Isaías
45 Ña̱yóʼo kúú ña̱ káʼa̱n yi̱ʼi̱ Jehová xíʼin ta̱ Ciro ta̱ nda̱kaxii̱n,
ta̱ ti̱ii̱n ndaʼa̱ kúaʼa
ta ndataxii̱ na̱ ñuu ndaʼa̱ ta̱yóʼo,
ña̱ va̱ʼa kindai̱ ndee̱ na̱ xáʼndachíñu,
ndakunái̱ yéʼé ñuu nu̱úra,
ta va̱ása ndasiña:
2 “Yi̱ʼi̱ kúú ta̱ kunúu ku̱ʼu̱n nu̱ún
ta ndasanda̱i̱ xi̱kí.
Sakúachi válíi̱ yéʼé ña̱ ku̱vaʼa xíʼin cobre
ta sakúachii̱ ka̱a ña̱ xíniñúʼuna ndákasina yéʼéna.
3 Ndaʼa̱ yóʼó ndataxii̱ ña̱ ndáyáʼvi ña̱ ñúʼu nu̱ú naa,
saátu ndataxii̱ ña̱ʼa ña̱ ndáyáʼvi ña̱ ñúʼu-se̱ʼé ndaʼún,
ña̱ va̱ʼa kunda̱a̱-iniún ña̱ yi̱ʼi̱ kúú Jehová,
Ndióxi̱ na̱ ñuu Israel, ta̱ xíniñúʼu ki̱vi̱ún tá kánai̱ yóʼó.
4 Xa̱ʼa̱ ta̱ Jacob ta̱ káchíñu nu̱úi̱, ta saátu xa̱ʼa̱ na̱ ñuu Israel na̱ nda̱kaxii̱n,
xíniñúʼi̱ ki̱vi̱ún tá kánai̱ yóʼó.
Taxii̱ ná ixato̱ʼóna ki̱vi̱ún ni va̱ása níxi̱xini̱ún yi̱ʼi̱.
5 Yi̱ʼi̱ kúú Jehová ta kǒoka inkana íyo nda̱a̱ táki̱ʼva íyo yi̱ʼi̱.
Iinlá yi̱ʼi̱ kúú Ndióxi̱ ta kǒo inkakana íyo.
Yi̱ʼi̱ taxi ndee̱ ndaʼún ni va̱ása níxi̱xini̱ún yi̱ʼi̱,
6 ña̱ va̱ʼa kunda̱a̱-ini na̱ yiví
ña̱ iinlá yi̱ʼi̱ kúú Ndióxi̱ ta kǒo inkakana íyo
nani tá kíta ñu̱ʼu iinsaá nda̱a̱ tá kíʼviña.
Yi̱ʼi̱ kúú Jehová ta kǒoka inkana íyo nda̱a̱ táki̱ʼva íyo yi̱ʼi̱.
7 Yi̱ʼi̱ kúú ta̱ íxava̱ʼa ña̱ ndáye̱ʼe̱ ta saátu ña̱ naa,
yi̱ʼi̱ kúú ta̱ táxi ña̱ va̱ása kundi̱ʼi-inindó ta saátu táxii̱ tu̱ndóʼo;
yi̱ʼi̱ Jehová kúú ta̱ kéʼé ndiʼi ña̱yóʼo.
8 Ndiví, sakúun sa̱vi̱;
vi̱kó, sakóyondó ña̱ nda̱kú.
Nda̱a̱ táki̱ʼva kána ku̱a̱ʼání ña̱ va̱ʼa nu̱ú ñuʼú tá kúun sa̱vi̱
saá ka̱ku na̱ ñui̱ ta kusi̱íní-inina kundoona nu̱ú koo ña̱ nda̱kú.
Yi̱ʼi̱ Jehová kúú ta̱ ke̱ʼé ña̱yóʼo”.
9 Ndáʼviní ña̱ káʼa̱nkúáchi* xíʼin ta̱ i̱xava̱ʼa miíña,
saáchi iin táʼví nda̱ʼyi̱ kuitíva kúúña,
íyoña nda̱a̱ táki̱ʼva íyo inkaka nda̱ʼyi̱ ña̱ ndóo nu̱ú ñuʼú.
