Isaías
38 Tiempo saá, ki̱ʼin kue̱ʼe̱ ta̱ Ezequías ta ndáa si̱lóʼo kuvira. Ta ta̱ profeta Isaías se̱ʼe ta̱ Amoz ni̱xa̱ʼa̱nra nu̱úra ta ni̱ka̱ʼa̱nra xíʼinra: “Ña̱yóʼo kúú ña̱ káʼa̱n Jehová: ‘Ka̱ʼa̱n xíʼin na̱ veʼún ndáaña xíniñúʼu keʼéna, saáchi va̱ása ndaʼakavíún chi ta̱ kuviva kúún’”. 2 Tá xi̱niso̱ʼora ña̱yóʼo, nda̱kotora chí kándíka veʼe ta ki̱xáʼara káʼa̱nra xíʼin Jehová: 3 “Jehová, káʼa̱n-ndáʼvii̱ xíʼún ña̱ ná ndakaʼún xa̱ʼíi̱ chi nda̱kúní ni̱xi̱yo inii̱ xi̱ndiku̱i̱n yichi̱ún xíʼin ndiʼi níma̱i̱, ta ke̱ʼíi̱ ña̱ va̱ʼa nu̱ún”. Tasaá ndeéní ki̱xáʼa xáku ta̱ Ezequías.
4 Tasaá ni̱ka̱ʼa̱n Jehová xíʼin ta̱ Isaías: 5 “Ndikó ta ka̱ʼún ña̱yóʼo xíʼin ta̱ Ezequías: ‘Ña̱yóʼo kúú ña̱ káʼa̱n Jehová Ndióxi̱ ta̱ David ta̱ táʼún ta̱ ni̱xi̱yo xi̱naʼá: “Xi̱niso̱ʼi̱ ña̱ ni̱ka̱ʼún xíʼi̱n ta xi̱nii̱ ña̱ xákuníún. Taxikai̱ kutakún 15 ku̱i̱ya̱, 6 ta sakǎkui̱ yóʼó xíʼin na̱ ñuu yóʼo nu̱ú ta̱ rey ñuu Asiria, ta ndakiʼii̱n tu̱ʼun na̱ ñuu yóʼo. 7 Ña̱yóʼo kúú señal ña̱ taxi Jehová ña̱ va̱ʼa na̱ʼa̱ Jehová nu̱ún ña̱ saxínura ña̱ ni̱ka̱ʼa̱nra xíʼún: 8 sakánda̱i̱ ku̱nda̱ti̱* ña̱ sáʼvi nu̱ú escalera* ta̱ Acaz, ta ndikóña u̱xu̱ kuato̱ chí sa̱tá”’”. Ta ndi̱kó ku̱nda̱ti̱ yóʼo u̱xu̱ kuato̱ chí sa̱tá.
9 Ña̱yóʼo kúú ña̱ ka̱ʼyi ta̱ rey Ezequías ta̱ ñuu Judá, tá ndeéndo̱ʼora ta nda̱ʼara.
10 Ka̱chii̱: “Ni ta̱ʼán kuchéevíi̱
soo xíniñúʼu ki̱ʼvii̱ Ya̱vi̱* nu̱ú ñúʼu na̱ ni̱xi̱ʼi̱.
Va̱ása kutakukai̱ ku̱a̱ʼá ku̱i̱ya̱”.
11 Ka̱chii̱: “Va̱ása kunikai̱ ña̱ va̱ʼa-ini Jehová,* va̱ása kookai̱ nu̱ú ñuʼú nu̱ú ndóo na̱ táku ña̱ va̱ʼa kunii̱ ña̱ va̱ʼa-ini Jehová.
Va̱ása kunikai̱ na̱ yiví na̱ táku
saáchi koi̱ xíʼin na̱ yiví na̱ xa̱a̱ ni̱xi̱ʼi̱.
12 Xa̱nina veʼe nu̱ú íyoi̱ ta ki̱ndaanaña ndaʼíi̱,
nda̱a̱ táki̱ʼva kéʼéna xíʼin veʼe loʼo ta̱ ndáa ndikachi.*
Nda̱a̱ táki̱ʼva ndátivína* iin tela ña̱ xa̱a̱ sa̱ndíʼina ni̱ku̱kuna,* saá keʼíi̱ xíʼin ña̱ tákui̱.
