Isaías
29 “Ndáʼviní Ariel,* Ariel, ñuu nu̱ú ni̱xi̱yo ta̱ David.
Ku̱i̱ya̱ tá ku̱i̱ya̱ keʼéndó vikó;
ta kǒo sandákoondó keʼéndó ña̱yóʼo.
2 Soo taxii̱ ná kundi̱ʼi-ini ñuu Ariel,
ta kusuchí-iniña ta kuakuña,
ta kooña nda̱a̱ táki̱ʼva íyo nu̱ú xíxi̱ ñuʼu̱, nu̱ú altar Ndióxi̱.
3 Xa̱i̱ koi̱ chí sa̱tá nu̱ú íyoún ña̱ va̱ʼa kanitáʼi̱n xíʼún,
ta iníí sa̱tá nu̱ú íyoún katai̱ yitu̱n tú xi̱ín* nu̱ú
ta ixava̱ʼi̱ nama̱ ña̱ kundasi sa̱tá nu̱ú íyoún.
nda̱a̱ táki̱ʼva va̱ása káxi íyo tu̱ʼun na̱ káʼa̱n ña̱ kivi ka̱ʼa̱nna xíʼin na̱ ni̱xi̱ʼi̱,
saá koo tu̱ʼún ña̱ ná kana nu̱ú ñuʼú
ta ya̱a̱ní koo tu̱ʼún ña̱ ka̱ʼún nda̱a̱ nu̱ú yáká.
5 Ku̱a̱ʼání koo na̱ sáa̱-ini xíni yóʼó nda̱a̱ táki̱ʼva ku̱a̱ʼání kúú yáká,
na̱ ndi̱va̱ʼa-ini koona nda̱a̱ táki̱ʼva íyo xe̱ʼe̱* ña̱ ndáchí xíʼin ta̱chí.
Ta iin kama kuu ña̱yóʼo.
6 Jehová ta̱ xáʼndachíñu nu̱ú na̱ ángel, kundaara yóʼó
kuniñúʼura taxa, satáa̱nra, ta ndeéní saníʼira,
ndeéní sakánira ta̱chí ta ndeéní sakúunra sa̱vi̱, saátu kuniñúʼura ñuʼu̱ ña̱ ndeéní xíxi̱”.
7 Tasaá ndiʼi na̱ ñuu na̱ kánitáʼan xíʼin ñuu Ariel,
ndiʼi na̱ kánitáʼan xíʼinña,
ndiʼi nama̱ ña̱ i̱xava̱ʼana sa̱táña
ta saátu ndiʼi na̱ sándi̱ʼi-iniña
kooña nda̱a̱ táki̱ʼva íyo iin xa̱ni, nda̱a̱ táki̱ʼva íyo iin visión ña̱ xi̱nina tá ñuú.
8 Ndiʼi na̱ ñuu na̱ kánitáʼan xíʼin yuku̱ Sion
kundoʼona nda̱a̱ táki̱ʼva ndóʼo na̱ xíʼi̱ so̱ko,
ta xánina* ña̱ xíxina soo tá ndákáxí-inina,* xíʼi̱na so̱ko
ta saátu kundoʼona nda̱a̱ táki̱ʼva ndóʼo na̱ kúni̱ koʼo ti̱kui̱í ta xánina ña̱ xíʼina ti̱kui̱í
soo tá ndákáxí-inina, kúnaana ta kúni̱na koʼona ti̱kui̱í.
9 Ndakanda̱ní-inindó;*
sakúkúándó miíndó ta va̱ása kotondó.
Ni̱xi̱nina soo su̱ví xa̱ʼa̱ ña̱ xi̱ʼina vino kúúña;
xa̱a̱ yatin nduvana soo su̱ví xa̱ʼa̱ ña̱ xi̱ʼina ndixi kúúña.
10 Saáchi Jehová kúú ta̱ ta̱xi ña̱ ná ku̱su̱n naandó;
nda̱kasira nu̱ú ndóʼó na̱ profeta,
ta nda̱kasira xi̱ní ndóʼó na̱ ta̱a na̱ xíto visión.
11 Saáchi nu̱ú ndóʼó, ndiʼi visión íyoña nda̱a̱ táki̱ʼva íyo iin libro ña̱ ndási kútu̱ xíʼin sello. Tá táxindóña ndaʼa̱ iin na̱ xíni̱ kaʼvi ta káʼa̱nndó xíʼinna “Ixaún ña̱ ma̱ní, kaʼvi ña̱yóʼo ta ndeé kaʼviúnña”, na̱yóʼo ndákuiinna “Kǒo kívi keʼíi̱ ña̱yóʼo chi ndásiña xíʼin sello”. 12 Ta tá táxindó libro ndaʼa̱ na̱ kǒo xíni̱ kaʼvi ta káʼa̱nndó xíʼinna “Ixaún ña̱ ma̱ní, kaʼvi ña̱yóʼo”, na̱yóʼo ndákuiinna “Kǒo xíni̱i̱ kaʼvii̱”.
