Isaías
1 Ña̱yóʼo kúú visión ña̱ xi̱ni ta̱ Isaías* se̱ʼe ta̱ Amoz xa̱ʼa̱ ñuu Judá xíʼin ñuu Jerusalén tá tiempo ña̱ ni̱xi̱yo ta̱ Uzías, ta̱ Jotán, ta̱ Acaz xíʼin ta̱ Ezequías, na̱ xi̱xaʼndachíñu chí Judá:
2 Kuniso̱ʼo ndóʼó na̱ ndóo chí ndiví xíʼin na̱ ndóo nu̱ú ñuʼú,
saáchi ña̱yóʼo kúú ña̱ káʼa̱n Jehová:
“Sa̱kúaʼnui̱ se̱ʼi̱ ta sa̱náʼi̱na,
soo vitin i̱xaso̱ʼona nu̱úi̱ ta ku̱a̱ʼa̱nna contrai̱.
3 Tí si̱ndi̱ki̱ xíni̱va̱ʼarí xi̱toʼorí,
ta tí burro xíni̱va̱ʼarí nu̱ú táxi xi̱toʼorí xíxáʼanrí;*
soo na̱ ñuu Israel va̱ása xíni̱na yi̱ʼi̱, na̱ kíʼví kúú na̱ ñui̱”.
4 Ndáʼviní ndóʼó na̱ ñuu na̱ ku̱a̱kiʼvi ku̱a̱chi,
iin ñuu na̱ ndísoní ku̱a̱chi kúúndó,
se̱ʼi̱ na̱ ndi̱va̱ʼaní-ini kúúndó ta sándaʼviníndó.
Sa̱ndákoondó Jehová; va̱ása íxato̱ʼókandó Ndióxi̱ na̱ ñuu Israel,
Ndióxi̱ ta̱ yi̱i̱; ta va̱ása xíínkandó kunindóra.
5 ¿Nda̱chun íxaso̱ʼokandó ta kǒoka nu̱ú kivi kanina ndóʼó?
Xa̱a̱ tu̱kue̱ʼe̱ ndiʼi xi̱níndó ta ña̱ ndeéndóʼova kúú níma̱ndó.
6 Xa̱ʼa̱ndó iinsaá nda̱a̱ xi̱níndó kúúmiíña kue̱ʼe̱.
Tu̱kue̱ʼe̱ndó, ku̱kúii̱ ku̱ñundó, ka̱na ndi̱ʼi ñii̱ndó ta ni̱ka̱a̱n nu̱úña...,
ta̱ʼán sandáʼandóña, ta̱ʼán katúnndó nu̱úña,
ta ni ta̱ʼán chikaa̱ndó aceite nu̱úña ña̱ va̱ʼa ndaʼaña.
7 Kǒo nda̱a̱ ni iin ña̱ʼa nu̱ú ñuʼúndó.
Xa̱ʼmi ndiʼina ñuundó.
Xíto nu̱úndó ña̱ xíxi na̱ inka ñuu ndiʼi ña̱ kána nu̱ú ñuʼúndó.
Kǒo ña̱ʼa íyo nu̱úña ta náʼa̱ña nda̱a̱ táki̱ʼva náʼa̱ ñuʼú ña̱ ni̱ki̱ʼvina nu̱ú.
8 Nda̱a̱ táki̱ʼva íyo iin veʼe loʼo nu̱ú xíyo sávina,
ña̱ íyo nu̱ú chíʼina tú uva, saá sa̱ndákoondó ñuu Sion,
nda̱a̱ táki̱ʼva íyo veʼe loʼo ña̱ ka̱nindichina nu̱ú chíʼina pepino,
ta ki̱ndooña nda̱a̱ táki̱ʼva íyo iin ñuu ña̱ ndákasi na̱ sáa̱-ini xíniña.
9 Tá va̱ása nítaxi Jehová ta̱ xáʼndachíñu nu̱ú na̱ ángel ña̱ ka̱ku savana,
xa̱a̱yó kundoʼoyó nda̱a̱ táki̱ʼva ndo̱ʼo na̱ ñuu Sodoma
ta saátu kundoʼoyó nda̱a̱ táki̱ʼva ndo̱ʼo na̱ ñuu Gomorra.
