Ña̱ va̱ása kuni mitúʼún, ndukú na̱ koo migoún | Biblia kivi chindeétáʼan xíʼún

Tá ku̱i̱ya̱ 2023, iníísaá ñuyǐví na̱ doctor ki̱xáʼana chíkaa̱níkana ndee̱ ña̱ chindeétáʼanna xíʼin na̱ yiví na̱ kúni mitúʼun. ¿Á kuchiñu na̱ yiví ya̱ʼana nu̱ú ña̱yóʼo?

• Ta̱ doctor Vivek Murthy, ta̱ íyo chí Estados Unidosa káchira: “Tá kúni mitúʼunyó ta kúxíkáyó nu̱ú inka na̱ yiví, ña̱yóʼo kivi sandákavaníkaña-iniyó. Soo íyova ña̱ kivi keʼéyó, ndiʼi ki̱vi̱ kivi chikaa̱yó ndee̱ ña̱ keʼéyó sava ña̱ʼa ña̱ va̱ʼa viíka kutáʼanyó xíʼin inkana”.

Su̱ví xa̱ʼa̱ ña̱ kǒo na̱ kutáʼan xíʼinyó kúú ña̱ kúni mitúʼunyó. Savana kivi kuni mitúʼunna ni tá kítáʼanna xíʼin ku̱a̱ʼání na̱ yiví. Ni nda̱a̱ ndáaka xa̱ʼa̱ kúú ña̱ kúni mitúʼunyó, consejo ña̱ va̱xi nu̱ú Biblia kúú ña̱ kivi chindeétáʼan xíʼinyó, tá kúú ña̱ va̱ʼa viíka kutáʼanyó xíʼin inkana.

Ña̱ káʼa̱n Biblia ña̱ kivi chindeétáʼan xíʼinyó

Viíní natúʼún xíʼin inkana. Ña̱yóʼo va̱ása kúni̱ kachiña ña̱ natúʼun kuitíún xa̱ʼa̱ ña̱ ndóʼún, chi saátu xíniñúʼu kuniso̱ʼún ña̱ nátúʼun inkana xíʼún. Tá ná na̱ʼún ña̱ ndíʼi̱-iniún xa̱ʼa̱ inkana, va̱ʼaníka kutáʼún xíʼinna.

• Ña̱ káʼa̱n Biblia: “Ndakundeéndó kundi̱ʼi̱-inindó xa̱ʼa̱ inkana ta va̱ása kundi̱ʼi̱-inindó xa̱ʼa̱ mií kuitíndó” (Filipenses 2:4).

Ku̱a̱ʼáka ná koo na̱ migoún. Chikaa̱ ndee̱ ña̱ koún migo na̱ xa̱a̱ xi̱kuaʼa̱ á na̱ válíka, na̱ ke̱e inka ñuu á na̱ káʼa̱n inka tu̱ʼun.

• Ña̱ káʼa̱n Biblia: “Kuʼvi̱níka-inindó kunindó” inkana (2 Corintios 6:13).

Ña̱ va̱ʼa kunda̱a̱-iniún ndáa ki̱ʼva viíka kutáʼún xíʼin inkana, kaʼvi artículo ña̱ naní “Cómo saciar la sed de amistad”.