Isaías

36 Tá xa̱a̱ ku̱a̱ʼa̱n 14 ku̱i̱ya̱ xáʼndachíñu ta̱ Ezequías, ta̱ Senaquerib ta̱ xi̱kuu rey ñuu Asiria ni̱xa̱ʼa̱nra ka̱nitáʼanra xíʼin ndiʼi ñuu ña̱ kútu̱ní ndási ña̱ ni̱xi̱yo chí Judá ta ku̱chiñura nda̱kiʼinraña. 2 Tá íyo ta̱ rey ñuu Asiria chí Lakís, saá chi̱ndaʼára ta̱ xi̱taxi vino xi̱xiʼira* ta saátu chi̱ndaʼára ku̱a̱ʼání na̱ soldado ña̱ ku̱ʼu̱nna ñuu Jerusalén nu̱ú ni̱xi̱yo ta̱ rey Ezequías. Ni̱xa̱a̱na yatin chí nu̱ú xi̱yaʼa ti̱kui̱í tá xi̱ñuʼu ini tanque ña̱ ni̱xi̱yo chí nu̱ú súkun, yatin chí yichi̱ chí nu̱ú xi̱xaʼa̱n na̱ yiví xi̱ndakatana ti̱ko̱to̱na. 3 Tasaá ta̱ Eliaquim se̱ʼe ta̱ Hilquías, ta̱ xi̱kiʼin kuenta xíʼin veʼe* ta̱ rey, ta saátu ta̱ Sebná ta̱ xi̱kuu secretario xíʼin ta̱ Joá se̱ʼe ta̱ Asaf ta̱ xi̱kaʼyi xa̱ʼa̱ ña̱ xi̱kuu, ni̱xa̱ʼa̱nna nda̱kutáʼanna xíʼinra.

4 Xa̱ʼa̱ ña̱kán ta̱ xi̱taxi vino xi̱xiʼi ta̱ rey, ni̱ka̱ʼa̱nra xíʼinna: “Ixandó ña̱ ma̱ní ka̱ʼa̱nndó ña̱yóʼo xíʼin ta̱ Ezequías: ‘Ña̱yóʼo kúú ña̱ káʼa̱n rey ta̱ káʼnu, ta̱ rey ñuu Asiria: “¿Nda̱chun ndákanixi̱níndó ña̱ kǒo nda̱a̱ ni iin ña̱ʼa kundoʼondó? 5 Yóʼó káʼún ña̱yóʼo ‘Xa̱a̱ xíni̱vai̱ ndáaña keʼíi̱ ta saátu kúúmiíi̱ na̱ soldado na̱ ku̱ʼu̱n nu̱ú ku̱a̱chi’, soo su̱ví ña̱ ndixaví kúú ña̱ káʼún. ¿Ndáana kúú na̱ ndáa-inindó, ta xa̱ʼa̱ ña̱kán kǒo xíínkandó kandíxandó ña̱ káʼi̱n? 6 Yóʼó ndáa-iniún ta̱ faraón, ta̱ rey ñuu Egipto, soo ta̱kán nda̱a̱ táki̱ʼva íyo iin tu̱yo̱ó* tú ni̱ta̱ʼnu̱ saá íyora, ta tá iinna ná katavi̱ndaana túyóʼo ku̱i̱sonú* ndaʼa̱na ta saátu kúú ña̱ kundoʼo na̱ ndáa-ini ta̱ faraón. 7 Soo tá ndóʼó ná kachindó ‘Jehová Ndióxi̱ndi̱ kúú ta̱ ndáa-inindi̱’, ¿á su̱ví altar ta̱kán kúú ña̱ sa̱kútaʼa ta̱ Ezequías? Ta saátu, ¿á su̱ví nu̱ú xi̱ndasakáʼnunara* kúú ña̱ sa̱kútaʼara ta ni̱ka̱ʼa̱nra xíʼin na̱ ñuu Judá ta saátu xíʼin na̱ ñuu Jerusalén ‘Nu̱ú altar ña̱ íyo chí Jerusalén kúú ña̱ xíniñúʼu kuxítíndó’?”’. 8 Ná keʼéyó ña̱yóʼo: ta̱ rey ñuu Asiria ta̱ káchíñui̱ nu̱ú, taxira 2,000 kuáyi̱ ndaʼún tá ná kuchiñún ndani̱ʼún na̱ koso* ndiʼi tíyóʼo. 9 Ña̱kán, ni ná chindaʼáva na̱ ñuu Egipto carretana xíʼin na̱ yósó* kuáyi̱ ña̱ chindeétáʼanna xíʼún, va̱ása kuchiñuvíún sandíʼi-xa̱ʼún ni iin na̱ káchíñu nu̱ú ta̱ rey, na̱ kúúmií iin chiñu ña̱ loʼoní ndáyáʼvi. 10 Ta saátu, miíva Jehová ta̱xi nda̱yí* ndaʼíi̱ ña̱ sandíʼi-xa̱ʼíi̱ ñuu yóʼo, saáchi mií Jehová ni̱ka̱ʼa̱n xíʼi̱n: ‘Kúáʼan kanitáʼún xíʼin ñuu káa ta sandíʼi-xa̱ʼúnña’”.

