Isaías
37 Ndi̱ku̱n tá xi̱niso̱ʼo ta̱ rey Ezequías ña̱yóʼo, nda̱tára ti̱ko̱to̱ra, nda̱kundixira ti̱ko̱to̱ ndayí* ta ni̱xa̱ʼa̱nra chí veʼe Jehová. 2 Tasaá ni̱ka̱ʼa̱nra xíʼin ta̱ Eliaquim ta̱ kíʼin kuenta xíʼin veʼera,* ta̱ secretario Sebná ta saátu ni̱ka̱ʼa̱nra xíʼin na̱ xi̱niʼi yichi̱ nu̱ú na̱ su̱tu̱ ña̱ ná ku̱ʼu̱nna nu̱ú ta̱ profeta Isaías se̱ʼe ta̱ Amoz, ta nda̱kundixina ti̱ko̱to̱ ndayí ku̱a̱ʼa̱nna. 3 Ta ni̱ka̱ʼa̱nna ña̱yóʼo xíʼin ta̱ Isaías: “Ña̱yóʼo kúú ña̱ ni̱ka̱ʼa̱n ta̱ Ezequías: ‘Ki̱vi̱ vitin ndíʼi̱ní-inindi̱, ni̱nda̱ʼyi̱na nu̱úndi̱ ta ku̱kaʼan nu̱úndi̱, ta íyondi̱ nda̱a̱ táki̱ʼva íyo iin ñaʼá ñá xa̱a̱ ku̱nu̱mí kaku se̱ʼe, soo kǒo ndee̱ñá ña̱ sakákuñá ña̱ loʼo yóʼo. 4 Sana kuniso̱ʼova Jehová ña̱ ni̱ka̱ʼa̱n ta̱ xi̱taxi vino xi̱xiʼi ta̱ rey,* ta̱ chi̱ndaʼá ta̱ rey ñuu Asiria ña̱ kusi̱kindaara Ndióxi̱ ta̱ nda̱a̱, tasaá Jehová Ndióxi̱yó taxira castigo ndaʼa̱ra xa̱ʼa̱ ña̱ ni̱ka̱ʼa̱nra. Ña̱kán, ixaún ña̱ ma̱ní ka̱ʼún xíʼinra xa̱ʼa̱ ndiʼi miíyó na̱ tákuka’”.
5 Ña̱kán, na̱ káchíñu nu̱ú ta̱ rey Ezequías ni̱ki̱ʼvina nu̱ú íyo ta̱ Isaías, 6 ta ta̱ Isaías ni̱ka̱ʼa̱nra xíʼinna: “Ña̱yóʼo kúú ña̱ ka̱ʼa̱nndó xíʼin ta̱ rey: ‘Ña̱yóʼo kúú ña̱ káʼa̱n Jehová: “Va̱ása yi̱ʼvíún xa̱ʼa̱ ndiʼi ña̱ʼa ña̱ kini ña̱ xi̱niso̱ʼún ni̱ka̱ʼa̱n na̱ káchíñu nu̱ú ta̱ rey ñuu Asiria xa̱ʼíi̱. 7 Chikai̱-inira ña̱ ná keʼéra iin ña̱ʼa, ta kunda̱a̱-inira xa̱ʼa̱ iin ña̱ʼa tasaá ndikóra chí ñuura; ta mií ñuura taxii̱ ña̱ ná kaʼnínara xíʼin espada”’”.
