Primero ña̱ Samuel

15 Ta̱ Samuel ni̱ka̱ʼa̱nra xíʼin ta̱ Saúl: “Jehová chi̱ndaʼára yi̱ʼi̱ ña̱ ndaka̱xii̱n yóʼó ña̱ koún rey nu̱ú na̱ ñuura Israel. Soo vitin kuniso̱ʼo ña̱ ka̱ʼa̱n Jehová xíʼún. 2 Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel: ‘Na̱ amalequita xíniñúʼu ndakiʼinna castigo xa̱ʼa̱ ña̱ ke̱ʼéna xíʼin na̱ ñuu Israel, saáchi ka̱nitáʼanna xíʼin na̱ ñuu Israel tá ke̱ena chí Egipto. 3 Xa̱ʼa̱ ña̱kán, kúáʼan kanitáʼún xíʼin na̱ amalequita. Xíniñúʼu sandíʼi-xa̱ʼún ndiʼina ta saátu ndiʼi ña̱ʼa ña̱ kúúmiína. Va̱ása taxiún ña̱ ka̱ku nda̱a̱ ni iinna.* Kaʼníún ta̱a xíʼin ñaʼá, na̱ va̱lí xíʼin na̱ sa̱kán ka̱ku, si̱ndi̱ki̱ xíʼin ndikachi,* camello xíʼin burro’”. 4 Xa̱ʼa̱ ña̱kán sa̱ndákutáʼan ta̱ Saúl na̱ soldado chí Telaim ta nda̱kaʼvirana. Ni̱xi̱yo 200,000 na̱ soldado na̱ xi̱xika xáʼá na̱ ke̱e ti̱xin ndiʼika tribu na̱ ñuu Israel ta 10,000 xi̱kuu na̱ ta̱a na̱ tribu ta̱ Judá.

5 Tasaá ni̱xa̱a̱ ta̱ Saúl nda̱a̱ ñuu ña̱ Amalec ta ni̱ka̱ʼa̱nra xíʼin na̱ soldado ña̱ ná kundoose̱ʼéna yatin nu̱ú íyo iin yoso̱. 6 Ta ni̱ka̱ʼa̱n ta̱ Saúl xíʼin na̱ quenita: “Kuxíkándó nu̱ú na̱ amalequita, ña̱ va̱ʼa kǒo sandíʼi-xa̱ʼíi̱ ndóʼó. Saáchi ndóʼó ni̱na̱ʼa̱ndó ña̱ ndixaní kúʼvi̱-inindó* xínindó na̱ ñuu Israel tá ke̱ena chí Egipto”. Xa̱ʼa̱ ña̱kán na̱ quenita ku̱xíkána nu̱ú na̱ amalequita. 7 Ta ta̱ Saúl ku̱chiñura ka̱nitáʼanra xíʼin na̱ amalequita, ki̱xáʼara kánitáʼanra xíʼinna chí Havilá iinsaá nda̱a̱ chí Sur, ña̱ kíndo̱o yatin Egipto. 8 Xa̱ʼníra ndiʼi na̱ yiví xíʼin espada, soo nda̱kiʼinra ta̱ Agag, ta̱ rey ña̱ ñuu Amalec ku̱a̱ʼa̱n xíʼinra. 9 Ta̱ Saúl xíʼin na̱ ta̱a na̱ kítáʼan xíʼinra va̱ása níxaʼnína ta̱ Agag, ni ndikachi mií tí va̱ʼaka ni si̱ndi̱ki̱ mií tí va̱ʼaka, ni kití tí nduʼú ni ti̱xúʼú* che̱e, ta saátu nda̱kiʼinna ndiʼi ña̱ʼa ña̱ ndáyáʼvi. Va̱ása níxiinna sandíʼi-xa̱ʼa̱na ña̱yóʼo. Soo ña̱ʼa ña̱ va̱ása ndáyáʼvi á ña̱ va̱ása níxikuni̱na, sa̱ndíʼi-xa̱ʼa̱naña.

