Isaías
28 Ndáʼviní corona* ña̱ liviní kánuu xi̱ní na̱ ñuu ta̱ Efraín, na̱ xíʼiní,
ta saátu ña̱ liviní náʼa̱ña saáchi íyoña nda̱a̱ táki̱ʼva íyo iin yita ña̱ yíchi̱,
ña̱ ka̱na chí xi̱kí nu̱ú va̱ʼaní kána ña̱ʼa, nu̱ú ndóo na̱ yiví na̱ kúta̱aní-ini xa̱ʼa̱ ña̱ xíʼina vino.
2 Kotondó. Jehová kúúmiíra iin ta̱ ndakúní ta̱ kúúmiíní ndee̱.
Íyora nda̱a̱ táki̱ʼva íyo taxa ta saátu ñíí,* íyora nda̱a̱ táki̱ʼva íyo ta̱chí ña̱ ndeéní káni ta sándiʼi-xa̱ʼa̱ña ndiʼi ña̱ʼa,
nda̱a̱ táki̱ʼva íyo sa̱vi̱ tá ndeéní kúun,
ta ta̱kán ndeéní sakánara corona nu̱ú ñuʼú.
3 Corona ña̱ liviní kánuu xi̱ní na̱ ñuu ta̱ Efraín, na̱ xíʼiní,
ku̱a̱ñi̱naña.*
4 Ta saátu ña̱ liviní náʼa̱ña ña̱ íyo nda̱a̱ táki̱ʼva íyo iin yita ña̱ yíchi̱,
ña̱ ka̱na chí xi̱kí nu̱ú va̱ʼaní kána ña̱ʼa,
kooña nda̱a̱ táki̱ʼva íyo iin higo tí nu̱ú va̱ʼa kána:
tá iin na̱ yiví xíninarí, ndi̱ku̱n xáxinarí.
5 Ki̱vi̱ kán, Jehová ta̱ xáʼndachíñu nu̱ú na̱ ángel, nduura iin corona ña̱ ndáyáʼviní ta saátu iin ña̱ʼa ña̱ liviní ña̱ kunúu xi̱ní na̱ ñuura na̱ kindo̱o. 6 Ta̱kán, taxira ña̱ nda̱kúní ná ndatiinna ku̱a̱chi ta taxitura ndee̱ ndaʼa̱ na̱ ndáa yéʼé ñuu, ña̱ va̱ʼa kuchiñuna xíʼin na̱ va̱xi kanitáʼan xíʼinna.
7 Saátu na̱yóʼo, xíʼina vino ta ndáñúʼuna chí yichi̱,
nda̱a̱ yatin nduvana tá xíʼina.
Na̱ su̱tu̱ xíʼin na̱ profeta xíʼina ndixi ta ndáñúʼuna chí yichi̱;
sána xi̱nína xíʼin vino,
ta nda̱a̱ yatin nduvana xa̱ʼa̱ ña̱ xíʼina ndixi;
xa̱ʼa̱ ña̱ va̱ása kívi kotona, ndáñúʼuna chí yichi̱,
xa̱ʼa̱ ña̱ va̱ása viíka ndákanixi̱nína, ni va̱ása viíka ndátiinna ku̱a̱chi.
8 Ña̱ ndu̱xanna, chútuña nu̱ú mesana...,
ku̱yaku̱a̱ ndiʼi nu̱únú.
9 ¿Ndáana sanáʼa̱na,
ta ndáana ndakanina tu̱ʼun yóʼo nu̱ú?
¿Á na̱ sa̱kán sa̱ndákoo chichín ka̱ʼa̱nna xíʼin?
¿Á xíʼin na̱ va̱ása táxikana chichín?
10 Saáchi “tuku ta tuku chiñu xáʼndara,
tuku ta tuku káʼa̱nra xíʼinyó ndáaña keʼéyó
loʼo ña̱yóʼo ta loʼo ña̱ káa káʼa̱nra xíʼinna”.
11 Tasaá kuniñúʼura na̱ kǒo kívi ka̱ʼa̱n va̱ʼa, ta saátu na̱ káʼa̱n inka tu̱ʼun ña̱ ka̱ʼa̱nra xíʼin na̱ ñuu yóʼo. 12 Iin yichi̱ ni̱ka̱ʼa̱nra: “Yóʼo kúú nu̱ú ndákindee̱na. Ná ndakindee̱ na̱ kúnaa; yóʼo kúú nu̱ú kivi ndakindee̱na”. Soo kǒo níxiinna kuniso̱ʼona ña̱ ni̱ka̱ʼa̱nra. 13 Xa̱ʼa̱ ña̱kán, Jehová káʼa̱nra xíʼinna:
“Tuku ta tuku chiñu xáʼndai̱ nu̱úndó,
tuku ta tuku ña̱ káʼi̱n xíʼinndó keʼéndó,
loʼo ña̱yóʼo ta loʼo ña̱ káa káʼi̱n xíʼinndó”,
soo na̱kán va̱ása kuniso̱ʼona,
xa̱ʼa̱ ña̱kán ndakavana chí sa̱tá
ndiʼi-xa̱ʼa̱ ndiʼina ta tiinnana.
14 Xa̱ʼa̱ ña̱kán, ndóʼó na̱ kúta̱aní-ini, kuniso̱ʼondó ña̱ káʼa̱n Jehová,
ndóʼó na̱ xáʼndachíñu nu̱ú na̱ ñuu chí Jerusalén,
15 saáchi ndóʼó káchindó:
“Xa̱a̱ ke̱ʼéndi̱ iin trato xíʼin ña̱ xáʼní,
ta xa̱a̱ ki̱ndoondi̱ iin ña̱ʼa xíʼin Ya̱vi̱* nu̱ú ñúʼu na̱ ni̱xi̱ʼi̱.
