¿Á xíniñúʼu ku̱ʼu̱n na̱ cristiano nu̱ú guerra? | ¿Ndáaña káʼa̱n Biblia xa̱ʼa̱ ña̱yóʼo?

Ku̱a̱chi ña̱ íyo chí Ucrania náʼa̱ña ña̱ na̱ níʼi yichi̱ nu̱ú na̱ veʼe-ñu̱ʼu na̱ káʼa̱n kúú cristiano káʼa̱nna xíʼin na̱ yiví ña̱ ná ku̱ʼu̱nna nu̱ú guerra. Koto ndáa ki̱ʼva chíndeétáʼanna xíʼin u̱vi̱ saá país nu̱ú ndíkaa̱ ku̱a̱chi yóʼo:

• “Kúni̱ndi̱ taxindi̱ tíxa̱ʼvi ndaʼa̱ ndiʼi na̱ kánitáʼan xíʼin na̱ sáa̱-ini xíni ñuu Ucrania […]. Ndiʼi tiempo koondi̱ xíʼinndó, ka̱ʼa̱nndi̱ xíʼin Ndióxi̱ xa̱ʼa̱ndó ta saátu chindeétáʼanndi̱ xíʼinndó” (metropolitano Epifanio I de Kiev, The Jerusalem Post, 16 tí marzo 2022).

• “Tá ki̱vi̱ domingo, ta̱ níʼi yichi̱ nu̱ú Iglesia ortodoxa rusa ta̱xira iin misa ta ni̱ka̱ʼa̱nra xíʼin na̱ soldado ñuu Rusia ña̱ ná kanitáʼanna xa̱ʼa̱ ñuuna ‘nda̱a̱ táki̱ʼva xa̱a̱ xíni̱va̱ʼa na̱ ñuu Rusia keʼéna ña̱yóʼo’. Ta na̱ chíñu na̱ íyo chí Moscú káʼa̱nna ña̱ ná ndakundeé na̱ soldado ku̱ʼu̱nna kanitáʼanna xíʼin na̱ Ucrania” (Reuters, 3 tí abril 2022).

¿Á xíniñúʼu ku̱ʼu̱n na̱ cristiano nu̱ú guerra? ¿Ndáaña káʼa̱n Biblia xa̱ʼa̱ ña̱yóʼo?

Ña̱ káʼa̱n Biblia

Biblia káchiña ña̱ na̱ ndixa ndíku̱n ta̱ Jesucristo va̱ása xáʼa̱nna nu̱ú guerra.

• “Taxiva̱ʼa espadaún, chi ndiʼi na̱ xíniñúʼu espada kuvina xíʼin espada” (Mateo 26:52).

  Tá iin na̱ yiví káʼa̱nna ña̱ va̱ʼava koo guerra á kánitáʼanna nu̱ú ña̱yóʼo, ¿á ndixa náʼa̱na ña̱ kándíxana ña̱ ni̱ka̱ʼa̱n ta̱ Jesús?

• “Xáʼndai̱ iin chiñu xa̱á nu̱úndó: ña̱ ná kuʼvi̱-inindó kunitáʼanndó; nda̱a̱ táki̱ʼva ni̱kuʼvi̱-inii̱ xi̱nii̱ ndóʼó, saátu kuʼvi̱-ini ndóʼó kunitáʼanndó. Tasaá kúú ña̱ kunda̱a̱-ini ndiʼina ña̱ kúúndó discípuloi̱: tá kúʼvi̱-inindó xínitáʼanndó” (Juan 13:34, 35).

  Tá iin na̱ yiví chíndeétáʼanna xíʼin na̱ ku̱a̱ʼa̱n nu̱ú guerra á ku̱a̱ʼa̱nna nu̱ú ña̱yóʼo, ¿á ndixa náʼa̱na ña̱ kúʼvi̱-inina xínina inkana nda̱a̱ táki̱ʼva ni̱ka̱ʼa̱n ta̱ Jesús keʼé na̱ discípulora?

Tá kúni̱kaún kunda̱a̱-iniún xa̱ʼa̱ ña̱yóʼo kaʼvi artículo ña̱ naní “El cristianismo y la guerra: ¿son compatibles?”.

¿Á xíniñúʼu ku̱ʼu̱n na̱ cristiano na̱ ndóo tiempo vitin nu̱ú guerra?

¿Á koo na̱ cristiano na̱ ndóo tiempo vitin na̱ va̱ása ku̱ʼu̱n nu̱ú guerra? Koovana, saáchi Biblia ni̱ka̱ʼa̱nña ña̱ tiempo ña̱ ndóoyó vitin ña̱ naní “ki̱vi̱ nu̱ú ndíʼi”, koo na̱ yiví na̱ xa̱a̱ síín síín ñuu ke̱e na̱ va̱ása sakúaʼaka ku̱ʼu̱n nu̱ú guerra, nda̱a̱ táki̱ʼva sa̱náʼa̱ ta̱ Jesús (Isaías 2:2, 4, nota).

• Ña̱ va̱ʼa kunda̱a̱ka-iniún xa̱ʼa̱ ña̱yóʼo, kaʼvi serie ña̱ artículo ña̱ ka̱na nu̱ú La Atalaya ña̱ naní “¿Qué piensa Dios de las guerras?”.

Si̱lóʼo kúma̱ní ta Jehováa “Ndióxi̱ ta̱ sándi̱ko-ini na̱ yiví”, kuniñúʼura ña̱ kaʼndachíñura ña̱ chindeétáʼanra xíʼin na̱ yiví na̱ yáʼa nu̱ú tu̱ndóʼo á ku̱a̱chi (Filipenses 4:9; Salmo 72:14).

• Ña̱ va̱ʼa kunda̱a̱-iniún ndáa ki̱ʼva keʼéraña, koto video ña̱ naní ¿Ndáa ki̱ʼva kaʼndachíñu Ndióxi̱?