10 Kuniso̱ʼondó ña̱ káʼa̱n Jehová, ndóʼó na̱ xáʼndachíñu chí Sodoma.
Kundiku̱nndó ña̱ káʼa̱n ley Ndióxi̱ndi̱, ndóʼó na̱ ñuu Gomorra.
11 “Kǒo chiñuví ndiʼi ña̱ sóko̱ndó nu̱úi̱”,* káchi Jehová.
“Kǒo kútóokai̱ ña̱ kaʼmindó* ndikachi* che̱e nu̱úi̱ ta so̱kóndórí nu̱úi̱,
ni xa̱ʼan* kití tí ndi̱ʼíní ta saátu ni kǒo kútóokai̱ ni̱i̱ si̱ndi̱ki̱ che̱e tí yúta̱,*
ni ni̱i̱ ndikachi válí xíʼin ti̱xúʼú.*
12 Ndóʼó va̱xindó nu̱úi̱,
¿soo ndáana ni̱ka̱ʼa̱n xíʼinndó kixindó ta kakandó chí yéʼíi̱
ta na̱ʼa̱ndó ña̱ va̱ása íxato̱ʼóndóña?
13 Va̱ása so̱kókandó ña̱ʼa ña̱ kúúmií harina nu̱úi̱ chi va̱ása ndáyáʼviña nu̱úi̱.
Kúndasíi̱ xínii̱ ña̱ chíʼmándó nu̱úi̱.
Tá kíxáʼa iin tá iin yo̱o̱, ki̱vi̱ sábado, tá ndátakandó ña̱ keʼéndó vikó...,
ni loʼo kǒo kútói̱ ña̱ kéʼéndó, chi kéʼéndó reunión ña̱ ndáyáʼviní ta kéʼétundó magia.
14 Kúndasíi̱ ña̱ kéʼéndó tá kíxáʼa iin tá iin yo̱o̱ ta saátu kúndasíi̱ vikó ña̱ kéʼéndó,
táki̱ʼva íyo iin ña̱ʼa ña̱ ve̱ení ña̱ ndísoi̱ saá íyoña; ta kǒo kúndeékai̱ xíʼinña.
15 Tá ndániʼindó ndaʼa̱ndó ña̱ ka̱ʼa̱nndó xíʼi̱n,
ndákasii̱ nu̱úi̱ nu̱úndó.
Ni ku̱a̱ʼání yichi̱ káʼa̱nndó xíʼi̱n;
va̱ása xíniso̱ʼi̱ ña̱ káʼa̱nndó saáchi ku̱a̱ʼánína xa̱ʼníndó.*
16 Kuchundó, ndasandiindó* miíndó;
kǒo kúni̱i̱ kotokai̱ ña̱ va̱ása va̱ʼa kéʼéndó;
sandákoondó keʼéndó ña̱ va̱ása va̱ʼa.
17 Sakúaʼandó keʼéndó ña̱ va̱ʼa ta saátu ña̱ nda̱kú,
taxindó consejo ndaʼa̱ na̱ sáxo̱ʼvi̱* inkana,
ndakiʼinndó tu̱ʼun na̱ kǒo yivá, ndakiʼinndó tu̱ʼun ná ni̱xi̱ʼi̱ yii̱”.
18 “Naʼandó ná natúʼunyó ta chindeétáʼi̱n xíʼinndó ña̱ ndakutáʼan viíyó”, káchi Jehová.
“Ni nda̱a̱ táki̱ʼva íyo color ña̱ kúáʼa ná koo ku̱a̱chindó,
nduyaaña nda̱a̱ táki̱ʼva íyo nieve;
ni ña̱ kúáʼa ná kooña, nda̱a̱ táki̱ʼva íyo tela ña̱ kúáʼa ña̱ yéʼe̱ní,
nduyaaña nda̱a̱ táki̱ʼva yaa ixí* ndikachi.
19 Tá chíkaa̱-inindó ña̱ kuniso̱ʼondó,
kuxundó ña̱ va̱ʼa ña̱ kana nu̱ú ñuʼú.
20 Soo tá va̱ása xíínndó kuniso̱ʼondó ta íxaso̱ʼondó,
kaʼnína ndóʼó xíʼin espada, saáchi mií Jehová kúú ta̱ ni̱ka̱ʼa̱nña”.
