Ndakaʼán xa̱ʼa̱ ña̱ ndáyáʼvi ka̱ʼviún

Ta̱ xa̱a̱ sa̱ndíʼún ka̱ʼviún iin tutu, ¿á íxayo̱ʼvi̱ña xíʼún ndakaʼún xa̱ʼa̱ña? Ndiʼivayó ndóʼo saá sava yichi̱ ña̱kán, ¿ndáaña kivi keʼéyó? Ña̱ kivi keʼéyó kúú ña̱ ndakaʼányó xa̱ʼa̱ ña̱ ndáyáʼvika ña̱ ka̱ʼviyó.

Tá xa̱a̱ káʼviún tavá tiempo ña̱ ndakanixi̱níún xa̱ʼa̱ ña̱ ndáyáʼvi ña̱ xa̱a̱ sa̱kuaʼún. Ña̱yóʼo kúú ña̱ ni̱ka̱ʼa̱n ta̱ apóstol Pablo xíʼin na̱ hermano na̱ ka̱ʼvi carta ña̱ chi̱ndaʼára. Ta̱ Pablo ni̱ka̱ʼa̱nra xíʼinna: “Mií ña̱ ndáyáʼvika ña̱ káʼa̱nyó xa̱ʼa̱ kúú ña̱yóʼo” (Heb. 8:1). Ña̱yóʼo chi̱ndeétáʼanña xíʼinna ña̱ kunda̱a̱-inina ndáaña xi̱ka̱ʼa̱nra xíʼinna.

Tá xa̱a̱ káʼviún tavá u̱xu̱ minuto ña̱ ndakanixi̱níún xa̱ʼa̱ mií ña̱ ndáyáʼvika ña̱ káʼviún. Tá kǒo ndákaʼún xa̱ʼa̱ña kivi kaʼvi tukún subtítulo á saátu kivi kaʼviún nu̱ú kíxáʼa iin tá iin párrafo. Tá sa̱kúaʼún iin ña̱ xa̱á, ka̱ʼa̱n xíʼin iinna xa̱ʼa̱ ña̱ ndákaʼún ta kǒo kotokaún nu̱ú tutu. Tá ná kaʼvi tukún ña̱ kúni̱ún ndakaʼún xa̱ʼa̱, saá kǒo nandósó-iniún xa̱ʼa̱ña tasaá kotoún ndáa ki̱ʼva keʼún ña̱ káʼa̱nña.