13 Jehová káchira: “Na̱ ñuu yóʼo káʼa̱nna ña̱ ndásakáʼnuna yi̱ʼi̱
ta íxato̱ʼóna yi̱ʼi̱ xíʼin yuʼúvana,
soo níma̱na, xíkání íyoña nu̱úi̱,
ta tá ndásakáʼnuna yi̱ʼi̱, ndíku̱nna ña̱ sa̱náʼa̱ inka na̱ yiví miína.
14 Xa̱ʼa̱ ña̱kán, tuku keʼíi̱ ña̱ sandákanda̱ní-ini na̱ ñuu yóʼo,
tuku ta tuku keʼíi̱ ña̱ sandákanda̱-inina;
ta na̱ ndíchi na̱ ni̱xi̱yo ñuuna, va̱ása kuumiíkana ña̱ ndíchi
ta na̱ ta̱a na̱ xíni̱ní, kǒoka ña̱ kunda̱a̱-inina xa̱ʼa̱”.
15 Ndáʼviní na̱ chíse̱ʼé ña̱ kúni̱na keʼéna nu̱ú Jehová.
Nu̱ú naa kéʼéna ku̱a̱ʼání ña̱ʼa
ta káchina: “¿Ndáana xíto ña̱ kéʼéyó?
¿Ndáana kúnda̱a̱-ini ndáaña kéʼéyó?”.
16 Ndi̱va̱ʼaní-inindó
¿Á iin kúu nda̱ʼyi̱ xíʼin ta̱ íxava̱ʼa ña̱ʼa xíʼin nda̱ʼyi̱?
¿Á kivi ka̱ʼa̱n iin ña̱ʼa xa̱ʼa̱ ta̱ i̱xava̱ʼaña
“Su̱ví ta̱yóʼo kúú ta̱ níkeʼé yi̱ʼi̱”?
¿Á kivi ka̱ʼa̱n iin ña̱ʼa ña̱ i̱xava̱ʼana xa̱ʼa̱ ta̱ i̱xava̱ʼaña
“Kǒo kúnda̱a̱-ini ta̱yóʼo xa̱ʼa̱ nda̱a̱ ni iin ña̱ʼa”?
17 Ti̱xin loʼo kuití tiempo, Líbano nduuña nda̱a̱ táki̱ʼva íyo nu̱ú chíʼina yitu̱n tú táxi ku̱i̱ʼi
ta nu̱ú íyo tú yitu̱n yóʼo, kooña nda̱a̱ táki̱ʼva íyo iin yuku̱.
18 Ki̱vi̱ kán, na̱ kǒo kívi kuniso̱ʼo, kuniso̱ʼona ña̱ káʼa̱n libro yóʼo
ta xa̱ʼa̱ ña̱ kǒoka vi̱kó ndáá ta va̱ása naa, na̱ kúáa,* va̱ʼa ndakotona.
19 Na̱ vitá-ini, kusi̱íní-inina xa̱ʼa̱ Jehová
ta na̱ nda̱ʼví, kusi̱íní-inina xa̱ʼa̱ Ndióxi̱ na̱ ñuu Israel, Ndióxi̱ ta̱ yi̱i̱.
20 Saáchi ndiʼi-xa̱ʼa̱ na̱ ndi̱va̱ʼa-ini
ta saátu na̱ kúta̱a-ini, ndiʼi-xa̱ʼa̱na
ta ndiʼi na̱ xa̱a̱ íyo tu̱ʼva ña̱ keʼéna ña̱ va̱ása va̱ʼa xíʼin inkana, ndiʼi-xa̱ʼa̱na,
21 na̱ káʼa̱n ña̱ vatá* ta chíkaa̱na ku̱a̱chi inkana,
na̱ sándaʼvi na̱ ndákiʼin tu̱ʼun miína chí yéʼé ñuu
ta saátu na̱ káʼa̱n ña̱ vatá xa̱ʼa̱ ña̱ kǒo kúni̱na nda̱kú ndatiinna ku̱a̱chi xíʼinna.
22 Xa̱ʼa̱ ña̱kán, Jehová ta̱ sa̱kǎku ta̱ Abrahán, káʼa̱nra ña̱yóʼo xíʼin na̱ veʼe ta̱ Jacob:
“Va̱ása kukaʼanka nu̱ú ta̱ Jacob
ta va̱ása na̱ʼa̱ nu̱úra ña̱ nda̱kava-inira.
23 Saáchi tá ná kotora na̱ se̱ʼera na̱ i̱xava̱ʼi̱,
ña̱ nda̱takana nu̱ú íyora,
ndasakáʼnuna ki̱víi̱,
ta ixato̱ʼóna Ndióxi̱ ta̱ yi̱i̱, Ndióxi̱ ta̱ Jacob
ta na̱ʼa̱na ña̱ íxato̱ʼóna Ndióxi̱ na̱ ñuu Israel.
24 Na̱ va̱ása káxi kúnda̱a̱-ini, xa̱a̱na kunda̱a̱ va̱ʼa inina
ta na̱ káʼa̱nkúáchi,* taxivana ña̱ sanáʼa̱nana”.