8 Tá ku̱ndaa̱-ini ta̱ xi̱taxi vino xi̱xiʼi ta̱ rey ña̱ kǒoka ta̱ rey ñuu Asiria íyo chí ñuu Lakís, nda̱kiʼinra ku̱a̱ʼa̱nra nu̱úra ta nda̱ni̱ʼírara ña̱ ndíkaa̱ra kánitáʼanra xíʼin na̱ ñuu Libná. 9 Tasaá ni̱ka̱ʼa̱nna xíʼin ta̱ rey ñuu Asiria xa̱ʼa̱ ta̱ rey Tirhacá ta̱ ñuu Etiopía, ka̱china: “Va̱xira kanitáʼanra xíʼún”. Tasaá tá xi̱niso̱ʼora ña̱yóʼo, chi̱ndaʼá tukura na̱ ku̱a̱ʼa̱n ka̱ʼa̱n ña̱yóʼo xíʼin ta̱ Ezequías: 10 “Ña̱yóʼo kúú ña̱ xíniñúʼu ka̱ʼa̱nndó xíʼin ta̱ rey Ezequías ta̱ xáʼndachíñu chí Judá: ‘Va̱ása taxiún ña̱ sandáʼvi Ndióxi̱ ta̱ ndáa-iniún yóʼó xa̱ʼa̱ ña̱ káʼa̱nra xíʼún “Va̱ása kuchiñuví ta̱ rey ñuu Asiria ndakiʼinra ñuu Jerusalén”. 11 Xa̱a̱ kúnda̱a̱va-iniún xa̱ʼa̱ ña̱ ke̱ʼé na̱ rey ñuu Asiria xíʼin ndiʼi ñuu ña̱ sa̱ndíʼi-xa̱ʼa̱na. ¿Ta á kuchiñu yóʼó ka̱kuún túviún? 12 Ndióxi̱ ña̱ xi̱ndasakáʼnu na̱ ñuu na̱ sa̱ndíʼi-xa̱ʼa̱ na̱ táʼi̱n na̱ xi̱ndoo xi̱naʼá va̱ása níkuchiñuvíña sakǎkuña ñuuna. ¿Ndáa míí ku̱a̱ʼa̱n ñuu Gozán, Harán, Rézef xíʼin na̱ yiví na̱ xi̱ndoo chí Edén ña̱ xi̱ndikaa̱ chí Tel-Asar? 13 ¿Ndáa míí ku̱a̱ʼa̱n ta̱ rey ñuu Hamat, ta̱ rey ñuu Arpad xíʼin na̱ rey ñuu Sefarvaim, Hená xíʼin Ivá?’”.
14 Ta̱ rey Ezequías nda̱kiʼinra carta ña̱ níʼi na̱ chi̱ndaʼá ta̱ rey ñuu Asiria ta ka̱ʼviraña. Tándi̱ʼi, nda̱kiʼinra ku̱a̱ʼa̱nra veʼe Jehová ta chi̱ndooraña nu̱ú Jehová. 15 Tasaá ta̱ Ezequías ki̱xáʼara káʼa̱nra xíʼin Jehová, ka̱chira: 16 “Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel, yóʼó ta̱ íyo nu̱ú tronoún sa̱tá* na̱ querubín, iinlá yóʼó kúú Ndióxi̱ ta̱ nda̱a̱ nu̱ú iníísaá ñuʼú. Miíún kúú ta̱ ke̱ʼé ndiví xíʼin ñuʼú. 17 Jehová, kuniso̱ʼo ña̱ káʼi̱n xíʼún, Jehová, koto ña̱ kúu. Kuniso̱ʼo tu̱ʼun ña̱ ni̱ka̱ʼa̱n ta̱ Senaquerib ña̱ kúsi̱kindaara yóʼó Ndióxi̱ ta̱ táku. 18 Jehová, ña̱ ndixa kúúva ña̱ sa̱ndíʼi-xa̱ʼa̱ na̱ rey ñuu Asiria ku̱a̱ʼání ñuu ta saátu ñuʼú miína. 19 Ta xa̱ʼmituna ndióxi̱ ña̱ xi̱ndasakáʼnu na̱ ñuu kán, chi su̱ví ndixa ndióxi̱ví níxikuuña chi na̱ yivíva ke̱ʼéña, ta ke̱ʼénaña xíʼin yitu̱n xíʼin yu̱u̱. Xa̱ʼa̱ ña̱kán kúú ña̱ ku̱chiñuna sa̱ndíʼi-xa̱ʼa̱naña. 20 Soo vitin Jehová Ndióxi̱ miíndi̱, ixaún ña̱ ma̱ní sakǎkún ndi̱ʼi̱ ndaʼa̱ra ña̱ va̱ʼa ná kunda̱a̱-ini ndiʼi na̱ ñuu na̱ íyo nu̱ú ñuʼú yóʼo ña̱ iinlá yóʼó kúú Ndióxi̱, Jehová”.
