¿Ndáaña kúú ña̱ ndatakuna?

Ña̱ káʼa̱n Biblia xa̱ʼa̱ ña̱yóʼo

Tu̱ʼun griego anástasis, ña̱ sa̱ndáya̱ʼana nu̱ú Biblia ña̱ “ndatakuna” káʼa̱nña xa̱ʼa̱ “ña̱ ndakundichina á ña̱ ndako̱o tukuna”. Tá ná ndataku iin na̱ yiví, tá íyo na̱ ndaniʼina saá koona; ta ndikóna koona nda̱a̱ táki̱ʼva ni̱xi̱yona tá kúma̱níka kuvina (1 Corintios 15:12, 13).

Tu̱ʼun ndataku va̱ása va̱xiña nu̱ú ña̱ Antiguo Testamento, á ña̱ naní Escrituras Hebreas. Soo nu̱ú táʼví ña̱ Biblia yóʼo káʼa̱nvaña xa̱ʼa̱ ña̱ ndatakuna. Tá kúú Ndióxi̱ ni̱ka̱ʼa̱nra xíʼin ta̱ profeta Oseas, “ndatavai̱na nu̱ú ñúʼu na̱ ni̱xi̱ʼi̱, ta sandátakui̱ na̱ ni̱xi̱ʼi̱” (Oseas 13:14; Job 14:13-15; Isaías 26:19; Daniel 12:2, 13).

¿Ndáa mií ndataku na̱ ni̱xi̱ʼi̱? Sava na̱ yiví ndatakuna chí ndiví ña̱ koona rey ta kaʼndachíñuna xíʼin ta̱ Cristo (2 Corintios 5:1; Apocalipsis 5:9, 10). Biblia káʼa̱nña na̱yóʼo kúú “na̱ siʼnaka ndátaku” (Apocalipsis 20:6; Filipenses 3:11). Ña̱yóʼo náʼa̱ña ña̱ koo inka na̱ ndataku. Ta inkana na̱ ndataku yóʼo ku̱a̱ʼání koona ta koona nu̱ú ñuʼú (Salmo 37:29).

¿Ndáaña kúu tá ndátaku iin na̱ yiví? Ndióxi̱ ta̱xira ndeé ndaʼa̱ ta̱ Jesús ña̱ sandátakura na̱ ni̱xi̱ʼi̱ (Juan 11:25). Ta̱ Jesús kuniñúʼura ndeé yóʼo ña̱ va̱ʼa sandátakura “ndiʼi na̱ ni̱xi̱ʼi̱ na̱ ñúʼu ti̱xin ya̱vi̱” ta na̱yóʼo ndikóna koona nda̱a̱ táki̱ʼva ni̱xi̱yona tá xa̱ʼa̱ ta ndakaʼánna xa̱ʼa̱ ña̱ʼa ña̱ xi̱xini̱na (Juan 5:28, 29). Vií koo ku̱ñuna ta̱ saátu lekena ,ta va̱ása kiʼin kue̱ʼe̱ miína (Isaías 33:24; 35:5, 6). Soo na̱ ndataku chí ndiví xa̱a̱na nduuna iin espíritu (1 Corintios 15:42-44, 50).

¿Ndáana ndataku? Biblia sánáʼa̱ña nu̱ú ñuʼú ndataku “na̱ ke̱ʼé ña̱ va̱ʼa ta saátu na̱ ke̱ʼé ña̱ va̱ása va̱ʼa” (Hechos 24:15). Ta sava na̱yóʼo kúú na̱ ta̱a ta saátu ná ñaʼá na̱ nda̱kú ni̱xi̱yo ini xíʼin Ndióxi̱ tá kúú ta̱ Noé, ta̱ Abrahán xíʼin ñá Sara (Génesis 6:9; Hebreos 11:11; Santiago 2:21). Ta na̱ ke̱ʼé ña̱ va̱ása va̱ʼa kúú na̱ yiví na̱ nda̱a̱ iin yichi̱ va̱ása nísakúaʼana ta va̱ása níkeʼéna ña̱ káʼa̱n Ndióxi̱.

Soo na̱ va̱ása xíniso̱ʼo ña̱ káʼa̱n Ndióxi̱ ta kéʼéna ña̱ kúni̱ miína, na̱yóʼo va̱ása ndatakuna, tá xíʼi̱ na̱yóʼo na̱ ni̱xi̱ʼi̱ va̱ʼa kúúvana (Mateo 23:33; Hebreos 10:26, 27).

¿Áma kúú ña̱ ndatakuna? Biblia ni̱ka̱ʼa̱nña ña̱ ndatakuna chí ndiví kooña tá ná kixaa̱ ta̱ Cristo ta ña̱yóʼo ki̱xáʼaña tá ku̱i̱ya̱ 1914 (1 Corintios 15:21-23). Ta ña̱ ndatakuna nu̱ú ñuʼú kooña ti̱xin mil ku̱i̱ya̱ ña̱ kaʼndachíñu ta̱ Jesucristo, ta ti̱xin tiempo yóʼo iníísaá nu̱ú ñuʼú nduliviña (Lucas 23:43; Apocalipsis 20:6, 12, 13).