11 Tasaá ta̱ Eliaquim, ta̱ Sebná xíʼin ta̱ Joá ni̱ka̱ʼa̱nna xíʼin ta̱ xi̱taxi vino xi̱xiʼi ta̱ rey: “Ixaún ña̱ ma̱ní, tu̱ʼun arameo* ka̱ʼún xíʼinndi̱ chi káʼa̱nvandi̱ña. Va̱ása ka̱ʼún tu̱ʼun na̱ judío xíʼinndi̱, ña̱ káʼa̱n ndiʼi na̱ yiví na̱ níndoso nu̱ú nama̱”. 12 Soo ta̱ xi̱taxi vino xi̱xiʼi ta̱ rey ni̱ka̱ʼa̱nra xíʼinna: “¿Á xíʼin mií kuitívandó ta saátu xíʼin ta̱ káchíñundó nu̱ú chi̱ndaʼá ta̱ rey yi̱ʼi̱ va̱xii̱ ka̱ʼi̱n tu̱ʼun yóʼo? Saáchi saátu na̱ ta̱a na̱ níndoso nu̱ú nama̱ káa xíniñúʼu kuniso̱ʼona tu̱ʼun yóʼo, chi inkáchi kutáʼanndó kaxíndó si̱ʼvíndó ta koʼondó ta̱lásándó”.*

13 Tasaá ta̱ xi̱taxi vino xi̱xiʼi ta̱ rey, ndeéní ni̱ka̱ʼa̱nra tu̱ʼun na̱ judío: “Kuniso̱ʼondó ña̱ káʼa̱n rey ta̱ káʼnu, ta̱ rey ñuu Asiria. 14 Ña̱yóʼo kúú ña̱ káʼa̱n ta̱ rey: ‘Va̱ása taxindó ña̱ sandáʼvi ta̱ Ezequías ndóʼó, saáchi va̱ása kuchiñuvíra sakǎkura ndóʼó nu̱úi̱. 15 Ta kǒo taxindó ña̱ sandáʼvi ta̱ Ezequías ndóʼó ña̱ kundaa-inindó Jehová, xa̱ʼa̱ ña̱ káchira “Sakǎkuva Jehová miíyó, ta ta̱ rey ñuu Asiria va̱ása kuchiñuvíra ndakiʼinra ñuu yóʼo”. 16 Va̱ása kuniso̱ʼondó ña̱ káʼa̱n ta̱ Ezequías, saáchi ña̱yóʼo kúú ña̱ káʼa̱n ta̱ rey ñuu Asiria: “Ná sandíʼiyó ku̱a̱chi ta kǒo kanitáʼanyó. Saá kúú ña̱ kivi kaxíndó ku̱i̱ʼi ña̱ kana ndaʼa̱ tú uvandó ta saátu ndaʼa̱ tú higondó ta koʼondó ti̱kui̱í tá ñúʼu ini pozo ña̱ kúúmiíndó, 17 nda̱a̱ ná kixai̱ ta ndakiʼii̱n ndóʼó ku̱ʼu̱nndó xíʼi̱n nu̱ú iin ñuʼú ña̱ íyo nda̱a̱ táki̱ʼva íyo ñuʼú miíndó. Iin ñuʼú nu̱ú íyoní trigo, cebada xíʼin uva, ña̱ kivi kuniñúʼundó ña̱ ixava̱ʼandó si̱ta̱váʼa xíʼin vino. 18 Va̱ása taxindó sandáʼvi ta̱ Ezequías ndóʼó tá káʼa̱nra xíʼinndó ‘Sakǎkuva Jehová miíyó’. ¿Ndáa ndióxi̱ na̱ inka ñuu kúú ña̱ xa̱a̱ ku̱chiñu sa̱kǎku ñuuna ndaʼa̱ yi̱ʼi̱ ta̱ rey ñuu Asiria? 19 ¿Ndáa míí ku̱a̱ʼa̱n ndióxi̱ na̱ ñuu Hamat xíʼin na̱ ñuu Arpad? ¿Ndáa míí ku̱a̱ʼa̱n ndióxi̱ na̱ ñuu Sefarvaim? ¿Á ku̱chiñuña sa̱kǎkuña ñuu Samaria nu̱úi̱? 20 ¿Ndáa ndióxi̱ kúú ña̱ xa̱a̱ ku̱chiñu sa̱kǎku ñuuna? Tá saá, ¿á kuchiñu Jehová sakǎkura na̱ ñuu Jerusalén nu̱úi̱?”’”.

21 Soo kǒo nda̱a̱ ni iin ña̱ʼa níka̱ʼa̱nna, saáchi ta̱ rey Ezequías ni̱ka̱ʼa̱nra ña̱yóʼo xíʼinna “Va̱ása ndakuiinndó yuʼúra”. 22 Soo ta̱ Eliaquim se̱ʼe ta̱ Hilquías, ta̱ xi̱kiʼin kuenta xíʼin veʼe* ta̱ rey, ta̱ secretario Sebná ta saátu ta̱ Joá se̱ʼe ta̱ Asaf ta̱ xi̱kaʼyi xa̱ʼa̱ ña̱ʼa ña̱ xi̱kuu, nda̱tána ti̱ko̱to̱na ta ni̱xa̱ʼa̱nna nu̱ú ta̱ Ezequías ta na̱túʼunna xíʼinra xa̱ʼa̱ ndiʼi ña̱ ni̱ka̱ʼa̱n ta̱ xi̱taxi vino xi̱xiʼi ta̱ rey.