Isaías
42 Kotondó, ta̱yóʼo kúú ta̱ káchíñu nu̱úi̱, ta̱yóʼo kúú ta̱ chíndeétáʼi̱n xíʼin.
Ta̱yóʼo kúú ta̱ nda̱kaxii̱n, ta̱ kúsi̱íní-inii̱ xíʼin.
Ta̱xii̱ espíritui̱ ndaʼa̱ra,
ta ta̱yóʼo nda̱kúní ndatiinra ku̱a̱chi xíʼin na̱ ñuu.
2 Va̱ása nda̱ʼyi̱ kóʼóra* ta ni va̱ása ndaniʼira tu̱ʼunra,
va̱ása taxira kuniso̱ʼona tu̱ʼunra chí yichi̱.
3 Va̱ása ka̱ʼnu̱ra tu̱yo̱ó* tú xa̱a̱ ni̱ta̱ʼnu̱
ta ni va̱ása ndaʼvara ñuʼu̱ ña̱ sa̱kán xíxi̱.
Ta̱yóʼo nda̱kúní koo inira ta ndasaviíra ndiʼi ña̱ va̱ása va̱ʼa íyo.
4 Va̱ása kunaara ta ni va̱ása ndakava-inira nda̱a̱ ná ndasaviíra ña̱ʼa ña̱ va̱ása va̱ʼa íyo nu̱ú ñuʼu̱ yóʼo.
Na̱ ndóo nu̱ú isla ndátuna ndakiʼinna leyra.
5 Ña̱yóʼo kúú ña̱ káʼa̱n Jehová, Ndióxi̱ ta̱ nda̱a̱,
ta̱ i̱xava̱ʼa ndiví, ta̱ sa̱ndákaa̱ña,
ta̱ i̱xava̱ʼa ñuʼú ta táxira ña̱ kána ña̱ʼa nu̱úña,
ta̱ táxi ta̱chí ña̱ ndákiʼin ndiʼi na̱ íyo nu̱úña
ta táxira espíritura ndaʼa̱ na̱ xíka nu̱úña:
6 “Yi̱ʼi̱ Jehová, ka̱nai̱ yóʼó ña̱ va̱ʼa keʼíi̱ ña̱ nda̱kú; ti̱ii̱n ndaʼún.
Kundai̱ yóʼó ta koún nda̱a̱ táki̱ʼva íyo iin trato ña̱ kíndo̱i̱ xíʼin ndiʼi na̱ ñuu
ta koún nda̱a̱ táki̱ʼva íyo ñuʼu̱ ña̱ túu̱n nu̱ú na̱ ñuu,
7 ña̱ va̱ʼa ndakunáún nu̱ú na̱ kúáa,*
ña̱ va̱ʼa ndataváún na̱ ñúʼu veʼeka̱a,
ña̱ va̱ʼa ndataváún na̱ ñúʼu nu̱ú naa.
8 Yi̱ʼi̱ kúú Jehová. Ña̱yóʼo kúú ki̱víi̱;
va̱ása taxii̱ ña̱ ixato̱ʼóna inkana nu̱úi̱
ta ni va̱ása taxii̱ ña̱ ndasakáʼnuna inkaka ña̱ʼa ña̱ i̱xava̱ʼana,
chi yi̱ʼi̱ kúú ta̱ xíniñúʼu ndasakáʼnuna.
9 Kotondó. Xa̱a̱ ku̱uva ña̱ nu̱ú ña̱ xíniñúʼu kuu;
ta vitin káʼi̱n xa̱ʼa̱ ña̱ʼa ña̱ xa̱á xíʼinndó.
Nátúʼi̱n xa̱ʼa̱ña xíʼinndó tá kúma̱níka kuuña”.
10 Katandó iin yaa xa̱á nu̱ú Jehová,
nda̱a̱ xíká keendó katandó,
ndóʼó na̱ xíka nu̱ú tá mar xíʼin ndiʼi ña̱ íyo inirá,
ná kata ndiʼi isla xíʼin ndiʼi na̱ ndóo nu̱úña.
11 Ñuʼú yi̱chí xíʼin ndiʼi ñuu ña̱ íyo nu̱úña ná ndaniʼina tu̱ʼunna,
ta saátu ñuu válí nu̱ú ndóo na̱ Quedar.
Ná nda̱ʼyi̱ kóʼó na̱ ndóo nu̱ú íyo yu̱u̱ náʼnu xa̱ʼa̱ ña̱ kúsi̱í-inina;
nda̱a̱ xi̱ní yuku̱ ná nda̱ʼyi̱na.
12 Ná ixato̱ʼóna Jehová
ta nda̱a̱ na̱ ndóo nu̱ú isla ná ndasakáʼnunara.
13 Jehová ku̱ʼu̱nra kanitáʼanra nda̱a̱ táki̱ʼva kéʼé iin ta̱ xíni̱ní kanitáʼan, ta̱ ndakúní.
Koora nda̱a̱ táki̱ʼva íyo iin ta̱a ta̱ xáʼa̱n nu̱ú ku̱a̱chi, ta̱ kúni̱ní ku̱ʼu̱n kanitáʼan.
