Segundo ña̱ Samuel

19 Ta na̱túʼunna ña̱yóʼo xíʼin ta̱ Joab: “Ta̱ rey David xákura ta kúsuchíní-inira xa̱ʼa̱ ta̱ Absalón”. 2 Ni ku̱chiñuvana nu̱ú ku̱a̱chi ki̱vi̱ kán, soo ndiʼi na̱ soldado va̱ása níkusi̱í-inina saáchi xi̱niso̱ʼona ña̱ kúsuchíní-ini ta̱ rey xa̱ʼa̱ se̱ʼera. 3 Ya̱a̱ kuití nda̱ndikó na̱ soldado chí ñuu, nda̱a̱ táki̱ʼva ndóʼo na̱ ku̱kaʼan nu̱ú xa̱ʼa̱ ña̱ xi̱nuna nu̱ú na̱ kánitáʼan xíʼinna. 4 Ta̱ rey David nda̱kasira nu̱úra xíʼin ti̱ko̱to̱ ta ndeéní xi̱kaʼa̱nra: “Se̱ʼe miíi̱ Absalón. Absalón se̱ʼe miíi̱, se̱ʼe miíi̱”.

5 Tasaá, ta̱ Joab ni̱ki̱ʼvira veʼe nu̱ú íyo ta̱ rey ta ni̱ka̱ʼa̱nra xíʼinra: “Vitin sa̱kúkaʼún nu̱ú ndiʼi na̱ káchíñu nu̱ún, na̱ sa̱kǎku yóʼó xíʼin na̱ se̱ʼeta̱ún, ná se̱ʼe-síʼún, ná síʼún xíʼin ná ñaʼá ná íyo xíʼún.* 6 Yóʼó kúʼvi̱-iniún xíniún na̱ sáa̱-ini xíni yóʼó, ta sáa̱-iniún xíniún na̱ kúʼvi̱-ini xíni yóʼó. Vitin ni̱na̱ʼún ña̱ na̱ níʼi yichi̱ nu̱ú na̱ soldado xíʼin ndiʼika na̱ soldado va̱ása ndáyáʼvivína nu̱ún, saáchi kúnda̱a̱ káxi inii̱ ña̱ kusi̱íníva-iniún tá ndi̱ʼi̱ níxi̱ʼi̱ nu̱úka ña̱ kuvi ta̱ Absalón. 7 Ña̱kán vitin ndakundichi ta kúáʼan chika̱ún ndee̱ xíʼin na̱ káchíñu nu̱ún. Chi tá ná va̱ása keʼún ña̱yóʼo, chínaʼíi̱* xa̱ʼa̱ Jehová ña̱ ñuú vitin va̱ása kindo̱oka nda̱a̱ ni iin na̱ ta̱a xíʼún. Ta ndeéníka koo ña̱yóʼo nu̱ú ndiʼika tu̱ndóʼo ña̱ ndo̱ʼún nda̱a̱ tá ni̱xi̱yo loʼún”. 8 Xa̱ʼa̱ ña̱kán, ta̱ rey David nda̱koora ta xi̱koora* chí yéʼé ñuu. Ta na̱túʼunna xa̱ʼa̱ ña̱yóʼo xíʼin ndiʼi na̱ ñuu: “Ta̱ rey íyora chí yéʼé”. Tasaá, ndiʼi na̱ yiví ni̱xa̱ʼa̱nna nu̱ú ta̱ rey.

Soo ndiʼika na̱ ta̱a ñuu Israel xi̱nuna ku̱a̱nuʼuna veʼena. 9 Ta ndiʼi na̱ yiví na̱ tribu na̱ ñuu Israel xi̱kaʼa̱nkúáchina* ta xi̱kachina: “Ta̱ rey sa̱kǎkura miíyó nu̱ú ndiʼi na̱ xi̱saa̱-ini xi̱xini miíyó ta saátu sa̱kǎkura miíyó nu̱ú na̱ filisteo. Soo vitin xi̱nura nu̱ú ta̱ Absalón ta kǒokara íyo ñuu yóʼo. 10 Ta ta̱ Absalón ta̱ nda̱kaxinyó ña̱ kaʼndachíñura nu̱úyó, ni̱xi̱ʼi̱ra nu̱ú ku̱a̱chi. Tá saá, ¿nda̱chun kǒo nda̱a̱ ni iin ña̱ʼa kéʼéndó ña̱ va̱ʼa ku̱ʼu̱nndó ndakiʼinndó ta̱ rey ná ndikóra?”.

