Isaías
47 Kúanuu ta koún nu̱ú yáká,*
yóʼó ñá loʼo kúa̱an ñá ñuu Babilonia.
Koo nu̱ú ñuʼú nu̱ú kǒo tayi̱ tú ndóo na̱ xáʼndachíñu,
yóʼó ñá loʼo se̱ʼe na̱ caldeo,
saáchi na̱ yiví va̱ása ndikóna ka̱ʼa̱nna xíʼún ña̱ yi̱i̱níún ta ma̱níníún.
2 Kiʼin iin molino ndaʼa̱* ta ndikoún harina.
Sáku̱taʼa ti̱ko̱to̱ ña̱ ndási nu̱ún.
Tavá si̱yoún, ná ndatu̱vi xa̱ʼa̱-si̱ʼún.
Ya̱ʼa ma̱ʼñú yu̱ta.
3 Kunina ña̱ cháláún.
Na̱ yiví kunina nda̱chun kúú ña̱ kúkaʼan nu̱ún.
Ndatii̱n ku̱a̱chi xíʼún, ta kǒo na̱ kasi nu̱úi̱ ña̱ keʼíi̱ña.
4 “Ta̱ ndásatá* miíyó kúú Ndióxi̱ ta̱ yi̱i̱
Ndióxi̱ na̱ ñuu Israel,
Jehová ta̱ xáʼndachíñu nu̱ú na̱ ángel kúú ki̱vi̱ra”.
5 Yóʼó ñá se̱ʼe na̱ caldeo,
ya̱a̱ koún, kúaki̱ʼvi nu̱ú naa;
va̱ása ka̱ʼa̱nkana xíʼún ña̱ kúún ñá xáʼndachíñu nu̱ú na̱ chíñu.
6 Ni̱sa̱a̱níi̱ xíʼin na̱ ñui̱.
Ta̱xii̱ ña̱ ná kǒo ixato̱ʼókaún na̱ ñui̱
ta nda̱taxii̱na ndaʼún.
Soo yóʼó, va̱ása níkundáʼvi-iniún kuniúnna.
Nda̱a̱ na̱ xa̱a̱ ku̱chée, ve̱ení sa̱káchíñúnna.
7 Ni̱ka̱ʼún ña̱yóʼo: “Yi̱ʼi̱ koo ñá kaʼndachíñu ndiʼi tiempo”.
Va̱ása níkandíxaún ña̱yóʼo;
va̱ása níndakanixi̱níún ndáaña kundoʼún.
8 Ta vitin, kuniso̱ʼo yóʼó ñá kútóoní keʼé ña̱ kúni̱ mií,
yóʼó ñá va̱ása yíʼvi, ñá ndákanixi̱ní ña̱yóʼo:
“Iinlá yi̱ʼi̱ kúú ñá ndáyáʼviní ta kǒoka inkana.
Va̱ása kuvi yiíi̱.
Va̱ása kunda̱a̱ví-inii̱ ndáa ki̱ʼva ndóʼo na̱ xíʼi̱ se̱ʼe”.
9 Soo iin kama kuití kundoʼún u̱vi̱ saá ña̱yóʼo, iin ki̱vi̱ kuití kuuña:
kuvi na̱ se̱ʼún ta kuvi yii̱ún.
Mií ña̱ ndixa kundoʼún ña̱yóʼo
xa̱ʼa̱ ña̱ ke̱ʼún ku̱a̱ʼání nu̱ú ña̱ tási ta saátu magia.
10 Ke̱ʼún ña̱ va̱ása va̱ʼa ta nda̱kanixi̱níún ña̱ kǒo ña̱ kundoʼún.
Ni̱ka̱ʼún ña̱yóʼo: “Kǒo na̱ xíto ña̱ kéʼíi̱”.
Ña̱ ndíchi ña̱ kúúmiíún xíʼin ña̱ xíni̱ún, ta̱váña yóʼó nu̱ú yichi̱ va̱ʼa,
ta ndákani-iniún ña̱yóʼo: “Iinlá yi̱ʼi̱ kúú ñá ndáyáʼviní ta kǒoka inkana”.
11 Kixi tu̱ndóʼo sa̱táún,
ta nda̱a̱ ni iin magia ña̱ kéʼún va̱ása kuchiñuña chindeétáʼanña xíʼún,
kixi tu̱ndóʼo nu̱ún; ta va̱ása kuchiñún kasiúnña.
Iin sana kixi tu̱ndóʼo nu̱ún, tu̱ndóʼo ña̱ ta̱ʼán kundoʼún.
12 Ña̱kán, keʼéka ña̱ tási ta saátu magia
ña̱ kéʼún nda̱a̱ tá loʼovíún.
Sana kivi chindeétáʼanña xíʼún;
sana sandákanda̱ún-ini* inka na̱ yiví xíʼinña.
13 Xa̱a̱ ku̱naavaún ña̱ ndáka̱tu̱ʼunníún na̱ táxi consejo.
Ná ndakunditana ta ná sakǎkuna yóʼó,
na̱ ndásakáʼnu ndiví, na̱ káʼvi xa̱ʼa̱ tí ki̱mi,
na̱ xíto yo̱o̱ xa̱á ña̱ va̱ʼa ka̱ʼa̱nna xa̱ʼa̱ ña̱ koo chí nu̱únínu
ta ka̱ʼa̱nna xa̱ʼa̱ ña̱ kundoʼún.
14 Koto. Na̱yóʼo íyona nda̱a̱ táki̱ʼva íyo yita* yi̱chí.
Kokona* xíʼin ñuʼu̱.
Va̱ása kivi ka̱kuna nu̱ú ñuʼu̱ yóʼo.
Su̱ví ña̱ ndasaa̱na xíʼin kúú ñuʼu̱ yóʼo
va̱ása koona ta ndasaa̱na nu̱ú xíxi̱ña.
15 Saá xa̱a̱ na̱ kéʼé ña̱ tási koona nu̱ún,
na̱ ka̱chíñuníún xíʼin nani tá loʼovíún.
Iin tá iinna ndakiʼinna ku̱ʼu̱nna.
Va̱ása koo nda̱a̱ ni iin na̱ kivi sakǎku yóʼó.