¿Ndáaña xíniñúʼu keʼéyó ña̱ va̱ʼaní xa̱a̱yó kundooyó?

¿Ndáaña káʼa̱n Biblia xa̱ʼa̱ ña̱yóʼo?

Chí nu̱únínu va̱ása kooka ku̱a̱chi, soo Reino Ndióxi̱ kúú ña̱ saxínu ña̱yóʼo su̱ví ña̱ kéʼé na̱ yiví. Reino Ndióxi̱ chí ndiví íyoña ta ta̱ kúú rey kúú Jesucristo. Koto ndáa ki̱ʼva va̱ʼaní káʼa̱n Biblia xa̱ʼa̱ ña̱ koo chí nu̱únínu.

1. Ndióxi̱ “sándiʼi-xa̱ʼa̱ra ndiʼi ku̱a̱chi nu̱ú iníísaá ñuyǐví” saá xi̱nu ña̱ “kúni̱ra ña̱ kundoo va̱ʼa na̱ yiví ta táxi̱n koo inina” (Salmo 46:9; Lucas 2:14, Biblia Nueva Traducción Viviente).

2. Reino Ndióxi̱ ña̱ íyo chí ndiví kaʼndachíñuña nu̱ú iníísaá ñuʼú ta sandíʼi-xa̱ʼa̱ña ndiʼi ña̱ sákaku ku̱a̱chi, va̱ása ndataʼví-táʼanka na̱ yiví xa̱ʼa̱ ña̱ kúúna na̱ inka ñuu ta inkáchi kundayáʼvi ndiʼina (Daniel 7:14).

3. Biblia káʼa̱nña xa̱ʼa̱ tátayó Jesús, ta̱ kúú Rey ti̱xin Reino Ndióxi̱, ña̱ kúúra “ta̱ sándiʼi-xa̱ʼa̱ ku̱a̱chi”. Miíra kiʼin kuenta ña̱ ná va̱ása ndikóka ku̱a̱chi kooña nu̱ú ñuʼú yóʼo (Isaías 9:6, 7).

4. Ti̱xin Reino Ndióxi̱, ndiʼi na̱ yiví na̱ sákaku ku̱a̱chi ndiʼi-xa̱ʼa̱na, saáchi Ndióxi̱ “sáa̱-inira xínira na̱ kútóo keʼé ña̱ va̱ása va̱ʼa” (Salmo 11:5; Proverbios 2:22).

5. Ndióxi̱ sánáʼa̱ra na̱ ndásakáʼnu miíra ña̱ viíní ná kundoona. Biblia káʼa̱nña xa̱ʼa̱ ña̱yóʼo ndáa ki̱ʼva xi̱nuña chi káʼa̱nña: “Espadana, ndasanaña ya̱ta̱ ta lanzana, ndasanaña kiʼí. Ndiʼi na̱ ñuu va̱ása kanitáʼankana xíʼin espada ni va̱ása sakúaʼakana ku̱ʼu̱nna nu̱ú ku̱a̱chi ña̱ kanitáʼanna” (Isaías 2:3, 4).

Ku̱a̱ʼání na̱ testigo Jehová na̱ ndóo nu̱ú iníísaá ñuʼú xa̱a̱ ku̱a̱ʼa̱n sákuaʼana ña̱ viíní kundoona xíʼin inka na̱ yiví (Mateo 5:9). Xa̱a̱ síín síín tu̱ʼun káʼa̱nndi̱ ta xa̱a̱ síín síín ñuu ke̱endi̱, ta yáʼaka dosciento treinta país xíʼin territorio íyondi̱ ta nda̱a̱ ni iinndi̱ va̱ása ku̱ʼu̱n nu̱ú ku̱a̱chi ña̱ kaʼníndi̱ na̱ yiví.