11 Ta̱ David chi̱ndaʼára na̱ ku̱a̱ʼa̱n ka̱ʼa̱n ña̱yóʼo xíʼin ta̱ su̱tu̱ Sadoc xíʼin ta̱ Abiatar: “Ka̱ʼa̱nndó xíʼin na̱ níʼi yichi̱ nu̱ú* na̱ tribu ta̱ Judá: ‘Xi̱niso̱ʼi̱ ña̱ ndiʼi na̱ ñuu Israel káʼa̱nna ña̱ kixina ndakiʼinna yi̱ʼi̱ ña̱ ndikói̱ veʼi̱. Xa̱ʼa̱ ña̱kán, ¿nda̱chun ta̱ʼán kixindó ndakiʼinndó yi̱ʼi̱ ña̱ ndikói̱ veʼi̱? 12 Ndóʼó kúúndó ñanii̱, ta iin ni̱i̱ kúúvayó. ¿Nda̱chun ta̱ʼán kixindó ndakiʼinndó yi̱ʼi̱ ta̱ kúú rey ña̱ va̱ʼa ndikói̱?’. 13 Ka̱ʼa̱nndó ña̱yóʼo xíʼin ta̱ Amasá: ‘¿Á su̱ví iin ni̱i̱ kúúvayó? Ndeéní ná koo castigo ña̱ taxi Ndióxi̱ ndaʼíi̱ tá ná va̱ása ndaka̱xii̱n yóʼó vitin ña̱ kuniʼún yichi̱ nu̱ú na̱ soldado na̱ xi̱niʼi ta̱ Joab yichi̱ nu̱ú’”.

14 Saá sa̱xínu̱* ta̱ rey David ini ndiʼi na̱ ta̱a na̱ tribu ta̱ Judá, ta na̱yóʼo chi̱ndaʼána na̱ ku̱a̱ʼa̱n ka̱ʼa̱n xíʼinra: “Kivi ndikóún ta saátu ndiʼi na̱ káchíñu nu̱ún”.

15 Tá ndi̱kó ta̱ rey ta ni̱xa̱a̱ra chí yu̱ta Jordán, na̱ ta̱a na̱ tribu ta̱ Judá ke̱ena chí Guilgal ta ni̱xa̱a̱na ña̱ va̱ʼa ndakutáʼanna xíʼinra, ta inkáchi ya̱ʼana yu̱ta Jordán. 16 Ta̱ Simeí se̱ʼe ta̱ Guerá, ta̱ benjaminita ta̱ ni̱xi̱yo chí Bahurim kama ni̱xa̱a̱ra xíʼin na̱ ta̱a na̱ tribu ta̱ Judá ña̱ va̱ʼa ndakutáʼanra xíʼin ta̱ rey David, 17 ta 1,000 na̱ ta̱a na̱ tribu ta̱ Benjamín xi̱kitáʼan xíʼinra. Ta saátu ta̱ Zibá ta̱ xi̱kachíñu veʼe ta̱ Saúl xíʼin 15 saá na̱ se̱ʼera ta saátu 20 na̱ káchíñu nu̱úra, siʼnaka na̱yóʼo ni̱xa̱a̱ chí yu̱ta Jordán tá kúma̱níka xa̱a̱ ta̱ rey. 18 Ni̱ya̱ʼara* chí nu̱ú yáʼana yu̱ta ña̱ va̱ʼa chindeétáʼanra xíʼin na̱ veʼe ta̱ rey ña̱ va̱ʼa ya̱ʼana, ta saátu ña̱ keʼéra ndiʼi ña̱ kúni̱ ta̱ rey. Ta tá si̱lóʼo kúma̱ní ña̱ ya̱ʼa ta̱ rey yu̱ta Jordán, ta̱ Simeí se̱ʼe ta̱ Guerá xi̱kuxítíra nu̱úra. 19 Ta ni̱ka̱ʼa̱nra xíʼin ta̱ rey David: “Táta rey, va̱ása chika̱ún ku̱a̱chi yi̱ʼi̱ ta ni va̱ása ndakaʼún xa̱ʼa̱ ña̱ va̱ása va̱ʼa ke̱ʼíi̱ ki̱vi̱ tá ki̱taún chí ñuu Jerusalén. Va̱ása kandíxaún ña̱ ni̱ka̱ʼi̱n, 20 saáchi kúnda̱a̱ va̱ʼava ini yi̱ʼi̱ ta̱ káchíñu nu̱ún ña̱ ni̱ki̱ʼvii̱ ku̱a̱chi. Xa̱ʼa̱ ña̱kán, ti̱xin ndiʼi na̱ veʼe ta̱ José, yi̱ʼi̱ kúú ta̱ nu̱ú ki̱xaa̱ ña̱ va̱ʼa ndakutáʼi̱n xíʼún táta rey”.

