Pregunta ña̱ kéʼé na̱ káʼvi tutu yóʼo

Tá ni̱ka̱ʼa̱n ta̱ Jesús ndáa ki̱ʼva ndakaʼánna xa̱ʼa̱ra, ¿ndáa míí xi̱ñuʼu na̱ 70 discípulo na̱ ni̱ka̱ʼa̱nra xíʼin ña̱ ku̱ʼu̱nna natúʼunna xa̱ʼa̱ Ndióxi̱? ¿Á sa̱ndákoonara?

Kǒoví na̱ 70 discípulo níxi̱yo xíʼin ta̱ Jesús tá ni̱ka̱ʼa̱nra ndáa ki̱ʼva ndakaʼánna xa̱ʼa̱ra, soo kǒo xíniñúʼu ndakanixi̱níyó ña̱ sa̱ndákoonara á ña̱ kǒo nda̱kúka níxi̱yo inina xíʼin Jehová. Saáchi tá ke̱ʼéra ña̱yóʼo xíʼin na̱ apóstol kuití xi̱kuni̱ra koora.

Xi̱kusi̱íva-ini ta̱ Jesús xíʼin ña̱ xi̱keʼé na̱ 12 apóstol ta saátu xíʼin ña̱ xi̱keʼé na̱ 70 discípulo. Ku̱a̱ʼáníva ni̱xi̱yo na̱ discípulo ta̱ Jesús, soo 12 kuitína nda̱kaxinra ña̱ koona apóstol (Luc. 6:​12-16). Ñuu Galilea xi̱ndikaa̱ra “tasaá sa̱ndátakara u̱xu̱ u̱vi̱ saá na̱ apóstolra” ta “chi̱ndaʼárana ña̱ ku̱ʼu̱nna natúʼunna xa̱ʼa̱ Reino Ndióxi̱ xíʼin ña̱ sandáʼana na̱ kúúmií kue̱ʼe̱” (Luc. 9:​1-6). Tándi̱ʼi, chí sur ña̱ Judea “nda̱kaxinra inka 70 na̱ discípulo ta chi̱ndaʼára u̱vi̱ tá u̱vi̱na ña̱ ku̱ʼu̱nna ndiʼi ñuu” (Luc. 9:51; 10:1). Ña̱kán, ndiʼi ñuu nu̱ú xi̱natúʼunna xa̱ʼa̱ra ni̱xi̱yo na̱ discípulora.

Ndiʼi na̱ judío na̱ xi̱kandíxa ña̱ xi̱kaʼa̱n ta̱ Jesús xi̱keʼéna ña̱ pascua ku̱i̱ya̱ tá ku̱i̱ya̱ xíʼin na̱ veʼena (Éx. 12:​6-11, 17-20). Tá si̱lóʼo kúma̱ní ña̱ kuvi ta̱ Jesús ni̱xa̱ʼa̱nra ñuu Jerusalén xíʼin na̱ apóstolra. Soo, kǒo níka̱ʼa̱nra xíʼin ndiʼi na̱ discípulora na̱ xi̱ndoo Judea, Galilea xíʼin Perea ña̱ ku̱ʼu̱nna kuxuna ña̱ Pascua xíʼinra. Sananí xíʼin na̱ apóstol kuití xi̱kuni̱ra koora ki̱vi̱ kán. Xa̱ʼa̱ ña̱kán, ni̱ka̱ʼa̱nra xíʼin na̱ apóstolra: “Kúsi̱íní-inii̱ ña̱ kuxui̱ vikó ña̱ Pascua yóʼo xíʼinndó, tá kúma̱níka kixaa̱ tu̱ndóʼo nu̱úi̱...” (Luc. 22:15).

¿Nda̱chun xi̱kuni̱ ta̱ Jesús koo mitúʼunra xíʼinna? Saáchi si̱lóʼo xi̱kuma̱ní ña̱ kaʼnínara chi “ndikachi sa̱na̱ Ndióxi̱, ta̱ sándiʼi-xa̱ʼa̱ ku̱a̱chi ñuyǐví yóʼo” ni̱xi̱yora (Juan 1:29). Ta̱ Jesús xi̱niñúʼu kuvira ñuu Jerusalén chi kán xi̱taxina ña̱ʼa ndaʼa̱ Jehová. Ñuú tá ke̱e na̱ israelita ñuu Egipto xi̱xina ndikachi chi tíyóʼo xi̱ndanaʼa̱rí ña̱ ni̱sa̱ñána, soo ndáyáʼviníkava ña̱ ke̱ʼé ta̱ Jesús chi ta̱vára miíyó ndaʼa̱ ku̱a̱chi (1 Cor. 5:​7, 8). Xa̱ʼa̱ ña̱ ni̱xi̱ʼi̱ ta̱ Jesús, na̱ 12 apóstol “nda̱a̱ táki̱ʼva íyo yu̱u̱ ña̱ ki̱xáʼa xa̱ʼa̱” congregación saá ni̱xi̱yona (Efes. 2:​20-22). Ndáyáʼviní ña̱yóʼo saáchi nama̱ xa̱ʼa̱ Jerusalén ña̱ yi̱i̱ “íyo 12 yu̱u̱, ta nu̱ú ña̱yóʼo ni̱ka̱ʼyi̱ 12 saá ki̱vi̱ na̱ 12 apóstol tí ndikachi” (Apoc. 21:​10-14). Na̱ apóstol na̱ nda̱kú-ini xíʼin Jehová xa̱a̱na keʼéna iin chiñu ña̱ ndáyáʼviní ña̱ va̱ʼa xi̱nu ña̱ kúni̱ra. Xa̱ʼa̱ ña̱yóʼo, ta̱ Jesús xi̱kuni̱ra ña̱ koona xíʼinra ña̱ kuxuna ña̱ Pascua, ta tándi̱ʼi ni̱ka̱ʼa̱nra xíʼinna ndáa ki̱ʼva ndakaʼánna xa̱ʼa̱ra.

Na̱ 70 discípulo xíʼin inkakana kǒo níxi̱yona xíʼin ta̱ Jesús ñuú saá. Soo, ndiʼiva na̱ discípulo na̱ nda̱kú íyo ini xíʼin Jehová ndakiʼinna ña̱ va̱ʼa xa̱ʼa̱ ña̱ ke̱ʼé ta̱ Jesús. ¿Nda̱chun? Chi ndiʼi na̱ nda̱kaxin Ndióxi̱ ku̱ʼu̱n chí ndiví xa̱a̱na kaʼndachíñuna ti̱xin Reino Ndióxi̱, ta xa̱ʼa̱ ña̱yóʼo kúú ña̱ ni̱ka̱ʼa̱n ta̱ Jesús xíʼin na̱ apóstolra ñuu saá (Luc. 22:​29, 30).