Tá iin kama ná ndakutú ti̱kui̱í ta ndeéní ya̱ʼará,
va̱ása ni̱ʼívírá miíndi̱,
saáchi ña̱ vatá* ña̱ ki̱ndoondi̱ keʼéndi̱ kúú ña̱ sakǎku miíndi̱
ta ña̱yóʼo kúú ña̱ chise̱ʼé miíndi̱”.
16 Ña̱kán, táta káʼnu Jehová káʼa̱nra ña̱yóʼo:
“Kotondó, kuniñúʼi̱ yu̱u̱ ña̱ xa̱a̱ xi̱tondosóna ña̱ chindúʼi̱ xa̱ʼa̱ Sion,
yu̱u̱ ña̱ ndáyáʼviní kúú ña̱ kuniñúʼi̱ ña̱ chindúʼi̱ xa̱ʼa̱ña.
Na̱ ná kandíxa ña̱yóʼo, va̱ása yi̱ʼvína.
17 Ta ña̱ nda̱kúní ndatii̱n ku̱a̱chi xíʼinna, kooña nda̱a̱ táki̱ʼva íyo yoʼo̱ ña̱ xíniñúʼuna ña̱ távána ki̱ʼva
ta kootuña nda̱a̱ táki̱ʼva íyo plomo.
Ñíí sandíʼi-xa̱ʼa̱ña ña̱ vatá ña̱ ndáa-inindó
ta ndakutú ti̱kui̱í nu̱ú ñúʼu-se̱ʼéndó.
18 Ndiʼi-xa̱ʼa̱ trato ña̱ ke̱ʼéndó xíʼin ña̱ xáʼní
ta saátu ña̱ ki̱ndoondó xíʼin Ya̱vi̱* nu̱ú ñúʼu na̱ ni̱xi̱ʼi̱.
Tá iin kama ná ndakutú ti̱kui̱í ta ndeéní ya̱ʼará,
sandíʼi-xa̱ʼa̱vará ndóʼó.
19 Ndiʼi yichi̱ ña̱ ná ya̱ʼará,
ndiʼi-xa̱ʼa̱vandó xíʼinrá;
saáchi ya̱ʼará ndiʼi xi̱ta̱a̱n,*
tá káʼñu ta saátu tá ñuú.
Nda̱a̱ tá ná yi̱ʼvínína, saá kúú ña̱ kunda̱a̱-inina xíʼin tu̱ʼun ña̱ xi̱niso̱ʼona”.
20 Saáchi loʼoní xi̱to ta kǒo kívi ndakaa̱na nu̱únú
ta loʼoní ti̱ka̱chí ña̱ ndíxina ta kǒo kívi kusa̱ʼvina xíʼinña.
21 Saáchi ndakundichi Jehová nda̱a̱ táki̱ʼva ke̱ʼéra chí yuku̱ Perazim;
ta ndako̱ora nda̱a̱ táki̱ʼva ke̱ʼéra chí yoso̱ yatin Gabaón,
ña̱ va̱ʼa saxínura chiñura ta síínní koo ña̱yóʼo,
chiñu ña̱ keʼéra, ndakanda̱ní-inina* xíʼinña.
22 Xa̱ʼa̱ ña̱kán, va̱ása kusi̱kindaandó
tasaá va̱ása kútu̱ ka̱tún cadena ña̱ núʼnindó;
saáchi xa̱a̱ xi̱niso̱ʼi̱ ña̱ ni̱ka̱ʼa̱n táta káʼnu Jehová ta̱ xáʼndachíñu nu̱ú na̱ ángel,
ña̱ chi̱kaa̱-inira sandíʼi-xa̱ʼa̱ra iníísaá ñuʼú yóʼo.
23 Kuniso̱ʼondó ña̱ ka̱ʼi̱n;
ta viíní kuniso̱ʼondó ña̱ ka̱ʼi̱n xíʼinndó.
24 ¿Á iníí ki̱vi̱ táʼví iin ta̱a tá kúma̱níka chiʼira?
¿Á nina ta̱ táʼví kuití kúúra ta ndásandoora nu̱ú ñuʼúra?
25 ¿Á su̱ví tá xa̱a̱ nda̱sandoora nu̱ú ñuʼúra
kúú ña̱ chíʼira comino ta saátu comino tu̱ún?
¿Ta á su̱ví saátu chíʼira trigo, mijo xíʼin cebada, ta saátu chíʼira espelta chí yuʼú ñuʼúra?
26 Saáchi ta̱kán,* va̱ʼaní sánáʼa̱rara.
Ndióxi̱ra kúú ta̱ sánáʼa̱ miíra.
27 Saáchi va̱ása xíniñúʼuna trillo* tá sákuachina comino tu̱ún,
ta va̱ása xíniñúʼuna llanta carreta ña̱ sakuáchina comino.
Saáchi xíʼin yitu̱nva sákuachina comino ta sáatu comino tu̱ún.
28 Tá sákuachina trigo, ¿á ku̱a̱ʼání yichi̱ sákuachinaña nda̱a̱ ndúuña harina ña̱ keʼéna si̱ta̱váʼa?
Va̱ása, kǒo kéʼéna ña̱yóʼo.
Ta tá sáya̱ʼana llanta carretana ta saátu kuáyi̱ sa̱na̱na sa̱tá ña̱yóʼo,
va̱ása sákuachi ndiʼinaña nda̱a̱ ndúuña ya̱a̱.
29 Mií Jehová ta̱ xáʼndachíñu nu̱ú na̱ ángel kúú ta̱ káʼa̱n tu̱ʼun yóʼo;
va̱ʼaní ña̱ kúni̱ra keʼéra
ta ndiʼi ña̱ʼa ña̱ kéʼéra, ndáyáʼviníña.