Primero ña̱ Samuel
29 Na̱ filisteo nda̱kayana ndiʼi na̱ soldadona chí Afec, ta na̱ soldado na̱ ñuu Israel ni̱xa̱a̱na xi̱kundoona yatin nu̱ú kána ti̱kui̱í chí Jezreel. 2 Ta na̱ soldado filisteo nda̱kiʼinna ku̱a̱ʼa̱nna xíʼin na̱ xáʼndachíñu nu̱úna ta nda̱taʼvína, savana xi̱kuuna 100 ta savana xi̱kuuna 1,000. Ta ta̱ David xíʼin na̱ ta̱a na̱ xi̱kitáʼan xíʼinra ndíku̱nna ku̱a̱ʼa̱nna sa̱tá ta̱ Akís. 3 Soo na̱ xáʼndachíñu nu̱ú na̱ filisteo ni̱nda̱ka̱tu̱ʼunna: “¿Nda̱chun va̱xi na̱ hebreo yóʼo xíʼinyó?”. Ta̱ Akís ka̱chira: “Ta̱yóʼo kúú ta̱ David ta̱ xi̱kachíñu nu̱ú ta̱ rey Saúl ta̱ íyo chí ñuu Israel. Ta xa̱a̱ yáʼaka iin ku̱i̱ya̱ íyora xíʼi̱n, ta nani tá sa̱ndákoora ta̱ Saúl ta nda̱kutáʼanra xíʼi̱n ta̱ʼán kunii̱ ña̱ keʼéra ña̱ va̱ása va̱ʼa”. 4 Soo sava na̱ xáʼndachíñu nu̱ú na̱ filisteo ni̱sa̱a̱nína xíʼinra ta ka̱china: “Ka̱ʼa̱n xíʼin ta̱ ta̱a yóʼo ná ku̱ʼu̱nra. Ná ndikóra ku̱ʼu̱nra chí nu̱ú ta̱xiún koora. Ta va̱ása taxiún kutáʼanra xíʼinyó ku̱ʼu̱nyó nu̱ú ku̱a̱chi, saáchi kivi nduura contrayó. Ta xa̱ʼa̱ ña̱ kuni̱ra kindo̱o va̱ʼara nu̱ú ta̱ Saúl nda̱a̱ kivi kaʼníra na̱ ta̱a na̱ kítáʼan xíʼinyó ta kuniʼira xi̱nína ku̱ʼu̱n xíʼinra nu̱úra. 5 ¿Á su̱ví xa̱ʼa̱ ta̱ David yóʼo kúú ña̱ xi̱tixáʼana ta xi̱xitana ña̱yóʼo:
‘Ta̱ Saúl xa̱ʼníra yáʼaka mil na̱ yiví,
ta ta̱ David yáʼaka u̱xu̱ mil kúú na̱ xa̱ʼníra’?”.
6 Ta̱ Akís ka̱nara ta̱ David ta ni̱ka̱ʼa̱nra xíʼinra: “Chínaʼíi̱* xa̱ʼa̱ Jehová, Ndióxi̱ ta̱ táku, ña̱ iin ta̱a va̱ʼava kúún ta kúsi̱í-inii̱ ña̱ ná kutáʼún ku̱ʼún nu̱ú ku̱a̱chi xíʼin na̱ soldado na̱ kúúmiíi̱, saáchi nani tá ki̱xaún nu̱úi̱ ta̱ʼán kunii̱ keʼún ña̱ va̱ása va̱ʼa. Soo savaka na̱ xáʼndachíñu nu̱ú na̱ filisteo xíkava-inina xa̱ʼún. 7 Ña̱kán va̱ʼaka ndikóún ta kiʼún kuenta ku̱ʼún ta kǒo keʼún nda̱a̱ ni iin ña̱ʼa ña̱ kivi sasáa̱ na̱ xáʼndachíñu nu̱ú na̱ filisteo”. 8 Ta ta̱ David ni̱ka̱ʼa̱nra xíʼin ta̱ Akís: “¿Soo ndáaña kúú ña̱ ke̱ʼíi̱? Nda̱a̱ tá ki̱vi̱ ña̱ nda̱kutáʼi̱n xíʼún, ¿á xa̱a̱ íyo iin ña̱ va̱ása va̱ʼa níkeʼé yi̱ʼi̱ ta̱ káchíñu nu̱ún? Táta rey, ¿nda̱chun kǒo kivi ku̱ʼi̱n xíʼún ña̱ ku̱ʼún kanitáʼún xíʼin na̱ sáa̱-ini xíni yóʼó?”. 9 Ta ta̱ Akís ni̱ka̱ʼa̱nra: “Nu̱ú yi̱ʼi̱, va̱ʼanívaún ta nda̱a̱ táki̱ʼva íyo iin ángel Ndióxi̱ saá íyoún. Soo na̱ xáʼndachíñu nu̱ú na̱ filisteo kúú na̱ ni̱ka̱ʼa̱n ‘Va̱ása taxiún ña̱ ku̱ʼu̱nra xíʼinyó nu̱ú ku̱a̱chi’. 10 Ña̱kán miíún ta saátu na̱ ta̱a na̱ kítáʼan xíʼún na̱ xi̱kachíñu nu̱ú ta̱ rey Saúl, ya̱chi̱ní ndako̱ondó taa̱n ta ndikóndó ku̱ʼu̱nndó tá xa̱a̱ ku̱a̱ʼa̱n túvi”.
11 Ña̱kán ta̱ David xíʼin na̱ ta̱a na̱ kítáʼan xíʼinra ya̱chi̱ní nda̱koona ña̱ va̱ʼa ndikóna ku̱ʼu̱nna chí nu̱ú ñuʼú na̱ filisteo, ta na̱ filisteo nda̱kiʼinna ku̱a̱ʼa̱nna chí Jezreel.