21 Ta ndi̱ku̱n saá, ta̱ Abisái se̱ʼe ñá Zeruyá ni̱ka̱ʼa̱nra: “¿Á va̱ása xíniñúʼu kaʼníyó ta̱ Simeí xa̱ʼa̱ ña̱ sa̱kúisochiʼñara* ta̱ nda̱kaxin Jehová?”. 22 Soo ta̱ David ka̱chira: “Ndóʼó na̱ se̱ʼe ñá Zeruyá, ¿nda̱chun kúni̱ndó ki̱ʼvindó ku̱a̱chi yóʼo? ¿Nda̱chun síín ña̱ káʼi̱n ta síín ña̱ kéʼéndó? ¿Á su̱ví vitinva kúú ña̱ ndikó tukui̱ koi̱ rey nu̱ú na̱ ñuu Israel? Ña̱kán, ¿nda̱chun xíniñúʼu kuvi iin na̱ yiví ñuu Israel?”. 23 Ta̱ rey ni̱ka̱ʼa̱nra xíʼin ta̱ Simeí: “Va̱ása kuvivíún”. Ta chi̱naʼára ña̱ va̱ása keʼéra ña̱yóʼo.

24 Ta saátu ta̱ Mefibóset se̱ʼeñáni ta̱ Saúl ki̱tara nda̱kiʼinra ta̱ rey David. Va̱ása níndakatara xa̱ʼa̱ra, ni va̱ása níndakaʼndara ixí* yuʼúra ta ni va̱ása níndakatara ti̱ko̱to̱ra, nda̱a̱ tá ki̱vi̱ ña̱ ku̱a̱ʼa̱n ta̱ rey iinsaá nda̱a̱ tá ki̱vi̱ ña̱ ndi̱kóra veʼera ta kǒo ña̱ níndoʼora. 25 Tá ki̱tara ñuu Jerusalén ña̱ va̱ʼa ndakiʼinra ta̱ rey, ta̱yóʼo ni̱nda̱ka̱tu̱ʼunrara: “¿Nda̱chun va̱ása níxa̱ʼún xíʼi̱n Mefibóset?”. 26 Ta ta̱yóʼo nda̱kuiinra: “Saáchi ta̱ káchíñu nu̱úi̱ sa̱ndáʼvira yi̱ʼi̱, táta rey. Xa̱ʼa̱ ña̱ va̱ása kívi kakai̱, ni̱ka̱ʼi̱n xíʼinra: ‘Chinúu tayi̱ sa̱tá burro sa̱na̱i̱ ña̱ va̱ʼa kosói̱rí* ta ku̱ʼi̱n xíʼin ta̱ rey’. 27 Soo ta̱kán ni̱ka̱ʼa̱nra ña̱ vatá* xíʼún xa̱ʼíi̱ táta rey. Soo miíún táta rey, íyoún nda̱a̱ táki̱ʼva íyo iin ángel Ndióxi̱ ta̱ nda̱a̱, xa̱ʼa̱ ña̱kán kivi keʼún ña̱ va̱ʼa túvi miívaún. 28 Miíún táta rey, kiviva kaʼníún ndiʼi na̱ veʼe yivái̱ soo nu̱úka ña̱ keʼún ña̱yóʼo, ta̱xiún ña̱ koi̱ iin táʼan na̱ xíxi nu̱ú mesaún. Kǒo nda̱yíví* kúúmiíi̱ ña̱ ka̱ʼa̱n ku̱a̱chii̱ xíʼún xa̱ʼa̱ inkaka ña̱ʼa táta rey”.