10 Tasaá ni̱ka̱ʼa̱n Jehová ña̱yóʼo xíʼin ta̱ Samuel: 11 “Kúsuchíní-inii̱ xa̱ʼa̱ ña̱ nda̱kaxii̱n ta̱ Saúl ña̱ koora rey, saáchi sa̱ndákoora ña̱ kundiku̱nra yi̱ʼi̱ ta va̱ása níxiniso̱ʼora ña̱ ni̱ka̱ʼi̱n xíʼinra”. Ta ta̱ Samuel ni̱ndi̱ʼi̱ní-inira xa̱ʼa̱ ña̱yóʼo ta iníí ñuú xa̱kundáʼvira nu̱ú Jehová. 12 Tá inka ki̱vi̱, ya̱chi̱ní nda̱koo ta̱ Samuel ña̱ va̱ʼa ndakutáʼanra xíʼin ta̱ Saúl, soo ni̱ka̱ʼa̱nna ña̱yóʼo xíʼinra: “Ta̱ Saúl ku̱a̱ʼa̱nra chí Carmelo, ta kán ka̱nindichira iin yu̱u̱ káʼnu ña̱ va̱ʼa ná ndakaʼánna xa̱ʼa̱ra. Tándi̱ʼi nda̱kiʼinra ku̱a̱ʼa̱nra chí Guilgal”. 13 Tá xa̱a̱ nda̱kutáʼan ta̱ Samuel xíʼin ta̱ Saúl, ta̱yóʼo ni̱ka̱ʼa̱nra xíʼin ta̱ Samuel: “Mií Jehová ná taxi ña̱ va̱ʼa ndaʼún. Ke̱ʼévai̱ ndiʼi ña̱ ni̱ka̱ʼa̱n Jehová xíʼi̱n”. 14 Soo ta̱ Samuel ni̱ka̱ʼa̱nra xíʼinra: “Tá saá, ¿nda̱chun xíniso̱ʼi̱ ña̱ ndáʼyi̱ ndikachi ta saátu si̱ndi̱ki̱?”. 15 Ta ta̱ Saúl nda̱kuiinra: “Sa̱na̱ na̱ amalequita kúúrí. Saáchi na̱ ta̱a na̱ ni̱xa̱ʼa̱n xíʼi̱n va̱ása níxaʼnína ndikachi xíʼin si̱ndi̱ki̱ mií tí va̱ʼaka, chi sa̱ndákoonarí ña̱ va̱ʼa so̱kóyórí nu̱ú* Jehová Ndióxi̱yó. Soo sa̱ndíʼi-xa̱ʼa̱vandi̱ ndiʼika ña̱ʼa”. 16 Ta ta̱ Samuel ni̱ka̱ʼa̱nra xíʼin ta̱ Saúl: “Xa̱a̱ va̱ʼa, ná ka̱ʼi̱n xíʼún xa̱ʼa̱ ña̱ ni̱ka̱ʼa̱n Jehová xíʼi̱n tá ñuú”. Ta ta̱ Saúl ka̱chira: “Ka̱ʼa̱n xíʼi̱n”.

17 Ta̱ Samuel ni̱ka̱ʼa̱nra xíʼinra: “¿Á ndákaʼún ña̱ ni̱ka̱ʼún ña̱ va̱ása ndáyáʼviún tá ndu̱ún ta̱ níʼi yichi̱ nu̱ú ndiʼi na̱ tribu na̱ ñuu Israel, ta saátu tá nda̱kaxin Jehová yóʼó ña̱ koún rey nu̱ú na̱ ñuu Israel? 18 Tándi̱ʼi, Jehová ta̱xira iin chiñu ndaʼún ta ni̱ka̱ʼa̱nra xíʼún: ‘Kúáʼan sandíʼi-xa̱ʼún na̱ amalequita xa̱ʼa̱ ku̱a̱chi ña̱ ni̱ki̱ʼvina. Ta kanitáʼún xíʼinna nda̱a̱ ná sandíʼi-xa̱ʼúnna’. 19 Tá saá, ¿nda̱chun va̱ása níkandíxaún ña̱ ni̱ka̱ʼa̱n Jehová? Nu̱úka ña̱yóʼo, nda̱kiʼún ndiʼi ña̱ʼana ta ke̱ʼún ña̱ va̱ása va̱ʼa nu̱ú Jehová”.