21 Kotondó, ñuu ña̱ nda̱kúní ni̱xi̱yo ini xíʼi̱n,
ndu̱uña nda̱a̱ táki̱ʼva íyo iin ñaʼá ñá kísi̱ xíʼin ku̱a̱ʼání ta̱a.
Nina ña̱ nda̱kú xi̱keʼé na̱ ñuu yóʼo;
ta kǒo nísandákoona keʼéna ña̱ va̱ʼa,
soo vitin nina na̱ xáʼníva kúú na̱ íyo.
22 Ku̱yaku̱a̱ plata ña̱ kúúmiíndó ta ti̱kui̱íva nda̱saka̱ xíʼin ndixindó.
23 Na̱ chíñu na̱ íyo ñuundó so̱ʼonína ta chíndeétáʼanna xíʼin na̱ kui̱ʼná.
Kútóonína kiʼinna xu̱ʼún ña̱ chindeétáʼanna xíʼin inkana
ta kútóonína ña̱ ná saníʼi̱na ña̱ʼa miína.
Va̱ása nda̱kú ndátiinna ku̱a̱chi xíʼin na̱ ni̱xi̱ʼi̱ yivá,
ta ni va̱ása xíínna ndatiinna ku̱a̱chi xíʼin ná kǒo yii̱.
24 Ña̱kán, Jehová ta̱ xáʼndachíñu nu̱ú na̱ ángel, ta̱ kúú Ndióxi̱ ta̱ nda̱a̱,
Ndióxi̱ na̱ ñuu Israel ta̱ íyoní ndee̱ káchira:
“Sandíʼi-xa̱ʼíi̱ na̱ íyo contra xíʼi̱n ta taxii̱ castigo ndaʼa̱ na̱ sáa̱-ini xíni yi̱ʼi̱.
25 Taxii̱ castigo ndaʼa̱ndó, tavái̱ ndiʼi ña̱ yaku̱a̱ ña̱ kúúmiíndó,
nda̱a̱ táki̱ʼva kéʼé na̱ yiví xíʼin plata tá sándutanaña ña̱ va̱ʼa ndasandiinaña,
saá ndasandii̱ ndóʼó.
26 Taxi tukui̱ ña̱ ná koo na̱ ndatiin ku̱a̱chi xíʼinndó,
taxii̱ ña̱ ná koo tuku na̱ taxi consejo ndaʼa̱ndó.
Tasaá ka̱ʼa̱nna xíʼinndó ña̱ kúúndó iin ñuu ña̱ nda̱kúní ndátiin ku̱a̱chi,
iin ñuu ña̱ nda̱kúní-ini.
27 Xa̱ʼa̱ ña̱ nda̱kúní-inii̱, sakǎkui̱ ñuu Sion,
xa̱ʼa̱ ña̱ nda̱kúní-inii̱ ndasatái̱ na̱ ñuundó ña̱ va̱ʼa ná ndandikóna.
28 Na̱ so̱ʼoní xíʼin na̱ kíʼvi ku̱a̱chi, inkáchi ndiʼi-xa̱ʼa̱na,
ta saátu na̱ sándakoo Jehová, ndiʼi-xa̱ʼa̱na.
29 Na̱kán kukaʼan nu̱úna xíʼin yitu̱n tú náʼnuní tú xi̱kutóondó,
ta ndóʼó kukaʼan nu̱úndó xíʼin jardín* ña̱ nda̱kaxinndó.
30 Saáchi xa̱a̱ndó koondó nda̱a̱ táki̱ʼva íyo iin yitu̱n tú káʼnuní
tú kóyo yu̱ku̱ ndaʼa̱ ta saátu koondó nda̱a̱ táki̱ʼva íyo iin jardín nu̱ú kǒo ti̱kui̱í íyo.
31 Ta̱a ta̱ ndakúní xa̱a̱ra nduura nda̱a̱ táki̱ʼva íyo ku̱ʼu̱ ña̱ yi̱chí,
ta chiñu ña̱ kéʼéra kooña nda̱a̱ táki̱ʼva íyo iin ñuʼu̱ loʼo;
koko* miíra ta saátu ña̱yóʼo,
ta nda̱a̱ ni iinna va̱ása kuchiñu ndaʼva ñuʼu̱ yóʼo”.