¿Á ndákaʼún xa̱ʼa̱ ña̱yóʼo?

¿Á ka̱ʼviún ndiʼi Tutu Ña̱ Nátúʼun xíʼinyó? Koto á kuchiñún ndakuiún ndiʼi ña̱yóʼo:

¿Á vií kéʼé Jehová xíʼin ná ñaʼá?

Va̱ʼaní yichi̱ chínúu Jehová nu̱úyó saáchi viíní kéʼéra xíʼin ná ñaʼá. Xíniso̱ʼora ña̱ káʼa̱nná xíʼinra, ndíʼi̱-inira xa̱ʼa̱ ña̱ ndóʼoná, ta ndáa-inira ña̱ viíníva kéʼéná chiñu ña̱ táxira ndaʼa̱ná (w24.01, página 15 xíʼin 16).

¿Ndáa ki̱ʼva xíniñúʼu kunda̱a̱-iniyó xíʼin ña̱ káʼa̱n Efesios 5:7 nu̱ú káchiña: “Va̱ása keʼéndó nda̱a̱ táki̱ʼva kéʼé na̱yóʼo”?

Ta̱ apóstol Pablo ni̱ka̱ʼa̱nra ña̱ ná kiʼinníyó kuenta ta ná kǒo kitáʼanyó xíʼin na̱ yiví na̱ kǒo ndásakáʼnu Jehová, chi kivi ka̱ʼa̱nna xíʼinyó ña̱ keʼéyó ña̱ kini tasaá ixayo̱ʼvi̱níkaña xíʼinyó kuniso̱ʼoyó ña̱ káʼa̱n Jehová. Soo kǒo xíniñúʼu kiʼin kuitíyó kuenta xíʼin na̱ yiví na̱ kítáʼanyó xíʼin, chi saátu xíniñúʼu kiʼinyó kuenta xíʼin ña̱ va̱xi nu̱ú Internet (w24.03, página 22 xíʼin 23).

¿Ndáaña vatá kúú ña̱ kǒo xíniñúʼu kuniso̱ʼoyó ni kaʼviyó?

Ku̱a̱ʼána kivi ka̱ʼa̱nna ña̱ vatá xíʼinyó xa̱ʼa̱ na̱ ñuu Ndióxi̱, sana na̱ migoyó kivi chindaʼána iin correo nu̱úyó ña̱ chi̱ndaʼá inka na̱ yiví nu̱úna. Ta nu̱ú ña̱yóʼo sana va̱xi ña̱ káʼa̱n na̱ apóstata, na̱ káʼa̱n ña̱ kúni̱na sakúaʼana xa̱ʼa̱ Ndióxi̱ soo su̱ví ña̱ ndixaví kúú ña̱yóʼo (w24.04, página 12).

¿Ndáaña xíni̱yó ta ndáaña kǒo xíni̱yó xa̱ʼa̱ ki̱ʼva ña̱ ndatiin Jehová ku̱a̱chi xíʼin ta̱ rey Salomón, xíʼin na̱ yiví na̱ ni̱xi̱ʼi̱ ñuu Sodoma xíʼin Gomorra ta saátu xíʼin na̱ ni̱xi̱ʼi̱ tá ku̱un sa̱vi̱ kini?

Kǒo xíni̱yó á ndataku na̱ yiví kán, soo kúnda̱a̱-iniyó ña̱ kúndáʼviníva-ini Jehová xínira na̱ yiví ta miíra kúú ta̱ xíni̱ ndáaña keʼéra (w24.05, párrafo 3 xíʼin 4).

Nda̱a̱ táki̱ʼva íyo iin “yu̱u̱” saá íyo Jehová, ¿ndáaña sánáʼa̱ ña̱yóʼo miíyó? (Deut. 32:4).

Kivi ka̱ʼa̱nyó xíʼin Jehová ña̱ kundaara miíyó. Kivi kundaa-iniyóra chi ndiʼi tiempo sáxi̱nura ña̱ káʼa̱nra. Saátu kǒo násamara ki̱ʼva ña̱ íyora, ni ña̱ xa̱a̱ ni̱ka̱ʼa̱nra va̱ása nása̱maña (w24.06, página 26 nda̱a̱ 28).

¿Ndáaña chindeétáʼan xíʼinyó ña̱ ka̱anyó tá xáa̱yó iin congregación xa̱á?

