna nu̱ú Ndióxi̱ ta kǒo kutóonína kuumiína xu̱ʼún (kaʼvi Hebreos 13:5). Sava na̱kán xi̱kuma̱ní xu̱ʼún ndaʼa̱na ta kǒo ña̱ kuxuna níxi̱yo (Heb. 10:​32-34). Ni̱xi̱yo tiempo ña̱ chikaa̱na ndee̱ ña̱ na̱túʼunna xa̱ʼa̱ tu̱ʼun va̱ʼa ta ku̱ndeé-inina ni̱ya̱ʼana nu̱ú tu̱ndóʼo, soo savana ki̱xáʼana ndíʼi̱ka-inina ña̱ kuumiína xu̱ʼún tasaá kundoo va̱ʼana. Soo kǒo kuchiñuví xu̱ʼún kán sakǎkuña miína tá ná ndiʼi-xa̱ʼa̱ ñuu Jerusalén (Sant. 5:3). Na̱ xi̱kutóoní kuumií xu̱ʼún, sana i̱xayo̱ʼvi̱níña xíʼinna sandákoona veʼena xíʼin ña̱ʼa ña̱ xi̱kuumiína ta kununa ku̱ʼu̱nna.

14. ¿Ndáaña ndaka̱xinyó keʼéyó tá kándíxaníyó Ndióxi̱?

¹⁴ Tá ndixa kándíxayó ña̱ ndiʼi-xa̱ʼa̱ ñuyǐví yóʼo, ña̱yóʼo chindeétáʼan xíʼinyó ña̱ kǒo kuni̱yó kuumiíyó ku̱a̱ʼání ña̱ʼa. Chi ti̱xin ña̱ gran tribulación kǒo kundayáʼviví xu̱ʼún. Biblia káchiña ña̱ na̱ yiví katana plata chí calle tá ná kiʼinna kuenta ña̱ “ni plata ni oro ña̱ kúúmiína, va̱ása kivi sakǎkuñana ki̱vi̱ ña̱ ná na̱ʼa̱ Jehová ña̱ sáa̱níra xíʼinna” (Ezeq. 7:19). Nu̱úka ña̱ kundi̱ʼi-iniyó ña̱ kuumiíyó ku̱a̱ʼání xu̱ʼún va̱ʼaka ná chikaa̱-iniyó ña̱ loʼo ña̱ʼa kuumiíyó. Ta saátu ná kǒo satáyó ku̱a̱ʼání ña̱ʼa tá kǒo xu̱ʼún ndaʼa̱yó chi kivi kundi̱ʼi̱ní-iniyó xa̱ʼa̱ ña̱yóʼo ta kǒoka tiempo kindo̱o nu̱úyó ña̱ kundi̱ʼi-iniyó xa̱ʼa̱ inkaka ña̱ʼa ndáyáʼvi. Saátu ná kiʼinyó kuenta ña̱ ná kǒo kundayáʼviní ña̱ʼa ña̱ kúúmiíyó nu̱úyó (Mat. 6:​19, 24). Nani kúyatin ña̱ ndiʼi-xa̱ʼa̱ ñuyǐví yóʼo xíniñúʼu na̱ʼa̱yó á ndáa-iniyó Jehová á ña̱ʼa ña̱ kúúmiíyó.

“XÍNIÑÚʼU KUNDEÉ-ININDÓ”

15. ¿Nda̱chun xi̱niñúʼu kundeé-ini na̱ cristiano?