¿Á xíniñúʼu ka̱ʼa̱n nda̱ʼyi̱ yóʼo xíʼin ta̱ íxava̱ʼa miíña “¿Ndáaña kéʼún?”?
¿Á xíniñúʼu ka̱ʼa̱nña xíʼinra “Kǒo ndaʼún”?
10 Ndáʼviní na̱ káʼa̱n ña̱yóʼo xíʼin ta̱ íyo se̱ʼe “¿Ndáa ña̱ʼa kúú se̱ʼún?”
ta xíʼin iin ñá íyo se̱ʼe káʼa̱nna ña̱yóʼo “¿Ndáaña kúú ña̱ sákakún?”.
11 Ña̱yóʼo kúú ña̱ káʼa̱n Jehová Ndióxi̱ na̱ ñuu Israel, Ndióxi̱ ta̱ yi̱i̱ ta̱ i̱xava̱ʼaña:
“¿Á nda̱ka̱tu̱ʼunndó yi̱ʼi̱ xa̱ʼa̱ ña̱ kuu chí nu̱únínu?
¿Á kaʼndandó chiñu nu̱úi̱ xa̱ʼa̱ ña̱ xíniñúʼu keʼíi̱ xíʼin se̱ʼi̱ ta saátu xíʼin ña̱ i̱xava̱ʼi̱?
12 Yi̱ʼi̱ kúú ta̱ ke̱ʼé ñuʼú ta saátu ke̱ʼíi̱ ta̱ ta̱a ta̱ íyo nu̱úña.
Yi̱ʼi̱ kúú ta̱ sa̱ndákaa̱ ndiví xíʼin ndaʼíi̱,
yi̱ʼi̱ kúú ta̱ xáʼnda chiñu nu̱ú ndiʼi tí ki̱mi ta saátu nu̱ú ndiʼika ña̱ íyo chí ndiví”.
13 “Xa̱ʼa̱ ña̱ nda̱kúní íyo ña̱ kéʼíi̱, ta̱xii̱ ña̱ ná ndeta* iin ta̱a
ta ndasanda̱kúi̱ ndiʼi yichi̱ra.
Ta̱yóʼo kúú ta̱ ixava̱ʼa ku̱a̱ʼá veʼe ta xa̱a̱ña kooña ñui̱,
taxira ná sa̱ñá na̱ nda̱kiʼinna ku̱a̱ʼa̱n xíʼinna,
va̱ása chaʼvinara ta ni va̱ása taxina nda̱a̱ ni iin ña̱ʼa ndaʼa̱ra ña̱ va̱ʼa keʼéra ña̱yóʼo”, káchi Jehová ta̱ xáʼndachíñu nu̱ú na̱ ángel.
14 Ña̱yóʼo kúú ña̱ káʼa̱n Jehová:
“Xu̱ʼún ña̱ kíʼin na̱ ñuu Egipto xíʼin ña̱ʼa ña̱ íxi̱íkó* na̱ ñuu Etiopía ta saátu na̱ sabeo na̱ súkunní,
kixina nu̱ún ta xa̱a̱na koona kuentaún.
Xíʼin cadena kunuʼni na̱yóʼo kakana sa̱táún.
Kixina ta kuxítína nu̱ún.
Xíʼin ña̱ to̱ʼó ka̱ʼa̱nna xíʼún: ‘Náʼa̱ miíva ña̱ íyo Ndióxi̱ xíʼún,
ta kǒo inkakara; kǒo inkaka Ndióxi̱’”.
15 Yóʼó kúún iin Ndióxi̱ ta̱ chíse̱ʼé mií,
Ndióxi̱ na̱ ñuu Israel ta̱ sáka̱ku miíndi̱.
16 Ndiʼina ndeéní kukaʼan nu̱úna;
na̱ íxava̱ʼa ña̱ʼa ña̱ ndásakáʼnuna, kukaʼan nu̱úna ku̱ʼu̱nna.