Nda̱ʼyi̱ kóʼóra, nda̱ʼyi̱ra nda̱a̱ táki̱ʼva kéʼé iin ta̱ xíka nu̱ú ku̱a̱chi;
na̱ʼa̱ra ña̱ ndakúníkara nu̱ú na̱ sáa̱-ini xíni miíra.
14 “Xa̱a̱ ku̱a̱ʼání tiempo kǒo ña̱ níka̱ʼi̱n.
Ku̱ndeé-inii̱ ta va̱ása níka̱ʼi̱n.
Tanai̱ ta ndakiʼin ni̱nui̱ ta̱chíi̱,
nda̱a̱ táki̱ʼva kéʼé iin ñaʼá ñá káku se̱ʼe.
15 Sandíʼi-xa̱ʼíi̱ yuku̱ xíʼin xi̱kí
sayíchi̱i̱ ndiʼi ña̱ kána nu̱ú ñuʼú.
Yu̱ta, ndasai̱rá isla*
sayíchi̱i̱ nu̱ú ndáku̱ʼun ti̱kui̱í nu̱ú íyoní tu̱yo̱ó.
16 Ku̱ʼi̱n xíʼin na̱ kúáa iin yichi̱ ña̱ va̱ása xíni̱na
ta taxii̱ ná kakana nu̱ú iin yichi̱ ña̱ va̱ása xíni̱na.
Ndasai̱ ña̱ naa, ñuʼu̱ ña̱ túu̱n
ta ndasanda̱i̱ ñuʼú nu̱ú íyoní koʼndo.
Ña̱yóʼo kúú ña̱ keʼíi̱ xa̱ʼa̱na ta va̱ása sandákoondaʼíi̱na”.
17 Ta na̱ ndáaní-ini ña̱ʼa ña̱ ndásakáʼnuna
taxínnana ta sakúkaʼanna nu̱úna,
saá kundoʼo na̱ káʼa̱n ña̱yóʼo xíʼin ndióxi̱ ña̱ ku̱vaʼa xíʼin ka̱a “Ndóʼó kúú ndióxi̱ndi̱”.
18 Kuniso̱ʼo ndóʼó na̱ sóʼó;
ta koto ndóʼó na̱ kúáa.
19 ¿Á íyo na̱ kúáaka, nu̱ú ta̱ káchíñu nu̱úi̱,
á íyo na̱ sóʼóka, nu̱ú ta̱ chi̱ndaʼíi̱ ku̱xa̱a̱ xíʼin tu̱ʼun nu̱úndó?
¿Ndáana kúáaka, nu̱ú ta̱ ta̱xii̱ ña̱ va̱ʼa ndaʼa̱,
ndáana kúáaka, nu̱ú ta̱ káchíñu nu̱ú Jehová?
20 Ku̱a̱ʼáníva ña̱ʼa xítoún soo va̱ása kíʼún kuenta xíʼinña.
Íyova so̱ʼún soo va̱ása xíniso̱ʼún.
21 Xa̱ʼa̱ ña̱ nda̱kúní íyo ña̱ kéʼéra
Jehová ndasachéekara leyra ta xa̱a̱ña kundayáʼviníña.
22 Soo i̱xakuíʼnana ndiʼi ña̱ʼa na̱ ñuu yóʼo ta ki̱ndaanaña ndaʼa̱na;
ndiʼina ñúʼuna ini iin ya̱vi̱, ta ñúʼu-se̱ʼéna ini veʼeka̱a.
Ki̱ndaana ndiʼi ña̱ʼana ta kǒo na̱ chindeétáʼan xíʼinna,
nda̱kiʼinna na̱yóʼo ku̱a̱ʼa̱n xíʼinna, ta kǒo na̱ káʼa̱n “Ndataxindóna”.
23 ¿Ndáa ndóʼó kuniso̱ʼo ña̱yóʼo?
¿Ndáana viíní kuniso̱ʼo xa̱ʼa̱ ña̱yóʼo ta ndakanixi̱nína xa̱ʼa̱ ña̱ koo chí nu̱únínu?
24 ¿Ndáana ta̱xi ña̱ nda̱kiʼinna ta̱ Jacob ku̱a̱ʼa̱n xíʼinna
nda̱a̱ táki̱ʼva kéʼéna xíʼin ña̱ʼa tá ndákiʼinnaña ku̱a̱ʼa̱n xíʼinna?
¿Ndáana nda̱taxi na̱ ñuu Israel ndaʼa̱ na̱ kui̱ʼná?
¿Á su̱ví Jehová kúú ta̱ ke̱ʼé ña̱yóʼo, ta̱ ni̱ki̱ʼviyó ku̱a̱chi nu̱ú?
Na̱yóʼo va̱ása níxiinna kakana yichi̱ra ta va̱ása níxiinna kundiku̱nna leyra.
25 Ña̱kán ni̱sa̱a̱níra xíʼinna
ta ta̱xira ña̱ ná kanitáʼan inka ñuu xíʼinna,
ta xa̱ʼa̱ ña̱ sáa̱níra sa̱ndíʼi-xa̱ʼa̱ ndiʼira ña̱ xi̱kuumiína soo va̱ása níxiniso̱ʼona.
Ndeéní ni̱sa̱a̱ra xíʼinna soo va̱ása níndi̱’i-inina xa̱ʼa̱ ña̱yóʼo.