21 Ña̱kán ta̱ Isaías se̱ʼe ta̱ Amoz chi̱ndaʼára na̱ ku̱a̱ʼa̱n ka̱ʼa̱n ña̱yóʼo xíʼin ta̱ Ezequías: “Ña̱yóʼo kúú ña̱ káʼa̱n Jehová Ndióxi̱ na̱ ñuu Israel: ‘Xa̱ʼa̱ ña̱ ni̱ka̱ʼún xíʼi̱n xa̱ʼa̱ ta̱ Senaquerib ta̱ rey ñuu Asiria, 22 ña̱yóʼo kúú ña̱ káʼa̱n Jehová kundoʼora:
“Ñá loʼo kúa̱an se̱ʼe ñuu Sion, kúndasínu̱úñá xíniñá yóʼó ta kúsi̱kindaañá yóʼó.
Ñá se̱ʼe ñuu Jerusalén sákuikóñá* xi̱níñá tá xíniñá yóʼó.
23 ¿Ndáana kúú na̱ ku̱sikindaún ta ndáana kúú na̱ ni̱ka̱ʼa̱n-ndi̱va̱ʼún xa̱ʼa̱?
¿Ndáana kúú na̱ ni̱nda̱ʼyi̱ún nu̱ú
ta ndáana kúta̱aní-iniún nu̱ú?
Ke̱ʼún ña̱yóʼo xíʼin Ndióxi̱ na̱ ñuu Israel, Ndióxi̱ ta̱ yi̱i̱.
24 Chi̱ndaʼún na̱ ki̱xi ku̱sikindaa Jehová ta ka̱chiún:
‘Ku̱a̱ʼání kúú carreta tú xáʼa̱n nu̱ú ku̱a̱chi kúúmiíi̱
ta xíʼin túyóʼo ndai̱ nda̱a̱ nu̱ú xi̱kí ña̱ súkun,
ku̱ʼi̱n nda̱a̱ táʼví ña̱ xíká va̱ʼa kíndo̱o chí Líbano.
Kaʼndai̱ tú cedro tú súkun va̱ʼa, ta saátu tú enebro mií tú va̱ʼaka.
Ku̱ʼi̱n nu̱ú ñúʼu-se̱ʼéna ni káni̱ní kúúña ta saátu ku̱ʼi̱n yuku̱ ña̱ kóʼo̱ní.
25 Kaii̱n pozo ta koʼi̱ ti̱kui̱í tá inka ñuu;
ta xíʼin xa̱ʼíi̱ sayíchi̱i̱ ndiʼi yu̱ta tá ku̱a̱ʼa̱n chí Egipto’.
26 ¿Á ta̱ʼánva kunda̱a̱-iniún? Xa̱a̱ ya̱chi̱ví nda̱kaxii̱n ña̱ saá kooña.
Xa̱a̱ ku̱a̱ʼání tiempo ni̱ya̱ʼa nani tá ni̱ka̱ʼi̱n ña̱ keʼíi̱ ña̱yóʼo.
Ta vitin keʼíi̱ña.
Sandíʼi-xa̱ʼún ñuu ña̱ kútu̱ní ndási ta kǒoka na̱ kundoo nu̱úña.
27 Na̱ ndóo ñuu kán kǒoka ña̱ kivi keʼéna;
yi̱ʼvínína ta nda̱a̱ kukaʼan nu̱úna.
