¿Ndáaña kúú alma?

Ña̱ káʼa̱n Biblia xa̱ʼa̱ ña̱yóʼo

Tu̱ʼun hebreo néfesch xíʼin tu̱ʼun griego psykjé, sa̱ndáya̱ʼanaña nu̱ú Biblia alma. Tu̱ʼun hebreo kúni̱ kachiña “kití á na̱ yiví na̱ ndákiʼin ta̱chí”, ta tu̱ʼun griego kúni kachiña “iin ña̱ táku”, á “iin na̱ yiví”.a Ña̱kán, kivi kachiyó tu̱ʼun alma káʼa̱nña xa̱ʼa̱ ña̱ táku kití á na̱ yiví, ta va̱ása káʼa̱nña xa̱ʼa̱ iin ña̱ ndíka̱a̱-iniyó ta tákukaña tá xa̱a̱ xíʼi̱yó. Ná kotoyó sava texto ña̱ va̱xi nu̱ú Biblia ña̱ káʼa̱n xa̱ʼa̱ ña̱yóʼo.

• Tá i̱xava̱ʼa Jehová ta̱ Adán, ta̱a ta̱ nu̱ú, Biblia káchiña ña̱ ki̱xáʼara tákura (Génesis 2:7). Ña̱yóʼo kúni̱ kachiña ta̱ Adán va̱ása níndakiʼinra iin alma, chi ni̱xa̱a̱ra ku̱ura iin alma, ña̱yóʼo kúni̱ kachina ña̱ ni̱xa̱a̱ra ku̱ura iin na̱ yiví.

• Biblia káchiña ña̱ alma kivi tiinña iin na̱ yiví na̱ xa̱a̱ ni̱xi̱ʼi̱ (Levítico 5:2, Jünemann), kivi kuxuña (Levítico 7:20, Katznelson), kivi kachíñuña (Levítico 23:30, Huerin), kivi kuni̱níña kuxuña ku̱ñu (Deuteronomio 12:20, Nácar-Colunga, 1974) ta kivi kandíxaña ley (Romanos 13:1, Reina-Valera, 1909). Iinlá na̱ yiví kúú na̱ kivi keʼé ndiʼi ña̱yóʼo.

¿Á tákuña ndiʼi tiempo?

Va̱ása. Ña̱ alma kivi kuviña. Ku̱a̱ʼání texto ña̱ va̱xi nu̱ú Biblia náʼa̱ña ña̱ saá íyoña. Yóʼo va̱xi savaña.

• Biblia káchiña: “Na̱ kéʼé ku̱a̱chi, na̱kán kúú na̱ kuvi” (Ezequiel 18:4, 20).

• Tá káʼa̱nña xa̱ʼa̱ castigo ña̱ nda̱kiʼin na̱ ñuu Israel tá ni̱ki̱ʼvina iin ku̱a̱chi ndeé, Ley xi̱ka̱ʼa̱nña: “Na̱ ke̱ʼé ña̱yóʼo xíniñúʼu kuvina” (Éxodo 12:15, 19; 31:14, Reina-Valera, 1909; Levítico 7:20, 21, 27, Biblia de Ferrara). Ta saátu nu̱ú Levítico 19:8, La Biblia de las familias católicas káʼa̱nña xa̱ʼa̱ castigo yóʼo ta káchiña: “Ña̱ alma kán xíniñúʼu kuviña”.

• Sava versículo ña̱ va̱xi nu̱ú Biblia xíniñúʼuña tu̱ʼun “alma ña̱ ni̱xi̱ʼi̱” ña̱ káʼa̱nña xa̱ʼa̱ iin ku̱ñu na̱ yiví na̱ xa̱a̱ ni̱xi̱ʼi̱ (Levítico 21:11; Números 6:6). Ni ku̱a̱ʼá nu̱ú Biblia sa̱ndáya̱ʼana “ku̱ñu ña̱ ni̱xi̱ʼi̱” á “na̱ yiví na̱ ni̱xi̱ʼi̱”, nu̱ú tu̱ʼun hebreo ña̱ ni̱ka̱ʼyi̱ Biblia va̱xi tu̱ʼun néfesch, ña̱yóʼo kúni̱ kachiña, “alma”.

