Isaías
27 Ki̱vi̱ saá, Jehová kuniñúʼura espadara ña̱ káʼnuní, ña̱ ndakúní, ña̱ xi̱ínní* yuʼú,
ña̱ taxira castigo ndaʼa̱ ko̱o̱ tí kamaní ku̱a̱ʼa̱n, tí Leviatán,*
tí Leviatán, tí ko̱o̱ tí ku̱a̱ʼa̱n chóʼo ta ku̱a̱ʼa̱nrí chí káa,
ta kaʼníra kití tí káʼnuní tí ndíkaa̱ ti̱xin mar.
2 Ki̱vi̱ saá, katandó yaa yóʼo:
“Yóʼó íyoún nda̱a̱ táki̱ʼva íyo tú uva tú táxi vino.
3 Yi̱ʼi̱ Jehová, ndái̱ ña̱yóʼo.
Ta kóso̱ ni̱ʼii̱ña.
Ñuú xíʼin káʼñu* ndái̱ña
tasaá va̱ása koo na̱ sandíʼi-xa̱ʼa̱ña.
4 Su̱ví ta̱ sáa̱ kúi̱.
Tá iinna chíndoona tú iñú á ku̱ʼu̱ ña̱ va̱ása va̱ʼa nu̱ú íyo tú uvai̱,
yi̱ʼi̱ kanitáʼi̱n xíʼinna.
Ku̱a̱ñi̱i̱* ña̱yóʼo ta kaʼmii̱ña.
5 Va̱ʼaka ná kixina nu̱úi̱ ña̱ kundai̱na.
Ña̱ va̱ʼa ndakutáʼan viína xíʼi̱n;
ña̱ va̱ʼa ndakutáʼan viína xíʼi̱n”.
6 Ki̱vi̱ ña̱ va̱xi, kana ti̱oʼo* ta̱ Jacob ta koora nda̱a̱ táki̱ʼva íyo iin yitu̱n,
na̱ ñuu Israel koona nda̱a̱ táki̱ʼva íyo iin yitu̱n tú xa̱a̱ xa̱ʼnu tú xa̱a̱ íyo yita ndaʼa̱,
nda̱a̱ táki̱ʼva koo na̱ taxi ku̱i̱ʼi iníísaá nu̱ú ñuʼú, saá koona.
7 ¿Á saátu xíniñúʼu ndeéní kanina ta̱yóʼo?
¿Á saátu xíniñúʼu ixandi̱va̱ʼanína xíʼin ta̱yóʼo tá ná kaʼnínara?
8 Nda̱ʼyi̱ kóʼún tá ná kanitáʼún xíʼinna ta saátu tá ná taváúnna.
Tá ná kani ta̱chí ña̱ va̱xi chí nu̱ú kíta ñu̱ʼu,* ndeéní sakánira ta̱chí ta tavára na̱yóʼo.
9 Saá kúú ña̱ ixakáʼnu-inira xa̱ʼa̱ ku̱a̱chi ña̱ ni̱ki̱ʼvi ta̱ Jacob,
ta ña̱yóʼo kúú ña̱ kuu tá ná ku̱taʼa ku̱a̱china:
yu̱u̱ ña̱ ku̱vaʼa altar, ndasaraña yu̱u̱ ña̱ cháchi mií,
ta va̱ása kindo̱o nda̱a̱ ni iin yitu̱n tú ndásakáʼnuna* ta saátu va̱ása kindo̱o nda̱a̱ ni iin altar nu̱ú chiʼmána.
10 Saáchi va̱ása kooka nda̱a̱ ni iin ña̱ʼa nu̱ú ñuu ña̱ kútu̱ní ndási;
kǒoka ña̱ʼa koo chí yuku̱ ta kooña nda̱a̱ táki̱ʼva íyo iin ñuʼú yi̱chí.
Kán kundoo tí si̱ndi̱ki̱ válí kixáʼanrí,*
ta kaxírí ndaʼa̱ yitu̱n.
11 Tá ná yi̱chi̱ ndaʼa̱nú,
kixi ná ñaʼá ta kindaanáña,
ta kuniñúʼunaña ña̱ ndakaʼminá ñuʼu̱.
Saáchi kǒo kúnda̱a̱-ini na̱ ñuu yóʼo.
Ña̱kán, ta̱ i̱xava̱ʼa miína, va̱ása kundáʼvi-inira kunirana,
ta ta̱ i̱xava̱ʼa miína, va̱ása chindeétáʼanra xíʼinna.
12 Ki̱vi̱ saá, Jehová ndakayara ku̱i̱ʼi tí íyo chí yu̱ta Éufrates iinsaá nda̱a̱ yu̱ta Egipto, ta iin tá iin ndóʼó na̱ ñuu Israel ndakayara. 13 Ki̱vi̱ saá, tivina iin ndiki̱ káʼnu, ta na̱ xa̱a̱ ku̱nu̱mí kuvi na̱ ndóo chí Asiria ta saátu na̱ ndóo chí Egipto, kixina chí yuku̱ yi̱i̱ ña̱ íyo chí Jerusalén ta kuxítína nu̱ú Jehová.