¹⁵ Xi̱niñúʼu kundeé-ini na̱ cristiano na̱ xi̱ndoo chí Judea saáchi xa̱a̱ ku̱nu̱mí kixi ku̱a̱ʼá tu̱ndóʼo nu̱úna (Heb. 10:36). Sava na̱ cristiano yóʼo i̱xandi̱va̱ʼana xíʼinna ta ku̱ndeé-inina, soo inkana sa̱kúaʼana xa̱ʼa̱ Ndióxi̱ tá kǒo ku̱a̱chi níxi̱yo. Soo, ta̱ Pablo ni̱ka̱ʼa̱nra xíʼinna ña̱ ndeéka koo tu̱ndóʼo ña̱ kixi nu̱úna ta xi̱niñúʼu koo tu̱ʼvana ña̱ nda̱kú koo inina nda̱a̱ ná kuvina nda̱a̱ táki̱ʼva ke̱ʼé ta̱ Jesús (Heb. 12:4). Ku̱a̱ʼání na̱ judío xi̱saa̱nína chi ku̱a̱ʼání na̱ ñuuna xi̱nduuna cristiano. Ku̱i̱ya̱ chí sa̱tá iin tiʼvi na̱ yiví ka̱nina ta̱ Pablo tá ni̱xa̱ʼa̱nra na̱túʼunra xa̱ʼa̱ Ndióxi̱ chí Jerusalén. Ta yáʼaka 40 na̱ judío “ki̱ndoona ña̱ va̱ása kuxuna ta ni va̱ása koʼona nda̱a̱ ni iin ña̱ʼa nda̱a̱ ná kaʼnína ta̱ Pablo” (Hech. 22:22; 23:​12-14). Ni ni̱xi̱yo ku̱a̱ʼání na̱ xi̱saa̱-ini xi̱xini na̱ cristiano, kǒo nísandákoona ña̱ ndatakana ni ña̱ natúʼunna xa̱ʼa̱ Ndióxi̱ ta saátu kǒo ni sandákoona ña̱ kandíxanína Ndióxi̱.

16. ¿Ndáa ki̱ʼva chíndeétáʼan carta ña̱ ka̱ʼyí ta̱ apóstol Pablo xíʼinyó? (Hebreos 12:7).

¹⁶ ¿Ndáaña chindeétáʼan xíʼin na̱ cristiano ña̱ kundeé-inina tá ná ixandi̱va̱ʼana xíʼinna? Ta̱ apóstol Pablo xi̱kuni̱ra chindeétáʼanra xíʼin na̱ cristiano ña̱ ndakanixi̱nína xa̱ʼa̱ ndiʼi ña̱ va̱ʼa ña̱ ndakiʼinna tá ná kundeé-inina. Ta ni̱ka̱ʼa̱nra ña̱ tá yáʼa iin na̱ cristiano nu̱ú tu̱ndóʼo, Ndióxi̱ kivi kuniñúʼura ña̱yóʼo ña̱ va̱ʼa sanáʼa̱rana ña̱ kundeé-inina (kaʼvi Hebreos 12:7). Ta tá ná taxina ña̱ chindeétáʼan ña̱yóʼo xíʼinna kivi xa̱a̱na kuumiíkana ku̱a̱ʼá ña̱ va̱ʼa tasaá sakúsi̱ína-ini Jehová. Ña̱kán tá ná ndakanixi̱nína xa̱ʼa̱ ña̱ va̱ʼa ndakiʼinna tá ná kundeé-inina nu̱ú tu̱ndóʼo, kǒo ixayo̱ʼvi̱víña xíʼinna ya̱ʼana nu̱úña (Heb. 12:11).

17. ¿Nda̱chun va̱ʼa xi̱kunda̱a̱-ini ta̱ Pablo xíʼin ña̱ xi̱ndoʼo na̱ cristiano?

¹⁷ Ta̱ apóstol Pablo chi̱kaa̱ra ndee̱ xíʼin na̱ cristiano kán ña̱ ndakú koo inina ta kǒo ndakava-inina tá ná ya̱ʼana nu̱ú tu̱ndóʼo. Ta va̱ʼaníva consejo ta̱xi ta̱ apóstol Pablo ndaʼa̱na xa̱ʼa̱ ña̱ kundeé-inina tá ná ixandi̱va̱ʼana xíʼinna. ¿Nda̱chun? Saáchi tá ya̱chi̱ miíra xi̱ ixandi̱va̱ʼa xíʼin na̱ cristiano. Ña̱kán xi̱kundaa va̱ʼa inira xa̱ʼa̱ tu̱ndóʼo ña̱ xi̱yaʼana nu̱ú. Ta saátu miíra ku̱ndeé-inira tá i̱xandi̱va̱ʼana xíʼinra, chi tá ndu̱ura cristiano ke̱ʼéna ku̱a̱ʼání ña̱ va̱ása va̱ʼa xíʼinra (2 Cor. 11:​23-25). Ta̱ apóstol Pablo xi̱kunda̱a̱-inira ndáaña xi̱niñúʼu keʼéna ña̱ va̱ʼa kundeé-inina. Ña̱kán ni̱ka̱ʼa̱nra xíʼinna ña̱ ná kundaa-inina Jehová nu̱úka ña̱ kundaa-inina miína, ta ni̱ka̱ʼa̱nra ña̱yóʼo: “Jehová kúú ta̱ chindeétáʼan xíʼi̱n. Va̱ása yi̱ʼvíi̱” (Heb. 13:6).

