¿Ndáaña ndóʼo na̱ va̱lí se̱ʼún tá xíniñúʼuna internet? | Ndáa ki̱ʼva chíndeétáʼan Biblia xíʼin na̱ íyo se̱ʼe

“Ku̱a̱ʼání na̱ va̱lí kúa̱an xíniñúʼuna internet soo ña̱yóʼo sándi̱ʼiníña-inina á sándakavaña-inina” (Ta̱ Vivek Murthy, director general ña̱ Salud Pública de Estados Unidos. New York Times, 17 tí junio ña̱ ku̱i̱ya̱ 2024).

¿Ndáaña kivi keʼé na̱ íyo se̱ʼe ña̱ va̱ʼa chindeétáʼanna xíʼin na̱ va̱lí se̱ʼena tasaá kǒo ña̱ kundoʼona tá xíniñúʼuna internet? Koto consejo ña̱ va̱xi nu̱ú Biblia.

Ña̱ kivi keʼé na̱ íyo se̱ʼe

Koto ndáaña káʼa̱n Biblia.

“Na̱ ndíchi ndákani va̱ʼa xi̱nína ndáaña keʼéna” (Proverbios 14:15).

Na̱ íyo se̱ʼe kivi ndaka̱xinna á taxina ña̱ kuniñúʼu na̱ va̱lí se̱ʼena internet á va̱ása, saáchi sava ña̱ va̱xi nu̱ú ña̱yóʼo va̱ása va̱ʼaña. Ña̱kán tá kúma̱níka taxiún ña̱ kuniñúʼuna internet, siʼna xíniñúʼu kiʼún kuenta á kivi ixato̱ʼóna hora ña̱ ni̱ka̱ʼún xíʼinna ña̱ kuniñúʼuna internet, ta saátu xíniñúʼu kiʼún kuenta á vií ndáka̱xinna na̱ kítáʼan xíʼinna ta saátu á vií ndáka̱xinna ña̱ kotona.

Tá kúni̱ún kunda̱a̱ka-iniún xa̱ʼa̱ ña̱yóʼo, kaʼvi artículo ña̱ naní, “¿Deberían mis hijos usar redes sociales?” xíʼin “Enséñele a su hijo adolescente a usar con seguridad las redes sociales”.

“Kuniñúʼu viíndó tiempondó, chi su̱ví tiempo va̱ʼaka kúúña vitin” (Efesios 5:16).

Tá ná taxiún ña̱ kuniñúʼu na̱ va̱lí se̱ʼún internet, ka̱ʼa̱n xíʼinna nda̱saa tiempo kuniñúʼuna ña̱yóʼo ta saátu ka̱ʼa̱n xíʼinna nda̱chun kúú ña̱ ndáyáʼviní keʼéna ña̱ káʼún saáchi ña̱yóʼo kundaaña miína. Kiʼin va̱ʼún kuenta ndáaña ndóʼo na̱ va̱lí se̱ʼún tá xíniñúʼuna internet ta nda̱a̱ kivi ka̱ʼún xíʼinna ña̱ loʼoka tiempo kuniñúʼunaña.

Kuniñúʼu video ña̱ naní, Tá kíʼviún nu̱ú Internet kuenta koún ña̱ va̱xi nu̱ú “Video ña̱ dibujo” ña̱ va̱ʼa chindeétáʼún xíʼin na̱ va̱lí se̱ʼún ña̱ kunda̱a̱-inina nda̱chun ndáyáʼviní ña̱ loʼo tiempo kuniñúʼuna internet.

Ña̱ va̱ʼa kunda̱a̱ka-iniún xa̱ʼa̱ ña̱yóʼo

Biblia kachina ña̱ “tiempo nu̱ú ndíʼi” kúú ña̱ ndóoyó vitin (2 Timoteo 3:1-5). Ta saátu táxiña consejo ña̱ kivi chindeétáʼan xíʼinyó tiempo vitin ni xa̱a̱ ku̱a̱ʼání ku̱i̱ya̱ ni̱ka̱ʼyi̱ ña̱yóʼo. Nu̱ú artículo ña̱ naní “Ku̱a̱ʼáníka na̱ va̱lí xa̱ʼa̱ ña̱ ndóʼona kíʼinna kue̱ʼe̱ ña̱ ndákava-ini”, kivi ndani̱ʼún iin lista nu̱ú va̱xi yáʼaka 20 artículo xíʼin video ña̱ kivi chindeétáʼan xíʼin na̱ íyo se̱ʼe ta saátu na̱ va̱lí se̱ʼena.