Alma xíʼin ña̱ táku

Nu̱ú Biblia, tu̱ʼun alma saátu kúni kachiña ña̱ táku. Tá kúú, nu̱ú Job 33:22 tu̱ʼun hebreo ña̱ “alma” (néfesch) ña̱yóʼo xíniñúʼunaña ña̱ va̱ʼa ka̱ʼa̱nna xa̱ʼa̱ ña̱ “táku”. Ta sava yichi̱ tá káʼa̱nña xa̱ʼa̱ iin na̱ yiví na̱ si̱lóʼo kuvi, Biblia káʼa̱nña ña̱ “almana” si̱lóʼo ndiʼi-xa̱ʼa̱ña (Éxodo 4:19; Jueces 9:17; Filipenses 2:30).

Ña̱ kúnda̱a̱-iniyó ndáa ki̱ʼva xíniñúʼuna tu̱ʼun alma chíndeétáʼanña xíʼinyó ña̱ viíka kunda̱a̱-iniyó xíʼin sava texto ña̱ va̱xi nu̱ú Biblia. Tá kúú, nu̱ú Génesis 35:18 káʼa̱nña ña̱ alma iin ñaʼá ki̱xáʼaña “ki̱taña”, á nda̱a̱ táki̱ʼva sándaya̱ʼa ña̱ versión Torres Amat ña̱yóʼo, ña̱ “ki̱xáʼa kítaña”. Ña̱yóʼo náʼa̱ña ña̱ táku ñá ñaʼá kán ku̱a̱ʼa̱n ndíʼiña. Ña̱kán, sava versículo nu̱ú Biblia káchiña ñá ñaʼá kán “ñá xa̱a̱ ku̱a̱ʼa̱n xíʼi̱va kúúñá” (La Biblia Latinoamérica, 2011).

¿Ndáa míí ka̱na ña̱ kándíxana ña̱ alma ña̱ va̱ása kívi kuviña?

Ku̱a̱ʼá na̱ religión na̱ káʼa̱n kúú cristiano kándíxana ña̱yóʼo soo Biblia va̱ása sánáʼa̱ña ña̱yóʼo chi na̱ griego na̱ xi̱ndoo tá ya̱chi̱ kúú na̱ xi̱kandíxa ña̱yóʼo. Ña̱ Diccionario enciclopédico del Cristianismo káchiña: “Na̱ griego na̱ xi̱ndoo tá ya̱chi̱ kúú na̱ xi̱kandíxa ña̱ íyo alma ta xi̱sanáʼa̱na xa̱ʼa̱ña, nda̱a̱ táki̱ʼva xi̱ka̱ʼa̱nna, ku̱ñu na̱ yiví (sōma) síín íyoña nu̱ú alma (psychḗ). Soo ña̱ Biblia, káxi káʼa̱nña xa̱ʼa̱ ña̱yóʼo ña̱ su̱ví u̱vi̱ kúúña chi iinláva kúúña”.

Va̱ása kútóo Ndióxi̱ ña̱ ná ndasaka̱ ña̱ sánáʼa̱ra xíʼin ña̱ ndákanixi̱ní na̱ yiví, tá kúú ña̱ kándíxana ña̱ va̱ása kivi kuvi ña̱ alma. Biblia káchiña: “Kuentaní koondó ña̱ va̱ʼa ná kǒo sandáʼvi na̱ ñuyǐví ndóʼó xíʼin tu̱ʼun ña̱ ndíchi ña̱ káʼa̱nna ta saátu xíʼin tu̱ʼun vatá ña̱ va̱ása ndáyáʼvi.” (Colosenses 2:8.)