18. ¿Ndáaña xíniñúʼu kunda̱a̱-iniyó, ta ndáaña xíniñúʼu keʼéyó vitin?

¹⁸ Tiempo vitin sava na̱ hermanoyó kúndeé-inina tá íxandi̱va̱ʼana xíʼinna. Ta iin ña̱ kivi keʼéyó ña̱ na̱ʼa̱yó ña̱ kúʼvi̱-iniyó xíniyóna kúú ña̱ ka̱ʼa̱nyó xa̱ʼa̱na xíʼin Ndióxi̱ ta saátu kivi taxiyó ña̱ xíniñúʼuna (Heb. 10:33). Biblia káchiña: “Ndiʼi na̱ kúni̱ ndasakáʼnu Ndióxi̱ ta kúni̱na kutáʼanna xíʼin ta̱ Cristo Jesús, ixandi̱va̱ʼatuna xíʼin na̱yóʼova” (2 Tim. 3:12). Ña̱yóʼo kúni̱ kachiña ña̱ ndiʼiyó xíniñúʼu koo tu̱ʼvayó tá ná kixaa̱ tiempo ña̱ yo̱ʼvi̱ní. Xíniñúʼu kundaaní-iniyó Jehová ta kǒo kaka-iniyó ña̱ chindeétáʼanra xíʼinyó ña̱ kundeé-iniyó tá ná kixi nda̱a̱ ndáaka tu̱ndóʼo nu̱úyó. Miíra sandíko-ini na̱ ndasakáʼnu miíra míí tiempo ña̱ xíniñúʼunaña (2 Tes. 1:​7, 8).

19. ¿Ndáaña kivi keʼéyó ña̱ va̱ʼa koo tu̱ʼvayó tá ná kixáʼa ña̱ gran tribulación? (Koto na̱ʼná).

¹⁹ Carta ña̱ chi̱ndaʼá ta̱ apóstol Pablo ndaʼa̱ na̱ hebreo va̱ʼaní chi̱ndeétáʼanña xíʼinna tá ki̱xi tu̱ndóʼo nu̱úna. Ta̱ Pablo ni̱ka̱ʼa̱nra xíʼinna ña̱ ná sakúaʼakana xa̱ʼa̱ tu̱ʼun Ndióxi̱ ta ná kunda̱a̱ka-inina xíʼinña. Tasaá kúú ña̱ kivi kunda̱a̱-inina ndáaña kúú ña̱ vatá ña̱ sánáʼa̱ inkana ta kǒo kandíxanaña, chi ña̱yóʼo kivi sakúxíkáñana nu̱ú Ndióxi̱. Ta saátu ni̱ka̱ʼa̱nra xíʼinna ña̱ ná kandíxanína ta keʼéna chiñu ña̱ xa̱ʼnda ta̱ Jesús, ta saátu viíní ná kuniso̱ʼona na̱ níʼi yichi̱ nu̱ú na̱ congregación. Ta ni̱ka̱ʼa̱nra xíʼinna ña̱ kǒo ixayo̱ʼvi̱ña xíʼinna tá ná ya̱ʼana nu̱ú tu̱ndóʼo tá ná ndakanixi̱nína xa̱ʼa̱ ña̱ ndakiʼinna chí nu̱únínu ta saátu tá ná kunda̱a̱-inina ña̱ kivi kuniñúʼu Ndióxi̱ ña̱yóʼo ña̱ sanáʼa̱rana ña̱ kundeé-inina. Tá ná kundiku̱ntu miíyó consejo ña̱ ta̱xi ta̱ Pablo ndaʼa̱ na̱ hebreo, saá kúú ña̱ kundeé-iniyó nda̱a̱ ná kixaa̱ ki̱vi̱ ña̱ ndiʼi-xa̱ʼa̱ ñuyǐví yóʼo (Heb. 3:14).