Segundo ña̱ Samuel
1 Tándi̱ʼi ni̱xi̱ʼi̱ ta̱ Saúl, tá xa̱a̱ ndi̱kó ta̱ David ña̱ ku̱chiñura ka̱nitáʼanra xíʼin na̱ amalequita, ki̱ndoora u̱vi̱ ki̱vi̱ chí Ziclag. 2 Tá ki̱vi̱ u̱ni̱, iin ta̱a ke̱era chí nu̱ú xi̱ndoo na̱ soldado ta̱ Saúl, ta ni̱nda̱ta̱ ti̱ko̱to̱ra ta níndoso ñuʼú xi̱níra. Tá ku̱yatinra nu̱ú ta̱ David xi̱kuxítíra.
3 Tasaá, ta̱ David ni̱nda̱ka̱tu̱ʼunrara: “¿Ndáa míí ke̱ún?”. Ta ta̱yóʼo nda̱kuiinra: “Chí nu̱ú ndóo na̱ soldado na̱ ñuu Israel ke̱i̱ xínui̱ va̱xii̱”. 4 Ta ta̱ David ni̱ka̱ʼa̱nra xíʼinra: “Ixaún ña̱ ma̱ní, ka̱ʼa̱n xíʼi̱n ndáaña ku̱u”. Ta ta̱yóʼo nda̱kuiinra: “Na̱ yiví ki̱xáʼana xínuna nu̱ú ku̱a̱chi ta ku̱a̱ʼánína ni̱xi̱ʼi̱, nda̱a̱ ta̱ Saúl xíʼin se̱ʼera ta̱ Jonatán ni̱xi̱ʼi̱”. 5 Ta ta̱ David ni̱nda̱ka̱tu̱ʼunra ta̱ loʼo ta̱ ki̱xaa̱ nátúʼun xíʼinra: “¿Ta nda̱chun va̱ʼa kúnda̱a̱-iniún ña̱ ni̱xi̱ʼi̱ ta̱ Saúl ta saátu se̱ʼera ta̱ Jonatán?”. 6 Ta ta̱ loʼo yóʼo ni̱ka̱ʼa̱nra: “Chí yuku̱ Guilboa íyoi̱, ta iin sana xi̱nii̱ ña̱ íyo ta̱ Saúl tíinndaara lanzara, ta carreta tú xíka nu̱ú ku̱a̱chi ta saátu na̱ soldado na̱ yósó* kuáyi̱ xa̱a̱ kúyatinna nu̱úra. 7 Tá ndi̱kóko̱ora ta xi̱nira ña̱ níndichii̱ kán, ka̱nara yi̱ʼi̱, ta yi̱ʼi̱ ni̱ka̱ʼi̱n xíʼinra: ‘¿Ndáaña kúni̱ún, táta?’.* 8 Ta ni̱nda̱ka̱tu̱ʼunra yi̱ʼi̱: ‘¿Ndáa ta̱ kúú yóʼó?’. Ta ni̱ka̱ʼi̱n xíʼinra: ‘Iin ta̱ amalequita kúi̱’. 9 Tasaá ni̱ka̱ʼa̱nra xíʼi̱n: ‘Ixaún ña̱ ma̱ní, naʼa yóʼo ta kaʼníún yi̱ʼi̱, chi tákukavai̱ ta xóʼvi̱níi̱’.* 10 Ña̱kán ni̱xa̱ʼi̱n nu̱úra ta xa̱ʼníi̱ra, saáchi ndeéní tu̱kue̱ʼe̱ra ta ta̱ xa̱a̱ kuvi kúúvara. Tasaá nda̱kiʼii̱n corona ña̱ kánuu xi̱níra xíʼin siki̱ tí ndíkaa̱ ndaʼa̱ra ña̱ va̱ʼa ndataxii̱ña ndaʼún táta”.
11 Xa̱ʼa̱ ña̱kán, ta̱ David nda̱tára ti̱ko̱to̱ra ta saátu ke̱ʼé ndiʼi na̱ ta̱a na̱ kítáʼan xíʼinra. 12 Ta ki̱xáʼana ndeéní ndáʼyi̱na ta xákuna. Ta va̱ása níxixina nda̱a̱ tá xi̱kuaá xa̱ʼa̱ ña̱ ni̱xi̱ʼi̱ ta̱ Saúl, se̱ʼera ta̱ Jonatán, na̱ ñuu Jehová ta saátu na̱ ta̱a ñuu Israel na̱ xa̱ʼnína xíʼin espada.
