NÁ KUNDOO TU̱ʼVAYÓ
Ku̱a̱ʼa̱n ndíʼi-xa̱ʼa̱ ña̱ íyo nu̱ú ñuʼú yóʼo | ¿Ndáaña káʼa̱n Biblia xa̱ʼa̱ ña̱yóʼo?
“Kamaní ku̱a̱ʼa̱n ndíʼi-xa̱ʼa̱ ña̱ʼa ña̱ íyo nu̱ú ñuʼú yóʼo. Ndákutú ti̱kui̱í ñuu náʼnu. Ndeéní niʼní. Ndeéní kúun sa̱vi̱. Ku̱a̱ʼa̱n ndíʼi ti̱kui̱í. Ku̱a̱ʼa̱n ndíʼi-xa̱ʼa̱ ku̱a̱ʼání planta ta saátu kití. Su̱ví ña̱ vatá kúú ña̱ káʼi̱n chi ña̱ nda̱a̱va kúúña. Ta ña̱yóʼo kúuña xa̱ʼa̱ ña̱ va̱ása xíín na̱ chíñu nasamana ley ña̱ káʼa̱n xa̱ʼa̱ ndáa ki̱ʼva kuniñúʼuyó ña̱ íyo nu̱ú ñuʼú yóʼo, káchi na̱ científico” (Ña̱ nda̱kuiin ta̱ António Guterres, ta̱ kúú secretario general na̱ Naciones Unidas, xa̱ʼa̱ informe na̱ Grupo Intergubernamental de Expertos sobre el Cambio Climático tá 4 tí abril ku̱i̱ya̱ 2022).
“Na̱ científico káʼa̱nna ña̱ ti̱xin ña̱ loʼo ku̱i̱ya̱ kivi ndiʼi-xa̱ʼa̱ ndiʼi ña̱ʼa ña̱ íyo nu̱ú 423 parque nacional ña̱ íyo chí Estados Unidos xa̱ʼa̱ ña̱ ndeéní niʼní. Ndiʼi tu̱ndóʼo ña̱ kivi sandíʼi-xa̱ʼa̱ parque nacional yóʼo, sana xa̱a̱ káʼvivayó xa̱ʼa̱ña nu̱ú Biblia: tá kúú ña̱ koko yuku̱, ndakutú ti̱kui̱í sava ñuu, nduta ndiʼi hielo, ndakutú ti̱kui̱í tá mar nu̱ú ñuʼú yóʼo ta ndeéníka niʼní koo” (“Caóticas inundaciones en Yellowstone, un aviso de las crisis que vendrán”, The New York Times, 15 tí junio ku̱i̱ya̱ 2022).
¿Á kixa̱a̱ iin ki̱vi̱ ña̱ va̱ása ndiʼi-xa̱ʼa̱ka ña̱ʼa ña̱ íyo nu̱ú ñuʼú yóʼo? Tá saá íyoña, ¿ndáa ki̱ʼva kuu ña̱yóʼo? Koto ndáaña sánáʼa̱ Biblia xa̱ʼa̱ ña̱yóʼo.
Biblia ni̱ka̱ʼa̱nña ña̱ sandíʼi-xa̱ʼa̱na ña̱ʼa ña̱ íyo nu̱ú ñuʼú yóʼo
Ña̱ Biblia káʼa̱nña ña̱ sandíʼi-xa̱ʼa̱ Ndióxi̱ na̱ “sándiʼi-xa̱ʼa̱ ñuʼú” (Apocalipsis 11:18). Ña̱ versículo yóʼo sánáʼa̱ña u̱ni̱ ña̱ʼa miíyó:
1. Na̱ yiví sandíʼi-xa̱ʼa̱na ña̱ʼa ña̱ íyo nu̱ú ñuʼú yóʼo.
2. Kiviva nduvií ña̱ʼa ña̱ xa̱a̱ sa̱ndíʼi-xa̱ʼa̱na.
3. Ndióxi̱ kúú ta̱ kivi ndasavií ndiʼi tu̱ndóʼo yóʼo, ta su̱ví na̱ yiví.
Va̱ʼaníva koo ñuʼú yóʼo chí nu̱únínu
Ña̱ Biblia káʼa̱nña ña̱ “ndiʼi tiempo koo ñuʼú” (Eclesiastés 1:4). Ta ndiʼi tiempo kundoo na̱ yiví nu̱úña.
“Na̱ yiví va̱ʼa kúú na̱ koo nu̱ú ñuʼú, ta ndiʼi tiempo kundoona nu̱úña” (Salmo 37:29).
Nduvií ndiʼi ña̱ʼa ña̱ íyo nu̱ú ñuʼú yóʼo ta liviní kooña.
“Ñuʼú yi̱chí kusi̱íní-iniña, ta yoso̱ yi̱chí kusi̱íní-iniña, ta kuaʼnuña nda̱a̱ táki̱ʼva xáʼnu azafrán” (Isaías 35:1).