Nda̱a̱ táki̱ʼva xáʼndana iin tela ña̱ xa̱a̱ ni̱xi̱nu saá keʼéra xíʼi̱n.
Nda̱a̱ tá túvi iinsaá nda̱a̱ tá ku̱a̱ʼa̱n kúñuú, ku̱a̱ʼa̱n sándiʼi-xa̱ʼún yi̱ʼi̱.
13 Chíkai̱ ndee̱ ña̱ va̱ása kundi̱ʼiní-inii̱ nda̱a̱ tá túvi.
Nda̱a̱ táki̱ʼva kéʼé tí ndikaʼa* saá kéʼéra chi xáʼnu̱ra ndiʼi lekei̱;
nda̱a̱ tá túvi iinsaá nda̱a̱ ku̱a̱ʼa̱n kúñuú, ku̱a̱ʼa̱n sándiʼi-xa̱ʼún yi̱ʼi̱.
14 Nda̱a̱ táki̱ʼva ndáʼviní ndáʼyi̱ saa válí tí naní vencejo á tí naní tordo, saá kéʼíi̱;
nda̱a̱ táki̱ʼva xáku tí paloma saá xákui̱.
Xa̱a̱ ku̱naa nduchúnu̱úi̱ ña̱ xítoña nu̱ú súkun:
‘Jehová ndíʼi̱ní-inii̱.
Chindeétáʼan xíʼi̱n’.
15 ¿Ndáaña kivi ka̱ʼi̱n?
Ni̱ka̱ʼa̱nra xíʼi̱n ta ke̱ʼévara ña̱ ni̱ka̱ʼa̱nra.
Vitá koo inii̱ ndiʼi ku̱i̱ya̱ ña̱ kutakui̱
saáchi ndeéní tu̱ndóʼo ña̱ ni̱ya̱ʼi̱ nu̱ú.
16 ‘Jehová, xa̱ʼa̱ ña̱ va̱ʼa-iniún kúú ña̱ táku na̱ yiví,
ta xa̱ʼa̱ ña̱yóʼo kúú ña̱ íyo ndeíi̱ ta tákui̱.
Yóʼó sandáʼún yi̱ʼi̱ ta taxiún ña̱ kutakui̱.
17 Nu̱úka ña̱ táxi̱n koi̱, ni̱ndi̱ʼiní-inii̱;
soo xa̱ʼa̱ ña̱ kúni̱ún xíniún yi̱ʼi̱,
nda̱taváún yi̱ʼi̱ ini ya̱vi̱ ña̱ sándiʼi-xa̱ʼa̱.
Va̱ása xítokaún ku̱a̱chii̱.
18 Saáchi Ya̱vi̱* nu̱ú ñúʼu na̱ ni̱xi̱ʼi̱ va̱ása kívi ndasakáʼnuña yóʼó,
ta ña̱ xáʼní va̱ása kívi ndasakáʼnuña yóʼó.
Ta na̱ ni̱xi̱ʼi̱ na̱ ku̱a̱ʼa̱n ini ya̱vi̱, va̱ása kívika kotona ña̱ nda̱kú-iniún.
19 Na̱ táku kuití kúú na̱ kivi ndasakáʼnu yóʼó,
nda̱a̱ táki̱ʼva kéʼé yi̱ʼi̱ vitin.
Na̱ íyo se̱ʼe, kivi sanáʼa̱na se̱ʼena xa̱ʼa̱ ña̱ nda̱kú-iniún.
20 Sakǎku yi̱ʼi̱ Jehová
ta xíʼin arpa sakáʼi̱ yai̱
ini veʼe miíún Jehová keʼíi̱ ña̱yóʼo ndiʼi ki̱vi̱ ña̱ ná kutakui̱’”.
21 Tasaá ni̱ka̱ʼa̱n ta̱ Isaías: “Kúáʼanndó xa̱ʼa̱ loʼo yuxa̱n* ña̱ ku̱vaʼa xíʼin higo tí ni̱yi̱chi̱, ta chikaa̱ndóña nu̱ú ndi̱ʼi náʼnu ña̱ táʼyi ña̱ ka̱na ñii̱ra tasaá ndaʼara”. 22 Ta̱ Ezequías ni̱nda̱ka̱tu̱ʼunra: “¿Ndáaña kúú ña̱ na̱ʼa̱ nu̱úi̱ ña̱ ku̱ʼi̱n veʼe Jehová?”.