29 Soo ta̱ rey David ni̱ka̱ʼa̱nra xíʼinra: “Kǒo inkaka ña̱ ka̱ʼa̱nyó xa̱ʼa̱. Xa̱a̱ nda̱kaxii̱n ña̱ miíún xíʼin ta̱ Zibá ndataʼvíndó ñuʼú ña̱ kúú kuentaún”. 30 Tasaá, ta̱ Mefibóset ni̱ka̱ʼa̱nra xíʼin ta̱ rey: “Miíra ná ndakiʼin ndiʼivaña, saáchi va̱ʼava ndi̱kóún ndi̱xaún veʼún táta rey ta kǒo ña̱ níndoʼún”.

31 Tándi̱ʼi, ta̱ Barzilái ta̱ galaadita ke̱era chí Roguelim ña̱ va̱ʼa ku̱ʼu̱nra xíʼin ta̱ rey nda̱a̱ nu̱ú ndíkaa̱ yu̱ta Jordán. 32 Ta̱ Barzilái xa̱a̱ xi̱kuaʼa̱níra saáchi xi̱kuumiíra 80 ku̱i̱ya̱. Ndiʼi tiempo ña̱ ni̱xi̱yo ta̱ rey chí Mahanaim, ta̱ Barzilái kúú ta̱ xi̱taxi ña̱ xi̱xixira saáchi iin ta̱a ta̱ kúikání xi̱kuura. 33 Xa̱ʼa̱ ña̱kán, ta̱ rey ni̱ka̱ʼa̱nra xíʼin ta̱ Barzilái: “Naʼa ta ya̱ʼún yu̱ta xíʼi̱n, ta chí Jerusalén yi̱ʼi̱ kúú ta̱ taxi ndiʼi ña̱ kuxún”. 34 Soo ta̱ Barzilái ni̱ka̱ʼa̱nra xíʼin ta̱ rey: “Va̱ása ku̱a̱ʼákaví ku̱i̱ya̱ kutakui̱. ¿Nda̱chunkaví ku̱ʼi̱n xíʼún chí ñuu Jerusalén táta rey? 35 Yi̱ʼi̱ xa̱a̱ 80 ku̱i̱ya̱ kúúmiíi̱. Va̱ása kívika kunda̱a̱-inii̱ ndáaña kúú ña̱ va̱ʼa ta ndáaña kúú ña̱ va̱ása va̱ʼa. Yi̱ʼi̱ va̱ása kúnda̱a̱ka-inii̱ á ya̱si̱n ña̱ xíxii̱ xíʼin ña̱ xíʼii̱. Ta ni va̱ása kívika kuniso̱ʼi̱ ta̱chí na̱ ta̱a xíʼin ná ñaʼá na̱ xíta. ¿Nda̱chunkaví xíniñúʼu sandíʼi̱i̱-iniún táta rey? 36 Yi̱ʼi̱ xa̱a̱ kúsi̱íva-inii̱ ña̱ ki̱xii̱ xíʼún nda̱a̱ yu̱ta Jordán yóʼo. ¿Nda̱chunví xíniñúʼu taxiún ña̱ va̱ʼa yóʼo ndaʼíi̱ táta rey? 37 Ixaún ña̱ ma̱ní, taxi ná ndikói̱. Taxi ná kuvii̱ ñui̱, yatin nu̱ú ni̱ndu̱xu̱n yivái̱ xíʼin siʼíi̱. Soo yóʼo íyo ta̱ Kimham, ná ku̱ʼu̱nra xíʼún ta ná ya̱ʼara yu̱ta yóʼo xíʼún táta rey. Ta kivi keʼún nda̱a̱ ndáaka ña̱ va̱ʼa túvi miívaún xa̱ʼa̱ra”.