20 Soo ta̱ Saúl ni̱ka̱ʼa̱nra xíʼin ta̱ Samuel: “Ka̱ndíxavai̱ ndiʼi ña̱ ni̱ka̱ʼa̱n Jehová xíʼi̱n. Ni̱xa̱ʼi̱n ta sa̱xínui̱ chiñu ña̱ ta̱xi Jehová ndaʼíi̱, sa̱ndíʼi-xa̱ʼíi̱ na̱ amalequita ta nda̱kiʼii̱n ta̱ Agag, rey na̱ ñuu Amalec va̱xi xíʼi̱n. 21 Soo na̱ ta̱a na̱ ni̱xa̱ʼa̱n xíʼi̱n nda̱kiʼinna ndikachi xíʼin si̱ndi̱ki̱ síʼi mií tí va̱ʼaka tí xi̱niñúʼu ndiʼi-xa̱ʼa̱, ña̱ va̱ʼa so̱kóyórí nu̱ú Jehová Ndióxi̱yó chí Guilgal”.

22 Ta ta̱ Samuel ni̱ka̱ʼa̱nra xíʼinra: “¿Ndáaña kúú ña̱ kútóoka Jehová? ¿Ña̱ kaʼmiyó kití* ta so̱kóyórí nu̱úra xíʼin ña̱ so̱kóyó inkaka ña̱ʼa? ¿Á ña̱ kuniso̱ʼoyó ña̱ káʼa̱n Jehová? Mií ña̱ nda̱a̱: va̱ʼaka ña̱ kuniso̱ʼoyó ña̱ káʼa̱nra nu̱úka ña̱ so̱kóyó ña̱ʼa nu̱úra, ta va̱ʼaka ña̱ keʼéyó ña̱ káʼa̱nra nu̱úka ña̱ so̱kóyó xa̱ʼan* ti̱xúʼú che̱e nu̱úra. 23 Ta ña̱ ixaso̱ʼoyó íyoña nda̱a̱ táki̱ʼva íyo ña̱ ku̱ʼu̱nyó nu̱ú na̱ ndáku,* ta ña̱ keʼéyó ña̱ kúni̱ miíyó íyoña nda̱a̱ táki̱ʼva íyo ña̱ keʼéyó magia ta ndasakáʼnuyó ña̱ terafim.* Xa̱ʼa̱ ña̱ va̱ása níxiún kandíxaún ña̱ ni̱ka̱ʼa̱n Jehová, vitin va̱ása kúni̱kara ña̱ koún rey”.