13 Ta ta̱ David ni̱nda̱ka̱tu̱ʼunra ta̱ loʼo ta̱ na̱túʼun xíʼinra xa̱ʼa̱ ña̱yóʼo: “¿Ndáa míí ke̱ún?”. Ta ta̱yóʼo ni̱ka̱ʼa̱nra: “Se̱ʼe iin ta̱ amalequitava kúi̱, iin ta̱ ki̱xaa̱ íyo chí ñuu Israel”. 14 Ta ta̱ David ni̱ka̱ʼa̱nra xíʼinra: “¿Nda̱chun va̱ása níyi̱ʼvíún kaʼníún ta̱ nda̱kaxin mií Jehová?”. 15 Xa̱ʼa̱ ña̱kán, ta̱ David ka̱nara iin ta̱ kítáʼan xíʼinra ta ni̱ka̱ʼa̱nra xíʼinra: “Naʼa ta kaʼníúnra”. Ta ta̱kán ka̱nirara ta xa̱ʼnírara. 16 Tasaá, ta̱ David ni̱ka̱ʼa̱nra xíʼin ta̱ loʼo kán: “Miíún kúúmií ku̱a̱chi xa̱ʼa̱ ña̱ ni̱xi̱ʼún, saáchi xíʼin ña̱ ni̱ka̱ʼún chi̱kaún ku̱a̱chi miíún chi ka̱chiún ‘Yi̱ʼi̱ kúú ta̱ xa̱ʼní ta̱ nda̱kaxin mií Jehová’”.
17 Tasaá, ta̱ David xi̱tara iin yaa xa̱ʼa̱ ña̱ kúsuchíní-inira xa̱ʼa̱ ta̱ Saúl ta saátu xa̱ʼa̱ se̱ʼera ta̱ Jonatán. 18 Ta ni̱ka̱ʼa̱nra ña̱ ná sanáʼa̱na yaa yóʼo na̱ yiví na̱ ndóo chí Judá, ta yaa ña̱ xi̱tara xa̱ʼa̱ ña̱ kúsuchíní-inira naníña “Tú kuxu̱n”* ta ni̱ka̱ʼyi̱ña nu̱ú libro ña̱ Jasar ta káchiña:
19 “Ndáʼviníún ñuu Israel. Na̱ ta̱a na̱ ndáyáʼviní ni̱xi̱ʼi̱na chí yuku̱ náʼnu ña̱ íyo nu̱ún.
Kotondó ndáa ki̱ʼva ni̱xi̱ʼi̱ na̱ ta̱a na̱ ndakúní nu̱ú ku̱a̱chi.
20 Va̱ása natúʼunndó xa̱ʼa̱ ña̱yóʼo chí Gat;
va̱ása ka̱ʼa̱nndó xa̱ʼa̱ña chí calle ña̱ Asquelón,
ña̱ va̱ʼa ná kǒo kusi̱í-ini ná ñaʼá se̱ʼe na̱ filisteo,
ña̱ va̱ʼa ná kǒo kusi̱í-ini ná ñaʼá se̱ʼe na̱ ta̱a na̱ va̱ása níta̱ʼnda̱ nu̱ú yi̱i̱.
21 Yuku̱ ña̱ íyo chí Guilboa,
ná va̱ása ko̱yoka yúyú ta ná va̱ása kuunka sa̱vi̱ sa̱tándó,
ta nu̱ú ñuʼúndó ná va̱ása kanaka ña̱ʼa ña̱ kivi so̱kóna nu̱ú* Ndióxi̱;
saáchi kán kúú nu̱ú ku̱yaku̱a̱ escudo na̱ ndakúní,
ta escudo ta̱ Saúl va̱ása níndaya̱kúnkanaña xíʼin aceite.
22 Kuxu̱n ta̱ Jonatán xíʼin espada ta̱ Saúl nina xi̱kuchiñuvaña,
kuxu̱n xíʼin espada yóʼo xa̱ʼníña na̱ ndakúní,
ta xi̱chichi ndiʼi ni̱i̱ na̱ sáa̱-ini xíniñaʼá sa̱táña.
23 Xi̱kuni̱ní na̱ yiví xi̱xinina ta̱ Saúl xíʼin ta̱ Jonatán tá xi̱takuna.
Ni tá ni̱xi̱ʼi̱ na̱yóʼo va̱ása nítaʼví-táʼanna.
24 Ndóʼó ná se̱ʼe na̱ ñuu Israel, kuakundó xa̱ʼa̱ ta̱ Saúl,
saáchi va̱ʼaní sa̱kúndixira ndóʼó ta xi̱ndixindó ti̱ko̱to̱ ña̱ kúáʼa ña̱ yéʼe̱ní,
ta chi̱ndósora ña̱ʼa ña̱ oro ña̱ liviní nu̱ú ti̱ko̱to̱ndó.
25 Kotondó ndáa ki̱ʼva ni̱xi̱ʼi̱ na̱ ndakúní nu̱ú ku̱a̱chi.
Ta̱ Jonatán ni̱xi̱ʼi̱ra nu̱ú yuku̱ súkun.
26 Ndeéní kúsuchí-inii̱ xa̱ʼún, ñani miíi̱ Jonatán;
xi̱kuni̱kavíi̱ xi̱xinii̱ yóʼó.
Nu̱ú yi̱ʼi̱, ña̱ xi̱kuni̱ún xi̱xiniún yi̱ʼi̱ xi̱ndayáʼviníkavaña nu̱ú ña̱ kúni̱ ná ñaʼá xíniná yi̱ʼi̱.
27 Kotondó ndáa ki̱ʼva ni̱xi̱ʼi̱ na̱ ta̱a na̱ ndakúní
ta ndi̱ʼi-xa̱ʼa̱ ndiʼi ña̱ʼa ña̱ xi̱xiniñúʼuna ña̱ xi̱kanitáʼanna”.