¿Á xíniñúʼu ndasakáʼnuyó imagen?
Ña̱ káʼa̱n Biblia xa̱ʼa̱ ña̱yóʼo
Va̱ása. Iin enciclopedia católica káʼa̱nña xa̱ʼa̱ ley ña̱ ta̱xi Ndióxi̱ ndaʼa̱ na̱ ñuu Israel, ña̱yóʼo káchiña: “Íyo ku̱a̱ʼání texto ña̱ náʼa̱ nu̱úyó ña̱ va̱ása níxiniñúʼuna imagen ña̱ ndasakáʼnuna Ndióxi̱ ta̱ nda̱a̱” (New Catholic Encyclopedia). Ná kotoyó sava versículo ña̱ káʼa̱n xa̱ʼa̱ ña̱yóʼo.
Nu̱ú Éxodo 20:4, 5 káchiña: “Va̱ása xíniñúʼu ixava̱ʼún nda̱a̱ ni iin ña̱ʼa ña̱ náʼa̱ nda̱a̱ táki̱ʼva náʼa̱ ña̱ íyo chí ndiví, ña̱ íyo nu̱ú ñuʼú á ña̱ íyo ti̱xin ti̱kui̱í. Va̱ása kuxítíún nu̱úña ta ni va̱ása taxiún saxínu̱na-iniún ña̱ ndasakáʼnúnña, saáchi yi̱ʼi̱ Jehová Ndióxi̱ún kúni̱i̱ ña̱ iinlá miíi̱ ná ndasakáʼnún”. Xa̱ʼa̱ ña̱ kúni̱ Ndióxi̱ ña̱ iinlá miíra ná ndasakáʼnuyó, ña̱yóʼo náʼa̱ña ña̱ kǒo kútóora ña̱ ndasakáʼnuyó imagen á inkaka ña̱ʼa.
Nu̱ú Isaías 42:8, Ndióxi̱ káchira: “Va̱ása taxii̱ ña̱ ixato̱ʼóna inkana nu̱úi̱ ta ni va̱ása taxii̱ ña̱ ndasakáʼnuna inkaka ña̱ʼa ña̱ i̱xava̱ʼana” (Scío de San Miguel, segunda edición, ortografía actualizada). Ña̱kán Ndióxi̱ kǒo kúni̱ra ña̱ kuniñúʼuyó imagen ña̱ ndasakáʼnuyóra. Tá i̱xava̱ʼa na̱ israelita iin si̱ndi̱ki̱ loʼo tí oro ña̱ ndasakáʼnuna Ndióxi̱, Jehová ni̱ka̱ʼa̱nra ña̱ “iin ku̱a̱chi ndeéní” kúú ña̱ ni̱ki̱ʼvina (Éxodo 32:7-9, La Palabra de Dios para Todos).
Nu̱ú Hechos 17:29 káchiña: “Va̱ása xíniñúʼu ndakanixi̱níyó ña̱ íyo Ndióxi̱ nda̱a̱ táki̱ʼva íyo ña̱ oro, ña̱ plata á yu̱u̱, á nda̱a̱ ndáaka ña̱ʼa ña̱ íxava̱ʼa mií na̱ yiví”. Na̱ veʼe-ñu̱ʼu vatá xíniñúʼuna imagen ña̱ kéʼé na̱ yiví tá ndásakáʼnuna Ndióxi̱. Soo nda̱a̱ táki̱ʼva káʼa̱n Biblia na̱ ndixa ndásakáʼnu Ndióxi̱ ta̱ nda̱a̱, ndiʼi ña̱ kéʼéna, kéʼénaña xa̱ʼa̱ ña̱ kándíxana Ndióxi̱ ta su̱ví xa̱ʼa̱ ña̱ʼa ña̱ xítona (2 Corintios 5:7).
Nu̱ú 1 Juan 5:21 káʼa̱nña xíʼinyó: “Ndóʼó na̱ se̱ʼe miíi̱, kiʼinníndó kuenta ña̱ kǒo ndasakáʼnundó nda̱a̱ ni iin ña̱ʼa ña̱ ndásakáʼnu na̱ yiví”. Ña̱kán tá káʼviyó nu̱ú Biblia xa̱ʼa̱ ley ña̱ ta̱xi Ndióxi̱ ndaʼa̱ na̱ ñuu Israel ta saátu na̱ cristiano, xíʼin ña̱yóʼo kúnda̱a̱-iniyó ña̱ vatáva kúú ña̱ sánáʼa̱na tá káʼa̱nna ña̱ xíniñúʼu kuniñúʼuyó imagen á inkaka ña̱ʼa ña̱ ndasakáʼnuyó Ndióxi̱.