Kundoʼona nda̱a̱ táki̱ʼva ndóʼo ndiʼi ña̱ʼa ña̱ kána chí yuku̱ ta saátu ku̱ʼu̱ kúii̱,
nda̱a̱ táki̱ʼva ndóʼo ku̱ʼu̱ ña̱ kána xi̱ní veʼe, ña̱ yíchi̱ña xíʼin ta̱chí ña̱ va̱xi chí nu̱ú kíta ñu̱ʼu.*
28 Soo yi̱ʼi̱, kúnda̱a̱ va̱ʼa inii̱ ama kúú ña̱ ndákundúʼún,
ama kúú ña̱ kítaún ku̱a̱ʼún
ta ama kúú ña̱ ndíkóún
ta saátu ama kúú ña̱ sáún xíʼi̱n,
29 saáchi xa̱a̱ xi̱niso̱ʼovai̱ ña̱ xuxanní yuʼún ta saátu xi̱niso̱ʼi̱ ndiʼi tu̱ʼun ña̱ ni̱ka̱ʼún
xa̱ʼa̱ ña̱ sáa̱níún xíʼi̱n.
Ña̱kán chikai̱ iin ka̱a si̱ti̱ún ta chikai̱ freno yuʼún,
ta sandándikói̱ yóʼó ñuu nu̱ú ki̱xiún”.
30 ”’Ta ña̱yóʼo kúú señal ña̱ táxii̱ ndaʼún:* ku̱i̱ya̱ vitin kuxundó ña̱ kana mií nu̱ú ñuʼú, ta ku̱i̱ya̱ va̱xi kuxundó ña̱ kana ndaʼa̱ ña̱yóʼo, ta ku̱i̱ya̱ u̱ni̱ chiʼindó ta sakéendó,* chiʼindó tú uva ta kaxíndó ña̱ kana ndaʼa̱nú. 31 Na̱ veʼe ta̱ Judá na̱ ná kunu ta ka̱kuna, na̱yóʼo koona nda̱a̱ táki̱ʼva íyo iin yitu̱n tú kúnúní ñúʼu ti̱oʼo* ta ku̱a̱ʼání ku̱i̱ʼi táxinú. 32 Koo na̱ yiví na̱ táku na̱ kee chí Jerusalén, ta chí yuku̱ Sion kee na̱ ka̱ku. Ta Jehová ta̱ xáʼndachíñu nu̱ú na̱ ángel, mií ña̱ nda̱a̱ keʼéra ña̱yóʼo.
33 ”’Ña̱yóʼo kúú ña̱ káʼa̱n Jehová xa̱ʼa̱ ta̱ rey ñuu Asiria:
“Va̱ása ki̱ʼvira ñuu yóʼo,
ta ni va̱ása kanira ni iin flecha ñuu yóʼo,
ta ni va̱ása kuniʼira escudo ki̱ʼvira ñuu yóʼo
ta ni va̱ása chindoora iin koʼndo ñuʼú sa̱tá nama̱ ñuu yóʼo ña̱ va̱ʼa ki̱ʼvira kanitáʼanra xíʼin na̱ ndóo yóʼo”’.
34 ‘Ndikóra chí ñuu nu̱ú ki̱xira;
va̱ása ki̱ʼvira ñuu yóʼo’, káchi Jehová.
35 ‘Ndakiʼii̱n tu̱ʼun na̱ ñuu yóʼo ta sakǎkui̱na xa̱ʼa̱ ki̱víi̱
ta saátu xa̱ʼa̱ ta̱ David ta̱ xi̱kachíñu nu̱úi̱’”.
36 Tasaá iin ángel Jehová xa̱ʼníra 185,000 na̱ ta̱a chí nu̱ú xi̱ndoo na̱ asirio. Ta na̱ nda̱koo tá xi̱ta̱a̱n* xi̱nina ña̱ ni̱xi̱ʼi̱ ndiʼi na̱ soldado. 37 Ña̱kán ta̱ Senaquerib ta̱ rey ñuu Asiria ndi̱kóra chí Nínive ta kán ki̱ndoora. 38 Ta tá xi̱kuxítíra ini templo ndióxi̱ra Nisroc, se̱ʼera ta̱ Adramélec xíʼin ta̱ Sarézer xa̱ʼnínara xíʼin espada ta xi̱nuna ku̱a̱ʼa̱nna chí Ararat. Ta se̱ʼera ta̱ Esar-Hadón ni̱xa̱a̱ ndu̱u rey.