¿Á kivi kandíxayó ña̱ ndataku na̱ ni̱xi̱ʼi̱? Kiviva kandíxayóña. Biblia káxiní káʼa̱nña xa̱ʼa̱ i̱i̱n na̱ xa̱a̱ nda̱taku, tá ku̱u ña̱yóʼo íyo sava na̱ xi̱ni ña̱ ndixa ku̱uña (1 Reyes 17:17-24; 2 Reyes 4:32-37; 13:20, 21; Lucas 7:11-17; 8:40-56; Juan 11:38-44; Hechos 9:36-42; 20:7-12; 1 Corintios 15:3-6). Ta iin ña̱ ndáyáʼviní káʼa̱nña xa̱ʼa̱ kúú tá nda̱taku ta̱ Lázaro ta̱ ta̱a yóʼo xa̱a̱ ku̱mí ki̱vi̱ ni̱xi̱ʼi̱ra ta̱ ku̱a̱ʼání na̱ yiví xi̱ni tá sa̱ndátaku ta̱ Jesús ta̱yóʼo (Juan 11:39, 42). Nda̱a̱ na̱ xi̱sa̱a̱-ini xi̱xini ta̱ Jesús va̱ása níka̱ʼa̱nna ña̱ su̱ví ña̱ ndixa níxi̱yo ña̱yóʼo ta nda̱a̱ xi̱kuni̱na kaʼnína ta̱ Jesús ta saátu ta̱ Lázaro (Juan 11:47, 53; 12:9-11).

Biblia káʼa̱nña, Ndióxi̱ kúúmiívara ndee̱ ña̱ sandátakura na̱ yiví na̱ xa̱a̱ ni̱xi̱ʼi̱. Ta va̱ʼaní ndákaʼánra xa̱ʼa̱ ndáa ki̱ʼva ni̱xi̱yo iin tá iin na̱yóʼo. Ta xa̱ʼa̱ ña̱ kúúra ta̱ kúúmií ndiʼi ndee̱, kǒo ña̱ kivi kasi nu̱úra ña̱ sandátakurana (Job 37:23; Mateo 10:30; Lucas 20:37, 38). Chi va̱ása kúúmií kuitíra ndee̱ chi kúniníra sandátakurana. “Chi kúni̱níún ndikóún kuniún na̱ ke̱ʼún xíʼin ndaʼún” (Job 14:15). Ña̱yóʼo kúú ña̱ káʼa̱n Biblia ña̱ kundoʼo Ndióxi̱ tá ná sandátakura na̱ kundoo nu̱ú ñuʼú.

Ña̱ va̱ása va̱ʼa ña̱ kándíxana xa̱ʼa̱ ña̱ ndataku na̱ yiví

Ña̱ kándíxa sava na̱ yiví: Tá ná ndatakuna íyo iin níma̱na ña̱ táku ndiʼi tiempo ña̱ ndákutáʼan xíʼin ku̱ñuna.

Ña̱ nda̱a̱: Nu̱ú Biblia káʼa̱nña, iin alma kúú iin na̱ yiví; ta ña̱yóʼo va̱ása tákukaña tá xa̱a̱ ni̱xi̱ʼi̱na (Génesis 2:7; Ezequiel 18:4). Tá ná ndataku iin na̱ yiví va̱ása kíta iin alma ti̱xinna saáchi mií na̱ yiví kúú na̱ ndikó koo nu̱ú ñuʼú yóʼo, ña̱yóʼo kúni̱ kachiña ña̱ mií na̱ yiví yóʼo kúú iin alma.

Ña̱ kándíxa sava na̱ yiví: Sava na̱ ndataku ndi̱ku̱n kama ndiʼi-xa̱ʼa̱na.

Ña̱ nda̱a̱: Biblia káchiña “na̱ ke̱ʼé ña̱ va̱ása va̱ʼa ndatakuna ta ndatiinna ku̱a̱chi xíʼinna” (Juan 5:29). Na̱ yiví yóʼo ndatiinna ku̱a̱chi xíʼinna xa̱ʼa̱ ña̱ keʼéna tá xa̱a̱ nda̱takuna su̱ví xa̱ʼa̱ ña̱ ke̱ʼéna tá kúma̱níka kuvina. Ta̱ Jesús ka̱chira: “Na̱ ni̱xi̱ʼi̱ kuniso̱ʼona tu̱ʼun se̱ʼe Ndióxi̱, ta na̱ ka̱ndíxa kúú na̱ kutaku” (Juan 5:25). Tá na̱ ndataku ná kuniso̱ʼona tu̱ʼun ta̱ Cristo á keʼéna ña̱ sánáʼa̱ra ki̱vi̱na kixiña nu̱ú “rollo nu̱ú va̱xi ki̱vi̱ na̱ kutaku” (Apocalipsis 20:12, 13).

Ña̱ kándíxa sava na̱ yiví: Na̱ nda̱taku kuumiína ku̱ñu ña̱ xi̱kuumiína tá ya̱chi̱ tá kúma̱níka kuvina.

Ña̱ nda̱a̱: Tá xíʼi̱ iin na̱ yiví ku̱ñuna táʼyi̱ña ta ndíʼi-xa̱ʼa̱ña (Eclesiastés 3:19, 20).