Ña̱ kundaa-iniyó Jehová, chi miíra chindeétáʼan xíʼinyó nda̱a̱ táki̱ʼva chi̱ndeétáʼanra xíʼin na̱ xi̱ndasakáʼnu miíra tá ya̱chi̱. Saátu ná kǒo chitáʼanyó congregación nu̱ú xi̱ñuʼuyó tá ya̱chi̱ xíʼin congregación nu̱ú sa̱kán ni̱xa̱a̱yó. Va̱ʼaka ná chindeétáʼanyó xíʼin na̱ hermano, ta saátu ná ndukúyó na̱ koo migoyó (w24.07, página 26 nda̱a̱ 28).

¿Ndáaña sákuaʼayó xíʼin u̱ni̱ ilustración ña̱ va̱xi nu̱ú Mateo 25?

Ilustración ña̱ káʼa̱n xa̱ʼa̱ ti̱xúʼú xíʼin ndikachi sándakaʼánña miíyó ña̱ xíniñúʼu nda̱kú koo iniyó xíʼin Jehová. Ilustración ña̱ káʼa̱n xa̱ʼa̱ 10 ná si̱ʼí kúa̱an sándakaʼánña miíyó ña̱ xíniñúʼu kiʼinyó kuenta ta kunditoní nu̱úyó. Ta ilustración ña̱ káʼa̱n xa̱ʼa̱ xu̱ʼún sánáʼa̱ña miíyó ña̱ kǒo xíniñúʼu sandákooyó ña̱ kachíñuyó nu̱ú Ndióxi̱ (w24.09, página 20 nda̱a̱ 24).

¿Nda̱saa súkun ni̱xi̱yo cuarto loʼo ña̱ ni̱xi̱yo chí yéʼé templo ña̱ i̱xava̱ʼa ta̱ Salomón?

Nu̱ú sava manuscrito ña̱ yatání, 2 Crónicas 3:4 káʼa̱nña ña̱ “120 codos” súkun ni̱xi̱yoña. Ña̱yóʼo kúni̱ kachiña ña̱ 53 metro súkun ni̱xi̱yoña. Soo nu̱ú inka manuscrito káʼa̱nña ña̱ “20 codos” súkunña, ña̱yóʼo kúni̱ kachiña 9 metro súkun ni̱xi̱yoña. Ña̱kán 9 metro súkun ni̱xi̱yoña chi va̱ása ndíka̱ní níxi̱yo nama̱ ña̱ templo ta̱ Salomón (w24.10, página 31).

¿Ndáaña kúni̱ kachi ña̱ “iin kuití xíniñúʼu koo ñá síʼi ta̱ siervo ministerial”? (1 Tim. 3:12).

Iin kuití xíniñúʼu koo ñá síʼi ta̱ siervo ministerial ta kǒo xíniñúʼu ku̱su̱nra xíʼin inka ñaʼá. Saátu kǒo xíniñúʼu ka̱ʼa̱n livira xíʼin inka ná ñaʼá (w24.11, página 19).

Tá ni̱ka̱ʼa̱n ta̱ Jesús ña̱ va̱xi nu̱ú Juan 6:​53, ¿nda̱chun va̱ʼa kúnda̱a̱-iniyó ña̱ kǒo níka̱ʼa̱nra xa̱ʼa̱ ndáa ki̱ʼva ndakaʼányó xa̱ʼa̱ra tá ná kuvira?

Nu̱ú Juan 6:53 ta̱ Jesús ni̱ka̱ʼa̱nra ña̱ kuxuna ku̱ñura xíʼin ña̱ koʼona ni̱i̱ra, ta tu̱ʼun yóʼo ni̱ka̱ʼa̱nraña xíʼin na̱ judío chí ñuu Galilea ta ña̱yóʼo ku̱uña ku̱i̱ya̱ 32 tiempo vitin, soo na̱ judío yóʼo ta̱ʼán na̱ʼa̱vína ña̱ kándíxana ta̱ Jesús. Soo tá ni̱ya̱ʼa iin ku̱i̱ya̱ saáví ni̱ka̱ʼa̱n ta̱ Jesús xa̱ʼa̱ ndáa ki̱ʼva ndakaʼányó xa̱ʼa̱ra tá ná kuvira, ta ña̱yóʼo ni̱ka̱ʼa̱nraña ñuu Jerusalén, ta na̱ ni̱ka̱ʼa̱nra xíʼin kúú na̱ apóstolra chi na̱yóʼo kúú na̱ kaʼndachíñu xíʼinra chí ndiví (w24.12, página 10 xíʼin 11).