24 Tasaá ni̱ka̱ʼa̱n ta̱ Saúl xíʼin ta̱ Samuel: “Ni̱ki̱ʼvivai̱ ku̱a̱chi. Va̱ása níkeʼíi̱ ndiʼi ña̱ ni̱ka̱ʼa̱n Jehová xíʼi̱n ta saátu ña̱ ni̱ka̱ʼa̱n miíún, saáchi ni̱yi̱ʼvíi̱ xi̱nii̱ na̱ yiví ta ke̱ʼíi̱ ña̱ ni̱ka̱ʼa̱nna xíʼi̱n. 25 Soo vitin, ixaún ña̱ ma̱ní ixakáʼnu-iniún xa̱ʼa̱ ku̱a̱chii̱, ta ndikóún xíʼi̱n ña̱ va̱ʼa ndasakáʼnui̱ Jehová”. 26 Soo ta̱ Samuel ni̱ka̱ʼa̱nra xíʼin ta̱ Saúl: “Va̱ása ndikói̱ xíʼún, saáchi va̱ása níkandíxaún ndiʼi ña̱ ni̱ka̱ʼa̱n Jehová, ta Jehová va̱ása kúni̱kara ña̱ ná koún rey nu̱ú na̱ ñuu Israel”. 27 Tá ndi̱kóko̱o ta̱ Samuel ña̱ va̱ʼa ndakiʼinra ku̱ʼu̱nra, ta̱ Saúl ti̱inra yuʼú ti̱ko̱to̱ra ña̱ kǒo ndaʼa̱ ta ni̱nda̱ta̱ña. 28 Tasaá ni̱ka̱ʼa̱n ta̱ Samuel xíʼinra: “Nda̱a̱ táki̱ʼva ni̱nda̱ta̱ yuʼú ti̱ko̱to̱ yóʼo saá ke̱ʼé Jehová xíʼún saáchi va̱ása kúni̱kara ña̱ ná kaʼndachíñún nu̱ú na̱ ñuu Israel. Ta taxira ña̱ ná kaʼndachíñu iin ta̱a ta̱ va̱ʼaka nu̱ú yóʼó. 29 Ta Ndióxi̱ ta̱ káʼnuní nu̱ú na̱ ñuu Israel, saxínuvara ña̱ ni̱ka̱ʼa̱nra ta va̱ása nasamara ña̱ ndákanixi̱níra, saáchi va̱ása násamara ña̱ ndákanixi̱níra xa̱ʼa̱ iin ña̱ʼa nda̱a̱ táki̱ʼva kéʼé na̱ yiví”.

30 Ña̱kán ta̱ Saúl ni̱ka̱ʼa̱nra xíʼinra: “Ndixava, ni̱ki̱ʼvii̱ ku̱a̱chi. Soo ixaún ña̱ ma̱ní, na̱ʼa̱ ña̱ íxato̱ʼún yi̱ʼi̱ nu̱ú na̱ níʼi yichi̱ nu̱ú na̱ ñui̱* ta saátu nu̱ú na̱ ñuu Israel. Ndandikó xíʼi̱n ña̱ va̱ʼa ndasakáʼnui̱ Jehová Ndióxi̱yó”. 31 Ña̱kán ta̱ Samuel nda̱kundiku̱nra ku̱a̱ʼa̱nra sa̱tá ta̱ Saúl, ta ta̱ Saúl nda̱sakáʼnura Jehová. 32 Ta̱ Samuel ni̱ka̱ʼa̱nra: “Kúáʼanndó ndakiʼinndó ta̱ Agag, rey na̱ ñuu Amalec ná kixira”. Ta tá ni̱nda̱ʼyi̱na nu̱ú ta̱ Agag saáví ku̱yatinra nu̱úra, saáchi nda̱kanixi̱níra: “Sana va̱ása kaʼníkavína yi̱ʼi̱”. 33 Saá ni̱ka̱ʼa̱n ta̱ Samuel: “Nda̱a̱ táki̱ʼva xa̱ʼníún ku̱a̱ʼání se̱ʼe ná ñaʼá xíʼin espada, saátu kundoʼo siʼún vitin”. Tasaá ta̱ Samuel xa̱ʼndaválíra ta̱ Agag nu̱ú Jehová chí Guilgal.

34 Tándi̱ʼi, ta̱ Samuel nda̱kiʼinra ku̱a̱ʼa̱nra chí Ramá, ta ta̱ Saúl nda̱kiʼinra ku̱a̱ʼa̱nra veʼera ña̱ íyo chí Guibeá. 35 Va̱ása níndikóka ta̱ Samuel kunira ta̱ Saúl ndiʼi tiempo ña̱ xi̱takura, soo ku̱suchíníva-inira xa̱ʼa̱ra. Ta Jehová ku̱suchíní-inira xa̱ʼa̱ ña̱ nda̱kaxinra ta̱ Saúl ña̱ koora rey nu̱ú na̱ ñuu Israel.