17 Soo Jehová sakǎkura na̱ ñuu Israel ndiʼi tiempo.
Nda̱a̱ ni iin ki̱vi̱ va̱ása sakúkaʼanna nu̱úndó ta ixato̱ʼóna ndóʼó.
18 Saáchi ña̱yóʼo kúú ña̱ káʼa̱n Jehová ta̱ i̱xava̱ʼa ndiví,
ta̱ kúú Ndióxi̱ ta̱ nda̱a̱
ta̱ i̱xava̱ʼa ñuʼú, ta̱ kútu̱ní i̱xava̱ʼaña,
ta su̱ví ña̱ níkeʼé mií kuitíra kúúña
chi ke̱ʼéraña ña̱ kundoona nu̱úña:
“Yi̱ʼi̱ kúú Jehová ta kǒoka inkana íyo nda̱a̱ táki̱ʼva íyo yi̱ʼi̱.
19 Su̱ví nu̱ú se̱ʼé níka̱ʼi̱nña ta ni va̱ása níka̱ʼi̱nña nu̱ú iin ñuʼú ña̱ naa;
va̱ása níka̱ʼi̱n ña̱yóʼo xíʼin na̱ se̱ʼe ta̱ Jacob:
‘Nandukúndó yi̱ʼi̱ soo kǒo ña̱ va̱ʼa ndakiʼinndó’.
Yi̱ʼi̱ kúú Jehová ta̱ káʼa̱n ndáaña kúú ña̱ va̱ʼa ta ndáaña kúú ña̱ nda̱kú.
20 Ndakutáʼanndó ta kixindó nu̱úi̱.
Ndóʼó na̱ xínu nu̱ú na̱ inka ñuu, inkáchi kuyatinndó nu̱úi̱.
Na̱ níʼi ña̱ʼa ña̱ ndásakáʼnuna xíka xíʼinna, kǒo miíví ña̱ kúnda̱a̱-inina,
na̱ káʼa̱n xíʼin ndióxi̱ ña̱ va̱ása kúchiñu sakǎku miína.
21 Na̱ʼa̱ndó prueba ña̱ va̱xi xíʼinndó, ka̱ʼa̱nndó xa̱ʼa̱ña.
Ná nda̱ka̱tu̱ʼun-táʼanna.
¿Ndáana ni̱ka̱ʼa̱n kuu ña̱yóʼo nda̱a̱ tá xi̱naʼá?
¿Ta ndáana ni̱ka̱ʼa̱n xa̱ʼa̱ña tiempo tá ya̱chi̱?
¿Á su̱ví yi̱ʼi̱ Jehová kúú ta̱ níka̱ʼa̱nña?
Iinlá yi̱ʼi̱ kúú Ndióxi̱ ta kǒo inkakana íyo;
iin Ndióxi̱ ta̱ kéʼé ña̱ nda̱kú kúi̱ ta sáka̱kui̱ ndóʼó, kǒo na̱ íyo nda̱a̱ táki̱ʼva íyo yi̱ʼi̱.
22 Naʼandó nu̱úi̱ tasaá kivi ka̱kundó, ndiʼi ndóʼó na̱ ndóo nda̱a̱ nu̱ú xíká,
saáchi yi̱ʼi̱ kúú Ndióxi̱ndó ta kǒoka inkakana.
ndiʼina chinaʼána ña̱ nda̱kúní koo inina xíʼi̱n
24 ta kachina: ‘Nina ña̱ nda̱kú kéʼé Jehová ta íyoní ndee̱ra.
Ndiʼi na̱ sáa̱ xíʼinra, ku̱ʼu̱nna nu̱úra ta kukaʼan nu̱úna.
25 Ndiʼi se̱ʼe na̱ ñuu Israel kunda̱a̱-inina ña̱ va̱ʼava kúú ña̱ nda̱kaxinna ndasakáʼnuna Jehová
ta na̱yóʼo kusi̱íní-inina ka̱ʼa̱nna xa̱ʼa̱ ña̱ ke̱ʼéra xa̱ʼa̱na’”.