38 Xa̱ʼa̱ ña̱kán, ta̱ rey David ni̱ka̱ʼa̱nra xíʼinra: “Ku̱ʼu̱nva ta̱ Kimham xíʼi̱n, ta yi̱ʼi̱ keʼíi̱ nda̱a̱ ndáaka ña̱ va̱ʼa túvi miívaún xa̱ʼa̱ra. Ndiʼi ña̱ ná ndukún nu̱úi̱, keʼévai̱ña xa̱ʼún”. 39 Tasaá ki̱xáʼa ndiʼi na̱ yiví yáʼana yu̱ta Jordán. Ta tá xa̱a̱ ku̱nu̱mí ya̱ʼa ta̱ rey, chi̱tóra* nu̱ú ta̱ Barzilái ta chi̱kaa̱ra bendiciónra. Ta ta̱ Barzilái ndi̱kóra veʼera. 40 Tá ni̱ya̱ʼa ta̱ rey David yu̱ta ta ku̱a̱ʼa̱nra chí Guilgal, ku̱a̱ʼa̱nva ta̱ Kimham xíʼinra. Ndiʼi na̱ yiví na̱ tribu ta̱ Judá xíʼin iin tiʼvi savaka na̱ tribu na̱ ñuu Israel ni̱ya̱ʼana chí inka táʼví yu̱ta xíʼin ta̱ rey.

41 Tasaá ndiʼi na̱ ta̱a na̱ ñuu Israel ni̱nda̱ka̱tu̱ʼunna ta̱ rey: “¿Nda̱chun na̱ ñanindi̱ na̱ tribu ta̱ Judá se̱ʼéní ki̱xina xíʼún ta sa̱yáʼana yóʼó yu̱ta Jordán xíʼin ndiʼi na̱ veʼún ta saátu ndiʼi na̱ ta̱a na̱ kítáʼan xíʼún, táta rey?”. 42 Ta ndiʼi na̱ ta̱a na̱ tribu ta̱ Judá nda̱kuiinna yuʼú na̱ ñuu Israel: “Saáchi táʼanvandi̱ kúú ta̱ rey. ¿Ta nda̱chun sáa̱ndó? ¿Á xa̱a̱ ni̱ka̱ʼa̱nvandi̱ xíʼin ta̱ rey ña̱ ná taxira ña̱ kuxundi̱ á ña̱ taxira iin regalo ndaʼa̱ndi̱?”.

43 Soo na̱ ta̱a na̱ ñuu Israel ni̱ka̱ʼa̱nna xíʼin na̱ ta̱a na̱ tribu ta̱ Judá: “Ndi̱ʼi̱ u̱xu̱ tribu kúúndi̱, ña̱kán kúúmiíkandi̱ nda̱yí ña̱ ku̱ʼu̱nndi̱ ndakiʼinndi̱ ta̱ David. ¿Nda̱chun va̱ása ní ixato̱ʼóndó ndi̱ʼi̱? ¿Á su̱ví ndi̱ʼi̱va kúú na̱ nu̱ú xi̱niñúʼu ku̱ʼu̱n ndakiʼin ta̱ rey ña̱ va̱ʼa ndikóra?”. Soo ndeéka íyo tu̱ʼun ña̱ ni̱ka̱ʼa̱n na̱ ta̱a na̱ tribu ta̱ Judá nu̱úka ña̱ ni̱ka̱ʼa̱n na̱ ta̱a na̱ ñuu Israel.